| |||||||
卓能集團主席趙世曾，上月部署接班安排，月尾向董事會提議升長女趙式芝為副執行主席，意味三十二億王國逐步交由長女領導。不過七十九歲的趙世曾未有退休計劃，「工作係人生最大樂趣，只要一日頭腦清醒、身體健康，我就永不退休。」最近他仲做埋男主角拍了條廣告片，為深圳龍華區的卓能雅苑宣傳。問趙生怎不搵個明星代言？他笑笑口話：「自己地盤、自己設計，梗係自己做埋主角，叫明星做主角有咩好？大家知呢啲係我哋做嘅地盤，俾大家買樓信心都好啲。」深圳賣樓 站在這片約八年前投得的五十五萬平方呎、可提供千伙單位的地皮，趙世曾說項目投資不用十億，以港式豪宅形式興建，現在可賣四十億，希望年尾推售。他回憶說：「買時龍華仲未入深圳市，當時當然平啲，後嚟交通通咗，又有子彈火車，廣州落嚟半小時，去香港將來都係廿五分鐘。」 當香港樓價閒閒哋萬元一呎時，趙世曾落力推介說：「呢度近過去新界地方，將來從西九龍過嚟就廿五分鐘，去新界都要四十五分鐘啦，火車站有專車接去地盤（樓盤），香港邊度去搵個二千幾蚊一呎嘅豪宅？」咁筍，有無留幾個單位自住呢？「我未必一定住喺度，間中去睇吓，我鍾意住酒店，留番啲俾佢哋（女友）住。」 識歎世界，身邊又不乏女伴的他，可有和女友遊遍深圳？趙世曾笑瞇瞇說：「你問佢（指着女友Dora），佢好似有啲去過，有啲未去過。」 粉墨登場 參觀樓盤期間，趙世曾忽然叫職員播放光碟，原來是他粉墨登場替樓盤拍的宣傳片，片中見他在草地上跑步，又同美女打桌球，「即係話我哋項目樣樣都有咁解，我哋地盤有籃球、網球、羽毛球、游泳池，有健身院，有商場，又有幼稚園。」片中的國內女模特兒是趙生拍板採用，他滿意地說：「有得俾我揀（模特兒），呢個都幾好，佢係深圳大學生，斯斯文文。」有美女在場理應疏乎，他卻笑話：「一早開工，拍到夜晚六點鐘拍到暈。佢哋拍完又叫你跑多次，跑幾次當健身，我哋無耐性俾佢拍完又拍，所以我哋做唔到明星，好彩我係老細可以話唔拍，拍到六點我就收工，拍唔拍得完我都走。」拍完廣告，同女模有冇下文？他笑着說：「無，完全係商業上來往。」除了深圳，卓能在杭州也有房地產項目，選在這裡，和趙世曾童年在杭州生活有關，「我細個好窮，牆都有窿，父母廿幾歲結婚，成日記得爸爸媽媽嗌交，因為我病咗無藥食，Daddy話要儲錢，媽咪話細路哥要食藥，咁就嗌交。我兩個大佬和我，大家唔夠食，我細個都得意，就送咗我去杭州同媽媽嗰邊親戚住，親戚屋企做醫生有錢啲，去幾個月返吓嚟又去吓，慳番啲米飯。」幾十年後杭州招商，他便在當地投資。 能者升任 趙世曾自編自導的又豈止樓盤廣告？當大家以為趙世曾重男輕女，加上不接受趙式芝和波爾錶太子女楊如芯結婚，會交棒給兒子趙式浩時，結果大家都估錯晒，趙世曾不慍不火說：「咁唔啱（重男輕女），公司嚟講，公司立場，係邊個有才幹邊個升上去，唔理佢係我屋企人或者外人。」揀趙式芝是否因為她在國際上有知名度？尤其趙生來一招十億招婿，不但美國傳媒來追訪趙世曾，就連非洲都有人認識趙式芝。「同知名度無關，睇佢才幹，佢喺公司做嘢有成績，佢做啲嘢樣樣幾有交代，做得幾好，一路再培訓佢多啲咁咪可以擔大旗囉，佢做得好對公司有益處，實際上交帶佢做嗰啲工作，都做得妥妥當當。」趙世曾捧長女上位，同時支持長子趙式浩離開卓能出外創業，趙式浩在另一訪問中，指出「我喺卓能做咗八年，一年平均去旅行兩、三次，而Gigi半年起碼去五、六次，仲要係長旅行，又有時間去揸直升機、打golf，我有時間都去讀個master啦」。對此，趙世曾就有以下見解：「放假去玩吓有咩所謂？」至於有指趙式芝約於○三年在公司做了半年，卻被父親勸退，是因為她做了影響公司利益的事，趙世曾又替女兒辯解：「唔係嗰啲，無咁嚴重。佢同Howard（式浩）一樣，即刻出嚟就入公司唔係咁好，唔知世界艱難，做嘢就容易唔勤力同做錯嘢，佢出去自己做咗一輪，再返嚟做嘢樣樣都好好多。」問他知否兩姊弟感情有無受影響？他答得坦白：「Howard個仔將來入公司做嘢都要家姐培養佢，佢哋兩姊弟感情不嬲都OK。」更現實的事還包括趙生一話計劃成立信託基金，連知己都受益，朋友即時多起來，「個個諗住同我做知己有好處，女仔打電話約出嚟食餐飯。（你點回應？）鍾意咪出去食飯。一路對我好嘅知己咪有得分。」 | |||||||