ZKIZ Archives


中環在線:志雲約飯局劉央請食檸檬 李華華

2010-1-25  AD

喺 TVB,陳志雲呼風喚雨,而且向來伶牙俐齒,估唔到被「女畢菲特」反過嚟請佢食咗一個好大嘅檸檬。
上 周六渣打理財介紹會,以「志雲茶聚」做壓軸大戲,嘉賓係渣打亞太區經濟師關家明、同埋「牛」氣十足嘅「女畢菲特」劉央。陳志雲對自己嘅普通話幾有自信,一 上台就講笑咁話,自己講得比曹仁超不知道好幾多。成個茶敍,不時係咁曹仁超長,曹仁超短,搞得劉央頭昏眼花,一時間仲將坐對面嘅關家明叫咗做「曹先生」。
當時場面都幾尷尬,關先生倒幾識趣,當聽唔到,反而陳志雲跳出嚟話:「哎,你對面坐的不是曹先生,是關先生。」劉央當時眉頭一皺,係咁講「對不起」,仲話要請關先生食飯賠罪。

劉:我沒興趣了解你

呢個時候,搞開飯局嘅陳總當然不甘寂寞,即刻回應:「我的節目叫『志雲飯局』,你們吃飯的時候,也請我好麼?我不是那麼難了解的一個男人……」佢嘅說話,即刻惹嚟台下觀眾大笑。估唔到劉央答得仲妙:「但是我沒有興趣了解你……」佢即時獲得全場鼓掌。
陳志雲都不甘示弱,笑說:「你了解我也可以賺錢嘛,我的公司也是上市公司。」點知劉央喺一片笑聲中回問:「哪間公司啊?」陳總斬釘截鐵咁話:「 T、 V、 B!」

叫陳總返大陸做節目

「哦……」劉央尷尬咗好耐,然後講:「哦…… TVB……你要是不播中國的節目,我看也收不到幾個廣告……」此話更引發台下觀眾鼓掌,歡呼聲此起彼落。劉央仲話:「你要是回大陸做節目,我一定投資你!」陳總只好回應:「哇,這個很厲害!」
兩位口才咁叻,即席妙問妙答針鋒相對,究竟誰勝誰負?睇台下觀眾嘅鼓掌歡呼,大聲為劉央吶喊,「女畢菲特」先贏一仗!
李華華

PermaLink: https://articles.zkiz.com/?id=13977

Next Page

ZKIZ Archives @ 2019