2010-12-15 AD
|
||||||
|
二○一○年國際 大賽果然非常好睇，當日馬場人潮洶湧，氣氛好熱鬧，丁財兩旺，一啲平時少見嘅朋友，呢日都在馬場出現。區議會主席C捉住左丁山話：「我今日照你貼士買。」 當堂為之一驚，自己寫貼士，湊吓興啫，累人輸錢，真唔好意思。四場賽事之中，估唔到為港爭光嘅，竟然係莎莎郭隻「締造美麗」，因大熱門「步步穩」臨時退 出，「締造美麗」跟住落飛，我哋追都追唔切，贏出之後，練馬師告東尼笑到見牙唔見眼，莎莎郭就似乎驚喜莫名，眼神露出唔多相信夢境成真咁樣，所以話行運起 上嚟，財神會自動入門，莎莎郭係咁意就收九百一十二萬頭馬獎金，雖則佢唔會旨在，都係一筆大橫財噃。 左丁山輸足九場之後，第十場睇見韋達騎 大熱門「川河勁駒」殺聲震天，十四號「人人興旺」着燈落飛，研究C又一早話佢今日只賭一隻「人人興旺」，諗住買單Q冇肉食，返唔到本，如何是好？突然間睇 到馬經花邊新聞話十號「何方神聖」身價一千萬元，馬主就係以買入貴價貨聞名嘅蕭氏父子，呢隻馬屬蕭公子名下，於是就買6、10、14互串，估唔到就咁搞 掂，三重彩派五千五百幾，就此來一個大翻身，執番身彩。 既有大賽，就有不少商界金融界人士到馬場，左丁山與一位高人傾咗一輪，問起證監會行 政總裁韋奕禮辭職，洋人立即向證監會第二號人物開火，股壇長毛首先開炮，郭家西報隨即有專文回應，極盡攻擊之能事，究竟有何玄機？呢位高人在看台同左丁山 咬耳仔講，據佢所知，政府已通知韋奕禮，明年九月任滿後不會續約，韋奕禮就來一個聰明公關騷，先發制人，自行見記者宣佈明年提前退休，執番啲面子先。又聽 講，佢見記者之前，曾要求各位證監高層一齊企在佢身後俾記者有個photo-op，但俾人阻止咗，否則佢嘅公關騷更加盛大。 韋奕禮離任，誰人繼任要全世界公開招聘，但以二號人物林張灼華（Alexa）之經驗與資歷，點都係一個強力候選人，來自英美澳紐與內地嘅應徵人士未必叻得過呢位女士。高人話，招聘還未開始，就有人要放風宣戰，相信未來戰況相當激烈。 |
||||||