ZKIZ Archives


我主場:《海闊天空》成集會抗爭歌黃貫中:頭暈身㷫就唱!

1 : GS(14)@2016-03-06 16:12:11

■對於《海闊天空》成為集會抗爭歌指定曲目,阿Paul直言此歌是香港人的集體情懷。攝影:陳志嵐


與黃貫中(Paul)做訪問前,《蘋果》記者收到不少朋友的溫馨提示,指受訪者躁底火爆燒上腦,切記小心。又難怪朋友有此憂慮。記憶中,阿Paul與Beyond隊友黃家強數度隔空開火,有「怒火Paul」霸氣稱號。可是,面前軟攤在自己studio梳化的阿Paul,面對他認為是敏感的問題,竟然笑咪咪侃侃而談。對於《海濶天空》成為近年抗爭人士的主題曲,阿Paul直言此歌包含Beyond和家駒精神,香港人無論何時何地,只要頭暈身㷫就會唱。撰文:王梓嫚自93年黃家駒離世,Beyond成員黃貫中、黃家強屢傳不和,多年來已達水火不容之境,另一成員葉世榮6月開Beyond紀念騷,阿Paul一早答應,但問題是家強至今遲遲未覆,能否三子合體,仍是言之過早。阿Paul日前接受本報記者專訪說:「其實呢個騷係紀念家駒嘅,但凡紀念家駒嘅音樂會,我都希望出席,亦都從來冇話過唔OK同台演出。當然Beyond係好多人嘅集體回憶,大家可以同台都係為咗一個信念。」



■Beyond曾幾何時是樂壇班霸,可惜近年阿Paul和家強屢傳不和,種種是非不斷蠶食Beyond。

■家強攬膠樣家駒拍MV,黃貫中指得啖笑。資料圖片



拒評家強抱膠樣家駒

世榮6月開騷,但阿Paul搶先於下月9日在九展開音樂會,他透露音樂會有新歌也有舊歌,唱經典歌《海闊天空》和《光輝歲月》更是指定動作,面對《海闊天空》成為集會人士的抗爭歌曲,阿Paul說:「呢首歌我唔敢講係咪香港精神,應該點講呢,我諗係大家對《海闊天空》嘅一種集體情懷,首歌有家駒有Beyond精神,唱嗰陣又可以嗌吓,所以順理成章、有乜頭暈身㷫就會拎出嚟唱!」
Beyond能否合體仍是未知數,但早前家強就率先在台上和「家駒」合體,為內地一手機宣傳,結果遭網民瘋狂洗板,斥家強「發死人財」,對此阿Paul表示:「我唔可以就一個商業行為去干涉人哋,因為我睇唔到原裝嗰條片,只係有人forward咗條二次創作嘅片畀我,哈哈哈,我覺得得啖笑箒!總而言之,有分數啦,《我有分數》,哈哈,講嘅係我首新歌歌名!」


■前年阿Paul踩落旺角支持雨傘運動,有指近日遭內地封殺,要煞停內地音樂會。資料圖片

講封殺:繼續上去做嘢

阿Paul前年支持「佔中」,有指近日遭內地封殺,內地音樂會急煞停,他坦言:「嗰個係一個歌友會,有返開內地演出嘅人都知,好多時都會忽然間stop咗,嚟緊下半年我都會上去做嘢,始終香港得800萬人,唔可以容納得晒我嘅音樂,所以無論係內地或者海外,只要有耳朵嘅地方,我都會去。」





來源: http://hk.apple.nextmedia.com/entertainment/art/20160306/19518254
主場 海闊 天空 集會 抗爭 歌黃 黃貫 貫中 頭暈 就唱
PermaLink: https://articles.zkiz.com/?id=297025


ZKIZ Archives @ 2019