中環在線：仰融「三年身家翻17倍」 李華華
2008-06-10 AppleDaily
華 華較早前引述大陸報章話，華晨汽車（1114）創辦人兼前主席仰融，想借遠東金源（1188）再造風雲，咁啱遠東金源上月底開股東會，華華為咗見吓呢位 01年《福布斯》中國富豪榜排第三嘅傳奇人物，所以專登喺股東會當日，走上遠東金源香港辦事處，睇吓有冇機會撞到佢，結果無功而回，但有關方面叫華華留底 卡片，話仰總會覆。
起初華華以為呢啲係客套說話，點知過咗幾日，身在美國LA嘅仰融，真係親自打長途電話畀華華。話說04年，仰融同內地政府因公司股權出 現爭拗，搞到要出走美國，唔經唔覺喺美國一住5年，仰融話用咗3年半時間，同遼寧省政府打官司，目的係要證明自己「乾淨」，結果係點？「水落石不出囉！」 仰融形容成件事就好似阿媽唔理乜嘢事，打咗個仔先，做仔嘅唔可以同阿媽劃清界線，更加難要阿媽認錯。
計劃明春返港
咁仰總會唔 會返中國呢？佢話返唔返都冇所謂，但應該唔係短期嘅事，皆因覺得人身安全冇保障，不過，佢有計劃出年春節嚟香港探吓朋友，同埋睇吓公司業務。佢仲好有信心 咁話：「3年之內，身家一定多過以前。」01年仰融做《福布斯》中國富豪時身家70億銀，家吓佢揸住約四成嘅遠東金源，以遠東金源市值10億銀計，佢身家 只係4億幾，要翻17倍先可以同舊時嘅身家一樣，仰總嘅決心咪話唔大。
佢仲同華華講，老婆仔女都好適應美國嘅生活，佢亦日日做45分鐘運動，每年又去滑雪 兩三次，「以前都唔識滑，喺美國時間多咗，先至學識！」
電郵：[email protected]
Next Page
ZKIZ Archives @ 2019
|