ZKIZ Archives


大教授芝加哥DVD騷 宗菁華

2008-07-24  NextMagazine

七 月十四日,法國大革命紀念日。喺花旗芝加哥,則有個一連五日之盛會誌記另一場大革命 —— 中國走資三十年。呢個盛會由產權宗師高斯(Ronald Coase)主催,另外仲有蒙代爾、Robert Fogel及Doug North呢三位諾貝爾經濟學獎得主,及一眾中外經濟學者出席。

咁嘅場面又豈可冇大教授?事實上會仲未開,佢已經喺《信報》連載佢會宣讀之論文。大會嘅規矩係每個講者有二十分鐘發言 —— 大教授例外。

會議由高斯講過開場白後就輪到大教授開聲,不過唔係真人騷,而係放DVD。佢成篇論文講咗足足兩粒鐘(喺《信報》都連載咗八個禮拜)。分量甚足,故此學者、專家都唔多頂得順,放咗一粒鐘DVD,大家要抖一抖,飲杯咖啡、伸伸對腳再放埋下半場。

除咗大教授DVD騷,港大首席副校長王于漸亦有親自臨場參與,講香港對促進中國開放作出之貢獻。王副校長外,高斯又特別突出理大蔡鴻達對安排成個五日會議付出之努力。

於此可見,香港對中國開放之貢獻又絕對唔只資金、人才、意念思維而已,呢三十年之經驗得以成為下一代之教材、樣板,香港之學者由大教授以降都出咗唔少力也。

米王走得開心

正是寧欺白鬚公,莫欺少年窮。經銷金香、金象等品牌嘅金源米業創辦人林拔中細個喺新加坡打工,餐餐食芽菜,發誓有朝發達唔再食芽菜。果然佢大半生都冇再食過芽菜。

細 個之時有次佢行經間貴價西餐廳,出於好奇喺門口偷望,可能睇得入神過頭,俾個南亞裔司閽踢屁股(剛啱通過反歧視法,唔得亂咁稱呼人也),仲嘲笑佢唔使指擬 有機會幫襯。六八年林拔中舊地重臨擦其大餐,臨走垂詢個司閽:「你阿爺係咪喺度看過門口?」兩年後,米王遁歸道山,相信佢一定去得開心。

魚王失婚

魚王、Ricky San鄭威濤絕少向人提起自己嘅感情生活,原來佢未開板前壽司,係同前妻李少玲拍檔賣日式手捲班戟,搵到第一桶金者。

當時佢哋鬼咁恩愛,拍住做生意,聯名揸住間公司,仲生咗一對仔女,成個好字。

可惜佢哋可以共患難,而唔可以共富貴。最後搞到離婚,後來其前妻李少玲改嫁味千拉麵個淥麵師傅。試問世間情為何物?俾你做到魚王都未必知也。

金牙大狀講嘢有聰明冇智慧

同樣係派糖,隔籬梳打埠何特首採取一視同仁政策,由細路仔到伯爺公,只要係澳門居民,見者有份,搞到唔少遷居咗香港嘅澳門居民搭船返去分錢。

煲呔亦都係派錢,為數更加一啲唔少,達一百一十億元之多,但就派到天怒人怨,班中產就鬧佢玩歧視,電油咁貴,政府抽稅如儀;免徵外傭稅又諸多動作,以致啲僱傭公司硬晒軚;代繳電費又完全幫唔到冇自己電錶住板間房之五無居民,總之人人唔順超。

何以派糖都搞到唔順超?無他,一以貫之,係都玩親疏有別嘅手腕,咁有乜辦法唔令人覺得佢大細超?

一心以為派糖收買人心,聰明絕頂,點知搞出個大頭佛。真正之大智慧又莫非好似何特首咁有派無類?你幾時見過要麻煩習副主席捉住何特首隻手教佢做嘢要「親自掛帥、親自過問」?

思捷環球去邢李『火原』化

潘祖明同思捷環球結束達九年賓主關係,副主席都唔做,掛冠而去。前此,米高‧邢李『火原』就已於今年一月辭任非執董,佢雖然仲執住八個巴仙股權,但喺間公司並無一官半職,同實際日常運作冇乜關連。

潘 祖明走人之際,佢仲有超過兩百萬股認股權並未行使,當中有超過一百萬股係以四十二個五毫八認購者,以當今之股價,淨係呢度佢已經犧牲達四千萬矣。佢最後一 趟以呢個價錢行使認股權係兩年前。自此佢就再無認購過矣。除咗潘祖明,米高‧邢另一個得力助手黎壽昌就已喺○六年走人。

二千年,米高‧邢仲係主席之時,佢執住間公司四成五股權,跟住一路減持,○二年三成八;○四年三成;○六年一成六,至今只剩番唔到一成。與此同時,佢嘅得力伙記逐個走頭。各位精明嘅投資者,呢一切嘅一切究竟講緊乜嘢俾大家知呢?

甘泉將成永別

唔經唔覺,甘泉執笠咗三個幾月,但佢哋幾架飛機則一直响停機坪日曬雨淋。上個禮拜四,兩架甘泉飛機突然間有動作。

起初人哋仲以為係例行維修,原來唔係。唔知大家知唔知,每架飛機都有個好似車牌咁獨有嘅冧把,以資識別唔同公司嘅飛機。到咗禮拜四,呢兩架甘泉飛機已經換咗冧把,成為一間花旗商業銀行嘅資產,當日係佢哋派人嚟接收飛機。

甘泉飛機一去,將成永別,分分鐘唔會再返嚟。唔少見證呢個歷史時刻嘅機場員工,都不禁忍住淚,同佢說聲goodbye!人始終係感情動物嚟者。
教授 芝加哥 DVD 菁華
PermaLink: https://articles.zkiz.com/?id=1481

貼施主席街招 宗菁華


2010-1-14  NM





經金勞詹「勸諭」,761百營環球主席施展望還殼(金勞詹同毓民喺議事堂你一句「黑底」,我一句「監躉」—— 另加PK等助語詞 —— 佢會用乜法子「勸諭」施主席,不必細表),但件事肯定仲未解決也。上個禮拜,施主席更加喺761中環寫字樓周圍俾人貼街招,何也?

原來○七年761搵咗印尼鎳礦嚟玩,於是有人借勢去小福建北角大力推銷,拍晒心口咁話:「贏嘅歸你,輸咗,個半同你買番」(福建話點講法,待考)。

姑勿論點講法,呢一招認真使得。加以施展望係福建政協、又同人講會買山頂天比高(後來唔成事),故此班福建鄉里信到十足十,而761熱鬧咗一輪,不在話下。點知冇耐761就唔多醒神,家吓則只得番兩毫子。一折都唔到,班鄉里唔㷫勢係假。貼街招,客氣咯!

邊個至係首富?

廈門係福建省嘅一個市。咁究竟「廈門首富」柯希平多錢呢,抑或「福建首富」陳發樹多錢呢?喺廈門及福建,究竟係柯生、陳生抑或少敏生知名度高呢?

中共元老、北京前市長彭真話佢都搞唔清究竟黨大抑或法大,但柯生、陳生、少敏生之身家財富評級、社會知名度如何,保薦人理應知嘅喎。

身負監管重責之港交所有冇責成保薦人搞清楚佢呢?如果冇,點解冇呢?咁基本嘅嘢都冇做,又何以保障投資者利益呢?

第二股東係首富?

講開天然乳品(462)嘅主要投資者福建首富陳發樹,原來佢係青島啤酒、紫金礦業及雲南白藥呢三間上市公司嘅第二大股東。

做得三間上市公司嘅第二大股東,身家點都有番咁上下,但算唔算「首富」,則值得商榷。若果咁都叫「首富」 —— 即使只係喺福建 —— 咁人哋第一大股東又企去邊呢?



貼施 主席 街招 菁華
PermaLink: https://articles.zkiz.com/?id=13825

山頂屋唔怕買 宗菁華

2010-02-18 NM





滙豐大班紀勤凱撒大帝式回朝,同佢一齊返香港之手下,數以十眾。同得佢一齊返嚟者,你估又會係茄喱啡乎?如斯一來,優質貴價樓又有乜辦法唔巴巴聲升呢?

須 知成個山頂,獨立屋只得三百間,而呢個數目肯定唔會增加者。呢個情況就一如畢加索之油畫,係咁多就得咁多。供應有限,但天下間嘅有錢佬就愈嚟愈多;唔講其 他金磚三國,單係中國之新發財就多到一如雨後春筍。雖然唔係所有中國嘅新發財都想喺山頂整番間屋,只要其中萬分之一有咁嘅諗法都唔得了。

於此可見,證監會嘅Dr. Wise話投資可升可跌,呢個講法絕對呃人者。你睇買畢加索油畫幾時使蝕過?在此奉勸敝刊讀者,有閒錢不妨上山頂置番間,賺梗o架噃!

意馬太子爺繼續發夢

土炮卡通《阿童木》票房失利不特止,更累到阿媽命都無埋!意馬國際旗下之動畫製作公司申請清盤,遣散兩百多名員工,過年前搞單咁嘅嘢都咪話唔傷感情也。

意馬大股東永菱通金融之洪錦標及其襟兄弟羅康瑞同樣咁傷,佢哋分別持一成八同百分之六股份。但一手搞出呢檔爛攤子之意馬太子爺高偉豪則已於去年底請辭。不過佢未心死,自組公司「夢馬」再戰江湖,創作動畫、漫畫、電子遊戲及相關產品。後生仔,冇夢又點會有前途呢?

劉夢熊煉金術

國際資源有炒股之稱,其前主席劉夢熊食慣「大茶飯」。舊年八月,國際資源仲未掘到金,劉主席已急不及待轉戰更有利陣地 —— 另一殼股佳訊控股做主席。

橋唔怕舊,唔到半年,佳訊又染「金」矣。間公司用三億八千萬入股內地黃金冶煉廠 —— 山東國大黃金。「今次係現成o架,唔係風險投資。」

落力推銷之餘,劉夢熊更大爆佳訊執董王志剛嘅身世,話佢老豆並非別人,正是前財政部長王丙乾,而內地財經界唔少高層都係王家嘅朋友咁講。劉主席想講乜,你明啦!

國大黃金煉金嘅本事頂呱呱,規模喺全亞洲數一數二;但金礦則欠奉。冇錯,佳訊有權以五億買個山東金礦,但呢個礦至今只係一紙勘探許可證而已。掘唔掘到金,頂籠五五波。咁算唔算風險投資呢,又?



山頂 屋唔 唔怕 怕買 菁華
PermaLink: https://articles.zkiz.com/?id=14314

李老闆硬撼曾律師 宗菁華

2010-04-29  NM





恒豐中心老細李德義狀告新抱曾昭 穎喺「婚後協議」(post-nuptial agreement)作虛假陳述,令唔少中環口痕友好生奇怪。

無論係婚前(pre- nuptial)抑或婚後協議,都係兩公婆自己訂定者,咁又點關老爺事呢?不過李老闆打慣官司,係法庭常客(有啲更加告到上終審庭),佢入稟告新抱,牌面 睇雖則有啲奇怪,但梗有佢嘅道理者。

不過佢新抱幼承庭訓,非但本身係律師,佢爹哋曾國政一樣係律師,而且唔係一般嘅律師而係幫過李老闆做 嘢之律師。公元兩千年,李老闆搵曾國政幫一位叫陳瓊仙嘅女士將一間私人公司嘅股票轉名。轉名一事後來牽涉到濫用授權嘅糾紛,卒之又打過一輪官司。

曾 國政現今自己開業,但先前佢則喺幫小甜甜同埋哨牙通打過無數官司之何敦(Haldines)掛單。佢之履歷騷quali,話佢「在重大刑事案件中委任大律 師為客戶辯護,包括謀殺案件……又忙於處理物業轉讓及遺產事務」,事實上遺產及家事法乃佢之專長。果如此,自己個女張「婚後協議」又豈會冇『目及』過者?

以 此視之,李老闆雖則係法庭常客,對手亦打慣官司,尤其係婚前、婚後協議之案件。除非中途雙方和解,否則旗鼓相當,呢場官司應該大把嘢睇也。

睇 清稅例至入飛

有人話,夏佳里做港交所主席,比上一手長江一號查理士‧李更加好,事關佢老哥除咗識搵同胞嚟上市外,更向外擴展,連俄羅斯大款 都傾掂,仲搵到九唔搭八嘅詩姑出手做非執董,認真巴閉。

除咗俄鋁,今個星期又有一件來路貨上場,就係法國二線護膚品公司歐舒丹 (L'Occitane)。口痕友?晒頭,呢隻牌子喺香港只有十六間分店,法國佬何以走嚟上市呢?

之唔係內需概念囉!法國佬話想北上大搞, 嚟香港上市,順理成章。一聽到內需二字,班散戶即刻醒晒,首日招股已經有八十億元孖展,破晒近期紀錄,犀利。

歐舒丹前景如何?在此僅提供些 少數據俾大家參考。首先,集資額嘅一半,用嚟幫大股東買舊股。仲有,公司上年賺咗六千萬歐元,但上市前就派咗八千萬股息俾原有股東。對舊股東則夠晒慷慨 啦,新股東又如何?再者,歐舒丹喺盧森堡註冊,依例派息要扣稅一成。入飛之先,有冇睇清楚呢?

大孖沙信錯人?

年前伍克波由 「殼王」陳國強及超人李等手上接咗嘉禾之控制權,出價只係鬼佬基金之八折。班大孖沙何以明醒佢?你慌唔係睇中佢之內地關係乎?邊個唔知道識得阿爺至有世 界?

伍克波內地關係如何?唔使兩年即見真章矣。華潤同新地合作,投資五十億元喺杭州搞咗個八百萬呎之萬象城。呢個場之戲院本來係圈咗伍克波 之嘉禾者,但日前商場開幕,個電影院則改插香港江家百老匯戲院之大旗。點解會咁嘅?唔使畫公仔畫出腸啦啩!

見到此番情景,年前慕阿爺之名而 賤賣嘉禾之大孖沙不知會有何感想?大孖沙做慣大買賣,點會咁計較先?

為黎署長測前程

長毛先是以「CYUSHO」車牌玩行政會 議召集人CY‧梁振英,再以「DONALDPK」玩禮賓府過客煲呔‧曾,創意講唔上,出位則肯定有份。

車牌用字出唔出得街,運輸署長黎以德 有最終話事權。長毛呢兩個車牌,矛頭指向明顯不過,而署長又由得過佢,現任同埋黑馬特首又安能冇任何芥蒂者?佢哋之量度如何?腹內是否可以撐船,大家放長 雙眼『目及』實黎署長之仕途就自有分曉矣。

本週翻譯

渣打影射獅子

渣打150周年,以Here for good為新標誌,此實有民建聯「留港建港」之志,但佢哋就將之譯作「一心做好,始終如一」。退休賓架覺得咁樣譯法,簡直九唔搭八。

除咗 「留港建港」,Here for good實則有更深層次之意義,就係影射隔籬獅子銀行對香港冇承擔。何也?

一、獅子老早搬竇去英倫,咁又 點似得渣打咁遷冊香港、本地掛牌上市?二、即使紀勤大班現今東返回朝,但都仲係英倫香港兩邊走;完全坐唔定,咁此又豈為Here for good之象?不過,有歸屬感是否等同優質銀行服務?大家除咗聽其言,睇怕更要觀其行也!

中環人語迷你版

“過去香港都試過唔 少天災人禍……天災。”

估中邊個中環人講呢句說話,送你NIKKO休閒袋一個

有意參加者,請於五月三日24:00前將答案電 郵centralman@nextmedia.com

小宗只接受電郵,郵寄免問。

本刊員工及直系親屬不得參加。

為 求公平及杜絕偷步搶答起見,請於星期三下午一時後來電郵競猜答案;在此之前發出之電郵作廢。

超過一位讀者估中,先到先得,恕不接受上訴。

答 案及中獎者姓名將於一○年五月六日本欄揭曉。

上週人語揭曉

“講民調,最實際一人一票。”

答案︰余若薇

得 獎者︰Y.Chan

中獎時間︰1:00pm 21/4/10

金牙大狀講嘢

劉吳好做唔做

喺官家壓 力下,無綫及亞視卒之同意喺高清頻道「原汁原味」轉播有線之世界波節目。此例一開,手尾長矣。

須知無綫及亞視皆由政府發牌,當中節目內容有 唔少限制,譬如讓出時段播放香港電台製作之節目一也;播放新聞處製作之宣傳片二也。換言之,關乎公共利益嘅嘢,只要政府開聲,兩個台冇得唔播者。

世 界波是否關乎死人冧樓之公眾利益?當然唔係啦。無綫、亞視、有線、NOW、香港寬頻等等肯唔肯競投轉播權?如何競投,隻揪抑或孖份?出價幾多?更從來都係 商業決定,毋須官家插手。若然如此,咁劉吳惠蘭做乜一而再,再而三係都要無綫、亞視轉播世界波?

若然轉唔轉播世界波都算得上係公共利益,官 家都要插手一番,下一趟容乜易要庫房出公帑買時段作轉播?正一好干預唔干預,恃住庫房疊水而多管閒事,咁有乜辦法唔手尾長先?
 



老闆 硬撼 撼曾 律師 菁華
PermaLink: https://articles.zkiz.com/?id=15369

何鴻章賣仔莫摸頭 宗菁華

   
 
2010-10-21  NM

 

新地位於上水的「天巒」賣個滿堂紅;已積極在天巒附近大興土木建豪宅,呢幅前身為「何東花園」土地原來有段古;記載於鄭宏泰及黃紹倫所著的《三代婦女傳奇——何家女子》一書內。

話說十九世紀二十年代之古洞大地主,就係何東爵士,其妻麥秀英因患有子宮瘤而無所出,於是把精神寄託於務農,在古洞旁之金錢村開闢「東英學圃」,專搞農務,圃內盛產蔬果,並自行安裝發電機,成為新界一個先進的農業實驗室。最有名為種桑養蠶、抽絲剝繭。一九二四年,「日不落國」要溫布萊搞展覽會騷哥利。香港殖民地自然要俾面,指定要展示香港製造之產物。時任副展覽專員之何東,早聞老外對養蠶抽絲之興趣,遂派麥秀英一行十二人到英國溫布萊獻技。

何東之計,秀英之技,令英國佬大開眼界,贏得主辦單位贈銀杯作感謝狀。昔日之「香港製造」,老外欣賞;今日之「香港製造」,乃「來自瑞士的天巒」也。

提起呢個「東英學圃」,何東長孫何鴻章仲記得園內收成的荔枝,甜到入心,「當日賣掉何東花園呢幅地,真係好唔捨得,當中涉及家族問題,見到一個咁有歷史價值花園又變成地產項目,真係好慘呀!」又係,呢幅地八九年何家出售時才幾千萬,家陣一間天巒都一億,梗係慘啦。

朱太分甘同味

金利豐老闆娘向來識飲識食;仲好肯分甘同味,秋風起,正是禾花雀最肥美的日子,朱太特意向老記送上來自廣州禾花雀;朱太話:「呢個時候當造呀,特別好食。」

近排熱錢湧入,股市火辣辣,唔少二、三線股都「禾雀亂飛」,非常應節;朱太亦忙個不停,四出洽談資源方面商機;早排由金利豐安排配股蒙古礦業(1166)就單日升過八成,本週一大市回調都升近兩成,搞到散戶心癢癢;不過朱太提醒散戶要留意風險,不要盲目投資,係喎,容乜易食完禾花雀之後,整隻「大閘蟹」就該煨囉!

金牙大狀講

隔代遺傳較健康

朝鮮金氏王朝「儲君」金正恩獲封大將軍銜進身為中央軍委副委員長;三個星期後,有中國特色社會主義「儲君」習近平「當選」為中央軍委會副主席。中朝兩國規模有別,而國運走勢背馳,但槍桿子出政權之道理則如一,此之為社會主義優越性乎?

金正恩之「儲君」地位由其「父王」金正日策封,是為直接遺傳;世界第二大經濟體行隔代遺傳制,習近平由上一任軍委主席江澤民欽點。兩個「儲君」皆肥頭而耷耳,有王者之相,究竟邊個襟熬呢?

金氏直接遺傳試過兩趟 —— 金日成傳位俾金正日,再由金正日傳俾金正恩;自一九四八年立國至今,金朝屹立不倒。有中國特色之隔代遺傳制同樣試兩趟 —— 鄧小平隔代傳位俾胡錦濤,再由江澤民隔代傳位俾習近平;共和國四九年成立,但隔代遺傳之制則始於八九年六四之後,歷史遠不及金朝。

雖然係咁,金朝之直接遺傳皆由病起,無論金日成或金正日都係有病至策封「儲君」。反觀有中國特色之隔代遺傳則健康得多,無論係鄧小平或江澤民傳位後都身體健康。觀乎其走勢,隔代遺傳睇健康。

龔仁心有心無力

華懋旗下的第三間酒店,位於黃竹坑的L'Hotel,上星期搞開幕派對,不少名人如前行會成員周梁淑怡,英皇娛樂CEO吳雨等均俾面出席,連應屆亞姐都踩場,躍升為華懋弗人龔仁心,身邊果然多好多朋友。

L'Hotel的英文口號「Chic South」中文口號大玩食字,譯為「型南」。為配合「型」,酒店當晚摒棄傳統的剪綵儀式,轉由龔仁心及其他酒店管理層「扯」開布景板上的膠紙,以展示板上的另一款圖案。原本這款「後現代」的剪綵方式尚算「別出心裁」,可惜工作人員將膠紙黐得太實,龔仁心出盡九牛二虎之力,都「扯」唔開,最終要由幾位大隻男上台幫忙,台上台下一片尷尬。

剪綵咁騎呢,台下有個口痕嘉賓陰陰嘴笑住話:「乜咁唔老呀!」龔仁心唔單止無黑面,事關記者問佢知唔知哨牙通個樣近排好鬼殘,佢笑住好豪氣咁話:「唔知佢喎!早知今日,何必當初。」

藥廠推銷員有前途

未上市已新聞多多的四環醫藥(460),○七年於新加坡上市,○九年底以「新加坡唔興保健股」為由私有化公司。今年十月,挾「醫藥股最高市值」之名來港吸水。曾幫博士蛙(1698)上市的口痕賓架話:「信我啦,呢隻勁過博士蛙!」營業十年,上市兩次,唔係唔勁呀。

四環勁在新聞多多,其中溫總乖仔溫雲松居功不小,由他創辦私募基金新天域入股後又褪,加埋中人壽、阿里巴巴主席馬雲創辦的雲峰基金,同埋量子基金大佬索羅斯,將四環藥業捧到星光熠熠。

然而,最勁者,乃主席車馮升與副主席郭維城,揭開本招股書,老是「車醫生」、「郭醫生」咁稱呼,雖然二人分別有八年和四年之行醫經驗,但二人負責推銷醫藥則有十七年之久,賣藥賣到當上市公司主席,所以你話做賣藥sales幾有前途,有辦你睇,我曾特首,亦做過輝瑞推銷員也。

兩位「醫生」車馮升(右)及郭維城(左)去年年底於新加坡私有化公司後,不足一年又來港上市集資。身後的瑞銀銀行家Joseph Chee近排頻頻現身上市記招,做到手軟,傳聞佢只會派卡片給操普通話的女記者。男記者想問佢要張片,佢會話:「呢排好忙唔想聽電話。」

索羅斯同道中人

講開四環,緣何阿里巴巴馬雲同索羅斯同樣睇中呢隻新股?原來馬雲背後有個軍師,係來自寶島蔡崇信(Joseph Tsai),佢老兄馬雲創業時間就加入阿里巴巴,唔介意做月薪只有五百蚊人民幣打工仔;蔡崇信係投資專才,控制一家對沖基金Blue Pool Capital,與索羅斯可謂同道中人,不過蔡氏係出身台灣律師世家——Tsar & Tsai的後人,中文名叫常在國際法律事務所,意謂「主恩常在」之祝福,蔡家咁謙卑又唔似得對沖基金咁狼死喎!

鴻章 賣仔 仔莫 摸頭 菁華
PermaLink: https://articles.zkiz.com/?id=18729

東尼永不沽售5號仔 宗菁華



2011-1-27  NM


東尼出院,朝住令人可喜之正確而順暢之上升軌進發,佢非但睇番報紙,仲玩其廿一點同埋Scrabble,更加開始諗番股票,此又豈不令人欣喜?

佢非一聽到宏利即刻眼開,我哋探過佢口氣,問佢對隻5號仔點睇?佢認為當下啲「沽派」謬矣。佢覺得在現水平,5號仔仲有得去也。咁到乜嘢水平至應該沽5號仔?應之曰:NEVER! 大家聽到啦。

東尼非但關注宏利、5號仔之去向,佢對自己建立之投資組合一樣縈繞於心。遲吓精神番啲,佢有意重新檢視個組合。不過我哋未應承得大家住,等吓啦!

鄧聲興起革命

年前股市演員鄧聲興「背妻玩o靚妹」而登上敝刊封面。不過似得李居明大師話齋,嗰一趟我哋可能中計矣。

何以瘀成咁?事關鄧演員顯然又並非玩o靚妹,佢原來直情係要同個o靚妹起革命。冇錯,係「為構建和諧家庭而奮鬥終身」。

佢篇組織「革命家庭」宣言,佢仲搬埋阿爺嘅至理名言「革命不是請客吃飯」出嚟,顯見「構建和諧家庭」唔係講玩也。鄧演員做慣戲,今趟莫非嚟真?

郭小姐冧爆王主任

泛民哀求新科港澳辦主任王光亞賜見而不果,糖王乖女、《南華早報》揸弗人郭惠光則「聖眷正隆」,全港中西傳媒之中,佢係首個獲得單獨接見。恰如煲呔‧曾之言,親疏果然有別也,大家擘大雙眼睇吓啦!

厚待如斯,郭小姐以小粉絲之姿態裝扮眼神望實王主任又豈不應該?換轉你係王主任都冧爆啦,係咪?

THE ICON:紅顏禍水

半山干德道THE ICON搞出滿城風雨,敝刊老記不辭勞苦,遠赴星洲起起發展商過江龍鍾斌銓底。佢係星洲福建華僑鍾奕莊個仔,乃三房所出,全家共有廿八名兄弟姊妹。

我哋搵到鍾斌銓同父同母嘅阿哥鍾金榜喺星洲最高尚住宅區Oxley Rise嘅祖屋(新加坡資政李光耀亦住喺呢一區),當時佢阿嫂朱薇瑾正喺度同班嬸母玩紙牌耍樂。聽佢口氣,搞出單THE ICON亦紅顏禍水也。點解?

佢阿嫂話:「鍾斌銓幾十年前識咗個香港女人,鍾意去香港發展。」若果唔係咁,又豈致搞出單咁嘅嘢呢?紅顏又豈非禍水哉?

鍾家以酒店為祖屋

講起鍾斌銓阿嫂朱薇瑾,佢現今居住之鍾家祖屋係間兩層高殖民地時代洋房建築物,花園佔地甚廣。間屋夠晒闊落,事關其前身係酒店嚟者。以酒店為居所,你話大唔大啦!

自己間祖屋大成咁,鍾斌銓點解又諗得到喺THE ICON整間要側側身至入得到嘅廚房呢?人嘅思想確係好奇怪者。

日本漢語弊傢伙

日本同中國向有同文同種之說,但對大和民族嚟講,漢字始終係外來語,結果就搞到敝、弊不分咯。認真弊傢伙也。

中環人語迷你版

“一定有燒鵝食。”

估中邊個中環人講呢句說話,送你SwitchEasy CANVAS for iPad 機套一件

有意參加者,請於一月三十一日24:00前將答案電郵centralman@nextmedia.com

小宗只接受電郵,郵寄免問。

本刊員工及直系親屬不得參加。

為求公平及杜絕偷步搶答起見,請於星期三下午一時後來電郵競猜答案;在此之前發出之電郵作廢。

超過一位讀者估中,先到先得,恕不接受上訴。

答案及中獎者姓名將於一一年二月三日本欄揭曉。

上週人語揭曉

“官有九個口,政府信唔過。”

答案︰石禮謙

得獎者︰Winnie Ho

中獎時間︰1:00pm 19/1/11

金牙大狀講嘢

大家等運到

「聯繫匯率之父」祈連活為經濟把脈,話美國冇通脹迹象,故此未來一年加息機會微乎其微。港元同美元掛鈎,咁即係香港同樣都唔會加息。如此一來,官家要防止樓市泡沫化則只得管制借貸一途而已。

先前金管局已經降低樓按比率,若然再降,咁啲銀行仲使搵食乎?難怪早前已有銀行發動減息搶客;若然再降樓按比率,銀行間之競爭勢將更形激烈。此又豈不進一步催谷樓市?

咁樣發展落去,若果美元利息唔掉頭回升,而港元又繼續掛鈎,遲早有一日政府要以行政手段禁制買樓。當然冇人想見到咁嘅一日,但會否要行呢一步,真係冇人知。話知嘅都係呃你者。大家等運到,咁樓價又有乜辦法唔係咁升呢?


東尼 永不 沽售 號仔 菁華
PermaLink: https://articles.zkiz.com/?id=21892

黃老闆獨憐老虎女 宗菁華


2011-2-24  Nm




老虎女胡仙夥拍長實集團向政府競投虎豹別墅活化計劃,此舉不禁令人唏噓。

昔者,超人李委派小超同老虎女斟數,結果以一個億買入大坑虎豹別墅。跟手補地價九個億發展名門,最後套現八十多億;扣除建築成本,純利高達五十幾個億,利潤驚人。今日老虎女唔介意俾人揸乾過,更加再次拍檔,此是器量大抑或老虎女仲未識世界呢?

斟數賣虎豹別墅之時,陽明山莊之黃週旋亦有參與其事。當時老虎女曾經主動提出上山同佢傾,但黃老闆於心不忍,親自落山傾以示尊重。又至小超敲定作價,黃老闆見老虎女淚盈於睫,動了惻隱之心,問小超可否秤先啲,加多兩千萬。結果如何,唔使講啦啩?

盡人皆知,小超為人斗零都算到盡。既然講好咗一個億,莫講話加多兩千萬咁多,即使加多廿皮亦難也。黃老闆唔怕尷尬幫口,莫非佢由台灣過嚟咁耐都未同小超交過手?

馮老闆利誘員工跑馬拉松

啱啱過去嘅星期日係一年一度之香港馬拉松,唔少有錢佬都有參加。

早兩年已經跑半馬之利豐老闆威廉‧馮國綸,今年亦有落場,仲感染到屋企人陪佢跑。好似佢兩個仔,以及大佬域陀‧馮國經個仔,都有參加。只可惜域陀馮有個大肚腩,唔敢去馬。

馮老闆唔只自己落場,仲動員過千利豐員工參加,更加特登卜咗富豪香港酒店兩層,等啲同事跑完去食早餐,仲提供埋腳底按摩,認真周到。

馮老闆跑完仲有氣上台同班伙記講番幾句。個司儀見機不可失,以rap嘅形式問老闆有幾多人工加?馮老闆轉數快,rap出答案:想人工加多啲,就要多啲人參加下屆馬拉松。

葉大姐靈活聯繫

香蛇同公關大姐葉潔馨聯手搞春茗,捨傳統之酒樓而喺成個中環最尊貴之香港會搞。除咗心裁別出,其格調之高,一般行家亦無與倫比也。

喺得香港會搞春茗,除非好似鄭大班咁老早入咗會,否則點都要有番咁上下關係人面至攞到地方。不過呢樣嘢又點難得到葉大姐呢?呢趟春茗就係由法律界老行尊練松柏(C.P. Lin)出面者,葉大姐人面如何,不必細表矣。

葉大姐之鋪頭以「靈活聯繫」(Link-Work)為號,即使搞單春茗亦見靈活運用聯繫矣,犀利。

梁伯韜灰太狼上身

番薯.梁伯韜舊年買入專做動畫之意馬(585),今年再有搞作,由意馬用八億買起神州卡通喜洋洋同灰太狼,大手筆也。

佢老哥打起條紅色羊咩呔見記者,話條呔係老婆送者。但隨即話自己似灰太狼,因為佢似得隻狼咁錫老婆云云。乜都俾你講晒啦,老友。

番薯.梁抱住個狼形大公仔,真人演繹狼吃羊之動物天性。真情流露,難怪超人李旗下之生命科技都入股意馬也。佢跟住會食乜嘢,大家且拭目以待啦!

本週冧巴︰拉弗夠八

酒王拉弗俾大陸班富一代,富二代搶到貴晒,已同全世界嘅名牌一樣學精咗,喺其酒樽上做功夫,冧呢班新發財。

如何冧法?整番個中文嘅「八」字囉。拉弗呢個「八」字穩重中見貴氣,極其考究,唔知係柳公權抑或係顏真卿呢,又?

本週謀殺事件

環保大道唔環保

通往將軍澳堆填區之公路以環保為名,實則一啲都唔環保。好天之時固然塵土飛揚,落雨天就更弊,泥漿四濺。

路政署罔顧呢個鐵一般嘅事實,夾硬喺公路中間闢設花圃,植其花木,咁又焉能唔搞到花木為泥濘漿實,形同謀殺?你估啲乜綠物青之環保組織有否為慘遭極刑之草木發聲呢?想創閣下個心也。


老闆 獨憐 老虎 菁華
PermaLink: https://articles.zkiz.com/?id=22738

中環食肆水盡鵝飛 宗菁華


2011-3-10  NM




三八婦女節前夕,股市延長交易時段,上下晝各早開半粒鐘。唔好睇小呢半粒鐘噃,禮拜一晏晝,中環食肆通通水盡而鵝飛!點解?

得一粒鐘食晏,經紀同埋啲炒家點食得切呢?落樓上樓埋位埋單,在在需時;計過條數,唔夠鐘出街食,焗住叫飯盒三文治,咁啲食肆有乜辦法唔學得李清照話齋,尋尋覓覓冷冷清清淒淒慘慘戚戚呢?中環租金搭火箭,再又遇上延長交易時段,你叫啲食肆怎麼辦?怎麼辦?

股壇長毛David Webb認為香港忝為世界三大金融中心之一,有必要同先進國家併軌;而併軌之道乃在延長交易時段 —— 及學得華爾街咁食晏無休。觀乎延長交易時段而仲未取消食晏之中環狀況,即使佢老哥業已升呢為夠資格攞六千蚊之永久居民,睇怕佢忘記咗一個基本事實:唐人以 食為天。鬼咩,佢來自英倫!弊。

印度裁縫轉數高

印度裁縫Raja Daswani狙擊「抽水大王」官永義,一經敝刊報導,聲名大噪。近日佢一轉口風,話唔作全面收購永義,更加開始減持。結果?禮拜一永義股價應聲滑落六個巴仙。但一切於佢無損,事關佢手頭嘅股票已升值近倍,袋袋平安矣。

佢老哥食住個勢喺自己本行出擊,玩其團購。上個禮拜四佢喺ubuyibuy現身,以優惠價$888賣價值$4,000之度身做西裝。

唔知係佢老哥夠號召力,抑或係團購嘅魅力,短短一日之間,250張優惠券盡數沽清,認真犀利。佢老哥轉數高成咁,好彩佢不為已甚,冇將場狙擊戰堅持落去,否則官永義都幾濕滯。執番身彩,仲唔去做番套新西裝還神?

強積金貨不對辦

正是一石激起千重浪,鬍鬚曾要注資強積金兩百四十億元,非但激發萬人上街,人人更因而『目及』多兩眼自己個強積金戶口。不『目及』猶自可,一『目及』唔少人至發覺班基金經理如何食人唔『舌累』骨,唔少人更又發覺唔少基金貨不對辦。

即以信安之香港股票基金而言,開宗明義話係「主要投資於香港股票市場」,但睇清楚其所持之股票,當中赫然有2.38%為怡和控股。眾所周知,未過渡,渣甸業已搬到新加坡掛牌矣。

又如信安之「美元儲蓄基金」,既為儲蓄,衰到貼地亦係冇息收而已,係咪?然而自○○年推出至今,其累積回報竟然係負2.86%;喺○七、○八年,其回報更劇跌9.23%。紅簿仔最多咪冇息收,點都不致蝕入肉啩?啲高官強迫人作此投資,唔上街咪真係當正你係病貓?

搬一搬獅子升三成

獅子錢庄新大班歐智華雖然已講到明佢老哥唔會搬竇返香港,因為鋪頭總部設在英倫,佢一搬,每年只可以留喺英國八十九日,做生意會好方便。但如果鋪頭都搬埋,咁咪冇呢個牽制囉?

果然,英倫之《星期日電訊報》透露,雖然獅子錢庄否認會搬竇返香港,集團其實已經考慮過其可行性。何以要搬?英倫非但皮費貴,稅更加重。搬返香港將大大改善其股東回報。有股東更作過估計,只要一公布搬,股價大有可能即時彈升三成咁講。

形勢比人強。所有公司都要向股東負責,獅子亦唔例外。有現成辦法可以即時大幅提高股東回報,班管理層若果唔認真諗諗,你估佢哋想唔do乎?

田王之都有逸夫樓

眾所周知,六叔邵逸夫乃上海阿拉,但喺盛產田王石之福建福州壽山鄉原來佢都有唔少粉絲擁躉,更加有人以佢之大號為自己之樓房冠名,足見捧場。

壽山鄉有名得過你叫,盛產田王壽山石。國家唔少人響應鄧總舵主號召,先富了起來,故此大有餘資炒其田王石。當下田王比價格拔足狂升之黃金更加貴,只要係真貨,一克要成人仔一萬大元。

矜貴成咁,壽山鄉由是到處張貼告示,「嚴禁開採,違者以盜竊罪論處」。社會主義中國「依法治國」,實情又如何?梗係執輸行頭、慘過敗家,你有你禁,我有我掘也。有乜辦法呢?掘田王仲好過掘金噃,唔掘又豈非搵自己笨?


中環 食肆 水盡 盡鵝 鵝飛 菁華
PermaLink: https://articles.zkiz.com/?id=23136

任得皮蛋‧劉舞 宗菁華

2011-6-16  NM




沙膽彤大手買入佐丹奴,引發無限遐想,令人以為佢遲早會食起整間嘢。但喺新礦資源投資者推介會上,佢老人家親自解畫,話絕冇咁嘅意思。只不過佢好欣賞佐丹奴嘅管理,覺得現任主席皮蛋‧劉國權做得好好,以實際行動支持佢。

換言之,彤叔即使沙膽,對運作良好之佐丹奴佢亦唔敢去碰,故此佢做咗大股東都唔會派人入董事局,費事諸多干預,而只係做個被動嘅投資者咁講。鬼佬話齋,If it ain't broke, why fix it? 皮蛋‧劉放心啦!

彤叔大晒冷

皮蛋‧劉管佐丹奴,沙膽彤完全放心,新礦資源就唔同啦。呢間內地公司早前喺香港上市,而表現乏善可陳。後來俾彤叔睇中成間買起,進而分拆上市,搵前壹哥曾 蔭培(即係特首弟呢?)做主席,可惜鎩羽而返,搞到要第三次上市。不過近排多新股上市,要脫穎而出亦非易事。有乜計?佢再用恒大招股群星拱照呢一招,搵咗 L君‧劉鑾雄、楊受成、張松橋、朱太、林建岳、恒大行政總裁夏海鈞、長實葉德銓等大晒冷。得唔得呢?

范太不棄故國

王光亞未落香港,人大常委范太已一早吩咐定,叫佢到香港之時千祈唔好講邊個做特首。王主任又果然聽話。記者以此問佢,佢第一時間作反應:「你又唔會選 我!」醒!王主任都要聽范太話,可見其quali。呢個quali又非一朝一夕建立起嚟者。范太做女之時,已精忠愛國,六三年佢仲讀緊聖士提反初六之時, 只不過十八歲女啫,已經寫咗篇題為《天地的不朽精神 —— 屈原》嘅鴻文,結語曰:「屈原是我國愛國者中一顆彗星,他不屈不折,任勞任怨而不棄故國的精神,值得我們學習。他一生為國為民的忠直,更值得我們敬仰。」 六三年饑荒大逃亡潮剛過,而范太歌頌「不棄故國的精神」,此又怎不難得?冇咁嘅quali又點得王主任掂乎?應該者。

法律行動唔止瀉

早前敝刊寫超大,五月廿六日見報之時,佢哋嘅股價即時跌咗接近三成,係插水式。一個星期後佢哋出咗封一頁紙長嘅律師信俾我哋。向敝刊「採取法律行動」之 說,更廣為宣傳,上晒各大國際通訊社,可惜對股價似乎冇乜幫助,股價再跌多十零個巴仙,此後繼續滑落,近兩三日至有番些少起色。見到此番局面我哋都唔識得 講,由表面證據睇嚟,「法律行動」似乎唔多止得瀉囉!Lomotil得唔得呢,又?

貨櫃先驅領獎

六月十一英女皇官式生日,頒咗個CBE俾和黃旗下之國際貨櫃碼頭副主席John Meredith,以嘉許佢對國際航運之貢獻。佢老哥有何貢獻?差唔多四十年前佢開始咗香港第一個貨櫃碼頭。當時貨櫃係新鮮事物,大家都唔知呢味嘢得定唔 得。故此佢嘅工作之一,係測試唔同顏色貨櫃對裝載嘅貨物有乜影響。邊樣測試法?佢將一個櫃髹黑色,另一個櫃髹白色,分別裝滿安全套運去澳洲。前者運去墨爾 本,後者運去雪梨。佢話雪梨現今人口多過墨爾本,原因即在其中。信焉?

本週鏡頭

特赦AM車?高官自煲呔打落,莫不以鏞記為飯堂。食晏時分,成條威靈頓街由是AM車川流不息,包括喺雙黃線上落。林鄭話堅持法治精神,僭建冇得特赦,即使鄉親父老一樣冇面俾。貫徹法治精神,AM車有冇得雙黃線上落呢?可惜林鄭唔管交通法呢。

中環人語迷你版

“實行剪咗佢。”估中邊個中環人講呢句說話,送你dexim CYL Premium Silicone Case for iPhone 4 (DLA 155)一件有意參加者,請於六月二十日24:00前將答案電郵centralman@nextmedia.com小宗只接受電郵,郵寄免問。本刊員工及 直系親屬不得參加。為求公平及杜絕偷步搶答起見,請於星期三下午一時後來電郵競猜答案;在此之前發出之電郵作廢。超過一位讀者估中,先到先得,恕不接受上 訴。答案及中獎者姓名將於一一年六月二十三日本欄揭曉。

上週人語揭曉

“六四只係小小的沙石。”答案:謝凌潔貞得獎者:C.K.LAM中獎時間:1:00pm 8/6/11

金牙大狀講[!84C5]

王光亞君臨特區新科港澳辦主任訪港,一改城府甚深之前主任廖暉嘅高壓作風,非但作前所未有之公開演講、同年輕人對話,更加去街市擦燒肉、食蛋撻,態度開 放,形象上得分唔少,不在話下。不過咁有咁弊。肥彭去旺角飲涼茶、去擺花街食蛋撻,冇研究之致,事關佢係港督,形象親民,香港人受落,公關贏晒。王光亞唔 係港督,但擺出成個港督咁嘅款,咁又置煲呔 —— 及未來之特首 —— 於何地?江澤民都去旺角巡,佢係主席,做乜都得,但王光亞唔係。再者,過渡後,假假哋,特區都叫話實行「港人治港」,外交、國防以外,照理中央一切唔管。 家吓王光亞落到嚟,左一句香港資產泡沫化,右一句物價漲升,再又話支持香港人做解放軍、萬萬要搞好國民教育等等,大佬,家吓究竟邊個管治緊香港先?係煲呔 定係王光亞?觀乎煲呔以降嘅高官對王光亞之卑躬屈膝,邊個係真老細則又清楚不過。咁搞法,仲有「港人治港」乎?不如北京接管啦,笨!起碼王光亞形象親民過 煲呔呀!

 


任得 皮蛋 劉舞 菁華
PermaLink: https://articles.zkiz.com/?id=25781

新地pre-sale儲客 宗菁華

2011-7-21  NM




早兩期我哋比較過瓏璽嘅樓書同實景,「有心人」見我哋咁有科學求證精神,特登醒我哋,話新地嘅賣樓手法同樓書一樣咁富創意。點有創意法?

瓏璽未正式開盤就好似賣時裝咁先嚟一場pre-sale,搵班準買家埋枱斟價錢。啱嘅就簽約「預留」,但新地則唔簽名,儲夠客啦,先至按政府規定,喺正式 發售前三日出價單,實情佢哋早已有批客簽字預留單位矣。儲客呢一招有乜好處?最好之處係俾人以為有大客成圈成圈咁大手掃貨,實則呢啲單位係逐個逐個斟返嚟 者。有咗pre-sale儲客呢一招,「價單」已名存而實亡矣。無怪乎瓏璽一反常態每隔一、兩日就加推大批單位,更加極速售罄。真係咁好市,又使唔使 pre-sale儲客呢,又?

高登耕開有人爭

正所謂「瘦田冇人耕,耕開有人爭」,蕭若元睇中高登討論區,話等高登開價,股壇評論人孫柏文都話要爭埋一份,蕭若元有興趣收購高登嘅新聞一出街,孫柏文話 各路英雄都有意斟埋一份,一朝早就有超過六個銀行家朋友話有興趣落疊,同蕭若元嚟個公平競爭。高登咩咁有吸引力?孫柏文話高登討論區充滿香港文化特色,同 佢搭檔收購嘅朋友,都係高登友。而且高登瀏覽人數高,佢話「南高登、北天涯」,內地熱門討論區天涯同高登齊名,佢相信高登絕對係條財路。

CEO義助劏房小孩

敝刊上期有篇《劏房小孩》故事,講八歲女童譚麗媛如何獨自返學,放學後又喺劏房照顧傷殘母親,故事有血有淚。文章出街,回響唔少,有上市公司CEO睇完個 古仔心有戚戚然,成晚冇覺好瞓。佢雖然知道世界上唔少類似嘅事件,但佢好想盡綿力做啲嘢。翌日早上,佢專人送上一萬元現金,囑敝刊轉交麗媛一家。CEO唔 想開名,佢寄語麗媛叫佢俾心機讀書。敝刊已經遵照指示,第一時間交咗錢俾麗媛,在此謹代表佢向善心CEO講聲多謝。

韶關高租賣鋪

幾年前敝刊踢爆以「商場醫生」招牌行走江湖之沈永年夥同曾Sir‧曾智英教人買鋪,當時唔少街坊中招,成年都無鋪收。事隔多年,呢對孖寶週前又試出動,帶 住兩百幾人北上韶關睇鋪。團費兩百幾銀,包三餐兼一晚溫泉酒店,筍成咁,只得兩百幾人去,算人少咯!「商場醫生」今趟嘅新招係保證頭十年每年平均有8%租 金回報;成交之時發展商更加一次過俾足頭五年租金。羊毛出在羊身上,呢五年租金直情由鋪價中扣除。未出發,宣傳單張話啲鋪十萬蚊已經有交易,而且商場離開 高鐵站好近,附近步行街有麥當勞等大型連鎖店,人流夠晒旺。去到現場,先知十萬蚊個鋪地處死角位,沈醫生話過百萬元嘅鋪至係信心保證。至於商場呢,唔塞 車,坐車去高鐵站都起碼要半粒鐘;步行街同樓盤嘅距離,係金鐘行去銅鑼灣咁遠。雖然係咁,依然唔少師奶落疊,因為五年保證8%租金回報睇落確係筍到痺。有 咁大隻蛤乸隨街跳,啲發展商仲使用六、七分利息周圍撲水乎?

林煥光唔做嘢

過江龍老千種金騙財,搵米雪開記招營造聲勢,更加搵埋臨記撐場,酬金按國籍種族、性別而定,中國籍男子價錢最平,外國籍女子最貴。呢個做法同警察請演員做 認人手續同出一轍。即以警方新近招聘嘅一批演員而言,中國籍男子之時薪不過係80蚊而已,中國籍女子時薪為108蚊,至於非中國籍及混血男子及女子則時薪 高達1,000蚊。工作同係供認人之用,而薪酬有天淵之別。同工而不同酬,而造成呢個差別嘅唯一原因係種族膚色及性別唔同,此又豈非如假包換之種族性別歧 視乎?執法機關公然搞歧視,咁仲有王法咩?執法機關公然搞歧視,肩負推行平等機會之林官煥光有冇出過聲、做過嘢?唔覺噃!唔好淨係識得攞彩至得o架,亦得 盡責乎?

方鏗返鄉下發達

華潤創業旗下嘅華潤雪花牌啤酒買起江蘇大富豪啤酒四成九股權。大富豪呢個品牌唔係由大富豪張子強而起,早於張子強仲未曉得食大茶飯之時,紡織界老行尊方鏗 已經開始返江蘇南通鄉下投資。除咗時代零售呢個超市連鎖店,佢又參股大富豪啤酒。前者於○七年上市,去年賣咗俾韓國樂天購物。大富豪啤酒原本係國企,九六 年重組,方鏗參股支持家鄉企業,到公司茁壯成長,佢就骨水離場。超市連鎖店及啤酒都賺大錢,故此回饋鄉里唔係一定做善事o架,有時都可以發達,方鏗就有辦 俾你睇啦!

中環人語迷你版

“要有俾人鬧到仆街嘅思想準備。”估中邊個中環人講呢句說話,送你NIKKO Daypack Academy 24背囊一個有意參加者,請於七月二十五日24:00前將答電郵centralman@nextmedia.com小宗只接受電郵,郵寄免問。本刊員工及 直系親屬不得參加。為求公平及杜絕偷步搶答起見,請於星期三下午一時後來電郵競猜答案;在此之前發出之電郵作廢。超過一位讀者估中,先到先得,恕不接受上 訴。答案及中獎者姓名將於一一年七月二十八日本欄揭曉。

上週人語揭曉

“唔好以為自己惡晒。”答案:李少光得獎者:K.K.Lam中獎時間:1:00pm 13/7/11

金牙大狀講[!84C5]

煲呔縱容抽水張炳良為抽水辯護,承認行政會係個決策機關,故此好似佢咁嘅成員有憲制責任維護集體決定。但行會成員又係社會嘅一分子,有責任反映民意,故此 毋須拘泥於集體負責紀律而扮其鵪鶉云云。位高權重而有此混淆視聽嘅言論,香港有乜辦法唔立立亂呢?須知行會有行會嘅規矩,而規矩之一係決策守秘;規矩之 二,決策一經敲定,成員集體負責。咁唔等於班成員唔可以反映民意,反之,做得非官守成員,其主要職責正正係反映民意 —— 喺會內反映,而唔係會內拗唔贏,到有咗決定啦就公開唱反調抽水。真係咁鍾意反映民意,去選立法會啦,笨。否則就應該乖乖服從集體決定,唔好亂咁嘈。現今一 個二個行會成員都似得張炳良咁,會內拗唔贏,就高舉民意大旗,同政府唱反調,咁仲有乜共同施政理念可言?理念唔一致,咁又何以言強政勵治?特區成日嘈嘈 閉,正正係煲呔縱容張炳良、CY之流抽水。社會唔和諧,佢要負絕大部分責任。


新地 pre-sale 儲客 菁華
PermaLink: https://articles.zkiz.com/?id=26442

高鐵拖人落水 宗菁華

2011-7-28  NM




高鐵出事,劉志軍案愈挖愈深。先前山西女富豪丁羽心「天匯」撻訂,暴露佢原來同劉志軍一案有關,當局已經落嚟查緊,跟住肯定仲會有唔少人被拖落水。

劉志軍案牽連甚廣,當然唔止一個丁羽心啦。呢,喺中環中心三十三樓,就有間由鄭朋、鄭飛同鄭龍呢三個福建晉江兄弟開嘅中盟世紀投資集團。集團旗下嘅中建亞 洲集團原來接咗唔少鐵道部嘅生意,專門幫高鐵挖地下隧道工程。近排呢間公司聽聞好似有啲頭暈身熱。莫非因為咁,呢幾個月佢哋間寫字樓一直烏燈黑火?就算減 排節能,都唔使咁o格,係咪?

恒大許家印阿茂整餅

上個月,對沖基金狂質恒大地產(3333)。當時主席許家印誓言報復,市場跟手傳出佢老人家打算用50億元銀彈同對沖基金砍過。上個禮拜二,恒大卒之出 招,斥資6.56億元回購1.1億股,回購價介乎每股5.58至6元,諗住咁就可以嚇走班淡倉友。不過恒大唔係按正常程序,等股價跌到殘晒至回購。反之, 許老闆等到股價大幅反彈至出招,由是刺激股價創上市以來新高。第一次回購就咁出位,莫非有錢無定使?似乎又唔係噃。恒大總負債達312億元,手頭現金則唔 到200億,即係淨負債達113億元;加埋每年要拎20幾億元支付利息開支,有閒錢都應該用嚟減債啦。大手掃貴貨,就算係自己嘅股票,一樣令人費解。回購 後股份要註銷,股本少咗,每股賬面值反而下跌。現金回購,錢俾咗街外投資者,自己嘅淨負債則上升,難怪摩通話恒大嘅淨負債率會因而增加2.3%,至 39.4%。咁樣回購法又豈非「阿茂整餅」?

請鐸叔食humble pie

傳媒大亨鐸叔為竊聽案俾班英國國會議員照肺。佢不打自招,話呢一日係佢八十幾歲人最卑躬屈膝嘅一日(The most humble day of my life)。莫非正正因為咁,自稱喜劇演員之Jonnie Marbles就成全佢,請佢食其humble pie?啲泡用嚟剃鬚嘅噃,食唔食得o架?

金牙大狀講嘢俞宗怡轉移視線

梁展文事件後,官家檢討退休首長級公務員要過幾耐冷河至可以搵真銀。擾攘一番,俞宗怡認為特區之冷河期長過英美以至新加坡,故此毋須進一步延長,否則會打 擊公務員士氣兼夾削弱優秀人才加入衙門之意慾云云。咁即係點呢?俞問責局長話成單嘢制度冇錯,梁展文先生亦冇做錯;千錯萬錯,錯在佢個人之疏忽。因為佢局 長一個人嘅疏忽,立法會開咗一輪會,搵咗一班社會賢達檢討過冷河制度。當中公帑固然用咗唔少,班民意代表同賢達才俊花嘅精神時間更加無從計量。若果俞問責 局長一早從實招來承認瀆職疏忽,咁又使唔使搞個大頭佛出嚟呢?換言之,經過梁展文事件,檢討冷河期之長短,好應該。更加應該檢討者,又豈非有關之問責高官 何以瀆職疏忽?倘有瀆職,制度上又應該點樣補救?辦法之一,係唔係問責下台,以儆效尤?咁關鍵嘅問題都唔理,反而走去比較特區同英、美、新加坡冷河期之長 短,此又豈非官僚轉移視線之慣技乎?咁樣問責法,特區政府嘅民望如果都唔插水,咁仲有天理乎?

葉劉慣手勢拉票

書展年來成為一年一度嘅城中盛事,無論是否有志於遷入港督府,但凡有頭有面嘅人士莫不去書展亮相。砌低替補機制,風頭一時無兩嘅葉劉又豈會例外?更何況佢 又係如假包換嘅作家,今年出咗本《Learning English With Regina》,教人學英文?葉劉去書展非為拉票,而係去同小朋友講故事。既然佢出得書教人學英文,佢梗係用英文同班小朋友講古仔啦!乜嘢古仔? 《Beauty and The Beast》也。(識得葉劉嘅人當又知道,佢講呢個古仔可能另有懷抱。)班小朋友(有關機構請嚟嘅小臨記也,收費同警方認人收費表唔知有冇出入?)是否聽 出耳油,目測法提供唔到答案。但一講完古仔,葉劉慣咗手勢,即刻同班小臨記握手。其手勢之嫻熟,一如落區洗樓。都有需要嘅,今日嘅小臨記即係未來嘅大選 民,拉定先囉!各位,咁就叫投資啦!

揼老董心口

卡臣‧楊家誠前無古人做其英超班主,雖然非常短癮,但亦已令特區唔少有銀之士身痕,想搞番隊波過過癮矣。英超係世界波,使費唔少;有銀士退而思其次,喺特 區搞其英超足球訓練學校,教o靚仔踢波。舊年至開辦嘅阿仙奴足球學校,至今已經設有兩間分校,成績唔錯,有銀士心思思想搞埋利物浦足球學校。據知利物浦已 經同意,預計下年就會成事,班主諗住會搵前港腳巴貝利做總教頭,事關佢祖籍Merseyside郡,利物浦乃其郡府,算係鄉里;加以巴貝利做過利物浦學 徒,大有淵源。利記學校依家尚未成事,有銀士正落力搵緊贊助商。可惜呢幾年利物浦表現唔醒神,冇份踢歐冠,班水唔易。白頭董兩兄弟喺利物浦讀書,係名譽出 品,佢哋更加自認利物浦粉絲,唔揼佢哋心口,咁揼邊個呢?

缺德經紀嗱渣招

沙田穗禾苑係居屋老祖,唔使補地價就可以自由買賣,故此舊年吸引咗大批投資者入場;成個屋苑因而炒到貴晒,係成交最活躍嘅居屋屋苑。不過經過官府連番出 招,炒家縮沙;盤源乾塘,成個屋苑至今猶如一潭死水,咁你叫班經紀食乜呢?結果?有人於是出怪招搵客。譬如將個單位打大五百幾呎,製造筍盤假象。等到有水 魚行入嚟就……咁仲唔止,為咗谷客,有經紀甚至向路人落嘴頭,話佢個單位唔乾淨,換屋為上。缺德成咁,咁有乜辦法唔俾人port佢先?炒魷兼俾人貼大字 報,抵佢!

中環人語迷你版

“出師一定要有名。”估中邊個中環人講呢句說話, 送你NIKKO Daypack Academy 24背囊一個有意參加者,請於八月一日24:00前將答案電郵centralman@nextmedia.com小宗只接受電郵,郵寄免問。本刊員工及直 系親屬不得參加。為求公平及杜絕偷步搶答起見,請於星期三下午一時後來電郵競猜答案;在此之前發出之電郵作廢。超過一位讀者估中,先到先得,恕不接受上 訴。答案及中獎者姓名將於一一年八月四日本欄揭曉。

上週人語揭曉答案


高鐵 拖人 落水 菁華
PermaLink: https://articles.zkiz.com/?id=26603

利民•錢跳船快而準 宗菁華

2011-10-13  NM

近期好多二打六公司嘅董事,一見勢色唔對,即刻跳船;即使恒生銀行、港鐵主席利民•錢果豐都唔例外,而佢跳船時間之準,顯見一切都有計劃、有部署也。話說利民•錢十年前科網股年代入股創業板中華網兼夾做埋主席,過去呢十年雖然業績乏善可陳,佢老哥對公司則不離不棄,更同時做埋中華網母公司CRC嘅主席兼非執董,直情關係一條龍。不幸年來CRC生意唔掂,佢哋喺美國納斯達克上市,故此依足花旗規矩,上個禮拜向美國法院申請破產法第十一章保護令。咁大件事利民•錢又豈會唔知?於是喺CRC申請破產前一日,佢就同CRC割席,辭任主席兼非執董矣。唔做一間公司主席啫,仲有港鐵同恒生主席做吖。但經此一役,利民個快勞有冇刮花到呢,又?

北京搞校慶
辛亥革命百年亦係上海聖約翰大學百年校慶。時逢大節,揀咗喺北京慶祝,其士之周奕卿老闆、《信報》前老總沈鑑治等聖約翰大學舊生皆北上參與其事。何以揀北京而唔喺上海慶祝?無他,有個舊生叫魯平,佢長居北京;近年佢行動唔多方便,乃有北上慶祝之舉。移磡就船,此乃國情所需。聖約翰及其他十二間基督教大學(從燕京到嶺南)對中國現代化貢獻良多,可惜解放後阿爺驅逐佢哋出境,其餘一切不必細表。雖有百年慶祝活動,但似乎唔見有人多謝當年出錢出力為中國作育英才之美帝噃。五千年文化,莫非就只剩低「忘本」二字?悲乎?

本週圖片中國人主宰牛熊
全球金融市場為歐元震散,但咁顯然冇影響到中國鄉里之遊興。呢,喺德國法蘭克福股市外邊,就有兩個鄉里,一個出盡吃奶之力撐起隻牛,另一個靠自己之噸位壓低隻熊。此番努力,鎮唔鎮到場㗎?

金牙大狀講嘢當香港人死嘅
將軍澳出現神經刀,十二粒鐘連環斬傷四個人,而成個特區猶懵然不知,皆因警方既以數碼封鎖消息,令報館聽唔到999台,而警察公共關係科又當香港人完全冇到,唔發布消息,以致冇人知道有狂徒出沒,提高危機意識,加強防備。警方封鎖消息嘅伎倆令人不油然想起○三年沙士之慘痛經驗。當時疫症已由廣東傳到上北京,家家戶戶都喺度煲緊醋,但成個特區則被蒙在鼓裡。直至廣東有個染咗病嘅醫生落嚟睇病,住喺窩打老道之京華國際酒店,將病毒周圍散播,傳到威爾斯醫院、淘大花園以至加拿大多倫多,病毒偵探用超級電腦追踪方知道病毒源頭喺廣東。但到呢個時候,香港以至全世界已經死得人多矣。今趟香港警方隱瞞事實、封鎖消息,學足大陸。經過沙士一役,連中國影帝業都曉得向全世界承諾,痛定思痛,今後會第一時間發布疫情消息。香港警方封鎖神經刀一案消息,至今粒聲唔出,莫非當香港人通通死嘅?

本週快閃黨
理文造紙二公子李文思娶老婆,喺洲際酒店筵開五十席,大場面也。以李家之江湖地位,官紳世族……齊齊到賀,自不待言。當中梗係唔少得兩大疑似特首候選人啦。可能因為有「感情缺失」,費事同婚禮相沖,唐唐自己冇嚟,而由唐媽媽頂上。另一疑似候選人CY早已表白,從來冇過「感情缺失」,故此佢非但現身,更加同太座孖咇而至。第一個回合交鋒,大勝一比○。此外另一個揚言即使翻頭嫁都要選特首之葉劉亦有到場。但以閃得快論,則冇一個及得CY矣。佢由抵埗到離開總共停留咗七分零三十九秒,比國家領導人長駐特區代表(非公開)詩姑•梁愛詩早走三分二十九秒正。犀利。

寓運動於工作
宜家(IKEA)喺上海開設「宜家中國測試和培訓中心」,致力強化產品安全及品質。佢哋測試嘅辦法既掟嘢又放火,一張床褥要用一百四十公斤嘅重物碌足五萬次,保養期仲長達廿五年,包保安全又襟用啦。即使蠟燭,都會經專人抽樣量度火光長度,以免時大時細燒親周圍物件。喺測試中心隔籬有個「宜家亞太區物流配送中心」,佔地達六千平方米,足足成三十四米高,出貨全自動。員工仲同我哋講,貨倉內地下畫嘅線,唔係方便擺貨,而係得閒嗰陣等員工可以打羽毛波。寓運動於工作,難怪佢哋咁開心。

本週高姓大名最坦白財經評論員
特區財經演員無數,各有地盤擁躉,無論係乜叔物哥以至紅黃藍白黑姐,睇怕佢哋冇一個及得呢位北京財經評論員咁坦白矣。何以見得?佢個大號叫水皮,連水皮都上得CCTV講財經,唔怪之得股市近排大上大落啦!此之為水鬼升城隍乎?還請小說名家李碧華小姐發落。

中環人語迷你版
遲遲唔辭職,等黃袍加身。估中邊個中環人講呢句說話, 送你JWATCH j-36-尊貴版手錶一隻 有意參加者,請於十月十七日24:00前將答案電郵mailto:centralman@nextmedia.com 小宗只接受電郵,郵寄免問。

上週人語揭曉
答案虛心聆聽。林瑞麟得獎者:C. K. Wong 中獎時間: 1:00pm 5/10/11 本刊員工及直系親屬不得參加。為求公平及杜絕偷步搶答起見,請於星期三下午一時後來電郵競猜答案;在此之前發出之電郵作廢。超過一位讀者估中,先到先得,恕不接受上訴。答案及中獎者姓名將於一一年十月二十日本欄揭曉。 ####

利民 錢跳 跳船 船快 快而 而準 菁華
PermaLink: https://articles.zkiz.com/?id=28301

田公子追四叔四千萬 宗菁華

2011-10-20  NM

六四時做副總理之田紀雲,有個仔叫田承剛。田公子新近落香港向四叔間恒基地產追債,告上法庭,話四叔間公司欠佢四千幾萬顧問費。呢單索償案家吓喺高院審緊。


按理四叔抱孫,派利是都派咗唔止四千萬矣,為咗雞碎咁多錢扭上法庭,貪馨香乎?據田公子講,○六年恒基逃匯,佢幫恒基同內地機構交涉,得以大幅降低逃匯罰款。但恒基否認有件咁嘅事。
為咗打呢單官司,田公子御駕親征落嚟香港出庭做證人。六十年來、六十年內,舉手發誓,坦蕩蕩公開承認藉人脈關係「做顧問」搵真銀嘅高幹子弟,田公子理應係第一人矣。
庭上田公子好有高幹子弟風範,即使坐,都坐到成個大爺咁嘅款,左望右望,可謂威風八面。作供之時佢更不忘噏番幾句時下內地流行諺語,又話自己如果呃得到恒基嘅話就IQ 800,不過係負數嗰隻,結果搞到俾代表恒基嘅大律師翟紹唐面斥,要佢尊重法庭乃莊嚴之地,收斂吓。
田公子作供完畢離開法庭,其陣容則更加架勢堂,前後有兩個疑似保鏢嘅彪形大漢傍實,另加兩名跟班。一眾人等行起嚟直情係拍電影咁嘅派頭,一字排開 成個「大晒冷」嘅格局。我哋幫田公子影完相,佢掉轉頭向我哋salute,非但威勢十足,連我哋都沾沾自喜,覺得自己都有埋料到,爽!

北京一個夠晒數
特首跑馬仔進入備選階段,備選人四出活動而又毋須申報開支使費,走法律罅乎?捉字蝨乎?我哋既唔評論,亦唔敢置評。千二人玩嘅遊戲,幾時輪到我哋講嘢吖,係咪? 可以同大家報告者,係備選諸方新近四出放風,而講得最多者係呢一句說話:「北京唔鍾意佢。」截至今年二月,官方人口統計數字顯示,京城人口達一千九百六十一萬二千三百六十八人;呢群人當中,究竟邊個唔鍾意佢先? 須知特首跑馬仔,鍾意「佢」嘅人毋須多,話得事者,一個就夠晒數!明乎此,則可以當一切風聲傳言死嘅矣!

金牙大狀講嘢 冇盡好市民責任
煲呔曾以「爛仔」、「黑社會」斥責某議員,此又豈止指桑罵槐而已,直情係粉墨登場親身演繹何謂語言暴力也。及後佢託詞掩飾,話自己唔善於 表達。笑容固然「尷尬而僵硬」,有時更加控制唔到自己而「黑面」。 唔善於表達?佢喺國家領導人面前揸住本拍紙簿耷低頭奮筆直書,唔係將乖乖小學生嘅角色發揮得淋漓盡致咩?控制唔到自己?大家有冇見過煲呔曾喺領導人視線所 及之處「面黑」過?即使俾王光亞指住鼻鬧,咪一樣笑口噬噬?於此可見「爛仔」「黑社會」之指控又豈係不擅詞令嘅人之一時失言? 係唔係失言唔緊要,喺香港地身為「黑社會」成員係犯法者,作為特區最高領導人,明知有人係黑社會,係咪好應該訓令禿鷹及其手下做嘢先?做咗七年特首,連好 市民嘅責任都冇盡,煲呔有冇做好佢份工又仲使問阿桂乎?難怪攞到四十分佢已經咁歡喜矣。

善伯不怒而威
講起恒生善伯嘅軼事,再講多單。話說善伯主政之時,非但叫伙記寧可入董事長房鬧佢都千祈唔好鬧啲人客,佢更加以身作則作風民主。如何民主法? 當時好似渣甸咁嘅英資大行例有大班廁所之設,但恒生則冇咁做。一視同仁,由善伯到信差都用同一個廁所。不過針冇兩頭利,民主平等固然可貴,但亦有弊處。 據恒生舊臣講,一視同仁用同一個廁所最弊之處,係入廁所方便,一個唔覺意善伯行入嚟,好多人即時打住屙唔出,以致要忍住行返埋位。乜嘢叫做「不怒而威」?善伯咪有樣俾你睇囉!

你今日更新咗未?
敝刊上期踢爆思捷造假,其財務總監周福安輕輕帶過,話只係未及時更新個網站而已,更加把責任推晒俾我哋:「《壹週刊》冇聯絡我哋,否則就會發現其中嘅差異啦。」咁講法咪即係話我哋啲同事偷懶吞泡冇做嘢?即使唔係誹謗中傷都係篤背脊矣。 實情係我哋搵過思捷嘅投資者關係部,而佢哋又應承盡快用電話及電郵回覆我哋;點知到咗截稿死線都仲冇料到,咁你教我哋點做啦? 與此同時,我哋又山長水遠走到思捷德國環球總部查詢德國批發市場及特賣場情況,但負責人拒絕接見,叫我哋用電郵提出問題。問題我哋用電郵呈上,但同樣冇覆到。思捷係咪要更新埋個電郵系統呢,周董?

更正道歉
上期我哋講CY以七分零三十九秒之極速出席理文造紙二公子李文恩之婚禮,點知一時手快,將李公子個大號寫作李文「思」,加以老眼昏花,未能及時執正,謹此向李公子致以深切歉意,非常之鎖你囉。

中環人語迷你版
民望下跌係對我嘅鞭策。 估中邊個中環人講呢句說話, 送你JWATCH j-36-尊貴版手錶一隻 有意參加者,請於十月二十四日24:00前將答案電郵mailto:centralman@nextmedia.com 小宗只接受電郵,郵寄免問。

公子 追四 四叔 叔四 四千 千萬 菁華
PermaLink: https://articles.zkiz.com/?id=28503

冇得拍膊頭搞掂 宗菁華

2011-10-27  NM

上個禮拜有個澳洲對沖基金嘅話事人質疑華寶(336)公布嘅毛利率過高。Blog內短短四百字,令華寶股價跌一成,市值蒸發十六億,即係每隻字值四百萬,勁過字字千金多矣!網上資訊認真唔講得笑也。


呢個基金話華寶毛利率高,主要係靠高價賣煙葉俾國營香煙企業,咁點解咁做會令華寶豬籠入水?無他,過去國營企業買嘢,唔使公開競投,好多時候都係買賣雙方自己斟掂。咁樣做法點解有助於提高華寶嘅毛利,唔使畫公仔畫出腸啦啩? 不過,舊年中國煙草總公司開始整頓行業運作,從此國企煙仔廠買貨要投標,唔少公司嘅業績即刻走晒樣矣。影響所及,另一間上市公司澳科控股(2300)亦有排震。呢間公司專做捲煙包裝印刷,客戶包括雙喜同紅塔山等龍頭大廠,今後佢哋一樣要依足規矩投標,冇得拍膊頭搞掂。 又有本地對沖基金估計,新政策起碼影響澳科兩成單。唔淨止咁,煙草總公司要加強審核,啲單全部要由高層處理,由是拖長招標程序事小,積壓資金、加重營運成本事大,因為咁會扯低盈利。基金佬都睇到華寶、澳科面對嘅問題,本地散戶又豈可唔打醒十二個精神?

黃毅力業務多元化
富利堡嘅黃毅力業務多元化,賣水貨車之餘,走去將軍澳寶林開咗間香港茶餐廳。餐牌大大隻字寫明,下午茶餐雲吞麵、水餃麵同魚蛋麵,通通每碗三粒。明碼實價,講明只得三粒,肯定開茶餐廳先河。 黃老闆話咁做法唔驚人客鬧佢孤寒,至緊要係有言在先,以免誤導顧客造成爭拗。何以只得三粒?佢話計過數,每粒魚蛋成本係三蚊八毫二,(計到小數點後兩個位,認真唔講得笑,果然係大老細作風。)三粒則剛好啱數,放多粒,已經維唔到皮矣。 佢仲話啲魚蛋係人手將海南門鱔打出嚟者,真材實料,冇花冇假。業務多元化,肯定係好事,一於祝佢好運,起碼都好運過張大導嘅表哥茶餐廳啦。

康文署露底
煲 呔曾以至成個特區政府民望「尋底」,大家知之矣。唐、梁兩「備選人」上京「摸底」,睇吓自己有冇行,乃特區跑馬仔之指定動作。及至出年特區政府換屆、三司 十二局問責高官有幾多個會「過底」俾新特首,至今尚是未知數。成功「過底」,則不妨去茶餐廳飲杯茶,加兩蚊整番件「烘底」奶油多。 喺公園,「為免造成滋擾,請把聲浪降底」,呢個「降底」究竟開邊瓣則還請全特區最有文化嘅衙門康樂及文化事務署揭開「謎底」。呢個衙門個老頂嘅老頂曾德成 未入仕之前係《大公報》老總,又做過特首國師中央政策組參謀,理應好有文化㗎噃。咁樣「露底」法咪好唔抵?弊!

金牙大狀講嘢 工聯會專倒米
工聯會上街反對俾外傭居港權,話咁樣做會搶走本地工人嘅飯碗。當中有人尤其擔心一有居港權,外傭唔再打住家工,走去高級餐廳做嘢;外傭英語能力強,肯定揮低本地人云云。 以咁嘅理由反對外傭居港權都算奇特。咁講法,工聯會應該上街抗議官府搞再培訓;事關受過再培訓,識嘢肯定多過冇被再培訓嘅工人,咁容乜易俾佢哋搶走晒所有人嘅飯碗? 同樣道理,工聯會應該馬上上街抗議官府搞十二年免費教育,因為讀過十二年書,無論中、英文都分分鐘好過冇受過十二年教育嘅在職人士。咁班後生容乜易搶走晒低學識、低技能嘅工人嘅飯碗? 明知學識、英文都未夠班,唔自我反省、自我投資學好佢,反而要政府禁止資歷高嘅人搶飯碗,工聯會有此思維實不為怪。大佬,有名得過你叫,係工聯會噃,識見認知係咁上下㗎啦!聽呢班人支笛、由得佢哋話事,莫講佢哋嘅飯碗不保,七百萬人都通通要紮砲也!

記得帶埋隻雞
對有關佢「感情缺失」之提問,唐唐喺兩分十三秒之內四度重複「我係唔會回應任何以緋聞為包裝嘅報導」,足見佢細個之時背書肯定絕對攞足一百分。 耶穌被捕後,聖彼得三度否認識得佢,何以唐唐要否認多一趟?原因可能係唸咗三次「我係唔會回應任何以緋聞為包裝嘅報導」,都冇隻雞走出嚟啼,向佢通水已經到數,可以慳啲,以致佢要背多趟書。 拍過《狂情》、現今幫唐唐統籌公關嘅Heidi•關鄭麗敏下趟唔該記得帶埋隻雞啦,OK?

保育、保良兩落空
立法會搬咗去添馬艦,中環大葛樓冷冷清清淒淒慘慘戚戚。更是愁煞人者,係大葛樓之奠基石,油漆剝落,雖然主禮嘉賓港督卜公爵士嘅大號隱約可見,但仄師名號則不復辨認矣。煲呔政府滿口保育,見諸大葛樓嘅一片荒涼景象,你話又似唔似啦! 不過,口保育而實不至都總好過保良局,佢哋門口石柱副對聯,金漆照人,但「大英」二字則刻意剷走。忘本如此,又何以言保良哉?保育、保良兩落空,呢個就係今時今日香港地嘅可悲境況啦!

冇得 得拍 拍膊 膊頭 搞掂 菁華
PermaLink: https://articles.zkiz.com/?id=28688

滙豐友邦奪命金 宗菁華 宗菁華

2011-11-03  NM

近期潮流興講金融霸權,有後生仔女更發起佔領中環行動,反對金融機構賺到盡,部分示威人士認為財團愈大愈涼薄,其中一個矛頭,指向紮營地獅子錢庄。


其 實做得錢庄,對前線員工捽數在所難免,據悉獅子的每名RM(Relationship Manager),每月目標可拆為幾條數,分別係基金同保險或I kill you later等等,就以基金為例,普通一間見得吓人嘅分行,每名RM每月要跑二千萬基金quota,唔到數就俾人照肺。 就算到數,仍未可以安樂,事關滙豐旗下有出自己的基金,若RM一味銷售其他基金公司的產品,忽略咗滙豐親生基金,仍有機會食貓麵。唔少獅子RM背後都呻滙 豐的基金表現麻麻,推薦俾客仔,盞趕客冇回頭。 至於保險界嘅一哥友邦,最近亦出新招搵生意。事緣今個月起,積金局表示打工仔若每月收入低於六千五,員工便毋須供款,換句話講,基金管理公司自然少咗收 入。 友邦於是醒起旗下數以千名嘅保險經紀為開源對象,皆因佢哋屬於自僱人士,九成九嘅保險經紀都唔會自動自覺供款(自己係僱主,邊有人咁得閒告發你唔供款)。 友邦向經紀們建議重新開始供強積金,雖然冇講唔就範會點,但經紀們已經牙痛咁聲,事關佢哋擔心要一次過供番強積金成立十年以來的欠款,以一年供款上限萬二 蚊計算,十年咪一砲過俾十二萬。

黃偉康未攞牌先開檔
平時嘅禮拜日,中環人例必抖抖氣,趁機做唔同類型嘅「課外活動」 調劑吓。但啱啱過去嘅星期日,情況有啲唔同,唔少財經人都著晒老西,俾面出席財經名嘴安祖•黃偉康同法蘭斯•藺常念搞嘅新證券行靈獅開幕。 究竟點解安祖•黃咁唔通氣,硬係要揀禮拜日開幕呢?原來靈獅另一股東乃風水師楊天命,楊師傅話呢日係近期難得之開市旺日,二話不說便扑槌。 從風水學角度看,靈獅已經開張大吉,但法理上仲未搞掂,皆因證監會還未批出認可牌照俾靈獅,安祖•黃話起碼到本月下旬,方可正式揸鑊鏟,但黃名嘴話就算納 半個月吉租都冇有怕,事關做得靈獅客仔,入場費最少一球港銀,肯定唔係坊間劈佣至五蚊雞嗰批散戶,喺咁嘅市況要搵一球港銀嘅客,真係要睇吓呢隻獅子靈唔 靈。

金牙大狀講嘢 溫室症候群
張建宗承認八十後、九十後班後生,年來「向上流動」確係多咗阻滯。但佢話唔使怕,祖國經濟蓬勃發展,肯上去拼搏,一定大把世界云云。張局長同班後生開玩笑乎? 香港地樣樣嘢有規有矩,唔使走後門、使黑錢、託人事,班後生尚有困難「向上流動」,叫佢哋去一切要聽黨話事、冇規矩可依、出盡符弗至搵到食嘅大陸,俾人生劏咗都未知乜事,更唔好講話「向上流動」矣。 其他唔好講,張局長如果唔係同班後生開玩笑,咁唔該佢身體力行,自己上大陸拼搏,睇佢有冇局長做? 班後生「向上流動」有阻滯,可能有一千個、一萬個原因,然而當中至為關鍵者係官府之溫室政策:父母有公屋住、出世有免費教育、十八歲就可以自己申請番間公屋、攤開手有綜援……俾過你都費鬼事「向上流動」啦,貪未辛苦過乎?

何家有女不用猜
嘉 域集團主席何永安,出名身邊美女如「雲」,包括鄺美雲及前亞姐曹央雲,就算刻下年逾六十,兼夾債主臨門被迫將公司清盤,仍有女下屬為他誕下幼子再做老豆。 其實坊間不時有傳何永安尚有大堆私生仔女,其中一個疑似經手人,乃上市公司財華社的老闆吉蒂•勞玉儀,皆因何永安曾在法庭指若有DNA證明自己係吉蒂•勞 的女兒生父,便寫張三千幾萬元支票做女兒生活費,但勞玉儀卻指與何永安只是生意拍檔,跟他從冇感情瓜葛,呢三千萬元純屬追債。 法庭最後判何永安敗訴,錢無奈何要俾,但可惜冇講清楚誰是女童生父,於是乎大眾當正係何家淑女,敝刊娛樂版早前寫何永安棄養曹央雲母女,亦有手民之誤,寫 咗勞女生父便是何永安。 吉蒂•勞玉儀為怕他朝嫁女俾人講閒話,於是帶埋女兒的出世紙正本供敝刊過目,表明女兒是與前夫的結晶品,希望事件告一段落。

IT人向葛珮帆贈興
嚟 緊嘅星期日,係區議會選舉嘅大日子,唔少候選人都盡最後努力落街派傳單,响沙田頌安區嘅民建聯候選人葛珮帆,除咗自己團隊派傳單外,仲有外在勢力助佢一 把,搵嚟十幾二十人幫忙派傳單,觀乎傳單內容,全部是集結媒體刊登過葛珮帆的「政績」,重點是「葛輝事件」,政府涉向iProA輸送利益,提醒葛珮帆便是 iProA創會會長,並溫馨提示,葛自稱苦讀九年所得的博士學位,由一間澳洲政府都唔承認嘅大學頒發,希望選民擦亮眼睛。 大家好自然以為贈興傳單的幕後策劃者,係同區候選對手劉家儀,但佢話唔關自己事。後來小宗索到,原來係有IT業內老闆,不值葛珮帆的所作所為,於是自發派 傳單,希望選民「認清葛珮帆」。

友邦 奪命 命金 菁華
PermaLink: https://articles.zkiz.com/?id=28887

財經影圈起風雲 宗菁華

2011-11-10   NM

青姐•胡孟青以惹火見稱。早前佢大罵有線,繼而劈砲,夠晒犀飛利也。即使無喺有線出鏡,佢間唔中仍照踩其他財經演員,更試過大爆財經演員借返內地睇廠,實則考察夜總會。食呢行飯而火爆如斯,你估班行家會否錫住佢呢?


實情係除咗黃瑋傑,青姐同其他行家甚少交心,永豐金融研究部阿頭淦國彬係另一個例外。早前阿淦拉埋天窗擺酒,請咗兩枱財經演員食全齋婚宴。青姐破例俾面,更加出埋自己個囝囝做花仔,認真唔話得。當晚無可避免,佢要同其他行家見面。 本來一直相安無事,點知中途青姐要帶囝囝行開一陣,結果大件事。股壇大隻佬揀正呢個時候過枱,走到青姐嗰一枱吹水,大唱「又肥又矮」嘅女財經演員頻頻睇錯市,即使食齋都似乎無助佢降火。 聽到大隻佬咁講,其他財經演員慌忙向佢打眼色,點知佢講得興奮過頭,唔識得醒水收爹。卻原來青姐位郎君當晚都有嚟飲,佢仲坐正喺呢一枱。大隻佬呢番言論,你估會唔會一五一十向青姐告其枕頭狀呢?江湖從此多事矣。

金牙大狀講嘢 取消SSD
額外印花稅(SSD)一周年,近四萬個單位將陸續鬆綁。主凶主吉,尚是未知之數。 名義上SSD係用嚟抑制炒風者,然而天要下雨,娘要嫁人,要炒依然有辦法,譬如簽訂避過SSD重罰之「遠期合約」一也。故此SSD之實際作用極其量係抑制 成交量而已,要真正阻止樓價攀升則難矣哉! 抑制成交量並非全冇後果者。就以行將鬆綁之四萬個單位而言,若然基調依然趨升,譬如繼續有游資湧入,你估樓價會有何反應?反之,若然一個唔覺意,四萬個單 位鬆綁而歐元又咁啱揀正呢個時辰解體,你估又會有乜後果呢? 於此可見,SSD抑制成交量,以致市場不能有秩序調整,風調雨順梗係乜事都冇啦!醜嘅唔靈,遇上沙士、九一一以至歐元解體之類嘅突變事件,樓市則不難出現 踐踏性拋售矣,到其時又搵邊個去收拾負資產殘局?仲唔趁住風平浪靜速速取消SSD又更待何時?唔通想等到爆發大災難至郁手呀?班大老爺如果識得咁諗又仲使 日日俾人指住個鼻嚟鬧乎?

本週斷症 陳浩濂冇心漏
莫非有人懷疑過自由黨之陳浩濂有心漏症,以致新工投資(前身為禹銘)主席李華倫要證明佢個心完整無缺?玩財技佢就叻啫,心臟科都得?唔係吖嘛?

老獅子國企頤養天年
上期我哋講獅子錢庄猛力逼迫前線員工生意,以致一批半上岸嘅老獅子棄船,唔再日以繼夜跑數。即使搵少啲,佢哋都寧願過檔中資國企,勝在唔使用降血壓藥送飯也。 話說有隻老獅子,幾年前加盟建行,負責實賣基金同保險。佢話國企果然係國企,就算班手下唔到數佢都唔敢開聲,更加唔好話幫佢哋照肺;事關上頭根本唔捽數,自己點解要攞苦嚟辛啫?何況基數定得低,輕輕鬆鬆已經有顯著增長,大家開心過日,何樂而不為? 雖然份工輕鬆,但老獅子始終唔多慣國企文化,當中尤以出糧㩒錢最為神奇。做咗國企職工,當然用番建行做出糧戶口,但佢發覺建行嘅提款卡只可以喺建行嘅櫃員機用,其他銀通櫃員機㩒唔到錢。 起初佢尚以為自己黑仔,點知後來發現其他同事同埋唔少客人都有同樣問題。佢本住團隊精神向上頭反映,但講嚟講去都講唔到邊度出錯,再過冇耐,成件事不了了之。文化如此,國企職工只可以喺自己鋪頭㩒錢,正常吖!

一邊回購、一邊減持
上個禮拜,賣化妝品嘅卓悅,其老細葉俊亨減持七千八百萬股,套現一億港銀。老細減持本來事屬平常,但咁啱佢減持之前,卓悅先至五度回購,而回購價同葉主席之減持價所差無幾,由是令人懷疑莫非有人托價散水? 我哋本住求真精神向葉主席求證,點知佢人在北京,上咗去接受安永一年一度嘅中國企業家獎。佢喺電話中證實確有減持一事,佢話自己唔熟上市條例,擔心咁樣做有否犯法? 違例就冇,但就樣衰啲囉。葉主席聽到咁講,定一定神,解釋內裡原由。原來去年卓悅搵咗由曹貴子醫生打骰嘅康健國際入股做策略性股東,希望大家合作搞醫學美容,更加講到明康健今年有權再買七千八百萬股卓悅。 一年時間話咁快就過,康健重提增持一事,葉主席叫曹醫生喺股市掃貨,點知曹醫生擔心會愈掃愈貴,焗住叫葉主席作私人配售。就係咁就搞出單一邊回購、一邊減持事件啦。雙方嘅合作計劃?一年過去,依然了無動靜。今趟康健再作增持,跟住會唔會有後着呢,又?

財經 影圈 圈起 風雲 菁華
PermaLink: https://articles.zkiz.com/?id=29083

變臉選特首 宗菁華

2011-12-1  NM

退休阿叔見到「最美麗港姐」朱玲玲撐CY,勾起唔少回憶而感慨繫之。 憶昔阿叔專門上門幫人洗珊瑚金魚缸。有次去到朱玲玲屋企,佢親自出迎,未郁手洗魚缸,「最美麗港姐」先親手奉上茶點,叫佢食咗至開工,更加叫佢慢慢嚟,唔使急。阿叔話從來未見過咁好相與嘅人客。


過咗幾日,佢接到柯打去CY屋企洗缸。冇茶點招呼唔在講,有人更加黑口黑臉,喝令佢小心啲,唔好整污糟啲地方更加千祈唔好打爛玻璃、整死啲珊瑚,佢賠唔起㗎。咁嘅人會關心民間疾苦,為低層請命,想創你個心啦! 世間事物冇嘢慘得過有比較。睇到朱玲玲撐CY,阿叔腦海重播呢兩幕,禁不住口噏噏:大家閨秀,心地善良,但見得世面少,佢點知道人間險惡呢?祝福今趟佢帶眼識人,搵到個真係錫佢嘅老公啦!之不過,如果真係錫佢又點會搵佢幫啲見高拜、見低踩嘅人撐場呢?會整衰形象㗎嘛。

金勞•詹賭波必勝
鍾意過大海玩兩手嘅金勞•詹培忠,獨好百家樂,間唔中亦會參加啤王大賽。事實上金勞詹標榜「贏谷輸縮心清數熟」,可謂逢賭必啱,至於係咪逢賭必精呢,則有待考證。
金勞•詹乃尊貴立法會議員,總唔可以日夜流連濠江搏殺,故此賭癮一起,佢往往靠賭波解慰,更加聲稱有套自創嘅賭波必勝方程式。呢套方程式係乜?
好簡單,吼準一隊聯賽中游隊伍,長期買和波。就以英超嘅維拉為例,今屆聯賽踢咗十三場,已經打和七場,和波比率高逾五十巴仙。金勞•詹話普遍嚟講,馬會開出嘅和波嘅賠率有三倍以上,就算第一注輸咗,第二次雙倍加碼,再唔得就繼續加碼,長買嘅話,總會連本帶利歸還咁講。
其實呢招同雙倍買大細理論一樣,但勝在賠率有三倍,所以只要贏一場就已經有錢贏,相反買大細就只可以回本。金勞•詹雖然唔肯講實際靠呢招贏咗幾多,但係認「好過賭馬啦!」

金牙大狀講嘢 軟弱唔代表無能
新界鷹派為丁屋燒林鄭 —— 嘅紙紮公仔,姿態仲高過當年話要強姦陸恭蕙之食力•簡。唔知咁算係進步呢抑或退步啦!與此同時,佢哋又指控以發叔為首之鄉事派軟弱無能。 兄弟鬩墙,發叔焗住以「軟弱唔代表無能」為回應。事實亦然。若果發叔係無能,煲呔又點會搵佢入行政會議呢?故此發叔有能係眾所周知嘅事實。然而班鷹派燒林鄭 —— 嘅公仔,完全當局長冇到,擺到明坐喺行會嘅發叔㩒唔住班。都㩒唔住,咁仲唔係軟弱? 不過發叔嘅「軟弱唔代表無能」論睇嚟又唔單純係就鄉事有感而發者,佢呢句金句同祥嫂「有心有力」嘅金句一樣,顯然另有所指。若然果如佢所言,「軟弱唔代表無能」,咁仲會有人買偉哥、犀利士乎?發叔都要注意吓佢個行會成員嘅身份,好多人睇佢頭做嘢㗎,影響藥廠生意就唔好啦!

本週車牌 擁唐派上街
一個交叉CY都未夠,要左右兩邊交叉埋,若非擁唐又豈會咁狼? 車主殷小姐經營外傭生意,佢莫非係要表述中產心聲,唔妥CY專門為基層出頭,當班中產冇到?

幾公分的距離
周大福招 股,彤叔班老友傾巢而出撐場,包括老友到拖晒手之四叔李兆基,同埋大劉劉鑾雄、四太梁安琪及金利豐朱太等。彤叔一家更加趁機影番張三代同堂嘅大合照。 彤叔有冇偏心,呢張大合照一目了然矣。相中可見,大官Solution企喺彤叔右邊,既為長子又係周大福主席,好應該。企喺彤叔左邊者,係乖孫鄭志剛,而 鄭志剛左邊係前排因韓籍女友「手」而紅咗嘅鄭志恆。佢今年三十四歲,由細就同阿爺一齊住,喺加拿大讀完書,返香港做過金融又搞過醫療網站,三年前先至開 始參與家族生意。 咁大場面,鄭志恆都無厘笑容,仲眼神游離,唔知有心定無意,佢企位又同其他人保持距離。唔通佢有自知之明,知道自己喺阿爺心中嘅位置?

自由港禁運黃金
上 期我哋講「撈底王」李和聲,佢提到「四八年香港唔俾黃金入口,好多黃金先運去澳門,再走私來香港」。香港以自由港開埠,何以偏偏又唔俾黃金入口,我哋問過 「撈底王」,佢話年代久遠,唔記得晒矣。 禁止黃金入口原來始於四九年四月十四日而非四八年,咁樣做同自由貿易無關,而係為咗維持幣值穩定。當時港幣同英鎊掛鈎,而英鎊按照國際貨幣基金會協議以黃 金為本位,鎊價以黃金重量計值,英倫銀行儲有黃金以維持英鎊與黃金之固定關係。若然黃金可以自由出入、自由買賣,金價之起落將必然衝擊英鎊之匯價。為咗防 止出現呢個情況,唯有斬腳趾避沙蟲。葡萄牙冇簽到協議,黃金由是可以自由出入澳門。 現今港元同美金掛鈎,何以特區又唔使禁止美金流出流入以穩定港元匯價?好簡單,因為現今有個自動調節機制,透過港元同美金利息差套戥,將港元維持喺七點八 之水平。美金流出,港息扯高,由是吸引美金回流;反之美金流入,壓低港息,由是引導美金流出,套戥運作令港元匯價貼近七點八水平。四八年英倫要禁止黃金出 入口,九成都係因為利率被鎖定唔郁得矣。

人大代表祭龐老太
將門之後、紹榮鋼鐵揸弗人龐老太熊少珠騎鶴西去,喪禮極盡哀榮,不在話下。 雖然阿姐汪明荃唔做生意,但始終係港區人大代表,商場女豪傑出殯佢又豈可以唔現身?你睇阿姐係落足功夫㗎!

變臉 特首 菁華
PermaLink: https://articles.zkiz.com/?id=29622

彤叔有妹仔養生 宗菁華

2011-12-8  NM

 

友報《蘋果》喺中環影到彤叔有靚女陪伴在側,令人聯想係咪小三。 非也,彤叔身邊有唔少「妹仔」,職責跟出跟入,照顧彤叔起居飲食,包括「抹吓身咁」,相中呢位哈爾濱姑娘叫Cindy,服侍咗彤叔好幾年矣。


除咗Cindy,彤叔仲有一、兩個專係陪佢食飯嘅「妹仔」。有次俾我哋撞正彤叔一支公坐喺皇朝會,原來陪食嘅「妹仔」姍姍來遲。高人見 告,「妹仔相陪」係彤叔養生之道。古時「妹仔」有貶義,通常指賣身俾大富之家嘅侍女,時移世易,照顧過燊哥嘅女看護Candy,已升呢為億萬富婆,「妹 仔」亦有出頭天矣。

霍公子挺……唐
數碼港商場舉行「中國小姐選舉」,已故國家領導人亨利•霍英東個仔霍震寰現身。我 哋恭逢其會,當然諮詢吓霍公子點睇雙英戰?佢撐邊個? 有此一問,皆因佢老父當年一句「我挺董」,真係一句頂一百萬句。霍家公子冇老父咁豪氣干雲,只係話有競爭係好事。不過佢跟手都有所演繹,話唐唐同商會中人 好熟,對廣珠澳地區發展又有參與云云,言下之意,你明啦!口水多多,何不一顯佢伯爺本色,拍吓心口,講句:「我挺唐!」

位元堂廣告歌 有段古
敝刊舉行「品牌第壹大獎」,位元堂榜上有名,佢哋位執董Karen(鄧梅芬)親自出馬嚟領獎,提到位元堂首街知巷聞嘅《太陽出來 了》廣告歌。 首歌原來除咗鄭少秋及李克勤兩位代言人唱過,警察幫辦出身嘅陳欣健拍戲時都唱過,唱到七情上面,好多人當正佢係位元堂嘅代言人。 呢首歌由七十年代唱到依家,係由顧家煇作曲,歌詞則出自位元堂第四代傳人黎宗岷之手。品牌創辦人黎昌厚出身廣州官宦世家,三十年代來港開設分店,七十年代 由黎宗岷接手。黎過身後,生意由太座黎葉慧儀接掌,至二千年,先至賣盤俾上市公司宏安。 Karen上場後大事改革,甚至百年商標都改埋,但首廣告歌則冇郁過,足見識貨。有啲嘢係唔郁得㗎!

何律師點醒湯君明
上 期敝刊講「淺水灣富豪爭海景」,提到湯君明破解咗淺水灣115號嘅高度限制契約,會起一棟二十七層高嘅住宅。景觀勢被破壞嘅保華大廈已有業主磨拳擦掌,打 算入稟阻止湯氏起高樓。 報導一出街,晨早八點未到,中環陸羽樓頭班茶客已經大噴口水議論紛紛。有人問湯君明當初憑乜咁沙膽買入淺水灣115號?有人又戥入標失敗嘅英皇唔抵。大家 你一言我一語,好不熱鬧。 茶客當中有位何君柱,係做開商業及樓宇買賣嘅律師,佢主動同湯君明講,呢單案其實好清晰,115號業主係同趙家立契唔起高樓者,現今湯君明同趙氏家族大被 同眠,而屋宇署又已准佢重建加高,咁保華班業主又憑乜去阻止佢重建加高呢? 何律師同湯老闆本來互不相識,因為我哋篇報導而做咗朋友。開卷何止有益,睇《壹週刊》直情係塞錢入你袋啦!使乜講!

廖烈智三十二度增 持
創興銀行爭奪戰表面上已告平息,但底下仍有暗湧。 事緣廖家三兄弟烈文、烈智、烈武鼎足而三持有廖氏集團呢間控股公司,再經呢間公司控制創興銀行。舊年廖烈文個仔廖駿倫同佢伯爺買咗佢手廖氏集團,再又搵到 堂兄弟廖烈武個仔廖金輝企喺佢嗰一邊,創興銀行睇住就嚟到手,點知佢阿叔廖烈智唔肯過佢,祭出家規,指阿哥廖烈文若然賣股權,就要賣俾烈智同烈武兩兄弟, 唔得賣俾第三者,即使係廖烈文個仔控制嘅公司都唔得。 結果?廖烈智同細佬廖烈武接咗大佬手貨,兩者由是簡直成為創興銀行之大股東。但睇嚟廖烈智並不以此為滿足,自八月十九日以來,佢已三十二度出手直接增持創 興銀行。呢個時候買銀行股,廖烈智梗係知道一啲嘢係其他人唔知者。係乜呢?

梁振英先生來函照登
上期我哋引述一位洗珊 瑚缸阿叔講佢上「最美麗港姐」朱玲玲及CY屋企洗缸嘅經驗。梁振英先生第一時間來函,澄清「指稱梁振英先生僱人清洗魚缸不禮貌一事,純屬杜撰」,而「梁振 英先生家中從未有玻璃魚缸,也從未養過珊瑚,或聘請過工人洗魚缸」。清楚明確,仲實牙實齒過講佢阿媽對紮腳。 梁振英先生來函,一再以第三者稱呼「梁振英先生」,直情當正封信係出自第二個人而非佢自己手筆咁嘅款。何以如斯見外呢,又?

彤叔 叔有 有妹 妹仔 養生 菁華
PermaLink: https://articles.zkiz.com/?id=29805

俾面俾出個大頭佛 宗菁華

2011-12-15 NM

梁振英只做瑞安同星島呢兩間上市公司嘅董事,係非執董,而唔係獨立非執董。何也?


大家唔好睇兩者只得「獨立」呢兩個字之差,工作同責任其實好大分別。獨立非執董係代表街外小股東監察公司運作,以免有人上下其手,危及小股東利益。故此獨立非執董例要加入公司嘅核數、董事提名、高層薪酬等委員會以實公司管理層及同錢銀有關嘅工作。 CY話佢冇做獨立非執董,並非佢唔曉得呢啲實務,只不過佢唔想過分參與瑞安及星島嘅實質運作咁講。換言之,佢做呢兩間公司嘅非執董純粹係俾面,但邊個會估得到俾面會好似佢咁俾出個大頭佛呢?世事難料,有辦過你睇㗎!

窮過紮砲
○ 七年,劉志雄用一億九千萬購入倚巒一個單位。表面睇劉生一定好富貴啦,係咪呢?睇真啲,佢已經用呢個單位七度借財仔,都唔好話唔手緊也。劉生手頭仲有個黃 泥湧道浩利大廈單位,舊年買入,亦已向財仔借錢造按揭矣。 劉生洋名叫LUU HUNG VIET DERRICK,揸加拿大護照,報稱係幾間公司嘅董事,寫字樓設喺金鐘力寶中心。佢打過唔少官司,最威一次,係佢買「幽靈之子」,告車行遲遲未確認細節及 出車日期,十月贏咗官司,攞番一百萬元訂金。 不過另一啲官司,劉生就冇咁好彩啦。佢曾經俾證監會告違反權益披露而被罰款;丹麥投資者又告佢私用約1.19億資金,偉浚礦業(0660)主席林清渠追過 佢八百萬元數、地產代理又追緊佢四百六十萬元佣金、與此同時又俾人申請破產以追還四千三百萬元等等。上趟出庭後,劉生話自己好窮,係嚟自埃塞俄比亞。埃塞 俄比亞人窮,至多紮砲啫,未至要做空心老倌呀?

上市人頭費狂加
近期個市唔多醒神,巨無霸周大福上市固然要下限定價,海通證券更加搞到要押後,等而下之嘅公司更加唔使講,好多上市即日已經潛曬水,情況慘烈也。 環境唔就,點會有散戶吼新股呢?但港交所規定,散戶數目唔夠,分分鐘導致上市計劃流產。幾多散戶先至算夠數?按規定,起碼要有三百個散戶認購至算數。咁嘅市況,去邊度搵三百個散戶呢?有鑑於此,唔少保薦人唯有重施故技,買散戶人頭抽新股。 買人頭現象一向都有,過去每個人頭值三嚿水。不過呢幾年新股暢旺,散戶爭住入飛,根本唔需要買人頭。現今市況逆轉,散戶絕跡,人頭又再有價矣。非但有價,而且大幅漲價六成以上至五嚿水一位。 配售新股上市雖然唔使好似招股上市咁煩,要搵夠三百散戶,但規例都要求起碼有一百個人認購。人數雖然少咗,但難度提高,事關港交所規定,只有PI(Professional Investor)至玩得配售;做PI基本入場費係一球資產。唔易搵也。 除咗PI,唔係揸香港身份證嘅海外投資者亦玩得配售。不過手續繁複,故此人頭費更高,據講試過要到成張金牛。對班自由行客嚟講,呢個銀碼對水腳不無小補也。

彤叔「妹仔」年薪百萬
做 彤叔嘅「妹仔」究竟有幾so? 經我哋追查,發覺阿Cindy顧美蓮○六年只係攞住通行證落香港,彤叔即時喺干德道買咗個銀主盤俾佢住。當時個樓市未正式郁,入貨價只不過係$678萬。 兩個月前,個市未冧得曬,佢以$1,350萬沽出;五年間淨袋六百幾萬。按年薪計,年年過百萬,何況仲有人工出呢?聽聞佢仲有部Benz揸喎,雖然係二 手,但都係名貴房車噃!

俾面 面俾 俾出 出個 大頭 菁華
PermaLink: https://articles.zkiz.com/?id=29876

伍家賣大宅啟示錄 宗菁華

2012-2-16  NM

 

 

寶珊道廿四號乃永隆銀行創辦人伍絜宜、伍宜孫家族大宅,上個禮拜以十八億九千萬元易手,賣得個好價也。


呢間大屋係永隆創辦人伍絜宜喺一九五三年以十八萬五千蚊向陳梁四好女士買入者。到咗一九七三年以一百五十萬轉手俾伍宜孫。十八萬五千蚊買入,十八億元賣出,六十年間回報率係幾多,唔該各位自已計啦! 伍宜孫為人慳儉,入住大屋後無特別裝修,只係用佢醉心嘅盆栽點綴吓。○五年佢騎鶴西去,後人亦無即刻賣家檔,等到今時今日至放出嚟。佢哋咁做法有乜指導意義? ○八年海嘯前伍家標尾會,以3.1倍PB賣永隆銀行俾招商銀行,一鋪袋兩百億。睇怕未來四、五十年啲銀行都冇可能再見番呢個價錢矣。賣銀行後四年再賣大屋,佢哋以行動同大家講緊啲乜,各位收到否?

伍家盆栽移民加國
講開伍宜孫醉心盆栽,佢生前喺粉嶺置有農場、僱用專人種咗數以百計嘅盆栽,從用嘅盆,到一草一木一石都至為講究。佢更加著有專書分享心得。 九七過渡,文革打砸搶破壞文物之殷鑑未遠,伍老闆將呢批盆栽送咗去加拿大。楓葉國家特別頒咗個獎俾佢以示嘉許。時移世易,現今字畫文物莫不以天價成交,伍老闆醉心之盆栽都理應有價啩?

伍家 大宅 啟示錄 啟示 菁華
PermaLink: https://articles.zkiz.com/?id=31249

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019