五一勞動節試為打工仔之歌
五一勞動節，由來屬打工仔的節日，由此聯想起打工仔之歌，不覺又想起近十多年的流行曲中，似乎不彈此調久矣，每說到這打工仔之歌，相信大部份人都必會奉許冠傑創作於三十年前的“半斤八兩”一曲為經典之作，曲詞開宗明義一句便是耳熟能詳的“我地呢班打工仔”。當年填詞的黎彼得先生據說出自草根，所以與阿SAM合作的歌詞每每深得本地草根一族心態，專以廣東俚俗語入詞，相當啜核妙趣，可說寫來俗中有雅，而又無“廟街王子”尹光作品之過份鄙俗，分寸拿捏甚佳，絕對值得致敬欣賞。
今日適逢此節，一時手癢，姑且又來東施效顰，遂以“天涯孤客”為調，試為一首打工仔之歌，得詞：
戇戇居居，戇戇居居，戇戇居居，戇戇居居……
日日番工似霎戇，你話有乜希望？
為左生活餬口家庭，唯有繼續做。
何堪出糧還款供樓，仲未計稅項，
更要扣住，強積金“草”落臨老用，
點知不會長期蝕晒？點過世？係個問題。
最怕我老板抽秤突然惹禍，
講真吖，問平日有乜邊個不偷雞？
要做八個鐘也嫌長，工作沉悶，
每日放工似條龍，鬆晒槓，
啊啊……休息過後再開工，繼續捱！
（收工更仲要OT，冇命捱）
戇戇居居戇戇居居戇戇居居戇戇居居……
若問加薪咪發夢，佢仲要減福利，
勞工階層條頸楂住成世注定，
回想當年環境真好，業業嗌暢旺，
你有氣力，有工開怕你唔去做，
工資高更人情味厚，
生計有，仲有賺頭。
翳翳翳，個心好似直頭翳住，
悲今天，做成日也不可夠交屋租，
冷漠老板更是無情，睬你嫌戇，
夾硬對沖你份長糧，吹脹未？
啊啊……點解我未中三T，冇運行！
為什麼呢為什麼呢？戇戇居居戇戇居居……