2009-03-27 AppleDaily
| ||||||
民 企資金來源,從來都係民企老細最敏感同埋神秘嘅一環,尤其金融海嘯爆發後,佢哋更忌諱記者提及呢類問題,雙方隨時擦槍走火。話說吉利汽車(175)大股東 吉利集團請內地記者睇廠,對於吉利逆市大舉擴張,錢從何來,自然成為一眾記者關注點。有記者提出,希望吉利可以公開融資渠道同資本運作方式,主席李書福初 時以「吉利目前很艱難,需要打基礎、練內功」推搪,大家自然唔收貨。 一輪對答後,某記者終於忍唔住,叫佢多談事實,少講觀點,李總當堂扯 火,一輪嘴話:「媒體不是法院、不是檢察院,也不是公安局,媒體沒有權力調查我們,我為甚麼要跟你講清楚。如果你們是公安局,你們今天就不要坐在這個地 方,我今天請你們到這裏來,不是要把財務報表對你們公開!」現場即時鴉雀無聲,尷尬無比。 結局係點?當然係李總道歉啦,仲交代埋吉利負債逾百億人民幣。如果李書福上述言論係真嘅,你話佢邊仲有錢去買福特汽車旗下嘅富豪車廠呢? |
| ||||||
較 早前完成世紀供股嘅滙豐控股(005),今日喺佢哋嘅福地──香港,率先舉行非正式股東大會。今年集團一改慣例,將總行全層28樓撥晒畀股東坐,傳媒要移 師去40樓開記者會。華華聽聞獅子行咁做,除咗想股東坐得舒適啲,據講今年好多股東回覆,話會出席股東會,粗略估計如果28樓坐滿股東,閒閒哋有五六百 人,舊年就有三四百名股東出席。 今年咁多股東駕臨,應該唔係為咗品嚐股東會後奀雌雌嘅茶點,好彩呢期滙控股價算硬淨,噚日收報64.3蚊,比供股價28蚊 高1.3倍,管理層唔使震,不過就算真係俾小股東話兩句,都係打者愛也啫!扎根香港超過140年嘅獅子行,連集團大班葛霖都話,從來冇忘記自己銀號個名叫 香港上海滙豐銀行,滙控要供股集資,本地小股東雖然唔少喺金融海嘯下變大閘蟹,都死心塌地照供,認真有heart。 | ||||||
| ||||||
如 果閣下同時係中電信(728)同聯通(762)兩隻中資電訊股嘅小股東,相信噚日會幾難忘。兩間公司同日搞股東會,上晝11點中電信嗰壇個個高高興興,有 點心食之餘,仲每人拎走兩隻應節糉;下晝3點聯通股東會呢,不但冇嘢打包拎走,仲要唔夠點心食,搞到有股東投訴兼狂鬧記者,「好鬼㷫」收場!點解要鬧記 者? 事緣有行家諗住影吓佢哋企喺枱邊呆等,好耐都未有第二輪點心嘅場面,點知就俾啲小股東鬧:「有嘢食你仲影,你有冇道德o架?」跟住啲說話仲難聽:「你 纜番個狗牌先好影」、「成班都係揸筆爛仔」、「全部都係乞兒」。咁小股東冇嘢食點解會同記者道德掛鈎?影一張現場花絮相又點會淪為乞兒呢?真係唔知!華華 敢講一句,逢親股東會小股東有乜唔likey間公司(最常見係唔夠蝦蛟燒賣),正常都係叫記者幫佢哋出頭影低佢。至於聯通呢一小撮咁另類嘅小股東,恕華華 見識少,真係前所未見。 |
| ||||||
華 華一向覺得,冇嘢比焗賭跟住輸錢更谷氣,但幾日前同個專為對冲基金做買賣嘅鬼佬經紀K傾偈,原來可以比焗賭輸錢更慘──就係不但焗賭,仲要買乜都幫你決定 埋,之後輸大錢你仲聲都唔聲得。呢單嘢當然唔係喺香港發生,有嘅話我哋《蘋果》都報咗啦。咁離譜嘅嘢其實係喺李家天下嘅新加坡發生。大家都知佢哋政府抱住 「官醒過民」嘅心態,從市民吸血汗錢,之後就經淡馬錫等國投公司買嘢。咁舊年佢哋好豪咁入咗好多外國銀行股,輸到趴街。 聽經紀K話佢哋早前開咗個討論會, 會中有個金融才俊揸咪鏟爆出席嘅國投高層。高層用例牌嘢解答,散會後有個自稱記者嘅人走埋才俊度,問佢個名同喺咩單位返工。才俊沾沾自喜以為有人賞識。點 知個「記者」一走,才俊個朋友即刻走埋去同佢講:「嗰個邊係記者,我話係政府嘅人,抄低你個名慢慢查你。」才俊當堂心慌慌。 |
| ||||||
長 和系今年公佈中期業績嘅安排特別古怪,首先係長江基建(1038)、長實(001)同和黃(013),差不多提前咗一個星期公佈業績。長建定於今日公佈業 績,按照以往做法,主席李澤鉅(小超人)會同幾位董事一齊召開業績記者會,亮相解吓畫,點知今次竟然罕有地無咗呢個環節。靚女公關解釋話,長建班董事嘅會 議排到密麻麻,撞晒期,連記者會都無期搞。至於下星期四嘅長和業績會就唔使擔心,會如期舉行。 長建今日派成績表 講開又講,其實長和業績記者會,業績都係其次,記者主要都係想聽吓李超人對經濟、股市、樓市嘅高見,最近佢細仔李澤楷為佢添咗個孫仔,睇嚟可以為記者會開多一個話題,聽吓李超人點樣講吓親情嘞。 |