ZKIZ Archives


羅志祥挑強國人機上載密集片激嬲網友

1 : GS(14)@2016-08-08 00:17:11

台灣男星羅志祥(小豬)上個月先啱啱度過37歲生日,但佢細路心、貪玩就大家都知,佢前晚似乎因為一時「手痕」,喺微博貼咗一條唔應該出現嘅短片,搞到部份fans取消關注先掂。話說前晚小豬分別喺微博同fb貼咗一張型仔相,佢耷低頭(但feel到佢chok嘅),背景係一個有好多大圓形圖案嘅建築物,可能一般人睇落好似冇乜嘢,但對於有密集恐懼症嘅人嚟講,係好恐怖嘅。點知小豬玩開唔識收手,之後發咗一段據網民描述係「手上全是洞而且還有洞裏面爬滿蛆的」短片,搞到好多fans睇完之後勁嗌核突噁心,然後,有好多人走去取消關注小豬,又留言鬧佢,搞到好大件事。唔知係咪知道玩出禍,小豬之後刪咗條片,再另外留言話:「好吧,因為我愛你們,所以我刪了!花哈哈哈哈哈!」雖然有部份fans「回流」,不過都仍然有唔少人鬧小豬玩大咗。之後,小豬再貼番一段自己跳舞嘅片嚟「補飛」,有fans突破盲腸話小豬其實係驚自己掉粉(失fans)。不過,呢條片,喺小豬fb仲有得睇。隔咗唔夠一日,昨早小豬再喺微博問fans:「請問大家一下,你們喜歡看擠痘痘的影片嗎?我好喜歡耶,好想跟大家分享」,有超過萬四個留言,其中有唔少人話佢「變態」同「喪心病狂」,不過亦有人表示「喜歡」。頭先佢再推咗一下文,話:「其實看擠痘痘影片很嗨的!你們好好想想吧,那我先去練練平衡感喔!」上星期生日先得到121萬個讚好同生日祝福,點知一時貪玩搞到有fans取消關注,但擠瘡應該點都好過……嘅。(好似係)其實小豬仲記唔記得,今年年初,佢因為發表「不用分那麼細,因為我們都是中國人」言論,遭台灣網民炮轟,紛紛取消關注其fb單嘢呢?一夜之間冇咗2萬fans,係咪想再試?





來源: http://hk.apple.nextmedia.com/entertainment/art/20160807/19726352
羅誌 誌祥 祥挑 強國 人機 上載 密集 片激 激嬲 網友
PermaLink: https://articles.zkiz.com/?id=304834


ZKIZ Archives @ 2019