美股昨日都幾驚嚇，繼標準普爾警告或會調降希臘的長期信貸評級之後，穆迪又話有可能調降希臘主權債務評級，重燃投資者對歐洲債務危機的憂慮，而美國申領失業救濟人數不跌反升，又令投資者擔心美國經濟復甦前景，在雙重打擊下，杜指開市即插逾160點，最低大跌近190點才喘定，之後跌幅續步收窄，尾市收復大部份失地。
杜指收市報10321 點，跌53點或0.5%；標普500指跌2點或0.2%，收報1103點；納指收報2234點，跌2點或0.1%；羅素2000種小型股無起跌。杜指期貨 最新報10309點，比現貨低水12點。VIX或「恐慌指數」微跌0.8%至20.1。美股顯示一定的支持力，標普500指數彈到差唔多無跌，而杜指都從 低位彈咗接近140點，顯示跌市時有相當買家入市吸，托番高個市。
港股美國預托證券大致持平，ADR港比指數收報20391點，比香港收市微跌9點。匯控收報85.23元，比香港收市低0.1%；中移動收報76.35元，比香港收市低0.1%。
最大的壞消息是美國勞工部在開市前宣佈的就業數字，上週美國首次申請失業救濟人數增加2.2 萬人至49.6萬人，遠高高市場預期的下降1.3萬人下至46萬人。過去兩週，美國首次申請失業救濟人數增加了12%，人數正逼近50萬人關口。另外，截 至2月13日一周持續領取失業救濟人數增加了6000人至462萬人；持續領取失業救濟的四週移動平均人數亦較前一周增加4250人至460萬人。
由於部分州失業人數持續高企，新增就業機會十分缺乏，聯邦政府已向這些州的失業人員提供了更多的現金救濟。但許多人的救濟期限也已到期，國會很可能決定再次延期。
Miller Tabak首席經濟學家Dan Greenhaus表示，暴風雪以及其它事件使近幾週申請救濟人數數據可能失真，但就業市場明顯地依然未走出低迷，因為其它指標也顯示就業人數並沒有快速增加。
不過經濟數據唔係一面倒向淡，商務部稱，美國1月耐用品訂單環比增長了3%至1757億美元，高過市場預期的1.9%增長，為去年7月份以來最大增幅。不過，資料顯示訂單增長主要來自民用飛機訂單，期間增長了126%。除飛機外，大多數行業需求在1月份都出現下降。
外 圍方面，希臘債務危機似有升溫跡象。標準普爾週三警告可能在一個月內將其評級調降至“垃圾”級別。一日之後，另一評級機構穆迪又話，除非希臘政府能實現削 減財政赤字計劃目標，否則該機構可能在數月內調降該國的主權債務評級。希臘評級問題令投資者拋售歐元並買入政府債券。穆迪全球主權風險部董事總經理Pierre Cailleteau在東京接受採訪時說：「如果未來幾個月希臘的財政穩定計劃出現較大偏差，我們將很可能對其評級做出相應調整。」他說，下調的幅度可能是「幾個等級」。若希臘遵循其財政緊縮措施，穆迪可能維持對希臘的「A2」評級。
早兩日在網誌講起唔輸可以做千萬富翁，惹起網友一些回應，網友大笨袋鼠咁講: 「利用複利滾存來儲蓄致富，越是早期儲蓄嘅錢，所發揮的複式威力就越大。但這樣一來，就要和另一個講法有一點衝突；好多時話，要搏趁後生搏，跌低咗都仲有 大把青春時間企得起身。當然，搏得到，早期用作複利滾存嘅資金當然多了，但搏唔到，那就損失了早期可用資金之複式威力。」
「照計做後生出嚟搏，在無人脈、無經驗背景下，其實成功機率甚低，好多時只係可以話賺咗經驗。而且成功的話，大慨亦不甘心轉型為守護財產，而繼續追尋搏嘅刺激。上年睇袋鼠財經報，潮牌Billabong創辦人，30歲鬆啲就賣斷股權，剩現金資產一億袋鼠幣，這個數字對大多數人夠了吧？但佢唔熟地頭在大陸開連鎖超級市場，跟住幾年輸X曬，上年在墨爾培法庭申請破產。」
「當 然俾佢過埋呢關，可能又再身家升一百倍…現在那些超級富豪，正門或橫門，多多少少搏幾次，但幾多先至夠呢？呢啲成功人士，有幾多嘢係我哋可以學習呢？（提 示，有一部份成功人士要訣，係成功之後先至用得上… 另一些可以用得上的，我估只要係屬於良師益友嘅平凡人都噏得出）。」
大 笨袋鼠講到創業問題，呢個類別屬「高級程度」，唔係咁易成功，後生仔無打工經驗，創業更難，所以我地都係先從投資講起，唔好講創業住。大笨袋鼠講到的「要 搏趁後生搏，跌低咗都仲有大把青春時間企得起身」，亦係好多人講買股時提到的說法，呢個說法的道理係咁，你剛出來打工，儲到1、 2萬元，若叫你投資，股神巴菲特一年都係10、20%回報，1萬元只賺2000元，頗有賺埋唔夠食幾餐好嘢的感覺。但你攞1、2萬去博，去投機，博中1萬 變10萬，到時先至投資都未遲，輸哂1萬亦可以再搵過。相比之下，到40歲時，有100萬身家，輸哂好大鑊，要儲20年先至搵得番。
呢個講法唔係唔啱，但係要明白，博開好難收手，慣咗投機，即使唔叫你收手，叫你分一半投資一半投機，你都唔願意，覺得投機太慢，唔過癮。問題是不少投機投到99，唔係20歲投機，到30、40歲就投資，而係一路投機下去，你一路投機都贏錢唔緊要，但有啲人一路投機都輸大錢，但佢偏要每次都賭盡每一毫子，睇到佢咁只能寫個服字。
大陸就快有股指期貨，即係我地香港的期指，睇電視見記者在上海訪問一個阿叔，佢話佢想玩股指期貨，喜歡佢快上快落，買股票賺錢太慢啦，佢話自己做模擬股指期貨交易，用一百萬賺咗成一千萬，所以好心急等股指期貨開場，佢就瞓身玩。
我 話呢個阿叔，係兩種人其中一種，一係賭聖，一係傻佬，若果佢係賭聖，真實炒期指時仍然大贏特贏，只是十中無一，甚至百中無一，因為期指是零和遊戲，有一個 大贏，起碼有十個人小輸。佢也可能係一個傻佬，而家大陸無期指，個市上落正常啲，慢啲，你做模擬交易較易贏，到真係有期指時，就係兩回事，大戶睇住散戶底 牌開牌，你買升，佢就買跌，即使大市真係要升，佢都插你1000、2000點，插到你投降先至升，散戶唔係咁易夠人玩。
所以我話年輕人炒吓唔妨，輸咗可以嚟過，但要記住，隨著年齡增長，就要加大投資的比例，控制投機的銀碼，除非你係賭聖，咁當然係例外，可以大肆投機啦，睇吓自己投機的往績，就知自己係唔係賭聖啦。
陸羽仁