|
||||||
三十六歲的亞視執行董事盛品儒，早前跟比他大五年的陳霽平傳出姊弟戀，被拍到二人親密摸臀入場睇戲，事後女的趕住認，男的卻唔認。 戀情未搞清，上週六男方又斷正，被拍到夜會爆乳女郎，未做正印卻殺出小三，畢竟男未婚女未嫁，這場愛情心理戰，隨時都有變數。講男 約陳霽平訪問，當然是因為近期她與盛品儒鬧得熱哄哄的緋聞，不旁敲側擊，跟盛品儒是什麼關係？「其實佢係我朋友，係好好嘅朋友，但係有可能可以發展，但未 正式發展。」二人認識四個月期間經常約會睇戲食飯，一提起約會，陳霽平立即露出甜笑，並大讚盛品儒細心，「佢每一次約我出街，都會諗去邊度食飯，睇乜嘢 戲，我唔使plan任何嘢，唔使用腦，佢都會安排得好好。」 訪問在上週六盛品儒被拍得於蘭桂坊醉攬爆乳女前進行，問到男方經常被拍得爛蒲爛玩，陳霽平說得輕鬆，「呢個我冇所謂，如果你真係鍾意蒲你繼續，我唔會介 意，我覺得大家要覺得合拍先再進一步發展。」對男朋友則採取自由放任政策，「我係會俾晒100%自由，佢哋鍾意點都得，男女拍拖我覺得最緊要信任，你越管 佢，佢就越覺得唔舒服，但當我知道你有日出軌，我會走，一定唔會有second chance！」 講女 被視為城中鑽石王老五的的盛品儒（James），自言非鑽石，「我只是一名普通王老五，仲係單身，目前以工作為重。」一句單身，不費毛力將同陳霽平的緋聞 推得一乾二淨。對這位緋聞女友他又點睇？他說：「佢係非常好嘅女仔，有學識又叻女，大家都係朋友，（有無發展機會？）將來嘅嘢真係唔知，（介唔介意對方大 過你？）做朋友最重要係傾得埋。」講到擇偶條件？James不忘賣廣告的說：「最緊要有良心。（是否一個要求高的人？）有要求總好過無要求。」自言宅男的 James透露，因為唔夠主動，廿五歲才有初戀，過去十年，拍過幾多次拖？他數數手指的說：「拍過五、六次左右，（仍未搵到結婚對象？）未，我好傳統結得 婚，將來就唔希望有離婚或者婚外情，所以要搵到個適合先拍拖，希望四十歲前結婚。」 四代富貴 上海出生的盛品儒，原名盛承灝，是家中的獨子，更是清末首富盛宣懷四子盛恩頤的後人，被指是富二代，他卻否認說：「首先我要聲明下，我唔係富二代，我只是 盛家第四代，俗語有說富不過三代，我是第四代，應該係由頭嚟過。」雖然沒有家規家訓，不過家族顯赫，難免備受注視，「其實到第二、三代都比較自由，始終是 書香世家，一定要練好毛筆字，不過我寫中文字都係唔靚。」兩歲便來香港的他，中小學讀過華仁、培正和國際學校，高中才到加拿大升學，在加拿大維多利亞大學 工商管理系畢業，九九年才回港。返港後，在銀行和水泥物料公司做過打工仔，又幫過父親的房地產生意做投資項目，兩年前由堂兄王征委任，出任亞視執行董事， 對他而言是一大挑戰，「希望將亞視定位成一間集新聞、財經、資訊為主的電視台，以良心為本，創意為先，亞洲CNN為目標。」 四個媽咪 外形比林峯更chok的他，近來經常見報，他說：「我以前好內向，個樣完全唔得，係典型宅男，自從做電視台後，工作上要高調，但我個人就唔喜歡出鏡見報， 唔想同公司藝人爭飯食。」由於父親長駐上海打理生意，他每隔兩、三個月便會返上海老家，而媽媽則留港打理家族開設的上海菜館留園和留園雅敘，他說：「放假 我都會返鋪頭幫手，平日主要是媽咪同兩位阿姨打理。」說起家中女人多，他打趣說：「細個我好多人錫，除了阿媽仲有三個阿姨，加埋就好似四個阿媽，四個一齊 催婚，都幾有壓力。」 完美男友 講到明男友偷食冇take two，與拍拖兩年的前男友、趙世儀兒子、趙世曾姪兒趙式言分手，有冇機會翻撻？「將來嘅嘢我唔知，我哋而家仲係好好嘅朋友。」她說趙式言是完美，「佢係 最sweet！心地善良、錫屋企，又鍾意小朋友，錫晒我全家，如果我daddy身體唔舒服，佢係醫生，可以即刻安排做檢查，佢會就晒你100%，又聰明， 佢絕對係完美丈夫或者男朋友。」講到咁完美，最後又是分手收場，陳霽平坦言有想過嫁給他，「有一個moment我覺得『咦，我會幸福喎。』可能係for someone else，但就未必係同我perfect。」 second chance 陳霽平父母是台灣人，父親做染布生意，她在台灣出世後便舉家搬到香港，她有一兄一姐，一家五口長年分散各地，小學畢業後到美國升中，大學畢業於加拿大多倫 多大學，之後回港於香港中文大學攻讀傳理系，又貪得意選港姐，由於懂得英語、國語、廣東話、法語及西班牙語，入行後她主要做主持、司儀的工作，怕悶的她又 想嘗試拍劇，但自《金枝慾孽》的「寶嬋」一角後便無以為繼，離開TVB，簽約王維基，「因為電視劇想有套代表作。」不過其實她最想可以自己監製一個電視節 目，「我同啲朋友有好多ideas for一啲電視節目，如果係有個investor需要content，我哋可以provide到，同埋睇吓對方有幾多budget。」與其得個諗字，不如 近水樓台，找盛品儒投資，如果你肯給他second chance的話。 |
||||||
| ||||||
通訊事務管理局一聲令下，九月一日辭職的前亞視執行董事盛品儒雖已離開公司半個月，據知被拉落台的他，已決心脫離傳媒行業，將轉到北京搞地產生意。 至於屢傳執笠賣盤的亞視，盛品儒聲稱在他「起身」前已有跟買家接觸，包括三年來依然未攞到免費牌的王維基，據知開價約六億，王維基並先後兩度搵中間人搭路，斟買亞視。轉移陣地 亞視為「紀念」盛品儒，製作MV式短片，狂讚，更日播夜播，搞到觀眾勁投訴。離職半個月，暫時未有新動向的當事人則主攻吃喝玩樂。 「James（盛品儒）冇做之後去咗幾個地方玩，北京都去咗兩次，佢話唔等錢使，仲plan咗跟住嗰幾個月會去美國、加拿大同日本。其實王征都已經幫佢搵咗地方落腳，喺北京搞地產生意，過完年後會去北京返工。」知情者說。 上週五（九月十三日）晚，盛品儒單拖到灣仔演藝學院睇歌舞劇《巴黎——永恒的癲馬Le Crazy Horse Paris, Forever Crazy》，但他開場一粒鐘後才出現，遲大到！ 嫌出手低 唔使返工，一早起身跑步的盛品儒週一（十六日）在寶馬山公園附近見到記者，對亞視賣盤一事回應說：「我唔再係亞視管理層，唔清楚最近賣盤嘅嘢，不過我仲喺度嗰陣，就知道王維基同查懋聲大概兩、三個月前搵過大股東黃炳均（亞洲電視主席）傾買股份，最後傾成點唔知，你哋要問番當事人。」問他是否會轉移陣地，到北京搞地產生意？盛品儒說：「我休息緊，會放假到年底，中間可能會follow吓project，地產會係其中一個發展方向，學吓嘢，但仲未決定。」盛品儒踢爆王維基搵查懋聲搭路買亞視，據了解，雙方於第一次商談後，亞視認為六億價錢太低，未能成事。不過，等了三年，投資超過十億都未攞到牌的王維基並未放棄，之後再搵姚志勝（中國和平統一促進會香港總會執行常務副會長）出面，幫手拉線，但據知亞視至今依然未有反應，雙方仍在拉鋸中。 易主台 亞視宿命，低收視！還有頻頻易主。由82年接手的邱德根開始，亞視老闆換不停，只有林伯欣掌舵時經歷過剎那光輝，及後的揸fit人，一蟹不如一蟹。 邱德根 82年麗的因收視及財政問題，股權出現變化，商人邱德根注資一億入股，並改名為「亞洲電視」。搞藝員訓練班，畢業生有黃秋生、何家勁；又舉辦亞洲小姐，打破無綫壟斷選美活動十多年的局面。 林百欣 88年林百欣為首的「麗新集團」及鄭裕彤的「新世界集團」聯手購入亞視三分之二股權，入主後先改台徽，並把中文台改名「本港台」，英文台改為「國際台」，沿用至今。新主大灑金錢向無綫挖角，撬走台柱何守信、沈殿霞、盧海鵬及曾志偉。炮製受歡迎節目《今夜不設防》、《今日睇真啲》、《龍門陣》及劇集《我和殭屍有個約會》，令對手倒瀉籮蟹。可惜光輝業績未能令收視大幅度扭轉，及後鄭裕彤減持股份，林百欣最終也難撐局面。 吳征 林百欣掌控亞視期內入主的吳征，一度推行大刀闊斧改革。裁員並率先推行節目外判，減低成本負擔。吳征年代，新聞部突破傳統，推行藝員朱慧珊及何守信做新聞主播，可惜劣評如潮。 封小平 00年林百欣出售亞視股權予鳳凰衞視的陳永棋、劉長樂及內地商人封小平。而由封小平出任亞視行政總裁之後，股權不斷變動，07年查懋聲亦成為新股東，其間發生王維基任行政總裁半個月的短命鬧劇。 旺旺蔡衍明 09年又有新股東加入，旺旺集團蔡衍明以私人名義入主亞視。之前揸旗的劉長樂吸引中資企業入股，令亞視親中立場鮮明化。 王征 10年王征成亞視新主後，頻製「笑彈」，有誤報江澤民死訊、跳馬舞抗議、開洗腦班等，騎呢作風，將亞視僅有的兩點收視推向零。 | ||||||