ZKIZ Archives


毓民元秋互寸家人坐監


2013-06-06  NM  
 

 

立法會內務委員會上星期五開會,惹火焦點有兩個,一個係毓民提出對曾鈺成主席嘅不信任議案,另一個係蔣麗芸提出罷免毓民同陳偉業。毓民提出議案辯論嗰陣,佢大罵建制派議員發言質素參差,文不對題,仲叫人「咁鍾意講嘢,返屋企同你老公講」。等緊表決嗰五分鐘,蔣元秋忍咗四分鐘終於頂唔順,走咗埋去毓民個位度話毓民,令部分議員起哄。究竟佢講咗乜嘢?

秋姐會後真係好唔開心咁話:「因為上一次佢已經提及我家人,其實我覺得唔好成日揭人哋瘡疤!我尊重佢,我一路到依家都冇提過佢家人,你知道佢家人好多嘢o架啦,我都冇提,我都知道佢好多嘢。我走埋去叫佢唔好提我家人,有啲乜事你同我講,唔好好似爛仔咁,我邊度會同你打爛仔交,唔好咁樣啦!」元秋口中嘅毓民家人,相信係指因為毒品問題被深圳公安扣押嘅長子黃特漢。毓民都唔弱,兩個星期前,有報紙報導毓民曾經講過秋姐係「含住金鎖匙出世嘅大小姐,佢細妹蔣麗莉亦都坐過監」!

嗰日蔣麗芸真係諸事不順,連佢提出罷免毓民同大嚿個議案都因為有法律觀點要澄清,被迫主動提出押後,仲要俾黨友Tree Gun寸一句:「咁今日傾咗咁耐做乜呀?」難怪佢開完會出嚟心情咁差!

六四前夕自由黨派「自由花」

每年母親節同父親節,都係大小政黨搞聯誼兼派蛇齋餅糉嘅好日子。自由黨上星期四晚喺金鐘名都酒樓訂咗八十圍枱,舉行「頌親恩」聯歡晚宴,招呼支持自由黨嘅「自由之友」,禮物人人有份,由砂煲罌罉到名牌Polo都有,每人收費一百八十蚊,抵到爛。呢啲場合,點少得由該黨立法會議員親自出馬派禮物呃like嘅環節?現場所見,地區直選出身嘅田北俊,比起另外四個功能界別出身嘅方剛、張宇人、鍾國斌、易志明受歡迎得多,尤其當田少高舉「自由花」派俾街坊時,一班公公婆婆、阿叔阿嬸不知幾熱情,拎住枝花爭住同田少影相。點解田少咁「斗膽」臨近六四派「自由花」?原來「自由花」係一支花形嘅原子筆,唔通自由黨想曲線撐平反六四?

CCTVB袁志偉擺記者上枱

CCTVB新聞部繼早前臨時抽起《新聞透視》碼頭風雲,又再整一劑破壞記者採訪獨立性。舊年四月一號,古思堯同馬雲祺「慶」梁振英上場,喺中聯辦疑似燃燒國旗,被律政署控告企圖以焚燒侮辱國旗。法庭星期一開審,控方傳召當日在場採訪嘅首席記者何永康做證人。何永康唔多想作供,一開波就向裁判官杜浩成申請豁免,話記者由採訪變成參與案件,日後接觸受訪者,專業嘅獨立性會受質疑。不過杜官話就算律師都冇豁免權,要佢繼續作供。有咩證供要搞到記者做證人?原來主控官黎劍華靠一條Youtube嘅片段,拍攝到當日中聯辦門外場面,做控方主要證供。主控官話搵唔到拍片人,要靠在場TVB記者確認片段係當日事發現場。舊年四月事發後,警方問TVB攞播出街嘅新聞片段做證物,九月仲入去TVB同處理過呢單新聞嘅員工錄口供,包括:攝影師、傳送片段嘅工程師、甚至剪片、編輯。新聞及資訊部總監袁志偉「花哥」原本都有機會做證人,後來證人名單就冇咗佢個名,但下屬走唔甩,要上證人台。有律師話,警方邀請任何人錄口供,當事人都有權保持緘默。佢話提供資料協助警方調查係公民責任,但如果係惡法挑戰新聞界嘅中立身份,就可以使用緘默權。有TVB新聞部人話,錄口供前,都有問過上司係咪應該去,「花哥」就毫無敏感度,以為警民合作。袁志偉透過發言人回應,警方要求何永康作供非經TVB安排。

 

毓民 民元 元秋 秋互 互寸 家人 坐監
PermaLink: https://articles.zkiz.com/?id=56971


ZKIZ Archives @ 2019