ZKIZ Archives


中介app的進退困局


2015-09-03  NM

他叫吳宇森(Sam),和大導演同名同姓。

留學澳洲,畢業後在當地打工寫app,去年回港創業。

如果app store是一間戲院,他自導自演的那套戲叫做「家務幫」,今年四月正式「上畫」。

公司如今零收入,每個月燒掉二十萬,仍吸引新加坡投資者叩門,投資一百萬新加坡元(約五百五十萬港元),發展海外市場。有捧場客是否代表成功?

今次擂台請來兩位專業評審,包括開發全球首個語音訊息傳送app的Green Tomato行政總裁郭秉鑫(Sunny),以及香港資訊科技商會榮譽會長方保僑(Francis)。

前者狠批兩位Startup老闆無遠見,到底點解?我點sell

香港人生活忙碌,我們一開始就打算開發網上綜合配對平台。去年,我和拍檔李耀基(Raymond)投資十多萬元,成立Devco Technology。先做網上問卷,發現家務助理需求甚大,於是決定開發「家務幫」。同call的士、客貨車一樣,僱主透過這個app,可找到家務助理到家中幫忙。除了一般家務,還有託兒及陪月服務。這個app和傳統中介最大分別是,僱主只要發出工作請求,系統就會即時作出配對,成功後會看到助理的相片、認證、以往僱主的回應等。最快十分鐘,就會有家務助理上門,不需要簽任何文件。

系統除了配對工作,更會自動按僱主挑選的工作類別來計算價錢,如九龍區一般打掃收八十元(每小時),有額外工作,如跨區買菜,就再收十至二十元。明碼實價,免卻爭拗。最後,個app有評分服務,僱主同家務助理都可以為對方評分。

現時,「家務幫」有約八千次的下載量,每日平均成功配對二十多個新工作。最近,有新加坡商人對Devco有興趣,公司決定進軍當地市場。

專家有問

方:方保僑郭:郭秉鑫家:家務幫方:個app依家唔抽佣,將來會點收費?好多app一收錢就好難做落去。家:依家係僱主以現金俾錢,但我哋下一個update版就會有收費模式,僱主須先在網上過數俾我哋,我哋抽佣後,再找數俾家務助理。其實已經有好多人問點解唔使抽佣,所以相信要收費應該唔難。方:依家面對嘅最大問題係乜?家:現時成功配對率只有五成左右。程式每次會安排四位助理俾僱主去揀,但有時啲客嫌太少,又或者短時間內無人接job就唔再登入。呢種情況就要做offline work,好似打電話俾僱主跟進,人手無得慳。郭:唔少香港人介意俾陌生人去屋企,點解決呢一方面嘅問題?家:好多客都反映過呢個問題。我哋每一個家務助理都親自見過,登記身份證、住址及有關文憑,仲同佢哋影埋相放上網。市面上好多中介都無親自見過佢哋,我哋做多一步就可以俾到信心僱主。方:如果僱主與家務助理發生糾紛,如唔小心打爛嘢,點解決?

家:我哋只係一個資訊平台,同啲助理都無僱傭關係,但會確保僱主請人之前有買家居保險,如果無會幫手跟進。

郭:你哋兩個最唔滿意對方乜嘢?

家:合作咗咁耐就無試過有好大嘅argument。Sam主力對外,曾收到feedback,主要是上年紀嘅姐姐,話唔識㩒,又驚㩒錯,希望個app可做得更好,但Raymond就覺得無咩空間可以再改,呢方面爭執最多。

郭:你哋打算進入新加坡市場,有無諗過太快?香港仲係剛起步,人手夠唔夠?我見唔到新加坡市場嘅吸引之處,純粹係因為嗰邊有人投資?

家:部分原因係。對方覺得個idea好適合新加坡,我哋都研究過,新加坡市場同香港都幾似,而且有識做app嘅朋友喺嗰度,所以嗰邊嘅發展係可行。

方:你哋嘅平台唔似eBay咁賣嘢,但back office嘅投放都幾大,又要聽電話又要揀人,香港都未站穩陣腳,資源好快會被攤薄。

郭:你覺得一百萬坡紙夠公司run幾耐?

家:兩邊市場各十八個月左右。

郭:你哋都知GoGoVan hit咗之後有幾多公司抄佢哋,你喺香港都仲未普及,市場上做開嘅公司整一個類似嘅app,你哋都可以bye bye啦。我覺得起碼要喺香港capture一個download數量或者係market share,先好諗其他市場。一百萬坡紙絕對唔足夠兩邊run咁耐。

家:其實我哋又無打算做到GoGoVan咁大,依家個量未必係最重要……

郭:如果量唔係最重要,點解唔一開始就收錢?

家:我哋啱啱進入呢個市場,唔收錢可以聽到多啲唔同方面嘅意見。

專家判決

郭:我俾六分,合格之上。呢個concept唔係新嘢,講得衰啲只係惠康百佳出面塊告示板。好壞取決於點執行,我問過佢哋有無試過打大交,好彩無,因為做Startup,idea周街都有,最大問題係teamwork,好肯定第日紛爭會愈嚟愈多。我覺得成個strategic係有啲弱,例如講到可以做到兩邊市場,你熟唔熟先?人哋一打落嚟就好易玩完,呢度係扣分位。依家七至八千嘅下載量係好少,唔太多人識。其實可以同現有嘅家務中介公司合作,用人哋嘅database去做自己嘅嘢,好似之前Uber都會搵的士司機,唔使一開始就要同現有嘅公司打,反而搵啲low-tech公司合作,咪可以食咗佢嘅生意。方:我俾七至八分。市場上好少呢類型嘅網上平台,用開又唔會只用一次,如果守得好,有得做。但收費後,就要諗吓點留客,點樣做得平過市面嘅收費,又賺到錢。依家要爭取更多曝光率,好似網上banner,或去論壇,睇吓有無人請家務助理。

用家品評

家務助理May姐:「我入行半年,喺僱員再培訓局讀陪月員課程時認識家務幫,登記成為『幫手』。呢度唔使簽任何合約,方便我喺唔同平台搵工,而且定好晒價錢,好方便,出面有啲agent出到去先改價錢,講到牙血都出埋就無謂。依家嘅僱主都係放定啲錢喺屋企,做完就拎錢走,如果以後要經agent或上網,遲咗先拎到錢,我就搵過第二間啦。」

撰文:梁延宇攝影:鄭樹清攝錄:廖健昌[email protected]


PermaLink: https://articles.zkiz.com/?id=158946

Next Page

ZKIZ Archives @ 2019