📖 ZKIZ Archives

爭風呷醋 監製捧陳敏之 徐子珊女一變花瓶

2013-07-04  NM

無綫為挽救跌唔停收視，早前重金禮聘福將黃子華回巢，拍住兩大姐仔徐子珊、陳敏之參演新劇《My盛Lady》。以為坐定粒六做女一的徐子珊，開戲後先發現陳敏之戲份愈加愈多，甚至同黃子華對手戲多過自己一截。上週劇組分別在油塘及西環拍外景，徐子珊明擺一姐款，對陳敏之不瞅不睬，只有黐住黃子華，才變面有講有笑。明益愛將 深得監製文偉鴻歡心的陳敏之，在新劇《My盛Lady》中分別同黃子華及阮兆祥有感情線，大玩三角戀，戲份比徐子珊有過之而無不及。「阿Jazz（文偉鴻）之前喺第一集《怒火》同《法網狙擊》做導演同監製，已經好錫敏之，兩套劇角色都係為佢度身訂造！今次仲要由醜女變靚女，好有發揮，監製加咗好多同子華嘅對手戲俾佢，出街嗰陣一定搶晒鏡。」一名《My盛》幕後人員說。冇監製錫，徐子珊轉攻黐實黃子華，甚至出動私家保母車，接送對方出入片場。「子珊喺片場好黐子華，無論平時出外景，抑或喺電視城化妝，子珊次次都主動話車埋子華，叫佢唔使坐劇組車。」幕後人員續說。 有你無我 上週四（廿七日），劇組連踩十二粒鐘拍外景，下午兩點，黃子華及徐子珊到達油塘商場，子華見未埋位，於是走入咖啡店休息，子珊二仔底死跟，更挨實子華吹水。未幾，陳敏之坐低搭枱，徐子珊即扁嘴起身走人，無癮敏之唯有拎塊鏡補妝，淡化尷尬場面。有你無我，之後敏之被召埋位，子珊即刻返入咖啡店，同黃子華、阮兆祥等人繼續吹水，擺明杯葛陳敏之。至晚上八點，劇組移師至上環林士街取景，拍攝黃子華強吻陳敏之被兜巴星戲份。徐子珊當晚負責做路人甲，全程行行企企，唯有面燶燶坐埋一邊篤電話，直至記者要求三人合照，徐子珊才勉強擠出笑容配合。原本以為執到好籌，可以拍住收視福將黃子華拍劇，最後卻由女一變花瓶，難怪子珊條氣唔順到出面。 早有積怨 09年，陳敏之和徐子珊拍攝劇集《美麗高解像》時，已有積怨。其中一場戲講述陳敏之掌摑徐子珊，拍之前導演講明「嚟真」，希望一take過，拍完後，徐子珊即刻怒目陳敏之，更嗌停機要敷冰。其後有傳媒報導話陳敏之夾埋伍詠薇、苑瓊丹等「八婆團」聯手整蠱徐子珊，令她硬食幾十巴。新聞出街後，即惹怒陳敏之及伍姑娘等，指徐子珊放流料搏同情。

電視風雲 - 王奇雲 皇妃監製 (2013年07月10日)

1 : GS(14)@2013-07-11 01:14:21

http://www.am730.com.hk/article.php?article=162653&d=2101

【am730專欄】老媽子話近排唔多精神，做咩都無心機，本以為佢有邊度唔舒服要去睇醫生，後來細妹爆料，話老媽子係因為晚晚煲劇，夜瞓咪無精神囉，竟然電視劇係罪魁禍首，邊套咁勁搞到老人家唔願瞓，照計依家深夜時段係播緊《世青盃》，根本無可能搞到我老媽子。原來佢個幾月前，已經夜麻麻一個人匿喺房睇無記高清台，播緊嗰套由台灣藝人林心如主演嘅《傾世皇妃》，每晚睇到凌晨，後生仔都傷身啦，相勸之下，佢老人家就投訴近期好悶，無咩節目啱佢睇，唔覺意發現有呢套宮廷戲啱口味，雖然有好多演飾角色嘅藝人佢唔識，但起碼有當年演《還珠格格》嘅林心如做女主角，仲有好戲之人惠英紅做太后，加上佢老人家大讚劇中演北漢太子嘅霍建華靚仔，集合種種原因，咁就俘虜咗佢老人家煲上癮。講番呢套劇，其實係林心如自組嘅製作公司嘅首套古裝作品，係改編自網絡作家慕容湮兒嘅同名暢銷小說，故事係以五代十國做背景，所以睇起上嚟，個個都係太子同埋公主，要處理咁多不同國度嘅宮廷戲，的確唔簡單。至於林小姐當然自己擔正做女主角，而且仲做埋監製，老實講，林小姐人靚又演得，經已係無需質疑，劇中服飾又夠華麗，又有型男陪襯，至於做監製呢，可以話佢仲有好多進步空間，有好多藝人做得悶悶哋，就鍾意喺行內嘅其他方面搵啲新搞作，例如演員走去出碟唱歌、藝人去做導演咁，連出名勤力嘅「牛華」，都曾經因此損失慘重啦，所以話演員想轉型都唔係易事，之但係，向來都知東南亞劇集需求大，國內市場更加被視為會生金蛋嘅地方，唔少行外人都想去分一杯羹，更何況在行嘅藝人，當然都希望個個都喺呢行搵到食，百花齊放。
(逢周一至五刊載)

---

逃出電視城：前監製見證無綫盛轉衰鍾澍佳控訴霸權廢人

1 : GS(14)@2015-01-11 21:05:25





「TVB裏有三類人：三分之一員工是有理想，有毅力，有才華和潛力而努力工作的！另外三分之一是不工作，不動腦，每天過着返工想着去哪吃午飯，未到四點來個tea，四點九去廁所洗手準備放工的頤養天年分子！而最後三分之一的是每天上班都絞盡腦汁來阻住人做事的真廢人！」以上是一位在無綫工作13年的監製鍾澍佳一番肺腑之言。撰文：楊潔雯



鍾澍佳19歲入無綫，由助理編導做起，做過編導、高級編導，再升做監製。在無綫經歷年少氣盛的黃金十年，近年眼見無綫由盛轉衰，本來是創意工業主導的電視台，竟然變成工廠，甚至是工具，難怪鍾澍佳在一位服務無綫28年的劇務一鳥被離職後，突然冒出頭來鬧爆無綫內有三分一都是廢人。



■鍾澍佳在無綫出身，由低做起，所以電視圈有不少朋友。資料圖片

■一鳥在無綫做了28年劇務，早前突「被離職」。資料圖片



戥一鳥被離職唔抵


鍾澍佳日前接受本報記者專訪說：「我講嗰段嘢係針對事囉！係針對一件事同一個政策，唔係某一個個別事件，一鳥其實都唔係第一個，舊年《東張西望》福哥（資深攝影師黃展倫）被迫提早退休，發哥（周潤發）都去幫佢，之前都有好多前輩都遇過呢個問題，我講嗰段嘢，係我當年離開TVB嘅少少感受，呢段嘢放喺好多大型機構、政府私營機構，上市公司越大型都係一樣，好不幸，電視行業唔係一個工廠，係一個創意媒體行業，放喺一個創意行業，咁就好得人驚喇！」鍾澍佳公然在微博向電視霸權開火，令不少圈中人咋舌，他說：「係呀！我同天華食飯，佢話：『你做乜咁夠膽！』，我冇針對任何人，我只係想講自己少少嘅感受，其實我都喺TVB大，佢教識咗我好多嘢，裏面我都遇到一啲好好嘅老師，有呢啲老師我先會慢慢成長，愛之深恨之切，因為咁先會覺得佢唔應該咁樣落去。」



所以，當鍾澍佳見到一個又一個舊同事「被離職」，自然感觸良多，他重提一鳥被離職的事，他說：「佢係咪炒我唔係好清楚，但係一鳥絕對係第一類嘅好員工，我哋前後腳入TVB，佢入咗劇務組，劇務喺TVB嘅體制係好重要，成個製作嗰日嘅拍攝順唔順利，好多時就係個劇務好唔好，TVB傳統個劇務組係好強，呢樣係無可厚非，佢哋都係會好忙，我哋拍嘢嘅人，聲譽好好，唔係買水買飯咁簡單。TVB製作拍外景喺導演之外係得一個PA，咁下面係冇人喇！一個有經驗劇務係可以幫PA解決好多問題，所以係好重要一個部門，你睇佢同咁多藝人嘅關係，唔係口講，係累積返嚟，所以係咪拍過戲劇都會識佢。」



「制度扼殺咗佢哋」

在TVB過了黃金十年，鍾澍佳一再懷緬過去說：「我諗我個年代，其他喺行業裏面好多電影導演，無可否認幫香港訓練好多優秀製作人才，我係最後一個出嚟可以拍到電影，其實仲有三分一人好做得嘢，只係個制度扼殺咗佢哋。」



■資深攝影師黃展倫（左）被裁，發哥仗義相助。

■鍾澍佳對無綫開火，全因愛之深，恨之切。


《蘭陵王》劇照

【人物誌】執導《蘭陵王》威水

鍾澍佳，又名佳佳導演。離開無綫拍電影，北上搵食，定居北京，本想落地生根，隨後結婚，之後生了兩個女，最近為了兩女生活和教育，又決定回港居住。鍾澍佳執導的內地劇《蘭陵王》在東南亞等地熱播，在台灣破古裝劇收視紀錄，去年8月在浙江、東方、深圳、雲南四大衛視播映，更取得三天收視破億的視頻點擊率。但在香港，他繼續堅持拍攝港式小品，為香港電影出一分力。





來源: http://hk.apple.nextmedia.com/entertainment/art/20150110/18997419

---

煽情監製：韋家輝度橋「總之要掟仔落街」

1 : GS(14)@2015-04-22 22:31:50

■韋家輝當年加入TVB後，曾被喻為「新王晶」。資料圖片


昨凌晨《大時代》重播逾41萬人收看，《大時代》靈魂人物、監製韋家輝昨亦透過助手回覆：「好開心咁多年前嘅作品仲有人鍾意，當年用倒敍方法一開頭就掉啲仔落街幾冒險，估唔到今日變咗經典。」2011年他於《焦點影人韋家輝》一書的訪問提到入行時仍是一張白紙，靠看影帶及劇本增進知識，將電影方法用在電視中。他舉例《大時代》首集的劇情：「一開始就想到要掟仔落街，那時的電視劇多用對白推展劇情，而我則先從影像去想，總之要掟個仔落街，甚麼原因掟就慢慢再度。」



26歲升做監製

韋家輝畢業後第一份工是在銅鑼灣碧麗宮戲院做停車場管理員，之後轉職TVB見習編劇，他透露：「記憶中在TVB上課沒多久，被視為可能是『新王晶』，上課後一個多星期便被調入戲劇組，首套劇是《過山車》，之後是《飛越十八層》。」到26歲從創作組升任製作組的監製，之前並無先例。他表示在年少時覺得很多部電視劇都不夠盡：「那時會問自己『換轉我來做會如何？』到有機會便盡情發揮，於是有《流氓大亨》、《誓不低頭》，那時我綽號叫『煽情監製』。」之後電視大戰展開，韋家輝拍《大時代》，他說：「現在回望會訝異，只有20多歲很自信，只知要贏。」採訪：李森





來源: http://hk.apple.nextmedia.com/entertainment/art/20150422/19120813

---

冇面俾 林峯唔吼《使徒行者》電影版 監製戚美珍推老公苗僑偉升男一

1 : GS(14)@2015-06-11 12:40:37

2015-06-11 NM



大台打鑼宣布開拍《使徒行者》電影版，話明原班人馬，林峯、佘詩曼孭正，點知已離巢的峯少唔稀罕，一句「無興趣」，推！被老死曾志偉拉落海做電影監製的三嫂戚美珍，索性順勢推在劇中飾演臥底阿Sir卓凱的三哥苗僑偉，做電影版男一，夫妻檔上陣，話晒事。唔傾片酬即推

繼《衝上雲霄》一開二後，無綫拍板開拍去年最高收視劇《使徒行者》電影版，並屬意沿用已經離巢的林峯做男主角，但林峯話之你，以「無興趣」為由拒絕，完全冇面俾。「林峯梗係唔接！《使徒行者》都叫做高收視，但TVB淨係俾佘詩曼攞視后，就算Seed哥都好有口碑，但林峯因為唔續約，就連豬肉獎都冇！既然係唔開心咁走，點解仲要俾面；況且林峯而家集中打大陸巿場，嚟緊又會同古天樂合作《尋秦記》，所以佢連片酬都懶得傾，一口就推咗。」林峯身邊人說。

徐子珊謀住

大台開戲，一貫慣例，自己友玩晒，《使徒行者》由曾志偉負責策劃，自己友戚美珍處女下海做監製；男主角換人，劇本亦要重新執過。「三哥三嫂同殼王玩得好埋，年前志偉叫三嫂出山幫大台主持飲食節目，三嫂碌卡搵咗好多紅人好似梁家輝、洪金寶做嘉賓；今次由佢做監製，對搵大卡士幫手都有幫助。而家林峯唔做，三嫂索性叫自己老公做男主角，反正之後都會搵啲大卡士坐鎮。」知情者說。男主角有變，女主角釘姐亦可能換，據了解，明年二月約滿的佘詩曼，仍與大台在拉鋸 階段。「如果阿佘唔續約，TVB未必俾佢做女一，加上樂小姐之前安排咗一班就快約滿嘅藝人同老闆食飯，徐子珊講到明續約條件係要有機會同想拍戲，所以如果阿佘傾唔掂，徐子珊分分鐘做女主角。」知情者說。

食得唔好嘥

電視劇收視好，亦唔擔保拍電影版有捧場客，但大台食得唔嘥，近年將收得的電視劇一開二，執多劑！

《Laughing Gor之變節》09年電視劇《學警狙擊》的Laughing哥大爆，大台搵影帝黃秋生及吳鎮宇坐鎮，捧謝天華做男一開拍電影版《Laughing Gor之變節》，公司揼本捧，不過謝天華人氣未有受惠，前年約滿大台後自組公司返內地發展。

《衝上雲霄》《衝上雲霄2》大收，不單令Cool魔張智霖人氣爆燈，大台更趁勢開拍電影版，除了安插親生女佘詩曼做女主角，又搵來古天樂、鄭秀文等大星孭飛，今年賀歲檔期收二千多萬，票房一般，慘蝕收場。

---

《洛奇》金像監製胰臟癌病逝

1 : GS(14)@2015-06-12 08:56:34

憑《洛奇》（Rocky）奪得奧斯卡金像獎最佳電影的荷李活監製Robert Chartoff，前日因胰臟癌於加州聖莫尼卡家中逝世，終年81歲。


■監製Robert（右）當年憑《洛奇》奪最佳電影，更令史泰龍（中）一炮而紅。


於紐約出世的Robert Chartoff生前炮製過不少膾炙人口的作品，除《狂牛》（Raging Bull）外還有當年令他得獎兼令史泰龍（Sylvester Stallone）一炮而紅的《洛奇》，更包辦全部《洛奇》系列監製，包括現已拍完進入後期製作的洛奇外傳《Creed》。當年跟Robert一起製作《洛奇》得獎的監製Irwin Winkler讚揚他說：「Robert的成就已說明一切，他還是個樂善好施的人，甚少人知道他為印度孤兒興建學校。」先後結過3次婚的Robert，跟現任太太Jenny Weyman共育有5位小朋友。撰文：盧葦





來源: http://hk.apple.nextmedia.com/entertainment/art/20150612/19180942

---

「披頭四」御用監製佐治馬田逝世

1 : GS(14)@2016-03-11 00:51:14

英國影響力最大搖滾樂隊「披頭四」的御用監製佐治馬田（George Martin），前晚在家中離世，享年90歲。佐治馬田因為發掘披頭四、監製其絕大多數專集並參與編曲演奏，被譽為「披頭四第五人」（Fifth Beatle）。


■佐治馬田（右二）與披頭四炮製了多張金唱片。


佐治馬田的經理人和披頭四鼓手靈高史達，昨宣佈他死訊。英首相卡梅倫指佐治馬田是「音樂巨人」，與披頭四合作炮製眾多偉大音樂。1926年出生的佐治馬田，二戰參軍後讀音樂，演奏雙簧管，29歲就成為EMI唱片子公司Parlophone主管，62年一聽披頭四，就洞悉他們流行潛力，一力簽下對方。佐治馬田以他的廣闊音樂知識，助披頭四音樂探索不同音樂元素，急速成長，亦不時客串彈鍵盤和負責管弦樂部份編曲，得意傑作包括在金曲《Yesterday》加上弦樂。法新社/美聯社





來源: http://hk.apple.nextmedia.com/international/art/20160310/19523512

---

《十年》監製：排斥本土等於除根

1 : GS(14)@2016-03-16 07:33:02

談本土思潮，自治派、城邦派、港獨派、革新派，各有論述，近年不僅泛民也主張本土，就連建制派及財爺，亦爭取本土話語權。何謂本土，誰說了算？角逐今屆金像獎最佳電影的港產獨立電影《十年》，5條獨立短片大談本土、港獨、赤化、以普滅粵，創下獨立電影罕見票房佳績。其中1條短片〈本地蛋〉中，廖啟智一句「千祈唔好慣」如當頭捧喝，這金句原來是出自年輕導演兼監製伍嘉良的手筆，「香港人呢十幾年面對嗰種嘅荒謬，真係日新月異，嗰種荒謬程度真係好創新科技，挑戰緊香港人個耐性係邊，願唔願意妥協」；十年後的對白，警醒當下的香港人，一切為時未晚。記者：李鈺廷《十年》5名年輕導演不問賺蝕，不用商業計算，純粹建構5組十年後的故事，向觀眾提問，「我哋問緊嘅問題，原來觀眾自己都問緊；原來我哋擔心嘅嘢，香港人都係擔心緊；原來我哋想點樣搵出路，原來香港人都係搵緊出路；大家都知道，個將來大家有份」，有誰共鳴？票房、入座率可見一斑，「裡面蘊含著香港人嗰種共鳴感、嗰種力量，我覺得好巨大」。近年本土思潮掘起，執導短片亦以「本地蛋」為題的伍嘉良認為，打壓越大，反作用力越大，「咁自然不過嘅事，都要被label（標籤）、被排斥，個原因又係唔講邏輯嘅，咪激發到好多香港人希望爭取同守護番嗰種本土」，直言政府不應打壓和排斥本土意識，更要努力保存和強化，「如果一個地方冇咗佢一路以嚟流傳嘅精神、文化價值，佢就冇咗一個根，冇咗歷史，冇咗文化嘅蘊釀；畀好多外來嘅、差劣嘅、唔同嘅價值文化不斷溝淡、衝擊」。他指政府不應假以土地不足為由，輕視本地農業發展；電影業界亦不應只歸咎網上侵權令票房下滑，而是多製作符合港人口味的影片，重新吸引觀眾入場。一部由年輕人執導的《十年》，5名導演無心插柳，卻造就本港獨立電影奇蹟，伍嘉良亦承認，本土電影威力不容小覷，「《十年》觀眾個對象就剩係香港人，即係本土、關心香港人嘅人為一個對象，有呢個成績，我哋覺得有一種好大嘅共鳴感；觀眾去睇，並唔係純粹一種消費、輕鬆、娛樂，而係佢好想睇吓一個對香港將來嘅想象會係點樣呢？」



智叔金句由來

上世紀八十年代，香港經濟騰飛；九十年代的移民潮，上流機會處處；港人一直搵錢至上，直至前年，一場由年輕人發起的雨傘運動，一眾已上位的中年人紛紛政治覺醒，走上街頭，走進社運，走入議會，希望填補過去數十年的政治缺失，為下一代抗爭，未時已晚嗎？伍嘉良執導的短片〈本地蛋〉中，飾演本地蛋商的廖啟智一句「千祈唔好慣」，成為電影金句；共鳴背後，執筆的伍嘉良亦希望此對白能敲響警號，希望當下成年人反省。「我寫嘅時候，想像吓佢（智叔角色）嘅處境，佢眼前嘅小朋友，佢自己嘅下一代搞成咁，佢社區入面年輕嘅朋友又搞成咁，我會唔會有一種反省呢？係咪應該有一種悔咎呢？如果一個有良知、願意對自己負責的人，我覺得要問呢個問題：究竟過去、現在，甚至乎將來嘅決定，有冇對得著下一代呢？有冇諗過我們選擇咗習慣，可能自己個代唔會直接受到影響，可能係下一個十年，可能係大家個小朋友，會面對一個好沉重嘅代價呢？」



「佩服」梁美芬

伍嘉良口中的「搞成咁」，就是連下一代都變成「小紅衛兵」，本土、本地等詞也動輒成禁語的十年後預像，卻遭經民聯立法會議員梁美芬批評為劇情過時，認為應起用「城管」而非「紅衛兵」。伍嘉良笑言「佩服」梁美芬的膽識，「我覺得佢個評價幾得意，咁係咪代表城管係一種進步呢？咁係咪佢話緊而家嘅城管，就係以前嘅紅衛兵呢？佢係咪描述緊偉大嘅毛主席嘅思想係out（過時）呢？佢都幾好嘢喎」。回看今天，香港雖沒有小紅衛兵，本土一詞亦非禁語，但也有青少年軍、國民小先鋒，「去殖」之聲絕非只聞樓梯響，電車、郵筒、校徽，仿佛有英皇冠、有殖民色彩就是禁忌，「香港人呢十幾年面對嗰種嘅荒謬，真係日新月異，嗰種荒謬程度真係好創新科技，挑戰緊香港人個耐性係邊，願唔願意妥協」。這位年輕導演筆下的「千祈唔好慣」，除了反思，也是寄語，「有好多違背良知嘅事情，是非黑白顛倒，你係明知道嘅，你係分辦到嘅，但你選擇咗妥協嘅，呢一種咪係唔好嘅習慣」。



被荒謬捧紅

普教中、青少年軍、李波失蹤、學生血的控訴；過去一年，有人說現實比電影更荒謬，甚至有人戲言不用看《十年》，劇情已活脫脫呈現眼前，但不少人仍堅持入場，一睹光影下的十年後是何等荒誕。在香港，荒謬捧紅了《毛記》，也捧紅了《十年》；在外媒爭相報道表揚之際，還得吃一棍內地黨媒以「思想病毒」狠批，但「病毒」荒謬得落畫後，仍繼續在社區蔓延、感染：教會、議員、大學學生會包場的放映座談會，遍地開花，還殺入香港電影金像獎，登陸本港和海外電影節，製作團隊當然鼓舞，但一切都是意料之外，原來他們盤算過最壞情況，「甚至乎冇人睇嘅話，咁就包場邀請人睇」。「開頭有得去電影節已經係一個bonus（獎勵）嚟！」伍嘉良坦言，當初5條短片剪接完成，根本無計劃在戲院上映，「係完全冇」。一套近乎零卡士、零宣傳的獨立電影，若能登上電影節已是佳績，最終《十年》公映近2個月，場次不多，票房突破600萬元；整體入座率高達七、八成，單計日間入滿率亦過半，個別場次更爆滿，伍嘉良說，以香港獨立電影界及上映規模計，此等入座率和票房實屬罕見，「無論係院方、電影影迷或者影評人，佢哋都講番佢哋觀察到嘅數字，係有啲瘋狂」。惟熱潮過後，伍嘉良更希望做好地區巡迴放映座談會，與市民深入交流。《十年》由5個短篇電影組成，有觸及敏感話題「港獨」的〈自焚者〉、賣雞蛋無路避走寶島的〈本地蛋〉，還有標誌廣東話沒落的〈方言〉等。【早前報道】《十年》全線落畫監製：會再傾戲院上映考慮出碟
http://bit.ly/1LsdJVN《十年》熱潮學界延續兩大學1,700張門票早售罄
http://bit.ly/1ouvMFB





來源: http://hk.apple.nextmedia.com/news/art/20160316/19531886

---

《殭》收視低　監製怪觀眾網民：畀發哥你拍都死

1 : GS(14)@2016-05-21 13:13:39

無綫劇《殭》大結局收視平均有25.8點，最高收27點，前晚該劇監製陳維冠接受傳媒訪問時，就話有啲失望，仲話拍呢套劇，其實只係想改變觀眾睇電視劇嘅習慣——就係唔好齋聽人講，亦唔好只係睇一兩集就下判斷，而係要真真正正去煲——陳維冠仲話，作為電視媒體係要不斷去試，而作為觀眾，陳維冠話，佢哋都要不斷進步。有網民反問：叫人睇多幾集先知好睇？點解唔索性將唔好睇嗰幾集刪走佢：「識拍戲啲人去晒邊，有啲咁嘅監製，畀發哥你拍都死。咁大反應係為喜見無綫任用新面孔，拍啲無乜點拍嘅題材，但點解可以拍成咁！叫人睇多幾集先知好睇就死啦，不如將唔好睇嗰前幾集取消好過，將啲出外景錢放喺有用的地方，例如編劇。點解無綫變到現在咁……」





來源: http://hk.apple.nextmedia.com/entertainment/art/20160518/19616018

---

無綫亂局余珍惡鬥　監製被辭職

1 : GS(14)@2016-05-21 18:29:43

【派系鬥爭】■余詠珊（右）和曾勵珍水火不容，令下屬慘成代罪羔羊。資料圖片


【內憂】無綫新劇《親親我好媽》，由前戲劇製作部總監梁家樹愛將關永忠監製，演員有陳敏之、黃智賢、江美儀等，據知，早前因演員投訴劇本差及高層權鬥問題，被高層曾勵珍下令「停廠」四日。昨日本報收到消息，指關永忠要為停廠負全責，成為事件的政治犧牲品。事關《親親我好媽》是助理總經理杜之克下旨開拍，而杜之克跟綜藝科總監余詠珊同一陣線，兩人與戲劇製作部總監曾勵珍勢成水火，今次因監製出錯搞到停廠四日，故關永忠要孭黑鑊被犧牲！其實，去年汪明荃落敗視后，羅家英已在微博留言：「梁系已飄蓬葉落，你明白的！」屬於梁家樹派系的關永忠被犧牲很正常。消息指關永忠接到大信封後，無綫下旨叫他低調處理，對外表示是自己「請辭」，而非「被辭」，昨日記者致電關永忠求證，問到是否離開無綫？最初他否認：「唔係，冇呀！」記者指因「停廠」事件傳被炒魷，他說：「舊聞喇！我而家做緊呢套劇後期，未知幾時出街，仲剪緊。」由於傳聞言之鑿鑿，記者再次致電給他，關永忠終改口：「唔係未辭職，係未走，公司規定辭職要六個月通知，自己喺無綫三十年，夠皮啦，唔係長情，鍾意就做啦。」


【慘被犧牲】■任職30年的無綫監製關永忠，成為權鬥犧牲品被辭職。資料圖片

關永忠直認唔開心

問到是否做得不開心請辭？關永忠坦言：「有啲影響，個人都攰。」是否跟停廠有關？他強調：「冇人同我提過呢件事，停廠停外景成日都有，牽涉搭景、演員檔期，其實係煲大咗，冇乜大問題。」余珍兩高層鬥爭激烈，記者指他不是珍姐黨羽，關永忠說：「我哋都係under佢嘅員工，TVB係老細，我哋出TVB糧，打工仔可以做乜，上面有乜指示做乜。我好少同老細打交道，多一事不如少一事。」採訪：非非





來源: http://hk.apple.nextmedia.com/entertainment/art/20160520/19619567

---