|
||||||
|
講起最低工資時 薪，盛傳係每小時二十八元。問餐廳Ｒ：「你地請清潔女工，時薪有幾多？」餐廳Ｒ話：「唔知噃，只知係月薪係六千蚊多啲，但工作時間唔止八個鐘頭。」佢大概 交晒俾夥計管，時薪與工時一概只知大數，不知詳情。以時薪二十八元，每年有三百六十五日，減五十二個星期日，減十七日假期，工作日數，再減假期與病假（約 數），當一年工作二百八十五日，總薪酬會係六萬三千八百四十元，伸算月薪係五千三百二十元。餐廳Ｒ話俾六千零蚊一個月，但工作不止八小時，應該係俾緊最低 工資o架嘞。 食肆面對租金上升，食材價格飛漲與最低工資，要賺錢就要生意好好兼控制成本得宜。前排寫史丹頓街一間垃圾站旁餐廳嘅生意好到 極，有讀者來郵問：「是甚麼原因？」於是問吓餐飲Ｍ，原來佢又叫餐廳Ｒ上去睇吓，餐廳Ｒ覺得「好羨慕及妒忌！」據餐飲Ｍ講，呢間餐廳之午餐好平（以中環西 餐廳價錢計），set lunch賣一百零八元（加一杯咖啡就要一百二十八元），極合西人胃口，所以日日坐到滿，中午轉兩三次枱，呢度室內設計亦佳，甚有氣氛呢。行家都知，食材 約佔餐價三成，毛利有七成，但飲啤酒、紅酒之類嘅毛利就有八成以上，人客肯飲酒，飲汽水，餐廳經理就有好笑容咯。中環一般西餐廳嘅午餐係三百至四百元之 內，譬如歷山大廈間8 2 ，就收一客午餐三百三十元，日日訂唔到位，但一時半過後，就冇咗四五成人，置地廣場嘅Zuma同樣如此，不似史丹頓街嗰間，二時過後仍然冇乜空位。 做 餐廳，最緊要係可以轉枱快（睇吓鏞記地下在午飯時間嘅情形就知，對面嗰間翠華亦然），轉枱（table turns）越多，賺錢能力越高，故此較早前有大學生到「大家樂」分店搞「快閃抗議」，完全無用，快餐店求之不得o忝。假如啲大學生搵齊幾十人，坐在快餐 店內飲一杯六蚊咖啡，坐足三小時唔走嘅話，快餐店真係多得佢地唔少。 |
||||||