ZKIZ Archives


畢菲特vs道氏理論 我要亂up


http://jimwong1120.mysinablog.com/index.php?op=ViewArticle&articleId=2195252


近排思考的問題是, 應該學畢菲特長期持有增長的股票, 定係捕捉牛熊, 牛市盡買, 熊市一股不留呢?

畢菲特: 主張價值投資, 不同於其師傅格拉咸, 畢菲特要尋找的除左價值低估的股票之外, 他要找的是長期有競爭優勢的公司, 例如可口可樂, 強生等,  只要這個競爭優勢存在, 公司可以一直增長, 他可以一隻股票買他數十年仍然不賣. 一隻股票現價$10元, 每年賺1元, pe10倍, 每年盈利穩定增長15%, 10年後每股賺4元, 到時10倍pe即40元, 20年後每股賺16元, 10倍pe 即160元, 當中未計股息。( 當然畢菲特用債卷去比, 我用pe 去比, 有點不同, 但義意都一樣)。

道氏理論: 即所謂的牛熊市, 股市有分牛熊, 歷久不衰, 此因人心是不會改變, 一代歷一代, 熊市恐慌冇人買股票, pe 跌到好低, 好多公司淨現金仲高過市值, 即代表好快到熊市底、牛一到, 牛一時, 個個懷疑是否牛市, 到牛三時, 平時唔買股票的買, pe 每每上到數十倍, 跟住又爆破, 進入熊市, 不停循環。呢一個類似擺鍾, 由極度高估, 到極度低估, 如果捕捉到牛熊, 牛市盡買, 熊市一股都冇, 可以好容易短短一個牛熊週期, 成為富翁

現在的問題是, 應該學畢菲特, 買一d 有長期競爭優勢的公司, 買他十年八載.長期持有, 定還是牛市盡買, 到牛三頂就盡沽呢?

如果用畢菲特個招, 你要想想你有冇信心買到呢d 長期成長的公司呢? 你有冇咁高的心理質素賺了兩倍, 四倍仲唔放? 如果有一年業績倒退, 你能否有足夠知識去衡量間公司仲係唔係有呢個長期競爭優勢, 如果到股災時, 你仲可唔可咁勁, 唔沽貨?

如果用捕足牛熊的方法, 又要諗, 你係咪捉到牛熊先, 兩年前, 恒指二萬七時, 個市升到痴線時, 我已經放晒d 股票, 以為自己好醒, 跟住個市到二萬點左右, 開始入市, 入到萬七點, 已經無晒錢, 睇住個市差不多跌落一萬點。其實能夠捕捉到牛熊既又有幾多人呢..

我在想, 用畢菲特的方法非常難, 難就難在心理質素, 難在升左十倍唔放, 難在業績倒退時唔放, 難在股災時唔放。不如用格拉咸的方法, 來得簡單點, 努力做功課, 找出價值低估的公司, 然後等到合理值高一些就沽出, 每隻股賺它數十% 至數倍。然後配合牛熊的學習, 當個市升到痴線時, 全民皆股時, 就沽貨,但要逐步沽, 就算點沽都唔好沽晒, 留番一點, 因為牛市估頂, 實估唔到, 沽左既就走去做定期之類, 總之唔好俾自己咁易拿到錢買貨. 到確認股災, 起碼有8成現金, 分批買入, 要嚴守紀律買入, 當然亦肯定下一次股災係估唔到底, 多數一入就輸, 但如果好似08年咁, 萬八先入貨, 入到萬四, 萬五, 冇晒錢, 雖然一入即輸到扒街, 要輸幾千點, 但因為分注入, 拉低成本, 到牛市一到, 好快就由蝕變賺。

近年牛熊週期變得快左, 可能同全球一體化有關。幾年就黎一次股災, 幾年就有一次機會, 身邊不少朋友, 係03年買股買樓, 就咁發大達, 要做到呢一點, 似乎較學畢菲特更易呢! 不過, 當有一定資產時, 就可以部份資產畢菲特型長楂、部份資產以格拉咸型+道氏理論運作。

PermaLink: https://articles.zkiz.com/?id=15050

牛三買咩股? 我要亂up

http://jimwong1120.mysinablog.com/index.php?op=ViewArticle&articleId=2650661

近日公司開始多了人買股票? 我最唔鍾意就係見到呢d 情況出現, 全民皆股, 代表股市危險. 好在而家都未到全民皆股, 大約只有2成人左右買股. 新股亦唔係係唔係都升.股市應該仲係牛二, 不過牛三也快了, 近日在想牛三應該買乜股 ?

1.不如開十個股票戶口, 等新股咩都升的時候, 就去抽新股. 一隻一戶口賺一千, 十個戶口就賺一萬, 一百隻新股就賺一百萬, 哇哈哈, 痴線!
2.不如買銀行股, 而家股值平, 等到牛三完, 穩穩陣陣贏錢. 不過, 唔岩我玩, 我鍾意冒險
3.牛三通常有泡沫, 泡沫要跟住概念, 捉到概念, 話之你科網泡沫爆破, 你係爆破前走到你就發達. 不過, 今次牛三係咩概念呢 ? 物聯網? 新能源? 智能電網? 農產品? 資產價格泡沫?
4.垃圾股. 每次牛三, d 垃圾股都升到你唔信, 升10倍20倍既比比皆是, 但跌9成9的都比比皆是...你要捉就捉d 貨乾晒既, 係晒老闆身上既垃圾股, 然後見成交量顯著增加, 股價陰d陰d升個d 黎買, 出左名見討論區個個講, 就千奇唔好買
5.現金多既股. 有好多人都鐘意買d 現金多既股, 價值投資, 安全邊際喎! 不過, 呢d 股要睇佢質素, 佢現金多, 但佢唔派息俾你, 佢業務無增長, 無前景, 無故仔, 呢d 股係牛三, 可以行到唔行.
6. 有d 股, 每股盈利大增,pe降低, 有故仔聽, 什麼什麼增長前景好勁個d, 股價就升到嘭嘭聲, 最重要就係有故仔聽. 可以炒上50倍pe 都得啊! 早幾年個隻做外賣食物個間公司, 唔記得咩名添, 每股盈利不斷增長, 市場仲有好大空間俾佢增長, 雖然負債不斷惡化, 負債不斷上升, 但股價一於少理, 係咁升, 兩三年間升左十倍(好似). 最後, 雖然資金週轉唔到, 衰鬼左, 股價直插, 但你捉到呢段升浪, 都咪話唔和味.
7. 當然, 你穩到盈利不斷增長, 有故仔聽, 財政狀況又因為盈利增長不斷改善, 又肯派息既股, 就最正, 穩陣之餘, 股價又大升, 贏錢又贏得安心, 但係, 咁易咩....

PermaLink: https://articles.zkiz.com/?id=18994

大家樂=太刻薄 我要亂up

http://jimwong1120.mysinablog.com/index.php?op=ViewArticle&articleId=2675701

近日大家樂提高員工時薪, 但卻扣減了員工的食飯時間人工, 變相減人工, 真是太刻薄了, 結果被人改名做「太刻薄」, 成為全民圍剿對象。很多人都說以後不幫襯大家樂, 大家樂今次這樣做, 可能最後得不償失, 品牌聲譽受影響, 未知股價會否同樣受影響呢 ?

不過, 今日想談的不是股價, 或者加入主流去圍剿大家樂, 而是想說, 發生這樣的事是必然會見到的, 外國社會已經有很多這樣的例子, 知識及他國推行最低工資的經驗已經能夠幫助我們預知今日的結果.

有 好多人說, 大老闆年賺一億, 賺少幾百萬都唔肯, 刻薄員工, 真係賤格。其實, 這只是窮人及打工仔從自身角度的想法。打工仔月薪一萬元, 老闆扣你五百元, 你要買少幾件衫, 你是萬般不願意的, 是嗎 ? 同理, 有錢人老闆賺少幾百萬, 他買少左一部跑車, 玩少左女明星, 他也是萬般不願意的。既然大家都不願意, 就要看市場的供求, 打工仔可以辭工, 老闆可以唔請你, 請一些願意接受低人工的人, 當沒有人願意做時, 老闆自然要提高人工, 去到市場可以接受的人工, 市場是會自然調節的, 這是市場經濟。假若你是一個老闆, 現在鬧人的你, 也是會這樣做的, 不要自命清高, 這是人性。

如果自命清高, 煩請將家傭的人工提高吧! 他們才是全港最低的工資呢! 為什麼你不願意呢 ? 為什麼全港有外傭的家庭會不出聲呢, 因為你是老闆.......

最低高資只會是幫你變成害你
今 日在肯德基食晚餐( 我也不說是那一間了, 免得影響人家), 負責收枱清潔的是一個中年男人, 這男人其中一腳是跛的, 他動作很慢, 行路很慢, 每一次收一個「盤」, 我和朋友張枱有三個盤, 他要分三次去收盤, 只能說效率實在很低, 對企業的形象其實也有影響的。我在想, 這樣的員工, 將來實施最低工資後, 他還有工做嗎? 他只負責肯德基入面一個細區, 若果將來要行最低工資, 假設33元, 我是老闆, 我寧願用$50 元, 請一個正常一點的員工, 一個年青的男人, 應該可以頂到他們2-3個人的工作量, 起碼可負責兩個區, 為何還要聘請他們? 這些人, 原本靠自己自力更新, 窮也窮得有骨氣, 但今日的議員傳媒要逼他們去拿綜援, 過一些更加貧窮的生活。

首先我們要理解到, 老闆是不願意賺少左錢的, 既然不願意, 他自然要找辦法解決( 大家應該用自己是老闆的角度去想)。即使老闆不裁員, 他也有許多許許多方法不增加薪金支出的。例如, 取消花紅, 雙糧, 要你變相ot 等招數, 低技術抵技能打工仔永遠是鬥不過老闆的, 因為呢個係供求的關係。大家樂今次的做法其實只是好普通, 我相信, 好多公司有更賤格的招數吧!

有部份好老闆, 他們願意加人工, 但他們也只會將成本轉嫁給消費者。其實, 今次最低工資, 政府及全港市民都是輸家。政府不行最低工資, 議員傳媒市民鬧你; 你行最低工資, 又會出現好似大家樂今次這情況, 報章又有一標題, 鬧政府監管不力, 無論怎樣, 政府都是輸家, 若最後, 最低工資證明是失敗, 都係政府的錯, 當初逼政府行最低工資的議員唔會錯. 全港市民黎睇, 因為企業裁員, 呢班人就要拿綜援, 拿綜援就代表政府支出多左, 綜援d 錢黎自稅收, 其實係市民埋單, 就算你無交稅, 綜援福利支出增加, 變相其他方面要減少。保安人工加, 代表管理費要加;茶餐廳人工加, 代表一餐飯的費用要加。

那什麼人是贏家 ? 只有議員, 傳媒是贏家。無論點, 佢地都係贏家。最低工資成功, 他們這班人自然是贏家。失敗了嗎? 責任會轉移到政府上, 說政府監管不力! 就是他們這班人的得益, 卻要全港市民受損, 唉!

 

PermaLink: https://articles.zkiz.com/?id=18995

金風科技(2208) 我要亂up

http://jimwong1120.mysinablog.com/index.php?op=ViewArticle&articleId=2755498

金風科技於早兩天接連公佈拿到大訂單, 分別是48億訂單, 相當於09年營收的38%, 及9.2億訂單, 佔09年營收7.3%。見訂單幾大, 研究一下。

金 風科技今年第三季業績賺7.59億人民幣, 每股0.34, 頭兩季才賺0.34, 即第三季賺的等於頭兩季總數。不過, 金風科技自上市後, 股價都令人失望, 仲一度失守招股價。研究一下, 原來風電傳設備出現產能過剩的現象。以行業入面1.5mw 風機價格, 2008年為6400元/千瓦,2009年為5300元/千瓦,今年降到4300元/千瓦,最新金風科技拿到的訂單, 更加低至3800元/千瓦,即是說行業競爭愈來愈激烈, 價格愈壓愈低, 每年下降1000元, 市場擔心風電企業的毛利, 所以金風科技自上市後的股價都沒有起色。

金風科技07年於A 股上市, 當時炒到個股價去到150元, 現在A 股股價是28元, 那時追貨的A股散戶, 真是欲哭無淚。其實, 當時金風科技之所以大炒特炒, 除了市道好之外, 金風科技上市前連續數年, 業績都以每年100%增長的, 這就自然有一個增長的故仔吹。不過, 上市反而害死金風。上市後, 財務報表曝光, 大家才知道原來風電這麼好賺, 於是一窩風去投資, 全世界風機制造商只有10幾家,中國卻有70多家, 而07年時, 中國的風電設備生產商只有30多家, 其余的40多家幾乎是在金風上市後的一年時間誕生。而競爭者的加入, 令金風科技的市場份額自08年開始下滑, 仲喪失了龍頭的地位予第二位的華銳風電。

價格戰將令企業的盈利受影響, 但是打完價格戰, 剩下的強者將會更加強。情況就如德昌電機(197)、阜豐(546), 薄利多銷, 以低價格逼退中小型廠, 成為最後贏家。金風科技與其他中小型廠比較, 主要分別是他的規模效應, 成本優勢: 金風科技本是最大的風電設備公司, 資金雄厚, 先後在A股及H股上市, 有資金就可以收購、發展, 近兩年, 金風先後收購多間上下游的公司; 一方面收購德國的世界級公司VENSYS Energy AG, 取得中國最領先的技術; 而且收購其他部件的公司, 如葉片等, 減低採購成本, 現在現在已經可以自行生產大部份部件。

金風擁 有最領先的技術, 國產的只有華銳風電一家可以與它競爭。另外, 因為收購原部件的公司及自己的研發, 金風可以自己製造原部件, 成本低好多, 所以價格戰之下, 那個3800元/千瓦的低價, 就是金風科技出的投標價。招標價愈壓愈低, 中小型廠都要向外採購零件, 毛利率已跌到只有數個百分比, 但因為金風科技有力自行生產零件, 令成本下降不少, 所以09年、10年, 雖然訂單的價錢每年跌1000元, 但金風科技的毛利仍然保持到, 而今年上半年的市場份額, 亦已經開始回升, 而近來的訂單已經發現, 金風科技與華銳風電拿到的訂單, 已經佔去了市場超過50%, 隨著技術的要求愈來愈高,中標價錢愈來愈低, 中小型廠將會大規模結束, 只剩下金風科技與華銳風電兩間獨大。 十二五規劃內, 新能源是重點發展計劃, 風電仍然會保持快速發展, 當產業經過價格戰汰弱留強後, 金風科技將會愈做愈強, 所以金風科技是長綫投資不錯的選擇。

不 過, 若以下一年來看呢? 由於中標價始終愈跌愈低, 鋼價亦有在趨升, 實在不能不擔心金風的毛利率, 而由於市場的擔心, 相信在價格戰期間, 金風科技不能支持現時20倍的PE. 我想給予15倍PE較合理. 查看基金估計的2011年金風每股盈利, 大約1.2, 1.2X15=18, 與現價18.06差不多。

但若果樂觀一點來看, 以金風科技的往績來看, 即使在08年09年市場份額下跌, 中標價持續下跌, 利潤仍然保持到5成至7成增長, 而從近來拿到的訂單, 顯示金風科技的市場份額已經回升, 中小廠開始倒閉來看,令到他們取得大訂單,而且金風的零件自給率愈來愈高, 成本應該可以繼續下降, 毛利率即使跌亦不會跌得多, 只要明年公佈的業績, 仍然保持增長, 純利率亦沒有下跌, 而中小型廠陸續退出, 市場的估值是會從新提高的, 若果業績較理想, 賺1.4, 而市場重新給予20倍PE , 股價是可以去到28元的。

從研究所得, 金風科技的買入點, 還是等價格戰完結, 中小型廠退出, 市場剩餘金風及華銳兩間獨大時, 才買入較為穩陣。

PermaLink: https://articles.zkiz.com/?id=19971

魏橋紡織(2698) 我要亂up

http://jimwong1120.mysinablog.com/index.php?op=ViewArticle&articleId=2731719

近日在看魏橋紡織(2698), 呢間全球最大的綿紗紡織廠, 上半年每股賺約0.5, 假設下半年相約, 全年賺1.0, 現價6.2左右, 即只有約6 倍pe , 以龍頭企業來說, 實在偏低。

看 看魏橋紡織的歷史, 07年前多徘徊於10元樓上, 公司的生意於04-06年都保持快速的增長, 去到06年下半年, 生意最好, 半年純利有成11億, 股價亦炒上去接近20元. 但到07年, 經濟最好的時候, 魏橋的生意反而開始走下坡( 表面純利雖較06年增長, 但都是一些一次性收入或會計制度上的改變的紀帳方法), 而股價係07年中後大牛市時, 股價已經後勁不計, 慢慢向下.

翻查原因, 07年, 原材料升到彭彭升, 國內人工加, 人民幣升值, 運費升, 令到毛利率由06年下半年的18%, 急跌至07年下半年的12%, 而當時魏橋紡織是沒有能力完全將成本轉嫁. 當時, 人民幣升值, 出口競爭力已削弱, 令到營業額已經下跌;油價升到百多元, 引致運費亦急升, 部份客戶要求改行陸路;原材料急升; 而由於紡織業門欖低, 競爭者眾, 魏橋無法將成本轉嫁, 令毛利急跌.

去到08, 09年世界經濟急轉直下, 業績急跌, 當時魏橋紡織採取的是「寧降利潤、不讓市場」的經營策略,08年上半年的純利率只有3%, 06年上半年有6.5%, 股價直插谷低。

由過往魏橋的業績總括來看, 06年經濟反彈需求增, 原材料未大升, 毛利升, 股價升上高峰。07年原材料大升, 毛利跌, 股價慢慢跌。08年上半年, 原材料仍然高位, 但歐美經濟已出問題, 需求削, 毛利大跌, 股價大跌。

踏 入2010年, 魏橋紡織業績反彈。原因是終於可以將成本轉嫁, 首先金融風暴, 令大量的細廠執笠, 市場的供應減少。而之前壓抑的需求隨著經濟的復甦而反彈. 供應減少, 需求增, 上游紡織企業有較強的話語權, 龍頭大廠的魏橋話語權更強, 可以完全將成本轉嫁。今年錦花價格大升, 魏橋這間超級大廠可以話控制市場的採購價, 大小廠都跟魏橋的採購價, 有說魏橋是特登提高採購價, 以圖令棉紗出廠價格更高。因為魏橋在低價積落一批棉花, 棉紗出廠價格高, 令到他們大賺特賺. 而今年棉紗出廠價格的升幅, 更是跑贏錦花的升幅, 令綿紗紡織廠的毛利大增, 魏橋可說是最得益。

今年上半年, 魏橋的毛利率已經升番上12.5%, 純利率更是已回到06年上半年的6.5%( 因為稅率減少), 純利只差06年一成, 但當時股價10元, 現時只有6.0元, 我想給予8倍pe, 魏橋要升上9-10元, 亦不困難。

不過, 中長線, 我不喜歡魏橋, 相信若沒有生意上的突破, 魏橋將一直處於低估值.

看 看今年以來內地的人工加幅, 魏橋已經將工人的薪金每月上調500元, 人工支出影響不輕。翻看06年至現在, 魏橋的工人數目是逐年減少的, 由15萬人, 減少至今年的10萬人, 減少三份一, 而以機器代替;但薪金總支出, 卻沒有減少, 都是維持在10-12億, 佔營業額比例, 由11.7%升至14.1%, 可見內地的工人薪金支出, 已經對人手密集的廠家構成大影響.

另外, 人民幣升值問題, 相信會對中國的紡織企業出口做成影響, 雖然魏橋不怕國內的其他廠競爭, 但國外的則麻煩了。

至於好的方面, 國內正大力淘汰落後產能, 當供應減少, 對魏橋紡織呢d 龍頭, 更有利, 亦更有力將成本轉嫁, 不過也要看內地淘汰落後產能的力道。另外, 剛公佈業績的1382, 業績相當不俗,

總的來說, 現價偏低, 若買入要賺3-5成, 應該不難, 但要賺1-2倍, 則難矣;

PermaLink: https://articles.zkiz.com/?id=19972

珠江鋼管(1938) 我要亂up

http://jimwong1120.mysinablog.com/index.php?op=ViewArticle&articleId=2771784

珠江鋼管(1938)為內地最大直縫焊鋼管製造商, 今年二月以4.5 上市, 現價3.58仍然潛水中. 老闆持股70%, 另外惠理於珠江鋼管上市時已持有5.7%, 5月時以3.61 增持股權到6%, 街貨只有約20%. 今年惠理隻隻股都有表現, 珠江油管都可謂表現最差, 現時仍然潛水中.

番看近幾年業績, 珠江鋼管上市前的增長一如大部份新股, 上市前數年業績大幅增長, 06年-09年, 股東溢利增長10倍, 但上市後2010上半年業績, 就來個倒退50%. 其實09年業績若非取得阿曼的一張阿曼大訂單, 業績已是倒退, 這張訂單佔去珠江鋼管09年20%收入, 2010年沒有這張訂單, 業績倒退不出奇也.

2010年上半年賺5千萬, 每股0.05元人民幣, 下半年若同樣賺0.05,全年賺0.1, 換算港幣, pe 亦要30倍, 故公佈業績後, 股價直插至2.58. 但為何股價近來顯得強勢, 升上3.58 呢?

原來10月中, 集團公佈截至9月底, 全年取得訂單47.5萬噸, 直縫埋弧焊鋼管的定單達41.2萬噸;電阻焊鋼管的定單達6.3萬噸。截至9月底止已交付直縫埋弧焊鋼管共15.4萬噸;另已交付電阻焊鋼管定單2.5萬 噸。計一計數, 上半年直縫埋弧焊鋼管有9.3萬噸, 即第三季交付6.1萬噸, 較上半年增長3成, 但即使如此, 假若下半年業績同樣增長三成, 即賺0.065人民幣, pe都要27倍, 怎買得落手 ?

再估2011年, 若今年第四季直縫埋弧焊鋼管同樣交6.1萬噸, 全年交21.5萬噸, 即落入下年的訂單已有20萬噸, 通常訂單要大約半年交付, 即大部份訂單將於2011年上半年交. 珠江油管09年業績高峰期, 全年都只是交32萬噸, 現時已經有大約20萬噸, 注意這只計縫埋弧焊鋼管, 未計電阻焊鋼管。

另外, 基金國浩資本有一篇分析指, 他們從行業渠道得知,珠江鋼管近期奪得南美洲一個8萬噸的項目, 是真是假不得而知, 若再增加這8萬噸, 即明年上半年已有訂單, 已差不多等於09年全年的訂單. 除此之外, 2010上半年業績倒退其中一個原因, 是09年有一張阿曼5億元的大訂單, 原來阿曼的這個大型工程, 預計約每兩年訂貨一次, 即2011年珠江鋼管有機會再取得這張大訂單.

惠理上市時已持有珠江鋼管, 我認為他們將視為長線投資. 事實珠江鋼管在國內的確擁有技術的優勢, 公司通過了美國石油協會API、英國BSI和ISO9002國際品質體系認證, 又用了2年時間成為國際油公司蜆殼(Shell)的認證, 是SHELL公司在國內的唯一合格供應商,阿曼的訂單就是SHELL公司, 而由於石油、天然氣這些項目的安全性很重要, 所以取得安全認證非常重要, 而取得SHELL 在國內的唯一合資格供應商, 意味他的訂單在國內是穩固而不易被取代的。

09年業績雖然倒退, 但有兩項重要發展. 1.首先與國家電網研究成功, 以鋼管輸電, 今年已取得10萬噸訂單. 2. 珠江鋼管和武鋼集團共同研製成功的深海輸送鋼管,屬國內首次試製, 是中國唯一能夠製造深水直縫埋弧焊管的企業. 中海油80%的淺水直縫埋弧焊管均從珠江鋼管採購, 即未來珠江鋼管大有機會搶走外國人的深海鋼管生意。

關鍵我想是國家的管道建設有多少, 西氣東輸、海底油氣管、城巿燃氣管、國家電網公司擴建, 據說都會在2011開始重新進入建設期, 我想訂單應該不成問題。

另 外, 珠江鋼管不斷擴產能, 現時有約145萬噸產能, 2011年增加30萬噸, 2012再增加30萬噸, 去到205萬噸, 產能會否擴張得太多呢? 09年時才有30萬噸訂單, 2011年就算增加一倍亦只有60萬噸, 如果用不著, 折舊都折死, 此點確實有些擔心. 但從另一方面, 可能公司對訂單充滿信心都未定.

好了, 又來亂估, 假若2011年再取得阿曼的大訂單, 國浩資本所說的8萬噸訂單真有其事, 即2011年上半年估計大約會30-40萬噸訂單, 全年有60-80萬噸, 較09年高峰期增長一倍, 若純利率一樣, 即賺8億, 每股0.84人民幣, 10倍PE, 股價即約9.6左右.

若果不亂計, 阿曼訂單未必取得, 國浩資本所說的8萬噸訂單未必有, 只計現時預計的明年上半年, 預計有20萬噸, 全年約40萬噸, 較09年增長三成, 純利亦一樣, 純利賺5.2億, 每股賺0.55, 而因為同業勝利油管等的PE都只是個位數PE , 所以只給予珠江油管8倍PE , 即股價約5元. 我認為現價可以小量買入一注, 若公佈下半年的業績, 計一計PE 嚇死人, 股價可能會回一回, 到時再買較抵買.

PermaLink: https://articles.zkiz.com/?id=20372

聯亞集團(458) 我要亂up

http://jimwong1120.mysinablog.com/index.php?op=ViewArticle&articleId=2953896

聯亞集團(458)今日出左業績, 好粗略咁睇過, 唔錯喎! 近排多間公司出業績, 呢間都算又平, 又有增長潛力。

今日收2.86, 而核心盈利每股賺0.59, 即pe 只有4.8倍, 全年派0.3, 即息率有十釐, 聽朝一開市實爆上去啦! 睇睇有冇水位執下!

看年報, 業務分製衣業及品牌分銷零售, 製衣業佔80%營業額, 品牌分銷佔20%;但利潤則製衣佔55%左右, 品牌分銷佔45%左右; 原因係品牌分銷毛利率較高. 以明年預計, 品牌分銷應該最少佔利潤50%。假設核心盈利無增長, 賺每股0.6, 製衣與品牌分銷各賺每股0.3, 製衣給予5倍pe , 品牌分銷給予8倍pe , 等於(0.3x5)+(0.3x8)=3.9; 若果息率維持, 較合理應7釐息, 股價亦去到4.0 .

再看, 盈利增長主要原因, 是品牌分銷快速增長, 09年上半年開始計連續四季, 收益是213745 > 261877 > 270474 > 388376 ;溢利是9351 > 18762 > 22756 > 46652 . 利潤率是4.4% > 7.1% > 8.4% > 12% ; 基本上, 營業額增長愈快, 利潤率就增長愈快.

這 樣的快速增長, 往往見於中國的連鎖零售店, 每半季透過特許經營, 開多幾十間, 透過開店去保持增長, 愈開得多就愈有規模效益, 每開一間就先收你特許經營費, 你又同我買貨, 收入快速增長, 而我開100間鋪,係電視買一個廣告係咁多錢, 開200間鋪 ,買一個廣告又係一樣咁多錢, 成本增幅慢過收入增幅, 利潤率就不斷增長...( 不過, 呢d 係我亂估既, 時間太趕, 無時間去研究佢既特許經營模式, 有d 特許經營係唔收特許經營費既, 而且仲係賣唔出既都可以退)

當然, 係咁開特許經營, 好易做衰個品牌, 而且透過開舖去增長, 增長雖快, 但當市場出現飽和時,就好似體育用品股咁, 盈利急速放緩甚至倒退.

無時間詳細研究聯亞的品牌, 但在這種經營策略初期, 業績往往可以保持快速增長....

假股2011年, 品牌分銷再增長三成左右, 每股賺0.4 ,加製衣業的0.3, 即(0.4x8)+(0.3x5) = 4.7. 聽日昇幅唔多, 可以追入!

不過, 由於成交量實在太少, 買都唔會買得多, 以免第日要隔幾格賣出. 而且呢d 悶人股, 佢可以半年唔郁就係唔郁, 悶到你嘔先行幾格

 

PermaLink: https://articles.zkiz.com/?id=23742

通賬惡 股價跌 我要亂up

http://jimwong1120.mysinablog.com/index.php?op=ViewArticle&articleId=2952276

近排業績期, 好多公司出業績, 但大部份公司的業績都是令市場失望的, 477,955,839,3818,3322,117,2689,1768,894,1203, 出業績後股價都要跌.

好多公司上半年業績對辦, 下半年卻有倒退. 唔怪得之早前d 資金離開新興市場, 其實基金都預計到好多公司去年下半年業績唔掂, 就算掂既, 2011亦缺乏增長點.

去年下半年開始, 通帳開始肆虐, 原材料開始貴, 企業成本增加; 成本增加若果能夠轉嫁就冇問題, 但供求已不上半年有利; 金融風暴期間, 訂單少,有中小企頂唔住結業, 亦有產能暫停,存貨跌至谷底, 至經濟開始復甦, 突然有急單,市場產能少了, 存貨少,原材料未大升, 市場需求好轉, 求過於供, 再加上寬鬆貨幣政策,利息低,企業毛利純利率都不錯; 但至下半年, 關閉的產能已大都重新開工, 亦有企業增產, 存貨已增, 寬鬆貨幣政策做成通帳, 原材料升, 但歐美經濟復甦緩援, 消費力仍然弱, 需求增長不及產能增長之下, 企業不能完全將成本轉嫁, 毛利率下跌; 跟著, 內地勞工短缺,人民幣升值, 銀根又開始收根, 借貸難,要給予較高息, 最後結果係利潤下跌.

2011年, 通帳愈來愈嚴重, 消費力增長不同步, 企業要轉嫁成本不易; 看來牛二仍然有排行, 今年已不如09及10年般易賺錢.

今年不要炒業績, 盡量等搵到一d 成本能夠保持, 而收入大增的企業先出手; 就像去年的東岳(189), 成本變動不大, 製冷制的價卻大升; 數碼通(315)成本變動不大, i-phone 卻令銷售大增,客戶願意付出高昂月費,兩隻股才能出現短期升幾倍的情況.

PermaLink: https://articles.zkiz.com/?id=23743

晨鳴紙業 我要亂up

http://jimwong1120.mysinablog.com/index.php?op=ViewArticle&articleId=3023265

今日以平均約6.2 賣出3/4 晨鳴紙業, 之前買入的成本扣除收取的利息後, 成本約6.1, 過去一年兩次買入晨鳴紙業都賺唔到錢, 呢隻野真係難玩!

不過, 晨鳴唔係真係咁差, 我隨時準備增持番。以2011年睇, 晨鳴紙業已經係紙業股中算唔錯了, 睇睇玖龍紙業, 年頭股價12元, 今日跌到只有8.08, 跌左三成幾, 但晨鳴紙業只係由7元跌到現在6.2, 計埋收息的0.3, 只係跌左幾個百份比.

先黎睇睇晨鳴點解咁硬淨
1. 以去年業績計, 晨鳴的pe 只有不足十倍, 息率卻有5厘, 令晨鳴有較強的防守力。
2. 產能投產
之前買入晨鳴的最大原因, 就係佢地呢兩年用左大約200億投資產能, 將會係今年同明年完成. 產能的投入, 將會帶黎業績的大幅增長. 以晨鳴在公告入面預計的利潤如下:
a. 80萬噸高檔低定量銅版紙(投資52億): 實現收入54億, 利稅11.64億, 利潤8.5億
b. 60萬噸高檔塗布白牛卡紙(投資26億): 實現收入23億, 利稅6億, 利潤4.3億
c. 45萬噸高級文化紙(投資17億): 利潤無講
d. 物流中心及配套鐵路專用線(投資20億): 利潤2.2億
e. 70萬噸木漿+300萬畝林地(投資約80億): 利潤無講

唔明白佢地講既咩叫利稅, 似係講毛利, 佢講既利潤似係扣稅後的純利, 如果咁計, 以佢地所預計純利, 全部投產後就多十幾億純利, 2010年晨鳴都只係有12億純利. 不過佢地會唔會樂觀左, 嘗試用其他方法估.
- 以晨鳴去年毛利約20%計, 約利約7%計, 就單計上面有提到的銅版紙同白牛卡紙合共提供收入77億, 7%純利, 已經可以帶黎5億幾純利.
- 以回報率計, 做生意投入資金, 保守以每年5% 回報, 200億的5%回報, 每年應該回報10億.
- 以產量計, 國內做紙每噸平均賺300元, 做木漿每噸賺1000元, 粗略計晨鳴去年的產能, 約300萬噸做紙產能+250萬噸做漿產能 = 賺9億+25億=34億。再拿去年的業績看, 毛利剛剛是34億. ( 哈, 係咁啱者, 晨鳴的木漿係用黎自給的, 不是出售的, 但大約咁樣計住先) 。以所有項目投產後, 185萬噸紙產能+ 70萬噸木漿 = 5.5億+7億=12.5億。投產後, 約增加12.5億毛利, 增加三成多( 不過, 未計鐵路同林地的收入)

所以晨鳴以往績pe 計, 現價不貴也不平, 而市場憧憬新產能投產, 業績大增, 所以股價比玖紙硬淨得多...

但係, 點解又唔升呢?
1. 今年首季業績實在差, 倒退, 話就話倒退1% , 實際係靠政府補貼救業績
2. 原本預計80萬噸銅版紙, 45萬噸高級文化紙, 70萬噸木漿4月投產, 但係延遲了, 而家要6 月先投產。4-6月係紙業的銷售旺季, 4月投產, 可以食正呢一水. 係6月先投產, 仲要經過試產, 即係6月都唔會提供到咩盈利, 更幣的是6月開始折舊. 成百億的設備折舊, 另外, 新產能投產, 要請多好多人, 呢d 人係要請左先, 再訓練, 再熟練, 即係行政費用會增加, 咁樣計, 二季的業績都係凶多吉少!

玖 紙大跌, 係因為原材料的升幅大過紙價的升幅, 玖紙無辦法轉嫁成本, 今年的毛利率肯定要跌不少. 晨鳴好一點, 因為有70%產能自給自足, 所以影響無咁大, 但由首季業績睇, 都係逃不過毛利下跌的命運. 另外, 歐盟對中國銅版紙徵收雙反關稅, 晨鳴雖然出口少, 但最怕的是其他銷去歐洲的銅版紙銷唔出, 返國內銷, 咁就令供應增加, 售價下跌, 晨鳴最大的產量就係銅版紙, 真係不利!

今日玖紙被券商下跌目標價至8元, 股價即大跌, 為免晨鳴被影響, 而且5窮出現左, 會否六絕? 上半年晨鳴業績咁睇, 可能要倒退20-30%, 都係沽出3/4 暫避一下, 等機會再買番.

 

PermaLink: https://articles.zkiz.com/?id=25124

南韓股市 我要亂up

http://jimwong1120.mysinablog.com/index.php?op=ViewArticle&articleId=3037501

近排個市雖然反彈反少少, 但我仍然對個市無咩興趣, 因為預計今年上半年大部份公司的盈利將會倒退, 工業股尤甚, 要買就睇零售股啦。中港兩地股市今年都唔掂, 但原來南韓股市今年創左歷史新高, 是全世界第一個國家今年創歷史新高, 令我諗起兩年前與友人的對話, 今日應驗了。當時, 我跟朋友說, 我看好南韓的經濟, 他則因為剛去完南韓旅遊, 認為南韓仍然很落後, 持反對意見, 現在我可以在他面前耀武一下了。

當時好多人說什麼金磚四國, 但我則看好南韓, 原則就在於youtube上看過他們的歌手表演, 其實就是鹹濕仔看那隊長腿美少女組合。記得5,6年前亦曾在youtube 上看過南韓的娛樂節目, 當時只覺得他們的穿著服飾仍然很老套, 髮型服飾是落後香港五年。但早兩年前, 再在youtube上看, 已經完全不同了, 他們就是在突飛猛進, 現在他們更是在帶領亞洲的潮流..

看 看k-pop , 南韓的流行音樂, 他們的跳舞組合, 現時漸漸在世界興起熱潮, 已不只是在亞洲了, 在youtube 上看已有數不盡的歐美的年輕人在youtube 上放上他們模倣南韓組合的跳舞片段, 早兩個月, 法國人因為買不到演唱會門票, 而舉行集會, 要求南韓的某公司演唱會加場。 亞洲的流行音樂在世界上興起是絕無僅有的 , 南韓在創做歷史.

回想當時與友人爭辯的論證是, 一個國家的娛樂事業, 是可以反映該地方的經濟的。我們看80-90年代中, 是香港的娛樂事業最發達的時候; 亦是香港經濟最好的時候。看看日本的情況如是, 以前我們看不起中國的明星或劇集的, 近年情況已有改變了。中國的經濟抬頭, 中國的明星亦在世界上開始嶄露頭角了。

娛樂事業是屬於奓侈品, 買唱片、看演唱會都是。當經濟好, 人民願意消費, 願意購買這些奓侈品, 明星歌星賺到錢, 唱片公司願意投放資金去包裝, 做成娛樂事業興旺. 記得90年代黎明拍一個電話廣告, 製作費要數千萬嗎? 當年香港就是有錢, 市民願意消費, 老闆賺到錢, 自然就去爭明星拍廣告, 他們的酬勞自然高。今日, 好多香港明星, 都返去大陸拍劇, 拍廣告lu, 他們的酬勞已經遠高於香港, 亦正是香港經濟的縮影.

家住銅鑼灣, 每日在銅鑼灣地鐵站都見到很多大陸人在銅鑼灣那個字旁邊影相, 你去砵蘭街, 砵蘭街那個街道牌旁邊亦常見到自由行影相, 其實這是香港電影的功勞; 其實電影事業, 對香港的旅遊經濟是有相當大的影響的。

根據這個鑼輯, 日本在緩慢衰落中, 中國南韓在快速冒起, 香港在快速衰退.....(記得畢菲特兩三年前說要投資南韓股市嗎?)

以下是一些片段a

PermaLink: https://articles.zkiz.com/?id=25414

Next Page

ZKIZ Archives @ 2019