2016-01-07 NM
純官向恒大主席許家印賣大陸地產項目之餘，寧願揸住恒大永續債券長期收高息都唔換股，呢班富豪，做生意等同鋤D，要贏錢又贏牙骹；純官呢招都係仿效彤叔同大劉交手嘅功架。
彤叔同大劉八十年代已孖住「哈乎」、「哈乎」以「Real Reward」間公司投資Sogo百貨，做到○四年以利福（1212）上市，依然不分你我以Real Reward持有利福股份，再殺上大陸做「久光」百貨齊齊搵食，當時梗係攬頭攬頸；直至兩年前大劉喺澳門惹官非，鄭家立即劃清界線，先把周大福在Real Reward持有的6.97%股份拆出來，以每股$16.39拋售，前年再以每股$14.75把餘下16%賣番俾劉氏，套現六十三億；利福呢一役，獲得 「Real Reward」正是彤叔，試問除彤叔外，邊個有「本事」要劉氏兄弟「啃」番啲股票呢？
所以話，純官揸住恒大嘅債券，雖然高息，一旦手持債券有乜差池，到時要睇純官有冇「彤叔」魅力，「大」到許家印而有Real Reward啦。
金融逍遙客：「上海仔」不堪設想
游走於中港台併購、私募投資的金融多棲動物，現為多間上市公司主要股東及董事
財經市場悶氣沉沉，反而上海仔一浪接一浪的新聞，卻成為本週矚目話題。從輩分、髮型、以至一身英姿颯颯打扮，周旋於富豪間，出入非富則貴圈子，生意更觸及 有機會撈到「粗嘢」嘅賭業。姑勿論真正實力如何，環顧中港台江湖人物，論形象鮮明和牌面氣勢，即使是四大家族龍頭也無人能及。相信不論是傳統古惑仔抑或新 進南亞兵團，都會奉上海仔為一個icon，是千千萬萬有志撈嘢兄弟嘅偶像。唔知有乜過節，最近一間主流傳媒窮追猛打，幾乎日日將呢個大佬級人馬的過去是非 一一曝光。時而洗黑錢時而勒索富豪，我們一眾讀者似追看江湖連續劇，內容真是日日新鮮，都期待真正高潮的來臨。傳媒的一支筆，指住一個身經百戰的江湖大 佬，猶如秀才遇着兵，但不知所措的卻是呢個兵！逍遙客所見，在各行各業有所成就之士，冇一個係全能。各自在所屬領域即使呼風喚雨，轉換另一個角色已變「鵪 鶉」。出入IFC、名牌大學出身又喺華爾街碌過，甚至可搞到百億企業破產嘅金融精英，一落旺角俾古惑仔盤幾句都會腳軟。同樣由細跟住秀茂坪十三太保周街 劈，入赤柱多過拜年嘅大佬輩，一見到封律師信都不知所措。此現象是一個common sense，人的潛能發揮僅建基於本身的經驗累積，俗語所講嘅隔行如隔山，若逍遙客是上海仔，點可能會用開記者會嘅方式去表達自己意見呢？更何況今時今 日，誰才是宇宙最惡最有實力的堂口；北望神州，如果連呢個道理都唔識尊重嘅，咁後果真係會不堪設想。
中環寸嘴：幾多錢？去食咪知囉！
楊國佳
工廈大王楊耀松長子，是各大有名食肆之VIP，喜歡研究城中有錢佬對食之要求，透過美酒佳餚，察看人生百態，讓讀者「嗒」落有味。
嘩，上個禮拜收電話收到手軟，啲老友猛問喺「好酒好蔡」即係食咗幾多錢啫？唓，我窒鬼啲友，成日問幾多錢，唔好咁working class啦！想知咪自己訂位去食囉，想同我對到嘴又唔肯去食，點有交流啫。近排可能冇乜新食肆開張，周圍都寫呢間「好酒好蔡」，鋪天蓋地，蘇施黃仲話， 當日要請阿蔡師傅由廣州來香港煮一餐飯你食，要十多萬；嘩呢個價其實都有其他alternatives啫，例如近排先有個friend嘍我，夾份包個意大 利廚師嚟香港一個禮拜，帶埋啲香草、食材煮正宗意大利菜，每人三日，俾一日佢休息，我都冇落疊；又或者慈善拍賣一餐嚟食，前年法國商會annual dinner，我就拍咗個米芝蓮三星廚嘅一餐，包埋機票、酒店去佢巴黎間餐廳喫一餐，不過你家陣問我，記唔記得嗰餐食過乜，味道如何，我又答唔到，事關嗰 次同屋企人去，佢哋瘋狂shopping大出血，搞到荷包都七上八落，都唔記得咁多！放假同老婆去半島酒店食lunch，順便買份新年禮物贈佳人，喺北美 洲同歐洲啲女人話Hermès手袋被人用到「濁」晒，而家興法國老字號Goyard包，喺半島間鋪得兩個sales，為求一對一，如果 多過兩個party去買，就要落閘喎！個個手袋人手造，吓吓要等四至九個月，趁啲人未識入定貨。嘩，真係誇張。
表面門當戶對
賭王三太千金何超蓮與霍英東孫霍啟山傳拍拖，牌面睇兩位都門當戶對o架，但係連三太都透過助手出聲否認；睇番家族棵樹，霍啟山為霍震霆次子，霍家嘅財政大 權係落入其二叔霍震寰手上；家族成員每月有固定「收入」，儼如「打工仔」，相對於三太陳婉珍個family office——UNIR，包羅中港澳及海外物業、賭場、直升機、古董一籃子生意，超蓮更直接到位去打理家族生意，係咪門當戶對，真係要睇得深入啲。
塑膠廠佬贏3億輸15億
人仔貶值，一班廠佬買落人仔accumulator（人民幣掛鈎外匯累計期權）輸到要登報紙叫救命，聽班廠佬講，輸得最甘係個「塑膠佬」，損手¥15億； 點解咁傷，梗係嘗過甜頭。話說呢位塑膠廠佬去買大批塑膠料，喺銀行唔單只有O.D. Line（透支額），有訂單自然開到L.C.（Letter of credit）信用狀，啲貨到手個廠佬就以平幾個巴仙「拆」貨俾行家，收到現金返來，一係做人民幣定期，或者買accumulator，就係咁，銀行見佢 貨如輪轉，L.C.不斷，雙方都有生意做，梗係皆大歡喜。人仔升值，塑膠廠佬把accumulator接番來嘅人仔拋出街或者做定期收息，個個月都有成三 球進賬；過去十年粗略估計賺三億多，但最終要輸十五億，冇計，Accumulator謔稱為「I kill you later」；金融海嘯期間，千億富豪都輸到入「廠」休養，攤分咗幾年先還清啲債；呢班廠佬同金管局投訴，攞命陳都未必幫到，只可以講前車可鑑！
插圖：祝健中