|
|||
繼美國股神畢菲特講番自己做過最老襯投資之後,CNBC「老襯系列」第2集前晚出街,輪到債王格羅斯同大家分享佢『火羅』!債王話,1975年某日,當時仲未發畢菲特同副手芒格搵佢,諗住借10球美金(7800萬港元)將巴郡發大搞;點知,佢見畢菲特間廠仔耷耷,賣衫賣糖又賣郵票,騎騎呢呢咁款,所以叫股神過主,結果,俾PIMCO母公司Pacific Mutual冷手執個熱煎堆。 嫌耷唔借錯失筍刁 咁一個禮拜後,沃爾瑪創辦人沃爾頓亦搵佢幫手,想借錢將業務發大搞,仲邀請佢去遊車河兼巡視業務,但沃爾頓沿途掛住同自己隻狗玩,加埋又樣衰衰,於是佢又送多個檸檬出去。 過冇耐,又有一間叫Itel公司借錢,呢間寫字樓豪到不得了,坐擁高層靚景,對正三藩市地標金門大橋,咁佢心諗今趟實冇走雞啦,就借500萬美金畀Itel,點知間公司竟然6個月後極速破產,佢5球即時灰飛煙滅! 債王話,錯過呢兩單超級筍刁兼要輸錢後,就告誡自己唔好睇門面,要注重內涵,不但將摩通創辦人摩根金句「借錢畀人唔係睇佢有幾多錢同幾多樓o架!」立為座右銘,更自己office掛起摩根幅相警醒自己。所以呢,後生仔戇居唔緊要,連戇幾鑊都冇問題,戇戇可能仲發呢! 李華華 |