逾200粉絲銅鑼灣捱熱撐場孝淵派心 怕醜儍笑
1 :
GS(14)@2016-07-09 07:02:13■孝淵昨午單拖現身銅鑼灣，晒腿冧港迷。
韓國女團少女時代（少時）成員孝淵大前日單拖來港，昨午出席於銅鑼灣舉行的代言彩妝品牌ABSOLUTE NEW YORK活動，獲超過200名粉絲撐場。孝淵一見粉絲即狂派心心，不過行開型格路線的她似乎有些怕醜，不時掩嘴笑，展現少女一面。而孝淵亦不忘少時的好姊妹，力讚秀英素顏最靚。
讚秀英素顏靚
昨午12時35分，穿上黑色短褲晒腿的孝淵準時現身，一出場即用普通話打招呼：「大家好，我是少女時代的孝淵，很開心見到大家。」港迷就用韓語大叫「我愛你金孝淵」，孝淵即識做地擺出大心心手勢回應，然後影相時又不停派心，不過她似乎有些怕醜，其間多次掩嘴儍笑，連主持都說孝淵非常嬌俏。近期流行韓妝，孝淵即大方分享心得：「眼妝很重要，我會用眼影營造眼神深邃的效果，再加條清晰的眼線。」又透露會用粉色系的妝容展現甜美一面，而要行型格路線時就會化煙熏妝。問到孝淵最滿意自己哪一部份時，孝淵答：「很多人讚我笑得好看，所以我最滿意自己的笑容。」而她平時偏好望落似冇化妝的自然妝容，不過強調眼神要深邃。至於對自己素顏有沒有信心，孝淵猶豫了一會後笑言：「有！」更透露：「少時每位成員都好靚，不過當中以秀英的素顏最美。」孝淵又大爆以前Tiffany會幫她化妝，少時成員果然好感情。
■超過200名粉絲逼爆店門口，捱熱撐場。
■親民的孝淵跟粉絲自拍，不忘派心心。
有主持美妝節目的孝淵提到未來的工作計劃：「之後會演出跳舞節目，如果有機會的話，也想挑戰演戲及演出綜藝節目。」至於是次來港，孝淵表示想食火鍋、點心及蛋撻，又稱自己在香港有很多朋友，今次來港工作可以抽空跟朋友見面覺得好開心。而非常識冧港迷的孝淵在會上跟幸運粉絲自拍，又為30名粉絲送上禮物及影合照，最後不忘用廣東話再次打招呼：「大家好，我係孝淵。」更承諾之後會多來香港，港迷當然收貨。採訪：梁展雯攝影：沈健程
來源:
http://hk.apple.nextmedia.com/entertainment/art/20160709/19687217
【《蘋果》獨家】人人問孝淵「我手袋冇泡菜！」
1 :
GS(14)@2016-07-12 03:19:34■少時成員孝淵上周來港時，獨家接受「人人問孝淵」環節。攝影：仇志德
【我Q你答問會】人人問港星大家就睇得多，《蘋果動新聞》今次搞搞新意思，首次搵來韓星玩人人問，更獨家邀得上周五在銅鑼灣出席彩妝品牌ABSOLUTE NEW YORK的韓國女團少女時代（少時）成員孝淵做「人人問孝淵」環節。雖然孝淵單拖迎戰港人問題，但超親民的孝淵全程有問必答，即使幾咁怪雞都冇有怕，自認做「辣女」之餘，又唔敢自己讚自己，最搞笑是被問到是否隨身帶住韓國國寶食物「泡菜」時，孝淵即不拘小節自摷手袋證明自己冇泡菜。採訪：鄒倩婷
Hing
■為了證明冇隨身帶泡菜，孝淵即自摷手袋表示只愛袋住日記簿。
1. Hing：聽講韓國人出trip會帶泡菜，你有冇帶？可唔可以睇吓你個篋或者手袋有啲咩？
孝淵：我手袋冇泡菜！我成日帶住印咗我名嘅日記，由小學開始寫日記，每過一段時間都會翻睇啲日記，會湧起好多回憶，而且日記又可以記錄回憶，所以好自然養成呢個習慣。除咗日記仲有眼影、胭脂唇膏兩用筆、薄荷糖、香水同聽歌、睇片必備嘅耳筒。
Matthew
2. Matthew：今次啲相影得好靚，影相時覺得難唔難？
孝淵：謝謝。今次係我個人名義擔任代言人，想騷到最靚一面畀人睇，所以都有負擔感，喺品牌影相嘅前一晚都有特別做保濕護膚。
Connie
3. Connie：少時裏面你同邊個最friend？通常會同邊個send message？
孝淵：唔可以話同邊一個最friend，會睇情況。因為成員眾多，有一齊購物嘅最好朋友，有談心嘅最好朋友，又有食飯嘅最好朋友。成員有一個聊天室，大家會「吱吱喳喳」咁講嘢。
Eleanore
4. Eleanore：你最鍾意自己身體邊一part？
孝淵：有啲怕醜，聽過其他人讚我腳踝同鎖骨靚。
掃興
5. 掃興：唔知你平時有冇睇開韓劇呢？可唔可以介紹一齣畀我？
孝淵：我有睇而家播緊嘅《Doctors》（由朴信惠和金來沅主演），亦都可以介紹畀大家。
Yvonne
6. Yvonne：韓國人咁食得辣，作為一個咁靚嘅女仔，你又食唔食得辣呢？
孝淵：我好鍾意食辣嘢，以前唔係好食到，但開始食之後就慢慢越食越辣。而且食辣嘢可以幫我減壓，所以都成日食辣嘢。
IVY
7. IVY：少女時代幾時comeback？有咩新image？
孝淵：我知有好多粉絲都等緊我哋團體comeback，但最近各成員都專注喺個人活動上，所以幾時comeback依然係秘密。
Joyce
8. Joyce：你唱歌同跳舞都咁叻，仲有邊方面想新嘗試或者挑戰？
孝淵：有機會嘅話都想挑戰拍戲，或者多樣化嘅活動。因為係首次挑戰，所以想演同自己性格相似、活潑識搞氣氛嘅角色。
來源:
http://hk.apple.nextmedia.com/entertainment/art/20160711/19689343
【女神自摷】少時孝淵揭私密 自摷手袋有啲乜！
1 :
GS(14)@2016-07-12 03:19:35孝淵公開佢嘅手袋有啲乜，原來隨身帶住一本日記簿，話將來睇返會記得好多回憶。
首位韓星挑戰「人人問」，佢係邊個？～～少女時代成員孝淵。上回有蘋民問到：「聞說韓國人出埠要帶泡菜，唔知孝淵你有冇帶呢？可唔可以睇吓你個手袋？」點知！孝淵竟然有求必應，即刻叫工作人員攞自己嘅Chloé黑色皮手袋，笑住話：「我手袋無泡菜！」
仲有化妝品、薄荷糖、香水，同埋佢話好緊要嘅耳筒！
孝淵做完訪問摷完手袋，勁有手尾自己執嘢，完全無明星架子，工作人員睇到都即刻嚟幫手。
仲任影唔嬲勁親民，抵我哋買雞蛋仔同奶茶畀你試，孝淵話第一次見雞蛋仔！
孝淵無隨身帶泡菜，但係就隨身帶住一本日記簿，訪問當日帶住嗰本，印咗孝淵嘅名「HYOYEON」。孝淵話小學就開始寫日記：「每過一段時間我都會翻睇啲日記，例如睇吓做練習生嘅日子，睇返會湧起好多回憶，所以覺得寫日記好好，亦都好自然養成呢個習慣。」
孝淵嘅手袋當然唔少得有化妝品，以備不時補妝，加上今次做咗美國化妝品品牌代言人，手袋就當然有眼影同埋胭脂唇膏兩用筆。另外，孝淵仲有帶薄荷糖、香水，同最緊要嘅耳筒！孝淵話，「我成日聽音樂，尤其喺飛機無聊嗰陣，要聽歌、睇片、睇戲，所以耳筒係必需品！」但係點解佢手袋無逃生三寶：銀包、電話同埋護照嘅呢？有助手真係好！
孝淵仲為咗冧香港fans，即場跟繙譯學咗句廣東話：「我愛你哋」
呢次孝淵為代言嘅化妝品牌嚟香港，係佢首次以個人名義擔任代言人。
孝淵摷完手袋，繼續出招冧香港粉絲，即場問繙譯：「教我一句廣東話同香港粉絲講吖！」繙譯就教孝淵講「我愛你哋」，孝淵仲即刻重覆講咗幾次「我愛你哋！」，然後好開心咁話：「今日終於學到一句廣東話喇！」真是冧死粉絲！為感謝孝淵全程有問必答，動主播阿仙仲準備咗香港特色小食－－雞蛋仔同奶茶作回禮，孝淵巧驚訝咁指住雞蛋仔話，「我第一次見！」睇嚟孝淵今日有嘢寫落日記簿喇！
來源:
http://hk.apple.nextmedia.com/entertainment/art/20160711/19689702