📖 ZKIZ Archives

來個中環大事回顧，首宗非鏞記爭產案莫屬。甘健成一方不但輸官司，佢老兄仲仙遊埋。兩個仔為秉承老父心願，正物色新鋪開間「琨勝廚房」。

不過開鋪要用嘅資金唔少，最新發展，係佢哋有意將手頭百分之四十五嘅鏞記股份，賣晒俾二叔琨禮，套現來開新鋪，心目中嘅價位係二十億！但據知他們仍未處理好甘健成的遺產事宜，由是雙方談判處於膠着狀態。 照睇，2013繼續有戲睇。

翠華秘密武器

同鏞記打對面嘅翠華，就愈做愈起，似乎威靈頓街條龍脈由鏞記射咗過去對面。翠華上市後，股價由$2.27一度勁升逾兩成至$2.73，並喺油麻地、尖東、沙田再開分店。據知，佢哋引入咗一部「真空豬扒按摩機」，為每一塊即將被煎嘅豬扒按摩半粒鐘，等佢舒筋活絡完之後，咬落會鬆軟啲咁話。部機聽落好搞笑，小宗問過幾次PR，但連張相同邊度買都唔肯披露，似乎視之為「大殺傷力秘密武器」﹗不過部機聽落似係美容院先會採用囉。

Give me a break

平日去開中環，要搵個地方零消費hea吓，唔係咁易，小宗醒你一個好位，就係滙豐總行五樓的卓越理財中心。呢度時時坐滿人，雖則要有成百萬身家，開個卓越理財戶口，先有資格坐喺度，但其實職員唔會check，仲好好笑容招呼，人人happy，真正做到「地方智慧」。去埋其他銀行，如渣打、恒生、中銀對照，如此服務，只此一家。

甘比麗君平分秋色

剛剛同大劉生咗個八磅男嬰嘅甘比，而家有一仔一女，剛好同呂麗君平分秋色。佢哋兩個嘅投資斬獲，一樣叮噹馬頭。兩年前，大劉一家科咗逾百億水去抽友邦，甘比同麗君各自派得二千六百幾萬股。友邦既阿媽賣仔救母AIG，順利配售逾五百億元的友邦股份，陰霾消除。股價氣勢如虹，升穿三十蚊，如果佢哋未套現，每人都賺成三億；友邦過去一年派息亦唔錯，額外袋多千萬股息。所以話，湊女朋友，俾隻好股佢上就夠和味。

中環「奇」景

有金執？有錢派？有IPO？通通唔係。此條在皇后大道中之人龍，原來是排隊買Jenny的特製曲奇（Jenny bakery），奇景也。

金牙大狀講嘢

股市交投淡靜，靠交易徵費支持之證監會舊年收入劇跌三成至兩億元左右，此可又無礙班大老爺加人工噃；同期佢哋薪酬上漲咗近一成四至超過一億八千萬元；加幅之大，恨死隔籬也。不過大家唔使驚佢哋洗腳唔抹腳，事關佢哋大把儲備，為數超過七十五億元，即使繼續大加人工都有排未使慌也。證監何以有咁多儲備？好天搵埋落雨柴囉。前幾年香港之上市集資額冠絕全球，連紐約都揮低；證監唔理三七二十一，只要有交投佢哋就有錢落袋；交投暢旺，佢哋有乜辦法唔肥過肥仔水先？不過係咁加人工，遲早有人眼紅，會俾人的上立法會照肺。要防患於未然，辦法不外乎兩個:一係就降低交易徵費，以免人工過高俾人眼紅；再唔係就學得金管局咁置業，即使唔係坐鎮IFC八十八樓，起碼亦應遷出長江中心，喺維港邊買番個有海景嘅單位，否則儲備多多，遲早出事o架

最近有北京經紀喺網上以近六億癲價，放售一座「目」字形嘅三進四合院（即由門屋、廳堂、兩廂共三個院落組成）。呢座「世界上第二個故宮」位於北海公園，佔地近七萬呎，建築面積都有成差唔多兩萬呎，九房九廳九廁，另加一個可以停放一百零八架車嘅地下室。

有份放盤嘅經紀小林話，呢座「皇家級別、京城唯一」嘅四合院原本建於一七五六年，係乾隆為其生母所起嘅居所，亦即係「北海九龍壁」同埋「大圓鏡智寶殿」所在地。但係喺一九一九年失火焚毀，十幾年前重建，現時業主係一個台灣人。小林仲話，已經有「五個高端客戶」話感興趣，更謂如想睇樓，要出示資金證明兼經律師核實，認真巴閉！其實呢間癲價四合院喺一○年曾經放售，當時開價四億二千萬，威震京城，不過無人問津，最近反而加價重現江湖。而北京四合院向來交投淡靜，兼且甚為秘密，小林透露，一年只有大約二十幾間成交，而且成交呎價企硬一萬蚊以上，比起大廈豪宅貴起碼一倍。「有實力的買家到處是，可惜沒好院子。」而有做開京城四合院買賣嘅經紀透露，一座位於故宮旁邊南池子大街嘅二萬七千呎四合院，正以十五億暗盤放售，呎價高達五萬五千幾，有美國投資公司正在洽談。

另外，可能因為呢排中央打貪風聲緊，搞到喺四合院經營嘅私人會所生意慘淡，最近多咗呢類盤源。好似喺后海一間唔夠四千呎嘅四合院，正以七千二百萬放售，呎價直逼兩萬，屬於北京頂級豪宅。北京四合院向來都係香港有錢佬心頭好。○六年病逝嘅「愛國商人」霍英東早喺八十年代就喺北京買入一間，據傳晶剛大婚，霍家就係送咗呢間四合院俾郭晶晶父母做聘禮。前港區人大朱幼麟嘅四合院極具皇宮氣派，專門請嚟藝術學院師生喺客廳天花畫咗一千零二條龍，為此用咗成兩公斤黃金，又搵維修故宮老師傅做裝修。至於港區人大王敏剛可以話係四合院大地主，佢早喺十年前已經有六間揸手。

租客：冬天好凍

德國商人Heino鍾情中國文化，一家五口月花三萬，租住東城區一間二千幾呎嘅四合院。佢話住喺四合院乜都好，不過最頭痕係冬天好鬼凍，事關並唔係間間四合院都有暖氣，就算有都未必夠暖。「而且電費好貴。」佢話冬天試過每個月交四千蚊電費。至於每到雨季，天花漏水同埋牆身滲水時不時都發生。不過斷估住喺「世界上第二個故宮」都唔使怕凍怕漏水啩！

本週圖片

記者喺山東煙台市中心隔五條街見到呢個「金木水火土」海報，仲以為麥玲玲擺風水陣擺到上煙台。行近一睇，原來係當地臨海豪宅「黃海明珠山莊」嘅樓盤廣告。至於呢五隻字可以點樣催谷新盤銷情，睇嚟真係要問過麥師傅先知！查番字典，鑫廣東話讀「音」，意思係金多興旺。淼讀「秒」，意思係水勢浩大。焱讀「驗」，解作光焰。垚讀「堯」，解作山高。