ZKIZ Archives


2226 老恆和發認股權證目的猜想 Edward Lee 發掘十倍股

來源: http://edwardten.blogspot.hk/2014/08/2226.html


有睇開我個Page都會見我久唔久講下呢間公司,無他,因為ipo寫過,俾人懷疑做假個陣又睇左好多資料,所以呢一年花得較多時間o係佢身上,近排,又有消息,就係發認股權證,認股權證是什麼? 簡單講下,公司發認股權證俾A(今次係CHAN CHI HUNG先生),用外星人既條文說法係發1億股認股權證,價格$0.1,行使價$8,限期12個月,用普通人既說法係A俾1000萬公司,獲得1億股兌換卷,就可以O係12個月內以8蚊買入最多1億股2226,即是最多佢要俾8億公司去買1億股股票,佢可以用/唔用,唔用佢就蝕左1千萬,因為兌換卷變哂廢紙,如果股價低過8蚊,理論上佢唔會行使,因為無錢賺,股價高過8蚊佢行使左就可以沽出黎賺錢,當然佢可以唔沽,即係A現時係賭公司一年後股價高於8蚊,咁佢一年內行使就會有錢賺,咁當然佢睇好公司先會買啦,公司同A點解要咁做,就係我今次要探討既原因

先戴頭盔,以下內容皆本人猜想,並非經證實的事實,亦沒有事實根據,當故仔聽下好了,至於如果最後俾我講中,你就當我開口中,撞中,我並不是有什麼內幕消息,純粹猜測。


對於老恆和黎講,佢今次發證可以集資8億返黎,為咩呢? 老恆和本身做料酒,IPO集資時招股書寫係為左買米,擴大料酒產能,但如果有跟開/研究開公司就會發現,公司最近多了豉油新品,只要上淘寶搜尋老恆和,就會見到百幾二百蚊人仔一支150-200毫升既豉油竟然好賣過料酒。新品O係淘寶出現係5-7月出,其實太油早於上年已經有,380人仔500毫升(每毫升0.76人仔),但而家有個自稱舌尖上的中國總監的食家沈爺開鋪賣,200人仔150毫升(每毫升1.33人仔)貴左75%,當中貴左既地方除左個包裝之外,就係貴在沈爺個名。


而家有祖傳太油同蝦子豉油,如果我係主席陳衛忠,我會點樣攪大壇生意? 本身IPO個度講明攪料酒就唔會郁佢,雖然事實佢可以改IPO D錢既用途,唔犯法,有通知就得,但料酒係本業,亦都要做,如果想快手攪豉油,一係問銀行借,發債,一係發股集資,咁明顯公司揀左搵人入股,所以8億好有機會用黎增加豉油產能(公司未講增什麼產能,純猜,但唔係料酒,唔係豉油,仲可以係咩?),至於策略上點解要搵宣傳高手入股,公告話陳生係攪推廣,就睇你信唔信佢喇!當然我無得唔信,因為我諗唔到其他原因要搵佢,我又唔識佢又唔知佢乜來頭。而豉油係好普通既產品,人人都做到,做出黎無大分別,十蚊同七蚊一支,同樣500ml,係人都會揀平個支,一樣味,所以做好品牌係最重要,如果要做品牌,搵人幫手建立品牌係一個方法,點解公司唔搵員工做宣傳?好明顯自己做唔掂啦,或者無資源,與其自己做,不如搵拍檔,俾股佢入黎坐埋同一條船!其實公司上市已經搵左蔡瀾o係路演出現,之後見蔡生攪飲食旅行團遊覽公司添!搵食家黎做係一個方法,上飲食節目推係另一方法,要讓全中國都認識,上電視一定係最快,但公司無全國性銷售網絡,睇返招股書就知,要做到間間超市都有,要好大產能,亦都要好多銷售費俾分銷商食,所以我估開頭係用網購推至全國都有得賣,而家其實已經做緊,天貓超市有,做起左先再慢慢搵超市幫手賣,但公司走高價路線,一兩個分銷商已經OK,繼而搵餐廳食肆入貨用,當然會係高級餐廳食肆豉油唔同料酒,料酒少地方人用(通常北方人),豉油市場大好多,而且佢做百幾蚊支,市場雖然細但我估點都大過料酒,競爭對手唔會多,起碼無鬼佬會整豉油整得好過佢,頂多臺灣日本商爭,我見淘寶賣得貴既豉油真係一隻手數得哂,外國入口要俾稅,個價自然貴,競爭力就弱左,本土做高價牌子真係唔多,小型家庭式會多d,但集團式真係唔覺,應該都係1隻手數得哂,所以係藍海市場,毛利率易KEEP得高,因為附加價值高所以呢間公司前景係十分豐厚但做做下會唔會有人爭,面對競爭公司有幾大能力同人爭,係一個未來需要面對的問題

好喇,講到好似好好咁,又講下有冇衰野,如果A唔用D兌換卷佢就蝕左1000萬,點樣賺返? 佢本身只有11萬8千股,值幾十萬,升到8蚊佢都賺唔返,但要留意1月28日公司上市,6個月後即7月29日禁售期完,大股東可以散貨,公司有2個主要股東,主席(5X%)+何X女士(2X%)(當初借錢俾主席攪生意而分到既,唔係佢老婆),有冇可能係大股東想出貨,特登攪壇野出黎等市場有憧憬,再推高股價之後慢慢套現? 好有可能,因為認股權證買方可以唔行使,佢蝕1000萬姐,但如果股價升1-2蚊,沽1千萬股出黎,已經賺返有凸,不過為左賺多少少錢攪壇咁既野,可能性又大唔大? 如果我係大股東,我就唔會咁麻煩,所以我覺呢個可能性唔高

至於有冇其他可能事情發生,要靠大家的想像力,這是我對這間公司的了解而作出的猜想,當然現時資料來看,我會是看好的,至於這間公司值不值投資? 要靠各位做下功課,我已經寫左幾篇,大家可以睇返,希望下次再寫呢間公司既時候,係寫上面一樣既野~

我知有人對呢間公司無咩好感,我寫低今次既猜想係怕如果我無寫,而又真係估中左既時候,我會後悔,為左唔想後悔,所以寫低,唔中又唔會蝕,但中左會後悔嘛:D
PermaLink: https://articles.zkiz.com/?id=108903

Next Page

ZKIZ Archives @ 2019