📖 ZKIZ Archives

供股狂熱 老狐狸

在上一篇「狐貍太太的渣打情意結」後，大家或會知道老狐貍對呢次渣打集團的供股是正面的，相信對其資本補充和其未來發展有重新上路的作用，故小弟也在除權前次分段買入，把部份家族基金投入供股，雖然執筆日(11月18日)傳出其印度貨款恐會違約，但老狐貍仍然相信其放款準則，暫時供股決定仍然未改變。

作為一個會在公開平臺發文章、唔知死的作者，老狐貍一直都好擔心有些讀者見到小弟的個人投資，就會模倣建立一個私人投資，故愈寫愈膽小，不敢下下去到咁盡去分享自己的投資方向，不是怕累人家輸了會被人用麻包袋蒙頭揼一身，而係怕一個不慎言令大家輸了多年積蓄過意不去。

其實近期老狐貍亦膽粗粗的打算用幾萬蚊去參與另一隻公佈供股 (公開發售)的股份，由於呢隻股份連一位股壇名人都唔夠佢玩，加上佢已經係本週一除權，故選擇在今天才去寫番自己參與呢隻供股的考慮因素。

隆成集團 1225.HK

呢間公司過去為一間生產兒童用品的公司，過去曾為基金愛股，股壇長毛都曾持有8.01%去到要披露的水平，及至最近該公司公佈以一供三、並大折讓的以每股份$0.15公開發售，引致大胃哥激到生蝦咁跳，令小弟好有興趣睇一睇佢既資料。

此公司係呢一兩年動作多多，大家睇睇先：

1. 2014年6月，集團出售其主業的嬰兒用品業務，並指會集中塑膠玩具和醫療業務
2. 2014年11月出售光纖業務予另一上市公司聖馬丁國際
3. 2015年初向中國投融資(1226.HK)收購廣州物業，並以現金和每股0.5元的新股支付
4. 2015年5月再以每股0.275元發新股予中國投融資，令其佔發行股份的12.44%
5. 2015年5月再以向中國汽車內飾 (48.HK)收購服飾業務，作價4500萬元，以每股0.6元發新股支付
6. 2015年5月以逾8,000萬元收購遼寧物業作發展綜老中心
7. 2015年10 月宣佈1供3 (公開發售方式)，每股$0.15集資用作發展證券及相關業務 (貝格隆證券)

對此，大胃哥非常勞氣，並曾向有關當局反映其對小股東不公，指出其過去的多番交易有問題，並公開呼籲股東投反對票去阻止是次大型集資行動，但事實就係，係特別股東大會時卻被通過了。

先睇一睇呢間公司的財務狀況。

以2014年年結的報表顯示，其總負債為4.39億元，而單就該公司的現金及銀行結存已達9.57億元，就算其後來投資綜老中心和貝格隆證券，相信其應有足夠的資金去應付。

那為什麼要供股集資？老狐貍估計黃姓股東應已功成身退，已買回其創立的嬰兒用品業務，亦在派特別股息時收回了，而老狐貍相信是次為一次供乾行動，目標顯而易見：就係令原大股東和大胃兄持股淡化，所以令到大胃兄佢生蝦咁跳。

其實睇一睇佢個供股結構，此公司有好大誘因係令到一眾人仕唔去供的，而包銷商就會輕易被取得75%的壓倒性股權。

可能大家覺得呢個世界好似咁唔公平，但係金融市場本身就係殘酷的，所以一隻專吃肉碎的老狐貍，就係呢D時間出手了。

以執筆當日其市值只為6億半，就當其未投資證券業務計，其凈現金已逾5億多元 ，還要加上其早前購入的物業和上市地位，可以話係抵買。此外，小弟見到貝格隆都好似幾多野搞下，直覺可能係Big tea rice。

大家可能又會好好奇咁問，老狐貍的平均價是多少？

老狐貍就係係除權前以約$0.176購入的，故以執筆時的$0.169計，由於為公開發售，股權不能賣出，即唔供就輸幾格，供就要拎多3倍錢出黎玩下咯，又唔使心急既，慢慢睇下都唔遲，反正我買呢個價都係大割引了。

至於買了多少？

由於大胃兄都唔夠佢玩，始終風險都大，所以哈哈哈，只係幾萬蚊貨仔，講出黎都俾人笑，貫徹小弟細細註大大聲的作風。

點解唔炒一大價股既？

近期市況始終睇唔清，歐洲中國日本量寬，美國又講加息，呢D都算小事，近期老狐貍最擔心既唔係通漲降臨，而係通縮情況，到時就真係幾叻都無用，因為Cash is King，慬慎一點好。

(本文章只屬分享個人投資考慮，不涉及投資建議或遊說，投資涉及風險，請小心考慮，請向閣下的持牌經紀查詢)

(老狐貍持有少量股份)

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍