人稱小炒王，最鍾意短炒，日日唔炒股唔安樂。樹仁新聞系畢業，曾任電視台、電台財經節目主持，最近與拍檔踩入紙媒出財經雜誌《策略王》。上週二初流出市面，港股即跌逾五百點。她最怕江湖魔咒──每逢財經雜誌創刊，就係股市見頂之日。 我哋唔想做《iMoney》呀！（編按：○七年十月《iMoney》面世，三日後股市見頂，金融海嘯來臨。）不過我哋都無咁大影響力啦！呢個時候出書，其實係之前諗住滬港通後個市會旺，坊間又比較少財經雜誌，想食住個勢啫。全公司得四個人。我係主編，但其實身兼記者、校對同sales，廣告一腳踢！好彩之前做嘢識落唔少朋友，第一期都到新地、福臨門呢啲廣告。但我哋連定價都未諗好，見其他財經雜誌通常賣廿蚊，我哋平兩蚊啦！點知「薄切切」賣十八蚊，連我朋友買完都問，係咪漏咗本呀？我哋知錯o架啦，下期開始會減價到八蚊！好意頭吖嘛！ 我哋想走小眾路線，介紹一啲唔係太多人留意嘅股票。係人都知做雜誌燒錢，我同拍檔總共投資咗五十萬，一本書成本都唔使五蚊，每期印萬幾本都係幾萬蚊，目標係賣到七成，希望有錢賺。我佔好小部分，玩完五十萬再睇拍檔頭啦！ 由電子傳媒跳到紙媒，咩叫藍紙都唔知，其實都幾踩鋼線。不過，由之前做主持，到而家身兼股評人，我都係一個踩鋼線嘅人，炒股風格更加係，係好易跌死o架，小心啲囉。我讀大學已經買股票，因為抽開新股嘅阿媽要我自己學費自己負責，我邊有咁多錢？佢叫我抽新股，第一隻抽中銀香港（2388），由八蚊升到十六蚊。但賺得最多，係玩細價股，幾危o架。一二年去美國旅行，見到玩具反斗城擺滿好多忍者龜，原來香港唔興，美國仍然大熱，於是開始留意生產商彩星玩具（869）。一三年九毫買入，今年初最高升到四蚊，我就賺咗超過五十萬！同年我行759，見到好多飲品由入口變成自家品牌，嘩，自己生產毛利高好多o架，嗰時股價由五毫升到最多五蚊，但我兩蚊就走咗，賺咗幾十萬。我都試過輸鑊甘，○七年用十四蚊買入中鋁（2600），點知撞正金融海嘯，跌到得一個四，蝕咗幾十萬。投資股票又好，今次出雜誌又好，我已經學識止蝕。 炒股咁多年，都賺到過百萬……又未到五百萬嘅！最近我就睇好高誠資本（8088），因為最近佢哋想收購一間內地非上市電影音樂娛樂公司，想發展內地市場，我睇好內地娛樂公司發展潛力。 | ||||