|
||||||
|
Gel甲、畫花、修手皮，美甲師 行業傳統由女人主導，今集主角卻是兩個大男人，而且出身同樣噱頭十足。其中，三十七歲的潘仲威（阿威），原是漫畫師，轉行後改用畫筆﹑水彩在指甲上作畫； 拍檔三十出頭的劉偉全（Dick），曾是為名牌行騷的模特兒，八年前入行，自詡第一代男美甲師，亦是冧客高手。 一年前，二人合資六萬多元，在尖沙咀開設樓上鋪「Top Nail」。兩個男「妝」甲師，不但冇嚇怕女顧客，反而引來一班闊太、OL做「粉絲」，上月收入逾七萬，扣除老闆人工，仍有四萬元盈利。 租金高企，住宅市場流行劏房，商鋪也不例外。Top Nail位於尖沙咀加拿分道商業大廈Solo Building七樓，同層只有一間大房，再劏成八間房。Top Nail位於走廊盡頭，是最大的一間，擁有雙邊玻璃，說是二百呎，看落只有百多呎，只夠擺兩﹑三張坐椅，月租八千元。 每日的傍晚及週六﹑日最旺場，客人都是事先打來預約好的。上週六中午，便巧遇連鎖涼茶鋪恭和堂的太子女董小姐。她是長期熟客，每隔兩、三個星期幫襯一 次，Dick暱稱她「豆豆」，「我同阿Dick好熟o架，佢手工好，出面坊間價錢係平啲，但整咗一個星期指甲就崩，搞到我好??。修甲畫花會上癮，有時扮 靚都係為咗俾男朋友睇，男修甲師可以俾到我意見，知道男人嘅喜好。」 Top Nail在去年開業，原租用二樓鋪位，因店面狹窄，兩星期前「擴充營業」，搬上七樓。牆上掛滿了色彩繽紛的甲片樣板，畫上美女、《三國誌》漫畫人物，甚至 新年揮春等。這些圖案，出自漫畫師阿威之手，用水彩或廣告彩畫上去，打破傳統美甲主要是畫花、黐閃石的框框。普通gel甲加簡單花款，最低消費二百五十 元，如要在指甲畫漫畫人物等，收費四百至五百元，比起坊間美甲店貴成一倍。「呢行競爭大，鬥平頂爛市冇得做，一定要賣手工先值錢。」Dick說。 吸客招數一細心氹阿太 身高六呎的Dick，曾替HUGO BOSS「行騷」，每次開工都「gel行頭髮」，配一身黑衣。因朋友介紹認識開美甲店老闆，獲對方游說加入，成為舊公司第一個男美甲師。外形殺食外，更能 言善道，相反拍檔阿威則不苛言笑。上週五，阿威替客人逐隻手指畫玫瑰，連續四十五分鐘都不發一言，悶得女士不停打呵欠。畫完後，輪到阿Dick接手，先搓 揉客人雙手，再替她塗透明gel，保護剛畫好的圖案，同時笑問：「你有無睇無綫劇集《真相》啊？」女士即刻回神，興奮地說﹕「有呀，劇情都OK，但我真係 唔鍾意楊怡﹗」兩人細聲講大聲笑，直至付款離開，客人仍滿臉笑容。「有時個客一坐兩﹑三個鐘，唔同佢傾下偈，佢好悶o架。」剛送完客的Dick笑說。性格 細心的Dick，會記住熟客的生日，送上細樽香水等小禮物，「有次見到個客肚皮隆起，應該有咗BB，我即刻醒水唔好用手大力拍佢膊頭，因為唔吉利。呢啲都 係以前打工，跟啲女仔學嘅。」Dick一輪嘴道。「啱啱識就好熱情，好容易俾人以為我係色魔。」阿威自嘲以前在美甲中心打工時，多次被客人投訴他太 「cool」。「有時好專心畫緊嘢，真係聽唔到個客講嘢。」不過，創業後，阿威坦言已盡量改善，主動同熟客傾下私事。「但始終唔係好慣，因為一講嘢，就要 停手望吓個客，一時分心畫錯，又要抹走再畫過。」另外，女士性格飄忽不定，令性格剛直的阿威摸不着頭腦，「問佢鍾意咩又唔知，建議俾佢又話唔好，惟有俾本 雜誌佢慢慢揀。」阿威無奈道，更細聲向記者表示，幸好Dick善於「冧客」，兩人性格一凹一凸，做生意才「夾得埋」。 吸客招數二指甲畫漫畫 Dick冧客有一手，但對外宣傳時，阿威才是主角，他十七歲已到漫畫社任製作助理，十多年間畫過《李小龍》、《拳皇》、《天蠶變》等漫畫書。漫畫業式微 後，曾轉行做過搬運及私家偵探，○七年看到報紙刊登廣告聘請繪畫師，便走去應徵，「點知去到先知係請人畫指甲。」阿威指，獲聘後兩個星期便要為客人畫花， 「第一次接客要畫喱士，唔知點畫，結果畫了兩個鐘，被個客鬧。」漫畫師出身，在行內可說是「開先河」。雖說美甲店開到成行成市，但真正識畫畫的美甲師不 多，因此阿威在行內迅速冒起，他每個月都自創新式漫畫圖案，送往美甲雜誌刊登。上週四，便遇到《美甲天書》的工作人員前來拍照。漫畫師夠噱頭，吸引不少大 眾媒體主動上門採訪，變相免費宣傳，客人亦慕名而來。「要突圍，一定要有特色。」阿威認真道。兩位老闆各有擅長，Dick資歷深，基本功、黐晶石及立體花 飾等，均手到拿來，而人手作畫部分，則由阿威負責。二人會用分流方式接客，提升效率。「客人嚟到，由我先修手、塗表層gel、磨花水晶甲面，再交俾阿威畫 畫，咁我又可以做下一個客人。」公司現儲落二百多名熟客，大多購買十送一的套餐。一週內新甲褪色或崩落，上門補甲不收費。阿威表示，誇張的漫畫人物一般只 用作宣傳，女士最喜歡的圖案離不開玫瑰花及喱士等。「要視乎客人的工作性質，有時公司唔俾畫到咁花。」例如空姐大部分只塗淨色，少女喜歡卡通、Hello Kitty款式，闊太毋須工作，喱士、鮮色、卡通一律通殺。適逢節日如萬聖節，很多客人要求畫南瓜、骷髏骨頭等。 吸客招數三招生變招客 小本創業，Top Nail並沒有賣廣告，只開設Facebook，更新最新的花款，吸引熟客換款。開業初期，大部分熟客都是Dick打工時儲下的客人。為增加宣傳，兩個老 闆決定開班授徒，結果不少學生反而變成客人，而有客人亦報名上堂，相得益彰。其中，恭和堂太子女董小姐，便是Dick從舊公司帶來的熟客，早前更報名上 堂。「初時以為學咗個指甲崩了都可以整番。但原來自己學完係無心修的，之後都要搵佢哋修甲。」董小姐笑說。現在，Top Nail設有五百元三小時的DIY興趣班，之後可升級至修手皮甚至專業級指甲畫花包實習班，六千元共六十小時，上課時間彈性，更可免費延長時間，教班收入 佔生意額約一至兩成。「美甲同畫畫一樣，要睇天分，同經常練習，如果學生肯學，我會毫無保留地教佢哋，個個人風格唔同，唔驚佢哋學成開鋪搶生意，反而佢哋 成功嘅，我做師傅嘅名氣亦更大，呵呵。」阿威自信道。市面美甲店大多用OPI牌子的甲油，但Top Nail卻用美國品牌Anna Sui甲油。Dick曾獲Anna Sui邀請做導師，教授學員美甲知識。後獲品牌給予折扣價買入甲油，每支比專門店便宜十元至二十元。「Anna Sui的價錢同OPI專門店的售價差唔多，但我覺得前者較順滑，擦指甲邊位時較易控制。OPI有新舊貨同水貨之分，我教同學仔自己做生意，最好入正貨，喺 呢度上堂，我會提供埋不同代理商嘅資料，方便入貨，唔會俾人呃。」 開業資料 （06/2010）租 金：$24,900*入 貨：$28,000裝 修：$8,000雜 費：$2,800總投資：$63,700*兩個月按金，一個月上期 營業資料 （06/2011）營業額：$73,100租 金：$8,300入 貨：$2,800雜 費：$2,000人 工：$20,000*盈 利：$40,000*包括老闆二人 |
||||||