ZKIZ Archives


與曾偉忠直播爆粗 笑足12年蔡育瑜重演送X猴 雪前恥

1 : GS(14)@2016-01-24 17:05:08

【正確讀出】■相隔12年,金猴孖寶蔡育瑜(左)和曾偉忠為now再拍宣傳片,二人順利講出「足金金猴」後,開心豎拇指。電視圖片



12年前足球評述員蔡育瑜和曾偉忠在無綫直播節目中一人一句「足金X猴」,成為電視史上經典笑料。猴年將至,now TV特找來這對金猴孖寶拍攝送真.送金猴宣傳片,以正確讀音重演當年送金猴經典一幕雪前恥。對於被笑足12年,曾偉忠和蔡育瑜昨日均表示不會介意,強調當日只是無心之失。


講起送金猴,一定會想起金猴孖寶曾偉忠和蔡育瑜!12年前,二人在無綫英超精華直播節目中揭曉「足金金猴」得主,結果齊齊將「金猴」講錯成粗口「X猴」,被網民笑足12年。想不到這經典一幕,昨日竟在now重現!



成件事有喜感

為迎接猴年,now找來已過檔旗下的蔡育瑜和曾偉忠拍攝一段送「足金金猴」的有獎遊戲宣傳片。片段昨日推出,一開始見兩人不停練習講「足金金猴」,繼而介紹now賀年送金猴有獎遊戲及問問題。原來now今次不但照辦煮碗找來六福送出3隻金猴,更問當年同一問題,亦即「2004年英超賽事狼隊主場對曼聯賽事中,哪一位狼隊球員為球隊射入奠定勝利一球」。蔡育瑜說:「答中嘅朋友有機會得到足金金猴!」終於講啱「金猴」,二人擊掌及擁抱,猶如一雪前恥。提到當年「足金X猴」事件,蔡育瑜昨在電話中表示是他與曾偉忠唯一一次現場蝦碌,雖被網民取笑,但未有令他留陰影,蔡育瑜說:「我哋係無心之失,問心無愧!不過估唔到咁多年仲有人講!最奇怪係佢講完我再講吖嘛!」問可會介意被人取笑?他說:「冇問題,第一我哋又唔係有心嘅,第二呢個絕對係意外。整件事睇嚟又唔係我哋俾人醜化,而係好似有啲喜劇感。」問他平時可會講粗口?蔡育瑜理直氣壯說:「梗係有啦!話唔講都係呃你!有邊個男人唔講粗口啫?但工作時係唔講!」



【不停朗讀】■為免再講錯粗口,蔡育瑜開鏡前不停練習。

【擁抱互賀】■曾偉忠與蔡育瑜開心相擁。

【全場歡呼】■工作人員亦戥金猴孖寶開心到揈甩帽。



曾被客戶睇中

至於曾偉忠昨日亦強調當年是甩嘴所致:「絕對係甩嘴,好似傳染病咁,我甩完佢甩,絕對唔係故意。」他指事件發生後,未有被無綫高層詐型,僅提醒他們下次小心一點。曾偉忠謂不介意被網民取笑,他說:「唔太過份冇乜所謂,好似睇戲,睇完有啲talking point攞出嚟講。」原來過去曾有廣告客戶想邀金猴孖寶一起拍廣告,但被二人拒絕,曾偉忠說:「有時唔係淨係睇錢,唔知人哋會點樣做,唔知人哋點樣要你出鏡,你應承咗點樣都要做,我哋幕前人要保持形象、要健康。」採訪:魯吉



蔡育瑜(62歲)

講波年資:逾20年簡介:負責踢中後衞,88年掛靴之後擔任足球教練。



曾偉忠(55歲)

講波年資:近18年簡介:踢前鋒或中場,94年掛靴,現為香港足球總會五人足球經理。





來源: http://hk.apple.nextmedia.com/entertainment/art/20160124/19464711
PermaLink: https://articles.zkiz.com/?id=294945

Next Page

ZKIZ Archives @ 2019