ZKIZ Archives


張高麗女婿來自上水

2016-02-10

英文名叫Put嘅李聖潑,剛剛當選深圳市政協常委,除咗有信義玻璃(868)老闆李賢義呢位好老豆,仲有位充滿政治能量嘅外父——國務院副總理張高麗;外父是「習總政權」的得力幹將。九七年任深圳市委書記,其間曾侍奉習大大長居深圳嘅老父習仲勛。

今年只有三十九歲的李聖潑未娶老婆前,都係香港一介平民,細佬李聖根、細妹李雅培都係就讀上水東華三院甲寅年總理中學,幾兄妹同學校師生關係友好;母校有乜要幫忙,永冇托手踭。○九年李聖根在深圳擺酒迎娶中國網球名將晏紫,母校老師更北上出席婚宴,對其兄當上深圳市政協常委,校內師生更以他為榮,信義李氏兄弟成為學校嘅「生招牌」。

金融逍遙客:中國印銀紙多過美國

游走於中港台併購、私募投資的金融多棲動物,現為多間上市公司主要股東及董事

近日在雪茄吧吞雲吐霧,到處都聽到股民唉聲嘆氣哭股喪。港股自去年五月轉勢以來,愈跌愈有,剛踏入2016,指數在多年低位的19000點,都繼續屢創新低!看過去九個月十跌一升的走勢,以往美股與港股關連性極高,香港開市大家習慣睇住昨晚杜瓊斯做人,近年中港經濟變了唇齒相依,恒生指數成分股全都屬中資各類銀行保險股,港股相關性轉為以A股為主,股民睇住幾乎同步開市的A股嚟炒。近幾個月,呢個一向要睇人面色做人嘅港股孤兒仔,真係淒冷。美股升,佢冇得升,美股跌佢跟住跌。內地A股反彈佢又冇得彈,但A股有乜風吹草動佢又跟住跌,睇住手上一堆港股,即使都是價賤又高息的實力股,都毫無招架之力,跌到趴喺地下。缸中人的感覺真係既心寒兼無奈。輸錢唔緊要,眼見各個身經百戰資深戰友,好似捱到連信心都冇埋先至可怕。連一啲經歷過1997、2000、2008三次股災的前輩都話悲觀,喺咁淒涼市况下,信心比乜都重要。逍遙客同大家分享吓一啲實在數據:08年美國金融體系都危在旦夕,AIG雷曼爆煲、花旗命危、Morgan Stanley唔知第日開唔開門,政府都束手無策,情况惡劣過現在幾倍,當時港股市盈率都有8倍,市賬率0.9倍。依家雖然中國經濟放緩,人民幣貶值,大鱷虎視眈眈,但斷估都冇08年咁嚴重。但現時港股市盈率已跌穿8倍,市賬率0.7倍,國企指數股更跌至6倍。基金老友話,港股大平賣主要係鬼佬抽水,而玩開港股的大陸資金因後欄失火莫財,係一種典型流動性陷阱,與基本因素關係不大。「今次不一樣」,差不多是每次股災大部分人的口頭禪,這也是人性的反映。在充滿恐懼的時候,能有樂觀的態度畢竟是少數,但這也正是投資市場的特點,都是少數人賺了大多數人的錢。回頭看,一般投資者都徘徊在恐懼及貪婪呢兩個極端之間。逍遙客之見,喺呢個恐懼時代,正是出手時候,只要有holding power,睇住手中嘅貨,兩年後買車買樓不是幻想。

中環寸嘴:唔係乜春春,係立春!

工廈大王楊耀松長子,出入高級酒店、銀行,及知名食肆,與各路人士打交道,透過美酒佳餚,察看人生百態,讓讀者「嗒」落有味。

年廿六係立春,即係新嘅一年開始,唔係乜春春呀,一早去文武廟主持立春攝太歲拜吓神;呢日成個氣場都唔同晒,起碼個天都有番啲陽光,個股市衰咗五個禮拜,我上次同大家「些牙」張路紙,話二月四日個市就升,最緊要「應」吖嘛(註:二月四日早上恒指上升三百四十六點)。啲銀行佬打嚟,話過年後要有new funding,超,我窒佢,長假期前講乜都冇用,你叫我搬錢嚟我就搬呀?啲美國佬銀行好乸寸o架,老馮咁樣。梗係以為我早排睇淡個市執好多。年關難過,好多揸弗人話市道唔好,又要撐住個雞頭,返到屋企又要扮死狗,唔係過年食材加價三成,老婆有藉口要加家用!拜完神行落去茶餐廳醫肚,呢間乜春「香江冰室」好巴閉,茶餐廳都要訂位?怪唔之啦,呢度做$80任食,點多幾味冇蝕底,嘩,嗰碟土魷肉餅真係嚇死人,一磚腐乳咁大,係個蒜香油撈白飯幾惹味,三扒兩撥就埋單鬆人啦,落番去屬於我嘅地頭——舊文華Chinnery再擦過。

內地客一年買$300億保險

以往廣東道擠滿內地客買名牌,其實有多間保險公司駐紮寫字樓嘅港威大廈,都有蜂擁到來的內地客買保險,仲要大排長龍,保監處數據顯示,截至去年九月底,新做的內地客保單達$211億,據行內資深保險經紀爆響口,謂全年計一定超過三百億,事關人仔貶值,去年十一、十二月是內地客買保單高峰期,閒閒哋每張單過百萬甚至數百萬,佢哋鍾意用銀聯碌咭或者網上過數繳費;唔少新移民做保險經紀北上搵客,年薪達四、五百萬,不過保險公司已落柯打着經紀保持低調,恐防阿爺落閘防止內地客透過買保險「走資」!

愈富貴愈寂寞

大劉錢多係人都知,但錢多又唔一定有知心友,有時想搵人傾吓偈都幾難o架(女人例外),小宗聽聞大劉特意請個法國嘅司機飛來香港,就係想傾吓偈咋,計小宗話大劉想收風多啲。呢位越南華僑嘅司機,專門服侍五湖四海富貴人家,搵司機傾偈,收唔少風,你估富豪又唔八卦咩?不過呢位司機來港不一會已頂唔順返回法蘭西了,大劉轉數速度快,司機同佢傾偈攰過開車o架!

PermaLink: https://articles.zkiz.com/?id=185177

Next Page

ZKIZ Archives @ 2019