呢個禮拜都係忙咗啲，事關要玩電臺所舉辦嘅投資比賽，由於關乎於名聲，所以都要畀心機玩。講返個遊戲，一開波，幾個參賽單位都買入隻協鑫新能源(0451)，由於反應太好，個遊戲玩了兩日，就搞到隻股都喺短短兩日爆升咗幾成，都咪話唔誇。不過講返隻股，其實真係可塑性好高，尤其作為保利協鑫(3800)嘅光伏下遊旗艦，日後成個太陽能電網都係佢摣Fit，依家先得150億市值，實在太唔似樣啦！
如果之前已跟小弟買咗協鑫新能源嘅話就唔使理，可以繼續摣，起碼等佢上到好似順風光電(1165)約300億市值都未遲，如果升到300億，即現水平介入仲有一個開可博，正！
不過，隨了協鑫新能源外，其實朱共山旗下仲有一隻好嘢可以博好多倍，呢隻就係亞洲能源物流(0351)，原來呢隻殼，朱共山早喺2010年入咗股，每股成本價介乎0.159元至0.16元，即現價買，你平過朱共山好多。如果再以保利協鑫入股協鑫新能源後累積升超過5.8倍作參考，亞洲能源物流起碼可以睇0.93元，更重要嘅係，呢隻股係朱共山私人持有，估計會緊加肉緊。
其實亞洲能源物流前身係中科環保，當年曾獲李小琳旗下嘅中國電力入股，後來因Ba叔案而告吹，再之後輾轉股權易咗手。再喺2009年底同2010年初，公司獲大有來頭嘅策略股東……朱共山註入資產。
朱氏喺當時短短個多月內，兩度註資入股亞洲能源物流，先喺2009年11月底將其私人嘅中鐵物30%股權註入亞洲能原物流，並收10億新股作代價；而今次則再將一家煤業船舶物流公司50%股權註入亞洲能源物流，註資代價1.6億元； 也以每股0.16元收取另10億新股作價，兩單註資完成後，朱氏持股量就會增至21.18億股，而佢呢手貨至今都冇減持過，由此可見朱共山都幾鍾意呢隻殼。
再睇盤數，今年上半年度，亞洲能源物流營業額為2333萬元，股東應佔虧損擴大96.2%至5684萬元。期內，公司鐵路建設及營運都無錄得營業額，分部虧損擴大9.3倍至6257萬元；船運及物流營業額得2333萬元，分部虧損縮窄34.2%至606萬元；基本上，睇盤數都唔開胃，仲有喎，公司截至年中，只持現金563萬元。盤數衰成咁，仲唔係等註資，最正嘅係朱共山只係第二大股東，唔算多貨，因為即使有大量新股畀佢都唔係問題。
至於目標價，難得朱共山近期當紅，最起碼見返佢嘅入股價0.16元，不過都係嫌升得少，事實上，保利協鑫依家超過400億市值，協鑫新能源都150億，依家亞洲能源物流只得18億，所以要追返同系，實在太多水位，應該係可以博佢幾個開。
陳承龍