📖 ZKIZ Archives

去年通訊局實施「公平使用政策」，各大電訊商紛紛取消無限數據計劃，但聲言即使超過公平數據使用量，仍可按優先次序享用4G數據速度，更保證不會低於通訊事務管理局規定的128kbps。惟近月多位3香港用家卻發現用爆數據後，數據速度急降，更長時間低於通訊局的規定。個案一長期不達128 kbps

黃先生去年十月欲買新手機，行經深水埗3香港街站，見心儀手機有「零機價」上台優惠，又有「無限數據計劃」套餐，銷售員聲稱用戶使用超過3GB數據後，3香港會「調整客戶使用網絡的優先次序」，最低也保證有128kbps，不像其他電訊商般停止數據服務。黃先生憶述，當時銷售員力銷每月二百六十八元的4G計劃：「Sales話3G計劃用超過3GB數據之後，（網速）會真係減到得番128kbps，但4G計劃就一定唔會低到得128kbps。」黃先生遂選用4G計劃，並簽下兩年合約。

上月七日黃正式轉台，使用逾十日便超出3GB數據上限，怎料網速急降，更長期低於128kbps，他不滿指：「個sales明明話呢個plan只會減速，但而家好似限速咁，以前同一個位都收萬幾個kb，而家得番幾十個kb，慢到load唔到片！」

減速變龜速

上週記者與黃先生一同使用通訊局的寬頻測試手機程式，記者手機使用3香港4G網絡，正常速度錄得接近60000kbps，但黃先生十二次測試中，有十次都未達最低下載速度128kbps，最低一次更只得41kbps，網速低至看不到影片，亦無法於WhatsApp上載相片。黃其後反覆測試兩天，不論早上九時、晚上八時或凌晨二時，下載速度同樣龜速。

個案二上月突然限速

除了黃先生，機不離手的黎先生去年六月攜機轉台，同樣與3香港簽下一年、每月二百二十八元的4G計劃，此計劃則列明，當用戶使用逾5GB數據後，會按使用網絡的優先次序決定客人網速。黎先生指，過去半年即使超出5GB數據上限，網絡依然順暢，只是間中變慢。但自上月起，卻長時間被限速至128kbps：「以前減速仲睇到片，而家load唔到，身邊好多人都係咁！」除了黎先生，網上討論區亦有約十名網友投訴，懷疑3香港近月擅自更改計劃，用爆使用量後一律改為最低速度，大呻已簽下長約難以轉台。記者與黎先生致電3香港客戶服務熱線時，職員解釋，「上網速度會減慢少少，但一定唔會低過128kbps」；但當黎先生指網絡長期低於128kbps後，職員又改口稱：「超出用量後都係128kbps左右o架，都係正常範圍。」

專家話機制欠透明

究竟何謂網絡優先次序？電訊商普遍沒有詳細解釋，本刊找到3香港兩年前的聲明，只解釋用爆數據量後，在繁忙時間或高頻率上下載檔案時會影響速度，但並無提到長期保持最低網速。互聯網協會保安及私隱工作小組召集人楊和生解釋，電訊商一般會於用戶的網絡上加記號，並根據記號排列使用的優先次序，以此「扣死」用戶網速長期處於128kbps。不過他批評電訊商的排序機制透明度低，外間無法得知如何決定優先權：「都唔知個隊係點排o架，比較唔透明，具體方法係咪真係做到公平，我哋唔會知。」楊又指手機網速長期低於128kbps屬罕見，此網速亦嚴重影響正常上網習慣，「email file大啲都開唔到，用開嘅apps又會好慢」。他建議受影響的用戶利用通訊局的測試系統記錄網速，搜集證據後向電訊商反映問題。香港資訊科技商會會長方保僑則指，無線網絡受不同因素影響，難與電訊商爭拗：「有時都有啲取巧，佢話提供128kbps俾你，電訊商可以解釋好多原因，都好難商榷。」

回應大打官腔

3香港所屬的香港和記電訊發言人回覆指，公司是根據「公平使用政策」來處理兩位事主的數據服務，不過數據服務或會受其他因素影響，包括所使用的手機裝置、網絡情況甚至天氣和障礙物引致的干擾。根據通訊局的公平使用政策指引，流動網絡商應保證4G手機上網速度不得低於128kbps。唯個別情況或受外在因素影響，現階段未能裁定3香港有否違反指引。去年局方共接獲38宗同類投訴，若情況屬實，會向電訊商發出警告。（李詠珊）

壹判官

3香港身為四大電訊商，如果改咗機制應出聲，而且合約寫明數據速度下限，就理應做到，不能失信於人！劣劣劣（五個劣為最嚴重）

上星期五，記者喺元朗做完嘢去酒樓醫肚，估唔到嘆嚇一盅兩件都有奇遇，居然撞見十八鄉鄉委會主席梁福元，跟住元朗區議會正、副主席梁志祥同王威信都嚟咗。一眾侍應非常識做，急急腳將幾位主席帶入貴賓房。

記者坐近一睇，門口寫住「新世界」名牌，莫非人稱純官嘅鄭家純搞咗個鄉紳飯局？只見餸菜推出推入，食足個幾鐘先至散席。記者數一數，呢餐午宴原來有近廿名元朗區議員出席，唔係鄉事派就係建制派，雖然最終見唔到純官，但記者認出，代表新世界嘅原來係聯席總經理兼執行董事陳觀展。陳總係猛料之人，曾經喺廣州市政府辦公廳做處長十年，又做過越秀交通執董，擅長地產及物業投資，三年前由純官親自力挖過檔，被視為心腹。近年各大地產商紛紛喺新界收地插旗，此時此刻有呢趟飯局，實在令人有無限聯想。記者事後致電梁福元求證，佢例牌否認，更聲稱當日飯局只係遲來的「春茗」：「春茗嚟咋嘛，好似中電、煤氣公司咁，年年都有o架喇，俾面派對之嘛！」清明都過埋先食春茗，記者都係第一次聽，佢仲誓神劈願話飯局從無傾過發展收地。梁志祥更索性話唔知邊個係陳觀展：「佢哋有新同事、有啲我都係第一次見……佢哋經理姓陳下話？都係介紹嚇啫。」記者問過無出席嘅元朗區議員，本來地產商宴請全體區議會成員食飯好正常，但新世界無按照慣例，向秘書處發邀請信，而係由公關逐個打電話問區議員出唔出席，點解要咁鬼祟？新世界解釋，由於飯局無特定議題，所以只係電話私下邀請議員，而唔經區議會秘書處。

范太前公關助趕六四館

六四紀念館終於開幕，紀念館所在地嘅大廈業主立案法團主席巢國超上週三蒲頭，話會繼續採取法律行動，釐清支聯會有無違反富好中心嘅公契，誓要趕絕紀念館。自稱「普通商人」嘅巢生經常前言不對後語，一時話自己負責律師費，一時話法團會俾番錢佢，轉過頭又話要開會傾嚇先，直至佢身邊嘅白衫男子教路，先至話係自己出錢，夜晚仲發新聞稿話「願意支付一切有關律師費用，毋須其他業主承擔」。呢位白衫軍師潘錦全原來來頭不小，佢係資深傳媒人，又係俊念傳訊顧問有限公司創辦人兼董事總經理。一一年唐英年醜聞纏身時，盛傳全國人大常委范徐麗泰隨時入閘參選特首，范太就喺嗰陣請佢做公關。九六年，潘錦全仲幫過前特首董建華助選，似乎同建制派關係相當密切。一個普通商人請到公關猛人助陣，錢從何來？潘錦全本週一回覆本刊查詢，話俊念受董吳謝香律師事務所委託及聘用，一切費用由維雅製衣廠，即係巢國超找數。

中西區再益自己友

政府大派四百五十萬俾十八個區議會宣傳《基本法》，呢啲明益自己友嘅活動陸續舉行。攞咗十一萬元嘅基本法推介聯席會議（基推會）聯同中西區區議會，本週日喺卑路乍灣公園搞填色比賽、攤位遊戲、歌舞表演、專題講座等，街坊反應麻麻。專題講座嘅主題係《基本法》賦予的權利和義務，主講嘉賓係律師衞珮璇。當日反對撥款而被抬離議會嘅區議員許智峰到場挑機，問衞珮璇喺法律基礎下如何保證普選冇篩選，點知衞話問題同活動主題無關，又話係咪良心律師應由自己評價，總之不停遊花園。現年廿八歲嘅衞珮璇係一一年區會選舉許智峰嘅對手，佢係有份批出撥款嘅區議員李志恆嘅姨甥女，兩人同屬由中聯辦港島工作部部長吳仰偉擔任首席榮譽顧問嘅建制組織「中西區發展動力」成員，衞當年參選曾被指舉家種票。李志恆話冇利益輸送亦唔覺尷尬，聲稱演講屬義務性質，活動細節由基推會安排，佢聲稱當日先知係姨甥女衞珮璇主講，真係信不信由你。許智峰質疑即使冇金錢輸送，但可能有延後利益，包括為衞珮璇下屆區選鋪路。

壹週圖片：曾鈺成伉儷豪遊京都

唔少香港人對京都情有獨鍾，立法會主席曾鈺成都唔例外。本刊同事目擊，上星期三曾主席夫婦把臂同遊京都嵐山，仲set機玩自拍，太太伍嘉敏乘機「搔首弄姿」，可惜曾主席搞咗成十分鐘先set好部機，真係辛苦曬。同事之後仲見到兩人去咗溫泉旅館「花筏」。據講旅館一客懷石料理最平都要七千日圓，即港幣五百三十蚊，一晚住宿接近港幣四千蚊，不過對曾主席嚟講，濕濕碎啦！