ZKIZ Archives


賣紙唔得咪要賺維穩費 中環客

來源: http://hkcitizensmedia.com/2016/08/31/%e8%b3%a3%e7%b4%99%e5%94%94%e5%be%97%e5%92%aa%e8%a6%81%e8%b3%ba%e7%b6%ad%e7%a9%a9%e8%b2%bb/

選舉經常有,但今年嘅選舉最核突,星島新聞集團旗下啲刊物寫啲古仔最難睇,份《頭條日報》可以攞官方否認咗嘅數字狂吹,而《東周刊》就攞啲過期八卦消息當新聞寫,幾乎將周澄寫到變再世妲己,連中環客喺立法會返工啲舊同學都笑咗。《星島日報》就可以作到懷疑性侵案係某電視臺攞唔到電視牌嘅原因。連中環客都問,乜呢啲嘢有人睇嘅咩?

只不過,你睇嚇星島新聞集團嘅成績表,咁你明點解呢啲無人睇嘅嘢,都居然登喺封面攞嚟俾人笑。星島新聞集團去年中期純利得四百零五萬,下跌百分之八十七,媒體業務溢利下跌成九成半,好誇張嚇。雖然星島新聞集團係咁吹《頭條日報》發行量好大,只不過,中環客每日早上中環街頭觀察所見,好多《頭條日報》係直送阿婆手上,睇兩睇,甚至睇都唔睇攞去回收。正由於廣告效用差,咁咪要賤價賣,發行量大又點。

賤價賣廣告唔係辦法,因為頭條日報嘅印刷量,已經接近派一份蝕一份嘅水平,又唔似壹傳媒咁早就轉型,應該可以受惠於人人改喺手機上睇新聞嘅大潮流。咁何柱國作為老闆,除咗炒人,同埋儘快完成將軍澳廠房嘅工程,減少租金開支,仲可以點。梗係做多啲維穩嘢,搏多啲中資大孖沙落啲偏離市價嘅廣告,咁樣業績至可能有起色。以煙仔何數口咁好,佢一定知咁炒舊聞,兼隨時得罪搞緊網購業務嘅大客,最後有可能賺番嚟。

煙仔何話俾大家聽,傳媒除咗要同全世界嘅人爭網上廣告外,故意做啲個別唔方便擺明賣廣告大客啱睇嘅內容,都係一種生存之道。正如點解商臺喺封咪事件後無死,你喺的士聽電臺,喺商營電臺聽到大堆政府宣傳聲帶,或政府贊助節目咪明囉。

中環客

賣紙 紙唔 唔得 得咪 咪要 要賺 賺維 維穩 穩費 中環
PermaLink: https://articles.zkiz.com/?id=213299


ZKIZ Archives @ 2019