中門大開：搶住入波 添馬男
1 :
GS(14)@2012-11-13 00:47:35http://hk.apple.nextmedia.com/financeestate/art/20121112/18064635
日前教育局局長「吳得掂」會見中學校長會，討論超額教師問題，會上林鄭「奶媽」陪同局長出席會議，真係令局長相當難堪。呢單嘢並非如國民教育咁濕滯，政府亦擺出有商有量姿態，為何要林鄭壓陣。
此舉實際後果係矮化梁粉局長，傳媒議論紛紛，認為吳局長無能，連咁簡單嘅事都搞唔掂，要勞煩政務司司長幫手。吳局長未來幾年想翻身，由低位反彈，好困難！因為佢嘅無能形象已深入民心。超額教師保留期由一年延長至三年，政府內部只要定下立場，在局長會見校長時表達政府看法，校長一定收貨，過程一點也不複雜。林鄭之壓陣，在政治姿態上是表達了內部對吳局長不信任，一來恐怕他會守唔住政府立場，作出過多讓步；又或者怕他亂噏，將政府讓步的一樁好事，變成了壞事。講到底就係信唔過佢嘅辦事能力。
但局內人另有睇法，尤其教育局就幾氣頂，因為本來由吳局長自己處理，冇請政務司助拳，因為咁大個人，都知道「奶媽」一出，必惹是非，招人取笑。今次司長出現，不是被邀請，而係林鄭主動要求，吳局長冇Say。局內人認為今次政府借超額教師問題向教育界示好讓步，修補反國教以來雙方對立關係，乃得分動作，所以林司長才搶住現身會議之中。
主動挺局長 遲早爆衝突
政務司司長「捨我其誰」的政治姿態，已開始在建制內部引起不滿，林鄭自己正步入政治險境而不自知。本地左派過去最痛恨陳方安生，一直認為她自視甚高，甚至想取董而代之，她亦極力阻止政府起用愛國人士，所以左派要除之而後快，最後由錢其琛出手訓斥，以退休告終。
梁振英乃董建華一力向中央推舉之特首，梁的大有為治港思路也近老董，早晚會同政務官價值爆發衝突，當年董陳之爭，極大機會重演。就算林鄭真係一心為吳局長好，其他人未必領情。林鄭司長，睇路！
添馬男