| ||||||
| 噚 日輪到會德豐（020）公佈年報，主席吳光正舊年人工加15%至2931.9萬銀，佢兩名左右手李唯仁同吳天海，亦分別加薪11%同10%。舊年會德豐盈 利倒退超過五成，但吳光正人工就由2544.5萬加到2931.9萬銀，當中底薪升7.8%至1505.6萬銀，花紅更大增17%至1400萬銀。老臣子 李唯仁亦唔失禮，人工由1082.2萬增至1204.5萬銀，當中底薪同花紅分別佔492.5萬同700萬銀。 吳天海人工加一成 不過華華最有興趣係吳天海份糧，雖然佢舊年人工加一成至1380.6萬銀，但當中佢喺有線寬頻（1097）嘅人工，就縮水7.6%至693.2萬銀。咁又係嘅，舊年有線業績係上市9年嚟首次「見紅」，身為當家嘅佢又點能夠唔減少少做啲嘢呢。 | ||||||
| ||||||
| 李超人講過，響 香港地要搞私有化成功，先決條件係無得罪人又無俾人搞，但計華華話，佢老人家應該數漏咗一點，就係班小股東要睇得化！ 舊年電訊盈科 （008）、華潤微電子（597）、鱷魚恤（122）同JOYCE（647）私有化單單撻Q，大家都諗住會德豐地產（049）今次衰硬，點知噚日佢哋個法 院會議同股東特別大會，投票過程竟然出奇咁順利同詳和，兩個會夾埋唔使兩粒鐘就通過咗私有化。第一場法院會議，贊成私有化嘅小股東票有98.76%；第二 場股東特別大會仲誇，有99.92%贊成。 其實，會地大股東吳光正10年前已經想圓呢個私有化美夢o架嘞。當年會地仲叫做新亞置業，00年 9月會德豐想私有佢，但最後失敗咗。估唔到吳生同股東鬥長命，今次終於成功圓夢。 雖然過程話就話祥和，但點都有啲聲音嘅！好似曾經反對電盈 同鱷魚恤私有化嘅「私有化剋星」梁國強就投反對票，佢嫌作價低過資產淨值好唔合理；另一位激動伯伯雖然狂呻，但覺得小股東幾時都唔夠大股東鬥，所以覺得唔 合理，但亦惟有無奈贊成，畀番啲股票大股東。如無意外，會地喺下個月22號就會除牌。 不過，你又唔使戥小股東慘喎，事關有人歡喜有人愁唧！ 有個婆婆笑到四萬咁口同華華講，佢相當滿意私有化作價，皆因佢揸咗會地N咁多年，成本好平咁話。 李華華 [email protected] | ||||||
| ||||||
| 地產股星級（其實可能係神級）分析員陸東，自從自立門戶做基金公司老闆之後，可以好奢侈咁花多啲時間做自己喜歡嘅嘢，唔再淨係為生活賺錢咁dry，佢一向都想回饋吓社會，好似最近，佢就忙於瞓身幫一幫弱勢社群！ 聖雅各福群會噚日喺海港城舉行「泥造人．樂造人」陶藝展覽，畀善長人翁競投弱能人士親手製作嘅泥公仔。搞手陸東為咗個event，近日好高調咁接受周刊同報紙訪問，順帶「硬銷」呢個展覽會，噚日仲親自出席開幕禮做埋主禮嘉賓，真係盡心盡力！ 東哥同華華講，海港城呢個展覽場係佢負責搵返嚟，而且九龍倉方面一傾即合，立刻借個場出嚟，「我同地產商嘅關係都幾好嘅！」原來佢同吳光正嗰面關係咁好！東哥又會唔會學人從政咁呢？佢就話自己冇興趣。 講開東哥自己個基金，佢話其中一個大中華基金主要投資內地工業、地產同消費股，公用、航空同電訊股就冇掂，點解？好似航空股咁，係受保護動物，好極有限；電訊股就冇乜增長……嗱！又袋錢落大家個袋喇！ 李華華 | ||||||
|
||||||
|
如果問邊個係香港「名牌」嘅代表，大家會毫不猶豫話係潘迪生同Joyce Ma馬郭志清。不過，呢個答案應該係10年前嘅事，今時今日，華華話係吳光正。 意 大利時尚精品集團「飛甩雞毛」Ferragamo噚日發聲明，話佢哋已經將旗下奢華成衣品牌Salvatore Ferragamo 8%股權，賣畀香港嘅吳光正家族，聲明無講用咗幾銀。除咗賣少少畀吳光正，總部喺佛羅倫斯嘅「飛甩雞毛」仲話，會增加喺大中華區分銷公司嘅股權，由50% 升到75%。 名牌潘Joyce Ma頓失色 「飛甩雞毛」掌門人Ferruccio Ferragamo話，佢希望咁樣做可以鞏固集團喺第三個千禧年奢華產業關鍵區域嘅地位。 查實吳光正幾年前已經同「飛甩雞毛」搭上，佢家族幾年前已經透過3間公司，經營連卡佛、Joyce（647）同埋俊思集團，而俊思就正正係「飛甩雞毛」同Guess等名牌喺香港嘅內地代理。 反觀「名牌潘」嘅名牌王國就開始失色，先失Polo Ralph Lauren，再失Tommy Hilfiger，真係賣少見少。至於Joyce Ma更加唔使講，成間Joyce幾年前都已經過戶畀吳生。 收 集咁多名牌，相信唔單止係個人喜好，仲記得，吳光正趁低將連卡佛收歸私人所有，其後買埋Joyce，早前更加想將佢私有化，但唔成功，不過無阻吳生繼續密 密「買」名牌，心水清嘅都會諗，他朝名牌滿袋，打包上市，仲唔係No.1名牌股。家陣最多銀両買名牌嘅係中國同胞，吳生喺內地各大城市都有大商場，仲唔相 輔相成。 |
||||||
| ||||||
澳門賭業興旺，搞到唔少民營企業家賭到連間上市公司都無埋。綠城中國（3900）大股東宋衞平，最近被內地私募基金經理閻焱，踢爆「衰爛賭」，要將旗下綠城24.313%股份，以63億元出售予融創中國主席孫宏斌，手頭只剩番一成八股權。 睇真啲，綠城第二大股東、九倉嘅吳光正，一樣揸緊24.313%股份噃！即係大家扯平，你唔多過我、我又唔多過你。咁邊個話事先？ 綠城公告指成立了「財務及投資委員會」，由九倉、宋衞平及孫宏斌派代表議決，一人一票。不過後兩者friend過打band；如果下下投票都二對一，吳老闆仲有無癮？ 吳光正兩年前入股，主要係想搵支盲公竹，打通內地政經商情，但佢幾年來股份賬面無賺，又無話事權。 睇番往績，佢同人「合作」，都無咩好結果。九三年，同長實李超人洽商鹽田港計劃，雙方就項目管理權爭持不下，最終九倉退出。再早啲，九十年代與英國國民西敏寺銀行合作，創辦豐敏集團進軍金融業，但差強人意，會德豐又終止投資。難怪吳光正早年曾對「合作」下了定義：「符合雙方利益才叫合作……要維護自己利益……誰做得好，誰就做曬100%！」咁對佢下一步，有無啟示呢又？ 啤梨豪宅有幾嘆？ 上期小宗爆啤梨張震遠「慳人闊自己」，被人申請破產但照樣續租三千呎豪宅。係嘅，雖然月租十七萬，但坐擁無敵淺水灣靚景，露台又大到可以開兩枱麻雀，點捨得走？今期再睇啤梨豪宅有幾嘆！ 人大定人大嘅代表 陳智思話自己係「中華人民共和國人民代表大會香港代表團代表」，乜佢唔係人大嚟嘅咩，點解變咗做代表團嘅代表呢？唔使刻意矮化自己噃！ 職場秘笈鬧人要有同情心 港大建築系畢業，由一個小小的項目經理，扶搖直上，升任至富豪國際（78）、百利保（617）及世紀城市（355）的董事。他每期分享不同的職場經驗及秘笈；要上位，無往不利。我打工多年，很多時也會發脾氣，或者控制不到自己情緒。回想起來，原因大部分都很無謂。其實，憤怒時做的事情多是錯，又或會說一些令自己後悔的說話，覆水難收。作為上司，假如無法控制自己的情緒，有很多壞處。他一定會向下屬發脾氣，下屬再向下屬發脾氣，造成反面的multiplying effect，向下擴散。即是一個人唔開心，而令到全世界都唔開心。究竟，怎樣做到泰山崩於前而色不變？當你想發脾氣時，先深呼吸一下，我試過左手畫圓圈、右手畫四方形，然後不發一言，對方（激怒你的那位）當然也沉默下來。如果可以，雙方最好離場一會。經過兩、三分鐘cool down，讓氣氛緩和下來。當下屬出錯，令人憤怒，需要發一封信（或電郵）責罵。信，可以照寫，但請等到二十四小時後，心情平復下來後，再把信讀一遍，看看是否有地方可作出修飾。事關最憤怒時候寫的信，一定寫了很多難聽的說話，收唔番。罵人的時候，也要有同情心。易地而處，如果被人用同一番說話罵的是你自己，你有什麼感受？找一個比你叻的人，做你榜樣。如果同一件事情發生，想像一下那人又會怎樣處理？他一定會比你淡定和輕鬆。你懂得這樣想，情緒又會好一些。我枱頭放了三個字警惕自己：勿動怒。經常看著，慢慢已經潛移默化，不再容易發脾氣。 金牙大狀講嘢詩姑改姓 詩姑話經過一百五十六年殖民統治，香港人俾紅毛鬼「洗腦贏心」，以致「國家觀念薄弱」，窒礙中港融合。一句講曬，所有嘢都係英國佬唔好、香港人唔啱、香港人唔著，乜都唔關強國事。一個唔覺意，仲令人以為詩姑係姓賴嘅，唔係姓梁。講起「洗腦」，呢味嘢唔係共產黨嘅看家本領嚟嘅咩？否則班學民仔又使乜反國教，拒絕洗腦呢？點解詩姑長他人志氣、滅自己威風，話啲紅毛鬼玩呢家嘢玩得仲叻呢？若果紅毛鬼果有本事贏盡香港人嘅心，甚至回歸十七年後依然仲有班後生死心塌地撐住支龍獅旗去遊行，咁詩姑係咪好應反省反省呢？自己唔照鏡，淨係識得賴人，唔通咁都可以贏心？冇可能o架噃。 | ||||||
| ||||||
出名數口精嘅九倉（4）主席吳光正講過，做生意「合作」係要好小心，所以喺香港甚少合資項目，九倉入股綠城（3900）一役，可謂正中下懷，遇到高手過招。兩年前綠城缺水，九倉一鋪攞五十億人仔入股綠城兩成四，做個第二大股東，點知十幾日後，綠城收第二家——融創（1918）茶禮，將綠城九項優質資產注入兩家嘅合資公司——融綠，吳光正眼白白睇住隻金蛋被「移動」都無聲出。 最近綠城同融創更殺吳光正一個措手不及，綠城個老細宋衞平將手頭兩成四股份賣晒俾融創老細孫宏斌，大拿拿六十三億銀交易袋袋平安後，突然話「悔婚」，分手費係咩呀？孫宏斌話要隻金蛋融綠五成股份喎，讀番書嘅吳光正應該聽過Fool me once, shame on you. Fool me twice, shame on me道理，拿拿臨派副主席周安橋上杭州，做乜？「維權」啩！ 踢竇創興頂樓擦蛇羮 喺中環幾乎絕跡嘅華資銀行，以往老細都鍾意自設廚房宴請客戶食私房菜，早前把創興銀行賣俾越秀集團嘅廖氏家族，仍揸住成幢創興銀行中心磚頭，呢，喺廿八樓就有個宴會廳，用嚟招呼吓以往廖創興銀行嘅客仔，咁梗係有番咁上下嘅「大」客戶先book到枱啦。咪以為呢啲地方食嘢好貴，因為唔使交天價租金，反而真材實料無打斧頭喎，工廈小王子楊國佳上週五就宴請友人吃蛇羮，唔知係咪「料」足，食到回復青春期爆瘡，佢啲朋友就話呢度嘅蛇羮可媲美以往恒生崩牙成出品。不過唔係話食就食，好似廖氏另一潮州友好楊海成，一個月前已訂位寫菜單，等師傅去搜挖食材；聽聞呢個私竇個廚，跟四叔李兆基個御用廚師李霖分屬同門師兄弟，又喺恒生做過，所以蛇羮有番咁上下水準。呢個廖氏私竇又唔多見越秀啲老總、企管人員嚟食喎，有中環口痕友話，自從華潤集團前董事長宋林，被中紀委揭發喺灣仔華潤五十樓豪飲豪食，國企啲老總又豈敢踏足私竇呢，係都行遠啲啦。 「收租王」倫伯仙遊心願未了 坐擁百億物業、有收租王之稱的「倫伯」倫志炎，於十月三十日突然離世，享年八十五歲。上星期，銅鑼灣堅拿道天橋旁的伊利莎伯大廈停車場外牆，掛出兩幅巨型訃文，所有進出紅隧的車輛，都可以清楚看到。倫伯縱橫地產投資界近五十年，治喪委員會成員逾二百人，政商界猛人雲集，包括前律政司長梁愛詩、嘉華主席呂志和、滙豐亞太區副主席王冬勝等。後人高調治喪，但倫伯在世時生活低調、節儉，是名副其實的隱形富豪。倫氏持有近八十個柴灣杏花邨單位，倫伯亦擇居於此，出入沒有名車、司機，最愛搭的士，或拿住張長者八達通，搭巴士、港鐵，周圍巡鋪。倫伯凡事愛親力親為，近年最掛心的，相信就是以伊利莎伯商場為中心的銅鑼灣發展計劃。自○五年以近十五億元，向上海公路大王劉根山買入伊利莎伯大廈地下至六樓商場及停車場後，倫伯之後再陸續買入謝斐道多個地鋪，計劃將該地段重新包裝。可惜，計劃進展緩慢，不少商場及地鋪長期丟空。後人將其「訃文」懸掛於此，相信亦呼應倫伯的心願。他日謝斐道變天，大家都會記住這位傳奇收租王。 澳門爆爭地戰 話說澳門一幅位於青州山、市值過百億嘅土地，最近引來當地兩大幫派人馬垂涎。呢幅地面積有成五萬六千平方米，鄰近珠海邊境，屬澳門青州山重建計劃範圍，絕對有潛力發展。根據土地登記資料，塊地由香港商人孫衞民旗下公司持有，佢係前特首董建華表弟，實力有番咁上下。問題係，塊地嘅舊業主唔肯放手，雙方仲鬧上澳門法院。官司未有裁決，但塊地已經俾不少有勢力人士吼住，仲高姿態喺幅土地「插牌」，宣示主權咁話，當澳門司法制度冇到！小宗收到風，舊業主為咗抗衡對方，已經搵嚟曾經叱咤澳門一時、兩年前啱啱出冊嘅江湖大佬相助。新舊澳門勢力正面迎戰，嚟緊仲有連場好戲。 金牙大狀講嘢大孖沙冇飛士俾 滬港通1117號列車並冇出軌，卻化作無人駕駛、無客乘坐之幽靈列車，咁搞法非但詭秘，連親手送上大禮嘅李克強總理都冇晒飛士。學得魯平主任話齋，怎麼辦？怎麼辦？滬港通單嘢由總理親自掛帥，係十二五規劃嘅重點項目。按理班大孖沙好好醜醜，冇理由唔支持o架。就算整色整水都要啦，係咪？而家搞成咁難睇，非但證明以兩地股市現今之格局，滬港通根本就冇啖好食，更深層次嘅意義係班大孖沙唔再俾飛士最高國家領導人。果真如此，都咪話唔濕滯也。濕滯成點？咁即係話班大孖沙猛然驚覺，事到如今，聽最高領導人支笛亦唔會有運行，咁仲使乜俾飛士你先？手尾長也。 | ||||||