美股連續第四日小幅 上揚，但走勢越見牛皮。杜指受上日美鋁公布唔理想業績影響，開市先跌，後來回穩，尾市仍能企於11000點上方， 微升0.1%至11019點；標普500指數就原地踏步，微升不足1點至1198點。英特爾(Intel)將發盈喜，推動科技股走高。納指相對表現最好， 不過都係漲了0.3%，收2466點。杜指期貨指數最新報10983點，與現貨低水36點。
港股美國預托證券亦 無乜大變動，ADR港比指數收報22107點，比香港收高4點。匯控報82.85元，比香港收市高0.2%，中移 動就差啲，收報79.14元，比香港收市低0.4%。
喺歐盟及IMF同意在必要時向希臘提供450億歐元的援助之後，希臘繼續出售國債的計畫，是否成功，成為全球投資者的焦點。昨日，希臘 拍賣的 7.8億歐元六個月期國債和7.8億歐元一年期國債，分別獲得逾7.7倍及6.5倍超額認購，遠好過三個月前的4.9倍及3倍。市場對此反應強烈。希臘兩 年期債券孳息率昨日下降了45點子至6.03厘。
東方匯理固定收益策略 主管基柏爾表示，希臘發債過程順利，反映歐盟的援助計畫已經挽回了投資者的信心，希臘也因此獲得了喘息的空間。有分析人士表示，歐盟與IMF援助機制的出爐，意味著未來12個月內希臘違約的風險已轉為零，也為希臘的國家主權安全與歐元區的金融穩定提供了保障。
不過，太平洋投資管理公司(PIMCO) 的CEO埃裡安卻表示，該公司不會參與近期的希臘國債拍賣。他認為，援助方案的條款無法讓希臘應對長期的財政和償債問題。有分析人士指，PIMCO的決定 也可能影響希臘政府隨後在美國的國債發行計畫。評級機構穆迪也表示，歐盟旨在幫助希臘解決其債務危機的救助協議，並沒有削減希臘評級再遭降級的可能性。
大炒家索羅斯對「希 臘援助計劃」亦唔係咁樂觀，佢昨日喺倫敦時話，援助計劃的貸款成本太高，希臘仍然面對一個「死亡螺旋」（death spiral）。「雖然歐盟給出的條款好過市場，但成本仍然好高。這將直接影響到希臘的償還能力。歐盟以官方優惠利率貸款予希臘，希望幫助希臘達成預期目 標。但一旦唔成功的話，希臘經濟將進一步收縮，到時稅收減少，經濟就越會差，將形成一個死亡螺旋。這個危險性是仍然存在的。」佢又話歐元區領袖同意援助希 臘的原因主要考慮係希臘一旦離開歐元體系，將導致歐元分裂。而歐元分裂最終會令歐盟解體。
在希臘國債獲得超額 認購的鼓舞下，歐元兌美元匯率在昨日的歐洲匯市盤中一度上升至1.3621，但隨後迅速回落，反映出市場對希臘債 務危機揮之不去的擔憂。有分析人士表示，儘管國債拍賣進展順利，但歐元兌美元匯率並沒有立即出現大幅反彈，顯示投資者對希臘債務前景的長期憂慮。
再講營運人生的話 題，網友Stockinvest留言，話做工無乜味，想做專業或半專業投資者，多年來生活節儉，消費不多，多年來 累積了580萬積蓄，故萌生去意，有啲十五十六。
有網友可能覺得Stockinvest哂命，有580萬，一年5%回報(買隻房地產基金就一定高過呢個回報)，每年收入28萬，每月 24000元，Stockinvest話自己每月只使5000元，唔做都不知幾happy啦。
我又覺得Stockinvest係面對一個真實的煩惱，我估佢30幾歲，人到中年，過往過開的生活開始覺得千篇一律，好多人包二奶都 係呢個年紀開始，當然轉工開展人生另一頁，都係尋求刺激人生的做法，唔好覺得佢自尋煩惱，佢係搵緊一份新職業，唔係想咁快退休唔做嘢嘆世界，佢只係諗緊做 全職投資者係唔係一條出路。
我首先想恭喜Stockinvest，有500幾萬資產，合理的回報已遠超自己生活所需，這就是財務自由的第一步，即係唔使再為生活擔 心，怕一朝唔掂，跌落地獄。Stockinvest累積這580萬主要靠儲蓄，唔係靠投資，正如佢自己所講，佢係月搵30000元，只花5000元的人， 只靠儲蓄已儲埋好多，呢個故事告訴大家，儲蓄係財務自由的第一步。
我覺得以Stockinvest的生活所需，佢攞住580萬而家退休都得，最大問題反而唔係未來投資係唔係有高回報，而係點可以盡量 唔輸錢，因為若輸起上來，580萬唔見一半得番290萬，個故仔又唔同哂，所以開始有啲錢就唔使咁博，因為博起上來，資產可升可跌也。
做全職投資，不一定 會比兼職好，好多人全職投資炒得好多出入好多，到期來回報更低，小心。做全職投資有一萬條路可以行，我睇到兩條路，都係跟人行的路，第一條路係跟人炒，細 心研究股份炒作的軌跡，跟佢走兩三個站，走呢條路，要好聰明，睇穿各種假局，又要同好有自制，跟住個假局行一段忍得住落車，唔係咁多人做得到，但我都見極 少量成功人士。
第二條路係跟人營運公司，香港過千間上市公司，好多只係齋炒，但亦有不是正正經經做生意，你 要搵出正經做生意的公司，從中揀出行業前景唔錯的公司，再從中揀出懂得營運的管理層，再代入佢的思路，睇吓佢點營運、做大間公司，你就會搵到出入市位，買 股要較穩陣地倍升都唔係咁難(關鍵在「較穩陣」呢三個字，因為好多仙股一係唔郁，一郁好多倍，但係唔穩陣，買佢可 能輸清)。想搵到呢啲公司，要花時間做功課，睇行業新聞，睇公司新聞，睇公司通告，年報，自己劃得出公司的業績全圖，甚至開始估吓佢明年賺幾多，少說要投 入的時間都是以月計，最重要是代入公司管理層的角度，睇吓佢想做乜，點樣做，做唔做得成功。股市是集資之地，中國是高度發展的市場，有不少公司有營商之 道，上市集資後在內地愈來愈大，問題係你搵唔搵到呢啲公司。
但做呢種功課，唔一 定要全職做，你可以兼職做吓先，然後做實驗，睇吓得唔多，若果得仲要知係大市得定係自己得，真係得才轉全職，因為辭工有機會成本，你一日花多8小時，可能可以搵多三兩隻股票，但佢地起碼要幫你一年賺多36萬(等於你份人工)，才值得全職去做。
關鍵唔係全職，而係 你是否掌握那一種技巧，技巧得，投入愈多時間，回報愈高，技巧唔得，炒得多，輸得多。或者網友有更好的全職炒作技巧，可以提供。
陸羽仁