|
||||||
|
在馬場碰到惡佬 明，首先唔係講馬，而係講食物價錢，佢為人好心水清，問左丁山知唔知道紫荊廳啲套餐價錢唔聲唔聲又加咗價？坦白講，入到馬場，掛住刨馬睇馬，好少睇菜單價 錢，真係唔知噃。惡佬明話：「特首在立法會都話自己同啲高官好留意菜價、牛肉價、豬肉價格嘅啦，你要行吓街市至得o架！」行街市，女賓架L就話自己有去 呀，發覺買餸一日貴過一日，消費物價指數（CPI）反映唔到。CPI包含一籃子物價，唔係完全反映食物價錢嘅。惡佬明話佢到馬場之前，在沙田第一城買麵 飽，發覺三蚊以下冇法子買到一個麵飽，好多品種都係一加價就五毫，唔會兩毫兩毫咁加上去，兩毫子留番嚟搭電車可也。 通脹成風，亞洲國家政府 為之手忙腳亂，猛諗辦法，但美國就冇通脹噃，美國鍾意睇核心通脹（即扣除食物及能源價格），去年係零點八百分點，所以伯南克會繼續印銀紙，新貨幣供應猛咁 湧入新興國家如拉丁美洲及亞洲，令到新興國家為應付啲熱錢，大為煩惱，造成兩難之局。點解呀？傳統應付通脹方法係加息，但美國唔加息，新興國家加息嘅話， 就會吸收更多熱錢，令本國幣值升高，對出口不利，唔加息呢，遊資炒股炒樓炒得更狂，資金泡沫隨之而來。 鑑於通脹日高，中國、南韓、印度、印 尼、泰國自去年第四季起，陸續加息，幣值日升。南韓最近試驗一個新方法，就係加息之餘，向銀行非核心負債徵費（levy）。呢個意念來自著名南韓經濟學家 Hyun Song Shin（牛津博士、普林斯頓經濟學教授），佢在去年十一月二十二日發表一篇「政策備忘」，題為Macroprudential Policies Beyond BaselⅢ，文中指出按照巴塞爾Ⅲ嘅指引，單純地增加銀行嘅「吸收虧損（loss absorbency）」一味要求銀行增加資本及儲備，始終唔係方法，倒不如提供負誘因（Negative Incentive），阻止銀行信貸過度膨脹，辦法就係將銀行負債分核心負債（零售客戶存款）及非核心負債（例如同業拆借，對冲基金大額存款），向非核心 負債徵取若干個百分點，嚇阻銀行過度膨脹，呢招得唔得呢？南韓已開始試用，如果得嘅話，其他國家可能群起效尤。 |
||||||