📖 ZKIZ Archives

自認加料Sell底褲 方力申狂操變爆肌男

1 : GS(14)@2014-05-14 00:59:34

http://hk.apple.nextmedia.com/entertainment/art/20140513/18718057'

                              又一個肌男胸降娛樂圈！現年34歲的方力申經4個月地獄訓練，成功搣脂激減30磅肥肉，操出41吋胸肌和6嚿腹肌，剝剩一條底褲拍廣告，超激凸的「小小方」浮誇到爆，方力申大方承認有裝假狗：「軟嘢硬嘢都攝吓！」得戚的小方揚言不介意接拍露股戲為藝術犧牲。

                前飛魚王子方力申曾代表香港參加2000年奧林匹克運動會，退役後火速加入娛樂圈做歌手，近年轉戰內地拍劇賺人仔的他，最近以過百萬人仔酬勞接拍內地品牌底褲廣告，由於要剝衫僅着底褲示人，小方由今年元旦開始苦練身材，跟轉行做健身教練的杜德智操弗，小方昨日接受電話訪問說：「自己一直有做開運動，由以前一星期三日變日日做，可能以前係運動員，更加事半功倍，由最肥169.5磅減到139.5磅，胸肌有41吋。」

汗水換腹肌

                然而，廣告相中的小方有點硬膠，身形線條更疑似造假，尤其是「小小方」超浮誇，小方坦言：「呢啲後期製作裝吓假狗，攝吓墊吓，軟嘢硬嘢都攝吓，但攝乜唔講得，係商業秘密。」問裝大了幾個size？他笑說：「大咗半個度啦，真係唔知。」小方承認有執相：「平常人影相都美圖秀秀，好在有拍片證明，唔怕畀人話身形唔係堅，終於明白男仔點解有腹肌鍾意自拍，因為用汗水換返嚟，梗係要show off。」
剝剩底褲拍廣告有否尷尬？他說：「唔尷尬，可能內褲好似泳褲好貼身，現場幫我整衫嘅女仔得23、4歲，佢攞嘢畀我攝，自己轉身變魔術。」問是否想挑戰碧咸的底褲廣告？小方說：「梗係冇，挑戰自己，呢個係好機會，希望有突破接多啲唔同戲，但性愛場面暫時過唔到自己，剝褲見八月十五都OK。」

                                                                                               

■小方今年元旦體重達169.5磅，拿着當日報紙做證展開瘦身大行動。

■小方以7位數接拍底褲廣告，「小小方」浮誇激凸，他坦承有裝假狗。

節食斷六親

                  小方用4個月激減30磅，他公開地獄減肥秘笈：「多數做單槓、引體上升、sit up，亦同泰拳朋友跑步打拳踢腳，從來冇諗過可以有腹肌，去奧運嗰段時間都冇，我諗自己係游得最快但身材最唔好，因為食得多。」小方指最後階段的節食過程最重要，這期間他就斷六親：「同家人飲茶只係飲水，睇到腹肌線條出晒嚟，最後塊面凹得滯過咗龍，有段時間冇食飯仲變排骨仔，廣告出嚟都覺自己過瘦。」

                                                                                               

■年逾50歲的杜德智身形fit爆，難怪小方請他做健身教練。

■小方接受健身教練杜德智特訓，操出胸肌和腹肌。

                節食減肥更令小方脾氣變得暴躁，他說：「烚嘢唔好地方係脾氣暴躁，媽咪成日引誘我食嘢．自己發脾氣，阿媽受咗我好多氣。」問女友鄧麗欣有冇讚他弗了？小方說：「有，佢話早就應該咁。」女友很滿意你身材？小方說：「但佢見唔到，嗰段時間佢喺內地拍嘢，自己更加專心節食，仲可以多啲時間做運動，拍廣告嗰日佢返嚟探班，都嚇一跳以為我病咗。」
拍完廣告後小方放縱飲食，8日後反彈16磅，他說：「夏天會再keep，估唔到人生可以做到咁樣，希望可以keep住鼓勵大家做運動。」
採訪：皓騫

操肌秘笈：兩星期地獄餐單

早餐

                  4條烚雞柳、西蘭花／椰菜花、4-6隻蛋白

午、晚餐

                  4條烚雞柳、西蘭花／椰菜花、4-6隻蛋白、一碗飯或2個番薯

小食

                  西芹、紅蘿蔔

運動

                  一星期三日跟杜德智健身，兩日打泰拳，兩日自己做運動

三日健身

                  操肌（一粒鐘）＋跑步（50分鐘）
方力申跟健身教練杜德智狂操單槓引體上升、雙槓（dips）、sit up、風火輪等器材，場地沒受限制，有時在杜德智的studio，有時在維園做運動。

兩日泰拳

                  打泰拳（一粒鐘）＋跑步（50分鐘）                                                        

---

2 : GS(14)@2014-05-14 00:59:51

http://hk.apple.nextmedia.com/entertainment/art/20140513/18718059


一向不介意剝衫的方力申，自小已經是香港泳隊代表隊成員，曾參加奧運，之後更殺入娛樂圈，由歌壇到影壇全部見到其蹤影，他更樂於在人前晒身材，但從未見爆肌出現。
童年圓碌碌

身形圓潤，非常可愛。
2000年俊飛魚

代表香港到悉尼參加奧運，身形雖健碩，但仍未見有腹肌。
2004年火炬手

雖然已經退役，但仍有機會擔任奧運的火炬手。
2006年晒泳褲

為南亞海嘯災民籌款，穿上泳褲替攝影師紀嘉良的寫真集任模特兒。
2007年勤練肌

開始邀杜德智任其私人健身教練。
去年戰娜姐

與周秀娜在內地拍攝劇集時，大晒胸肌。

---

3 : GS(14)@2014-05-14 01:00:03

http://hk.apple.nextmedia.com/entertainment/art/20140513/18718062


方力申爆肌拍攝內褲廣告，很多男星為演出，也曾花功夫鍛煉腹肌和人魚線。
張家輝

去年為拍攝電影《激戰》，不吃鹽、油、糖及澱粉類食物之餘，每天只吃2、30隻雞蛋白以增加體內的蛋白質；到要拍攝前3日狂食飯，靠澱粉質來爆肌。
杜汶澤

為拍攝電影《3D豪情》，開始「白烚人生」，既在社交網上載自己的大隻照，更分享操肌心得及食譜。
張繼聰

去年為配合新碟《無限可能》練6嚿腹肌，除了節食節水，他趁拍劇、錄歌空檔健身，有時深夜收工後也舉鐵及跑步3小時。
彭于晏

為拍《激戰》狂谷肌，接受三個月地獄式訓練，方法就是每天健身2-3小時，飲食上只吃由白水煮的蛋白和雞胸肉果腹。
周杰倫

去年為演唱會而鍛煉八嚿腹肌，他練肌期間堅持少油少鹽，連大夥出去聚餐，他都堅持只吃烚菜。

---