ZKIZ Archives


月賺八萬 情侶檔創芝士熱狗瘋潮

2015-02-12  NM  
 

 

上個月,YouTube、facebook及各大飲食論壇均熱傳一條短片,片中廚師將一大碗熱辣辣芝士淋在一份熱狗上,金黃色的芝士與鮮紅色的番茄醬混合時發出「吱吱」聲,令人「食指大動」,這條短短九秒的短片,令到紅磡的小食店「Iconic H」大排長龍。情侶檔老闆、三十二歲的尹佩琪(Karena)及三十三歲的張君行(Brian),亦大感意外。兩人開店時本以香腸做主打,但短片熱爆後,熱狗變成主要收入來源。現時日賣三百份,上月已賺八萬元,今個月生意額更有望升多一倍!不過熱狗簡單易煮,熱狗潮未必興得耐,Brian亦坦言:「應付唔到。我哋婚禮都要推遲,又驚之後生意不保。」記者找來有兩家小店的串皇老闆Wingo,他傳授長做小食檔的秘笈。

Iconic H去年九月在紅磡必嘉街開店,隔一個街口就是賣漢堡包非常出名的「時新快餐店」,兩店都是售賣以麵包底為主的食品,打對台得來又各有各做。Iconic H主打十八款香腸配熱狗,售價由廿五至廿八元,另外配料如熱溶芝士或黑松露雞蛋則加十元,特色醬汁另外加收三元,一款熱狗閒閒哋要賣超過四十元,與十六元一個漢堡包的價錢相比,貴一大截。熱狗走貴價路線,初期每日只售出十多份,直到上個月拍了只有九秒的短片放上網,真正時來運到,生意急升。記者上週四早上十一時到鋪頭,發現還未開鋪,已有十多人在門外排隊,但因為雞蛋還未到貨,被迫遲了半小時才營業。排頭位的客人林小姐足足等了四十五分鐘才能買到熱狗。另一個飢腸轆轆的陳同學,試食過後表示:「好值得,芝士好好食,一定會再幫襯。」門外長期有人排隊,擠得行人路水洩不通,接單接到手軟的Karena開始做唔掂,男友Brian於是辭去工作,二月份全職落鋪幫手:「上個月十九號先放條片上網,之後嘅十日生意已經倍升,做咗廿五萬生意,我估今個月應該會做到五十萬生意!」雖然生意表面風光,但背後卻隱藏危機。現時兩人除了日做十五小時外,連婚期也被迫推遲,店鋪也因受困於面積及電壓所限,未能增聘人手煮食,更重要是他們擔心熱潮過後生意不保。

危機一:煮食太慢流失客人

記者現場觀察三日,雖然很多客人貪新鮮來幫襯,不怕等足一小時「朝聖」試食,但由於排隊時間太長,不少理工大學生專程來試食後向記者吐苦水指:「等得太耐,下次未必再嚟!」有部分客人亦希望增設送外賣或打電話預訂取貨服務,減少等候時間,但Karena無奈地表示很難做到:「試過俾客人打電話落柯打先,但因為唔夠人手,根本做唔切。」事實上,Iconic H鋪頭面積太細,廚房只能企四個人,要增加人手非常困難,而且也很難添置爐具去加快煮食:「當初揀鋪頭時太快決定,結果間鋪嘅電壓唔夠高,唔可以放多個炸爐去炸腸仔。」他們曾花數千元加設一個爐,希望加快製作速度,但鋪內電壓不足,最終要以十蚊賤賣。現時只有一個炸爐與鐵板爐,效率甚低。Brian每次只能炸八條香腸,每條炸十分鐘,一小時最多只可以炸四十八條香腸,連同煎蛋及燒芝士,每份熱狗製作需時十五分鐘。現時每個鐘能賣出三十多份熱狗,生意增長已差不多飽和。記者曾提出過可預先將香腸煮熟加快出貨,但Karena認為很難做到:「一來新鮮好食啲,二來我哋有十八款香腸,個個客人口味都唔同,好難話預先煮熟邊款腸先,所以要即叫即煮。」

危機一解決方法

既然煮食爐具不可以增加,唯有從款式方面着手,我覺得十八款香腸太多,應該減少款式,如每週推出其中八款香腸,每週都轉款,除了可令客人保持新鮮感,亦可以縮短煮食過程,因為只係煮八條香腸,咁就可以預先煮熟,加快整熱狗的過程,同時可以令生意額繼續上升。

危機二:香腸成本高

鋪頭現時最熱賣的產品是芝士熱狗,但其實兩人原本是想主打出售歐式風味的香腸,二人反覆試過五十多款熱狗腸,才篩選出十八款腸,但每條香腸成本卻高達十元:「我哋搵啲腸係貴嘢,如蘋果雞肉腸、辣味羊肉腸,主要供應俾酒店用,出面好難買到,都冇人肯用咁貴嘅腸做熱狗。」而招牌菜熱溶芝士,更是Brian精心調製:「我十二歲去過新西蘭讀書,喺當地餐廳做嘢偷師學返嚟再改良,用咗三種唔同嘅美國芝士混合煮成。」香腸連同芝士及雞蛋等配料,成本高昂,毛利只得五成。於是,Karena想出增加套餐,如客人買熱狗後,再加十二元,便提供汽水及薯條:「薯條同汽水成本低,拉上補下,一個套餐毛利可以升到六成幾。」不過一份套餐售價差不多要五十元,記者現場所見,只有一半客人會選擇套餐:「一份熱狗已經好飽,再叫薯條會食唔晒!」

危機二解決方法

現時香腸向不同供應商取貨,成本效益非常低,應該集中向同一間供應商買貨,同時大量入貨,從而降低食材成本。

危機三:易被同行抄襲

Iconic H獨沽一味賣熱狗,但其實當中的香腸、麵包甚至醬汁均是由供應商入貨,只得黑松露雞蛋及芝士是自己原創,很容易被人複製,就像過去幾年的急凍乳酪及愛爾蘭瘋薯熱潮一樣,開得快執得快。由於Karena擔心芝士熱狗的熱潮會很快冷卻,於是從款式上落手,例如選擇不同肉類的香腸,「一般香腸都係用豬、牛、雞混合,但紅磡區好多人有宗教信仰,所以我特登搵咗款羊肉腸,遲啲會搵埋素腸,咁就行埋素食路線。」但這樣同時將款式多、製作時間長的問題惡化。目前除了芝士熱狗外,亦推出了黑松露雞蛋熱狗及蘑菇熱狗,她故作神秘指,下個月會推出一款新產品,保持顧客新鮮感。Brian就認為不怕被人抄襲,更笑指:「做熱狗唔使學師,最重要係開鋪要好有毅力,日做十幾個鐘,而且最難係同供應商打好關係。」兩人目前每天提早一小時落鋪準備食材,收鋪後亦要花兩小時清潔,每天由中午做至凌晨才收工。其實這盤生意相當難請人,Karena試過出月薪一萬三千元連花紅,都請不到人工作,她無奈地指出:「每日凌晨兩、三點先有得瞓,我連婚期都要押後,想花多啲時間喺菜單同搵鋪。我覺得芝士熱狗係可以長遠咁賣落去,我想開多間分店,同埋可以喺鋪頭同客人一邊食嘢一邊傾偈。」

危機三解決方法

後生仔唔願捱,可以考慮縮短工時,咁會易啲請人。另外,租金貴,冇咩空間加人工。不過,教員工熟食心得,塞錢落佢哋袋,都係留人方法。

開業資料(9/14)租金^:$96,000裝修:$200,000入貨:$8,000雜費:$3,000總投資:$307,000^兩按一上

營業資料(1/15)營業額:$250,000租金:$32,000人工#:$45,000食材:$83,000雜費:$10,000盈利:$80,000#兩名老闆、一個全職員工、兩個兼職

月賺 賺八 八萬 情侶 檔創 芝士 熱狗 瘋潮
PermaLink: https://articles.zkiz.com/?id=132131

環海.東岸掀高成數按揭瘋潮

1 : GS(14)@2016-06-21 07:25:38

【本報訊】自去年中起,樓市轉弱,發展商為求散貨爭相透過旗下財仔為買家提供高成數樓按,不分劏房盤抑或豪宅盤,按揭成數普遍由樓價80%起跳,最瘋癲的更「借到凸」、成數高達樓價120%,遠高於正常情況下銀行承造的水平。瘋狂借錢的風潮去年8月由紅磡「劏房之城」環海.東岸帶起,發展商九建(034)旗下財仔為買家提供樓價95%按揭,吸引上車客狂搶,約個半月即售出超過逾860伙。往後不斷有發展商加入,更衍生出多種超短期樓按,被傳媒喻為「奪命按揭」。例如嘉里(683)旗下屯門滿名山上月推出「供息不供本」樓價80%一按,首年免息供之餘,更免入息審查及壓力測試,不過樓按年期只有五年,未來樓價波動難以預計,五年過後買家要再向銀行承造正常樓按或會出現困難。至上月新地(016)錦田北鄉郊新盤Park Yoho更推出「借到凸」貸款計劃,針對擁有物業買家提供抵押舊樓可承造新樓高達120%按揭。如今長實(1113)、會德豐(020)等大型發展商旗下樓盤均有提供高成數按揭予買家選擇,戶型涵蓋劏房細戶至千萬豪宅。





來源: http://hk.apple.nextmedia.com/financeestate/art/20160621/19663066
環海 東岸 掀高 成數 按揭 瘋潮
PermaLink: https://articles.zkiz.com/?id=302326

97瘋潮再現 萬人排隊抽樓 學者籲買家量力而為 倘加息隨時供不起

1 : GS(14)@2017-05-27 08:51:50

■長實海之戀昨即場抽籤賣樓,大批準買家排隊報到,人龍延至港鐵紅磡站一帶。周智堅攝



【本報訊】香港回歸20周年前夕,樓市重現1997年爆煲前瘋狂一刻。李嘉誠旗下長實(1113)荃灣新盤海之戀,昨高峯期近萬人排隊,墟冚程度如1997年開售的青衣灝景灣翻版,長實高層昨指氣氛似1997年,但未有泡沫;首批496伙即日沽清,即晚加推346伙,加價約2%。學者提醒市民,樓價高若碰上加息隨時供不起。記者:朱連峰 黃嘉銘



海之戀屬金管局本月19日加辣後開售的首個大型新盤,首批平均呎價僅15,772元,貼近二手價,加上按揭成數達85%,掀起搶購潮。長實有別一般新盤開售前一天抽籤的做法,昨天賣樓即場抽籤,規定所有準買家須於上午9時至10時15分報到,結果營造萬人空巷場面。



■海之戀為金管局上周加辣後首個開售的大型新盤。

年輕買家佔六成


記者現場直擊,昨早未夠9時,位於紅磡置富都會售樓處一帶已聚集大批準買家及地產經紀,排隊人龍先排出天橋,再由天橋排落港鐵紅磡站,超長人龍圍住半個港鐵站。人龍更誇張到排落樓下隧道B1出口,記者行了接近5分鐘至半島豪庭對開天橋始見龍尾,人龍估計有近300米,相當於約25部雙層巴士總長度。長實執行董事趙國雄表示,第一批客人8時左右已到,「大家都睇到,可以講得係形容萬人空巷,其實都唔止萬人,不過我哋都用萬人空巷,最長隊尾排到幾乎黃埔花園嗰頭」,反映市民置業希望很大,多達六成買家是年輕人,不少人要父母資助首期入市。23歲學生魏先生表示計劃買一個兩房單位,預算樓價800至1,000萬元入市,由於仍是學生沒有收入,層樓由媽媽支付首期及供款。不少人將目前瘋狂的樓市與1997年比較。今次海之戀賣樓墟冚程度足以與1997年6月開售的青衣灝景灣比較。灝景灣於1997年6月5日截止認購當日,排隊人龍由銅鑼灣世貿中心排到紅隧出口,700個單位一日沽清,成樓市經典。之後樓市泡沫爆破,樓價跌近七成,高峯期入市的業主猶如經歷浩劫,因而被戲稱為「浩劫灣」。趙國雄認為,雖然目前市場氣氛近似1997年,但「冇乜泡沫」,因為樓市有實際需求,用家亦佔超過九成,情況與1997年不同,當年利息高達10厘,現低見2厘多,只要買家有穩定職業及收入,自用便沒有問題。


家庭客連掃六伙


美聯布少明稱,有一組區內家庭客動用約8,172.3萬元連掃6伙作投資及自用。至昨晚8時全數單位已獲認購,應是繼將軍澳緻藍天後兩年來全港最熱新盤。中文大學劉佐德全球經濟及金融研究所常務所長莊太量指,現時樓價實在太高,買家要上車,借得多、自然供得多,萬一面對加息隨時供不起,就算供到也「好辛苦」。莊呼籲買家認真衡量自己實力,考慮向發展商或「財仔」借貸時,要謹慎考慮是否還得起。


買家心聲


魏先生:「計劃買個兩房單位,預算樓價800至1,000萬元,由媽媽畀首期同供款。」


葉先生:「用超過3,000萬元掃3伙,每伙大約1,000萬元,打算買嚟自住。」



97年主權移交至今,香港前進還是倒退?「蘋果」與你細數廿載風雨。【回歸二十年】專頁:http://hksar20.appledaily.com.hk




來源: http://hk.apple.nextmedia.com/news/art/20170527/20035464
97 瘋潮 再現 萬人 排隊 抽樓 學者 買家 量力 而為 加息 隨時 供不起
PermaLink: https://articles.zkiz.com/?id=334124

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019