ZKIZ Archives


刀眉689大殺四方

2016-07-28  NM

小宗八卦,側聞風水佬爆響口,話特首梁振英去珠海「紋眉」,令眉毛原本冇咁濃密嘅變成一對「刀眉」,以提升官運,大殺四方,風水佬為免呢位紋眉師搵特首堂眉做生招牌,拒絕透露紋眉師傅大名,不過,比較十年前梁振英堂眉,實在愈老愈濃密噃!

中環寸嘴:收埋份多士嚟賣!拋窒我呀?

工廈大王楊耀松長子,游走高級酒店、銀行,及知名食肆,與各路人士打交道,自認有jet set生活方式,透過美酒佳餚,察看人生百態,把「生平絕學」不吐不快與粉絲分享。

上次去新加坡試過間Les Amis法國餐廳,俾佢摘到兩星米芝蓮,計我話使乜去到新加坡,香港四季酒店啱啱換咗個廚,喺意大利都攞過兩粒星米芝蓮o架,都係踎喺四季coffee shop咋。我米芝蓮餐廳又去,大牌檔都踎唔少,無計,僆仔時老豆「風吹皇帝褲襠」(意謂:孤×寒)咁去磨練我。大牌檔啲嘢夠鑊氣,非筆墨所能形容嘅。呢,上個禮拜去灣仔德如茶餐廳吔早餐,吖,我明明記得有個檸檬多士好鬼正,條花佬炳(企枱)話六十幾年都冇,哈,我都俾佢拋窒,其實嗰款係黃梅醬多士,收埋個多士嚟賣呀!嗱,嗰日同個老友前後吔咗四份三文治,第一份飛咗邊真係唔夠飽,記得唔好飛邊呀,呢度啲麵包皮夠厚度,四條邊又夠平均,啲麵包皮食唔晒,攞返屋企整bread pudding又一餐啦。間鋪頭有個阿婆坐正中間,好似鷹眼咁一眼關七,一睇就知係個大牌檔揸弗人,佢都有兩手準備,將個大牌檔upgrade黐住間茶餐廳嚟做,他日佢百年歸老,個大牌檔牌照被收番,打響咗個朵,啲後人淨係做間茶餐廳都食幾代吖,又避開創業難,守業更難嘅宿命,呢個揸弗人有腦呀!

楊局長曾經滄海

創科局局長楊偉雄未落場先認輸,呼籲社會對科創失敗有「包容力」,講得出呢番說話,局長都曾經滄海o架。二千年科網股熱潮,局長喺外父翁祐間上市公司蜆殼電器打工做董事,舅仔翁國基做董事總經理,當時蜆殼電器轉型搞高科技;楊局長近年接受訪問都「揚」過一單半單戰績出來。話說九七年蜆殼投資一間光學通訊系統公司Kaifa,至九九年科網股高峰期以換股方式賣俾在美國Nasdaq上市的E-Tek,在科網股爆煲前蜆殼賣股套現四億三;不過局長只講前半部威水史,之後蜆殼再「疊」上去,投資三億到十多個科技項目,科網股爆煲後蜆殼最少要撇賬兩億,搞到○三年公司業績見紅蝕六千萬,貴為上市公司又點「包容」呢,及後楊偉雄離開外父間公司去咗數碼港做CEO,剩番舅仔翁國基繼續喺公司搞高科技,五年前隻殼仲賣埋俾國企,變咗中海宏洋(81) 。

太子鄧以和為貴

人稱「太子鄧」嘅太子珠寶老闆鄧鉅明,殺入元朗插旗開鋪,揀正大馬路轉角靚位,非常搶眼,目標顧客好清晰,梗係週末過境到元朗掃貨嘅自由行啦。太子鄧都好識做,入元朗搵食先拜土地,開張當日,封咗條馬路,班鄉紳一字排開,除咗十八鄉鄉事委員會主席梁福元,仲有廈村代表「田雞東」、錦田代表「狐狸」、屏山代表「高佬和」、八鄉代表「四眼民」,可謂濟濟一堂,呢間旗艦店三層高,頭三年月租六十萬,之後三年每月六十九萬,嗱,業主係監製電影《黑社會》嘅羅守耀,九叔個仔呀,咁係咪夠晒照先!

PermaLink: https://articles.zkiz.com/?id=208204

Next Page

ZKIZ Archives @ 2019