喺三星同蘋果一統天下形勢越嚟越明顯下,硬件市場,至少流動硬件市場越嚟越難玩。 Blackberry 宣布將硬件部門外判俾印尼公司, Blackberry 只專註於軟件應用,尤其喺Android作業系統為基礎嘅軟件應用,以及連八達通嘟卡機都有用佢嘅作業系統QNX。
硬件利潤低,風險大,唔玩係正常過正常。之前遊戲機製造商世嘉都係唔再開發硬件平臺,專註將超音鼠等經典遊戲移植到其他平臺,發現更好搵。 Blackberry 嘅企業級應用,其實同iOS以及Android配合,世界上大把手機公司同佢合作,攻打政府一類大企業市場。特別蘋果iOS同Samsung嘅機嘅作業系統,軟件層面都過曬美國軍方保安標準, Blackberry 喺硬件上越嚟越難競爭,咁變成純軟件公司係好合情合理。
Blackberry同世嘉都係唔玩硬件嘅經典例子,相信下一個唔玩硬件,至少會退出流動市場,應該係任天堂。
任天堂食住Pokemon風潮,將Mario移植到iOS,其實發出訊息好清楚,至少喺手提遊戲設備,任天堂同 Blackberry 同世嘉一樣,都係走純軟件路線。至於家庭機,睇Sony同微軟出乜條件,誘使任天堂放棄開發硬件。但可以肯定係,任天堂手上大把經典,全部移植到iOS都賺死佢,何苦咁辛苦做部Gameboy嚟做乜?
中環客