ZKIZ Archives


【專題籽】拜年唔打牌 鬼佬教你玩boardgame

1 : GS(14)@2016-02-02 15:58:54

拜年做乜好?年年都打麻雀和玩魚蝦蟹太悶了,今年不如玩boardgame啦。



【專題籽:港情講趣】拜年一怕對住姨媽姑姐你眼望我眼;二怕話題圍繞談婚論嫁。上樓cafe「空中棋園」鬼佬老闆John話,新年玩boardgame既能打破以上困境,也不怕dead air尷尬,並推介三隻簡單遊戲,好過打麻雀咁話喎。

首選唔使用腦

記者請來一對boardgame發燒友情侶Iris及Terry試玩John的推介之選,John話新年最忌玩太複雜的boardgame,講解得耐又玩太耐,教得來可能年都拜完。他嚴選的三款遊戲都以快和好玩為主,即使屬策略性遊戲,也比一般多關卡的boardgame易上手,總之,唔使點用腦,務求大家有得玩,有得笑,熱熱鬧鬧。



《小矮人七仔》老少咸宜擲骰仔 





【難度】★☆☆☆☆【玩家人數】2至7人



【玩法】



1.輪流擲骰仔,每人每次擲一粒,連擲七次,每次擲骰後依心水放入方格,目的是將七粒骰仔的點數由細至大排列,越順序得分越高。

2.每局擲到第三粒骰,其他玩家可依形勢估計擲骰者能否排出由小至大的點數,以「剔」或「交叉」表達信任或不信任,估中加1分。

3.七粒骰仔必須右起點數由小至大排列,如上圖示最後一次擲骰時,若擲不到「1」、「2」、「3」或「6」,該次擲骰作廢,無分加。最後以成功順序排列的骰仔數目計分,一粒骰仔得1分,另骰仔與方格下面的圓形同色加1分,若骰仔放到規定方格外的頭尾兩格,則須減2分,如上圖示得分為8分。埋尾計數,誰最高分誰勝。



【記者推介】自問沒甚麼玩 boardgame智慧,所以手到拿來的遊戲最合我心水。擲骰仔簡單得來又容易玩完一鋪,不怕越玩越悶。




《Bucket King3D》摧毀金字塔

【難度】★★☆☆☆【玩家人數】4至5人



【玩法】



1.卡牌與小杯各分紅黃藍紫綠五色,開始時,每人分派十隻卡牌、十隻小杯(每隻色各兩隻)。玩家先用小杯由下至上以「4321」陣式砌金字塔,之後輪流出牌。

2.玩家每次可出1至3隻牌,出幾多隻牌取回幾多隻牌,下一輪玩家要跟上一輪玩家的卡牌顏色及點數(一定要大過)出牌,無該顏色卡牌就要推倒自己金字塔的該顏色小杯,另有百搭牌可當任何顏色卡牌,最快被推倒金字塔者為輸家。




《Machi Koro》簡易版大富翁

【難度】★★★☆☆【玩家人數】4人



【玩法】



1.每人有四張卡牌,代表四座城市,在買賣物業和商店間最快賺到錢。一開始時每人只有三蚊,一塊麥田和一間麵包店,輪流擲骰仔後就可進行買賣。

2.當所買物業及商店越多,擲骰後對一對所持店舖卡牌上的骰仔數字,可按卡牌指示收取其他玩家和銀行金錢,累積財富至全買下四座城市為勝。




玩家心聲

Terry:「三隻game都好玩過癮,新年玩boardgame鬥智鬥力,好過打麻雀傷和氣。尤其新年拜年見到唔太熟絡的親戚朋友,一齊玩可以藉此認識對方,冇咁尷尬。當玩到需要策略嘅遊戲,就會見到有啲親戚好有料到。」





Iris:「三隻game都簡單易玩,短時間就玩完一局,唔使花半小時解釋玩法,新年同親朋戚友gathering,多一種活動選擇。」



John:「推介《Machi Koro》,平時好多boardgame都要輪流等人出牌,未到你嗰陣就發住夢等,但呢隻game必須望實每個玩家嘅每個行動,因為每人出牌同買賣都會影響自己拎到幾多錢,參與性更大,可以玩足全程。」



空中棋園灣仔軒尼詩道99號彰顯大廈11樓記者:王秋婷攝影:陳永威編輯:陳漢榮美術:黃創泰





來源: http://hk.apple.nextmedia.com/su ... t/20160202/19475188
PermaLink: https://articles.zkiz.com/?id=295086

Next Page

ZKIZ Archives @ 2019