|
||||||
|
三藩市老友K來港一行，跟住去台灣，目的係見吓金融投資界啲老友，睇吓最新中台港經濟狀況，佢在西岸做投資顧問近三十年，獨立行事，不屬於任何集團，咁多年來屹立不倒，仍然風騷，在人才輩出嘅美國西岸，可算異數，何況佢係華裔o忝。 呢 日叫做盡地主之誼，請佢到「占美廚房」吃午飯，佢居然仲記得「占美」有一款o架喱湯，於整個三藩市灣區搵唔到嘅，叫咗一客，飲到伸出大拇指，一味讚好，可 憐左丁山食嘅蘇格蘭安格斯牛仔肉就既韌且老，幾乎係切崩刀。閒談之中，佢講起中海油幾年前想買加州聯合石油（Union Oil of California），俾美國政府以國家安全理由阻撓，結果雪佛龍石油公司買咗，買入之後就將好多非核心資產分拆出售，其中一間小公司擁有位於內華達州 與加州邊境嘅一個小型礦場，以幾百萬美元沽之哉。老友K當時睇到段新聞，生奇怪之心，心諗Union Oil以前買入呢啲無關重要嘅資產，究竟為乜？研究之下，原來呢個礦場就係稀土礦場，而稀土市場就係中國壟斷嘅，於是買入呢間小公司嘅股票，每股十美元以 下，結果後來稀土新聞越嚟越多，去年開始，稀土資源股大漲特漲，呢隻股嘅股價升到四十蚊，老友記立即沽清。依家呢？老友K話：「仲未可以開採稀土呀！用咗 幾千萬美元推動，公司仲未攞到採礦許可證，喺美國好難過到環保呢一關嘅，睇落仲有排搞，不過股價繼續狂升，我賺少咗好多，不過算咯，稀土概念點知可以炒幾 耐？」
唔怪得老友K生活得咁安樂，久唔久就大賺一次，夠生活啦，呢啲叫做投資穩守突擊術，睇到正先至落重槌。佢素來生活樸 素，住在三藩市半山區一間細樓，可以望到金門灣橋，呢個海景好值錢，照計佢應該買唔起吖，但原來世界上有租金管制呢啲事情，三藩市只有一九七九年以後落成 嘅樓市先至冇租金管制，而老友K早在七○、七一年左右已到三藩市工作，用五百美元月租，租咗半山區一個細單位，之後就點都唔肯搬咯，根據「三藩市租金管 制」方法，過去十年，每年加租由0.6%至2.9%，計番過去四十年，老友K俾嘅租金，抵到爛喇，便宜到實在難以想像，唔怪得三藩市咁難搵屋，啲新進護 士、教師、專業人士等等個個話住唔起三藩市，但老友K等資深租客，都唔知幾咁印印腳！ |
||||||