母親節盡訴親情江欣燕高歌謝媽咪
1 :
GS(14)@2017-05-14 10:50:58■江欣燕自言與母親性格南轅北轍，但齊齊唱K甚合拍。攝影：沈健程
【母親節系列之媽媽萬歲】為人母親是終生學習，無私地愛子女。新手媽媽周汶錡，享受與兩名可愛囝囝的小情人關係，計劃做一個無壓力的hea媽媽，令大仔Jacques每日開心成長。江欣燕媽媽則祈禱女兒找到愛的歸宿，笑言願為女兒擋子彈，欣欣亦相當孝順，唱歌謝親恩之餘，下月更計劃搬回娘家。江欣燕爸爸去年撒手人寰，今日是母親節，亦是欣欣父母51周年結婚紀念，欣欣日前帶媽媽到卡拉OK，大唱《世上只有》及《真的愛妳》謝親恩。問到感激媽咪甚麼，欣欣說：「佢係一個好媽媽，畀好大人生空間我，畀咗好靚嘅樣我，我好鍾意媽咪性格好天真，不過我又好擔心佢，如果我係佢，我都會好痛！因為爸爸舊年過咗身，我好擔心佢唔食嘢，之前媽咪好瘦，瘦到得70幾磅。」
■爸爸去年過世，欣欣決定下月搬回娘家與媽媽互相依靠。
■二人母女情深，欣欣唱《真的愛妳》謝親恩。
■江媽媽表示可為欣欣擋子彈，欣欣即感動爆喊。
下月搬返娘家
去年爸爸走了，欣欣決定下月再次搬返娘家與媽媽住：「我最想令媽咪唔使咁擔心，佢真係乜都擔心，好天又驚我哋曬親，落雨又叫我唔好揸車。」4年前欣欣離婚，江爸爸就叫她搬回家，她慨嘆：「我覺得呢個決定好啱，因為喺爹哋嘅晚年，我返去同佢好sweet過咗最後嘅兩三年。」
母願代擋子彈
提到兩個女愛情都不順利，江媽媽就自責：「我唔係好叻、好識做媽咪嘅人！其實睇到佢哋開心我就開心，最擔心佢哋有唔開心，我做媽媽唔識做啲乜，盡量唔好同佢哋提啲煩嘅嘢，為咗令佢哋開心，我會做好自己多啲。」77歲的江媽媽擔心百年歸老後，沒人照顧欣欣，常祈禱希望有錫囡囡的人出現，欣欣笑問可否為她擋子彈？江媽媽即說：「好吖，如果子彈嚟嘅時候，我真係會企喺你前面。」欣欣即爆喊：「你畀咗條命我啦，你嗰條我唔要呀！唔好擔心咁多嘢，好榮幸喺你健康時，有機會照顧你，你健康多啲，開心啲！」採訪：皓騫場地提供：MegaBox CEO Neway
來源:
http://hk.apple.nextmedia.com/entertainment/art/20170514/20020426
眾星盡訴父親情雷宇揚推Job陪仔玩「我好珍惜呢幾年」
1 :
GS(14)@2017-06-18 11:18:11■過往工作忙碌的雷宇揚，今年首度與囝囝雷庭慶祝父親節，開心玩波波池。
【父親節嚟喇】今日父親節，一眾爸爸紛紛出動與子女們慶祝。長居廣州的雷宇揚日前與3歲囝囝及太太到兒童樂園耍樂，原來早兩年他因工作少陪囝囝，於是去年減少工作享受親子樂，他說：「想彌補番，我每日張開眼就諗起佢。」而Dear Jane主音黃天翱和太太楊洛婷、胡子彤和爸爸，以及林俊賢和女兒林鈺洧，亦各自慶祝父親節。現年52歲的「鬼王」雷宇揚，2012年與內地女主播馬荔結婚後長居廣州，3年前他榮升爹哋。日前雷宇揚一家三口在廣州接受本報專訪，提早慶祝父親節。原來囝囝雷庭出世首兩年，雷宇揚因要兼顧工作四圍飛，未有時間陪伴，照顧囝囝的責任交由停薪留職的太太負責，今年是首次一家齊齊整整過父親節，雷宇揚說：「出世之後兩年我陪得佢少，想彌補番，我每日張開眼就諗起佢。」雷宇揚自言沒有節日觀念，總之囝囝開心他便開心，覺得日日都是父親節。
■雷宇揚減少工作，一家三口盡情享受親子樂。
■雷宇揚2012年與太太馬荔結婚後，3年前誕下囝囝雷庭。
■雷庭錫錫爹哋，令雷宇揚冧到爆。
■雷宇揚（右）早前為電影宣傳，結束工作後馬上返家陪囝囝。微博圖片
減少應酬戒酒
過去一年，雷宇揚已減少公幹，他說：「近一年我比較飛少啲，多啲時間留喺佢哋身邊，小朋友生活好簡單，早上6點幾起身，晏晝3點幾放學返屋企，去公園踩單車、去波波池玩吓，一般小朋友同父親做嘅嘢我都做晒，食完飯之後就瞓，我哋嘅親子活動一般平民百姓都會做，一齊瞓、送佢返學，發神經同佢一齊瀡滑梯，已經係好開心，仲有陪佢睇電視，佢逼我睇卡通片。」自有小朋友後，雷宇揚已絕少應酬，往往工作完畢便飛撲返歸。他說：「佢?家3歲半，去到8、9歲就唔跟我哋，我好珍惜呢幾年，所以?家多啲返屋企，少啲應酬，有啲工作太遠太辛苦，或者去好多日就唔接。?家好少見朋友，唔會好似以前單身咁，冇嘢做出去飲酒，?家出去飲酒係零。」
香港教育變態
當了父親3年多，雷宇揚指兒子對他影響不少：「以前覺得自己最重要，?家係個仔，以前喺國內坐車唔扣安全帶，?家會扣，我有乜事佢點算？」虎媽虎爸現今社會十分普遍，但雷宇揚堅拒做虎爸，他說：「我覺得最緊要佢開心，如果佢唔開心，強迫佢做一樣嘢都冇意思。」囝囝現於廣州一所國際學校就讀，雷宇揚認為小朋友讀書無需太緊張，只要成績不太差便可以，他說：「我揀啲冇乜功課嘅學校，香港啲教育真係變態，我朋友個女朝早6點幾返學，夜晚返到屋企做埋功課12點半，人生係咁點得？細路仔應該係玩，識字就得，呢方面我唔會畀壓力。」問會否生多個時？雷宇揚說：「我抱開放態度，我老婆就話夠，照顧一個都好花時間，如果兩個好辛苦，同佢去一日迪士尼，我散足三日，同佢玩一陣波波池，我底褲都濕埋，我太太重新投入工作都好忙，佢好鍾意份工，又唔想放棄。」採訪、攝影：曾小嘉
來源:
http://hk.apple.nextmedia.com/entertainment/art/20170618/20059441