|
||||||
|
呢幾個月業績突然轉壞、負面新聞多多嘅李寧（2331），唔知係咪應付投資者查詢都嚟唔切，搞到成日擺烏龍！ 噚 日就有內地媒體報道，話李寧旗下一個低檔次品牌「新動」，唔經唔覺運作咗3年，但生產呢個品牌間公司「上海新動體育用品」，竟然一直未有喺上海市工商局註 冊。嗰位記者仲好勤力咁落去舖頭，拎住「新動」嘅產品查證，發現上面個吊牌寫明產品係「由上海新動體育用品公司出品」，無花無假，無砌錯李寧咁話！ 篇報道引述一名律師講，未註冊公司生產嘅產品，拎去市場賣，後果可大可小，分分鐘俾人告虛假宣傳。華華一睇都被佢嚇親，嗱嗱臨去搵公司發言人解畫。 更新吊牌致印錯名 李寧發言人解釋，原來單嘢係一場誤會。雖然李寧嘅副品牌叫「新動」，但生產嗰間公司正確名稱係「上海心動」，08年1月成立，有晒註冊號碼，所以內地記者用「上海新動」查公司註冊，梗係查唔到啦！咁何解人哋又喺你啲產品度見到「上海新動」個公司名呢？ 問題就係出在舊年第三季，李寧因為要更新產品吊牌，一時唔小心，小部份產品個吊牌將「上海心動」印錯咗做「上海新動」。公司話一發現擺咗烏龍，已經即刻將呢批產品落晒架，徹查事件。不過，嗰位內地記者唔知係好彩定唔好彩，咁啱拎咗件仍然喺市面流通嘅錯版產品嚟睇。 李寧CEO張志勇因09年減持李寧股份唔記得披露，早排俾證監會罰2000蚊。睇嚟李寧班人做嘢大頭蝦有前科，希望佢哋以後做嘢小心啲！ 李華華 |
||||||