ZKIZ Archives


公司欠租張震遠豪宅逍遙

2013-06-27  NM
 
 

 

啤梨張自從生意失敗要「裸辭」後,連返商交所打躉都少咗。數碼港已於六月中入稟法院,追討逾七百萬租金和利息兼收樓。啤梨張返工做「租霸」,收工後就返去淺水灣道豪宅繼續歎世界。佢自住及隔籬租俾阿媽住嘅兩間豪宅,月租加埋要三十四萬,月月都準時交租。

最近小宗聽聞呢座六層高嘅豪宅有盤放租,即刻call經紀去睇盤。原來,個放盤喺正啤梨張樓上。呢座樓齡超過半世紀嘅豪宅,每層分A、B室,各三千餘呎,望正淺水灣沙灘。不過,啤梨張自住嘅B室就有棵樹阻咗少少景。單位最正係個近百呎嘅大露台,聽講啤梨張最愛坐在露台,食住雪茄,望住個海「度橋」。夏日炎炎,小宗企喺露台,幻想自己係啤梨張,橋就諗唔到,只係望到遠處沙灘,有幾個三點式女郎喺度玩水,春光無限。話說啤梨張嗰兩個單位今年十月就租約期滿,業主湯君明話未傾續租,所以未諗到會唔會加租。去年底啤梨丁母憂後,A室得佢家姐住,但聽聞姊弟關係麻麻,水緊嘅佢相信顧得自己,亦顧唔到家姐了。

最靚CEO變「雙失」中女

有「鐘錶女王」之稱嘅胡敏珊,過去數月突然喺社交圈「消失」,最近更被踢爆盤生意好唔掂,欠租、人工達百幾萬。模特兒出身嘅胡敏珊,曾經同代理美國名錶Philip Stein嘅鐘錶商人毛志輝拍拖,飛上枝頭後轉行賣錶,事業、愛情皆得意。分手後,胡敏珊繼續富貴,創辦平價錶品牌Chouette,自己做生招牌。不過,拿過呢隻錶來賣嘅行家話:「呢隻錶嘅毛利雖然都有三成,同勞力士一樣,但後者一隻要十萬、八萬,佢一隻只係二千蚊,賺得嗰六百蚊,真係唔知要賣幾多隻先交到中環咁貴嘅租金。」生意失敗,愛情亦得個「桔」。今年初,四十一歲嘅胡敏珊被影到搭上細佢十年嘅動作演員杜宇航,男方為呢段愛情,不惜犧牲事業。不過,小宗老友透露,佢哋已分手,並齊齊潛水。 小宗都要慨嘆一句,花無百日紅,幾時都係留番條後路穩陣。

湯君明大戰扶乩道士

講開炒家湯君明,呢期佢最「關心」嘅唔係租客或市道,而係一班道士。上星期,佢急call小宗一齊去高院聽審。查實呢幾年,以佢為首嘅一班壇生(即道觀嘅信徒),一直同元朗金蘭觀嘅道士打緊官司,前後加埋起碼有八單官司仍在進行中。自認食飽飯無事做嘅湯君明,話十年前跟老友去呢個道觀度聽道、學氣功,仲捐過唔少錢。當時,金蘭觀爭緊道觀佔用嘅三萬呎地皮,向新世界提出逆權侵佔,搵咗湯君明去同新世界嘅堅叔(梁志堅)講數。最後,不但被堅叔省到立立令,官司仲輸埋。呢件事亦點醒佢,覺得道觀嘅管理好有問題,終於搞到反晒面。湯君明入稟告幾個話事嘅壇主,乜都信扶乩,仲話「天職神委」,唔跟公司法選主席等,對方就反告其誹謗。告來告去,搞足兩年,但大把錢嘅湯君明誓要將呢班壇主拉落馬咁話。

Give me a break:最貴VS最平公司治

早排灣仔東來居一碟餐蛋飯賣一百廿八蚊,天價平民餐,引起滿城風雨。小宗有個識飲識食嘅朋友即刻打來報料,話尖沙咀Hullett House Hotel嘅西餐廳The Parlour出咗份全城最貴嘅公司三文治,單賣價四百八十元,連埋加一,要五百廿八大元。咁離譜,小宗當然要去試吓。酒店喺前水警總部,環境古色古香,確實心曠神怡。主角上枱,單計分量就略為失望,點解咁貴?餐廳公關強調,啲餡用咗頂級食材。最貴係中間嗰件,用咗一百克要千三蚊嘅Balik三文魚,以及伊朗Beluga魚子醬;右邊嗰件上面有塊日本近江A5和牛,要成二千蚊一公斤,就連伴碟用嘅水耕菜,都係飛機貨。小宗第一時間試食,但啲料太厚,一邊食一邊跌,好論盡,仲有啲乾口,可能小宗吃慣平民嘢,竟然覺得壹傳媒五樓canteen嘅公司治仲好食。有相你睇,都幾靚仔o架。最重要係,呢份「名副其實」嘅「公司」三文治,只係賣十三大元。心理影響味覺,小宗都唔敢再投訴壹仔五樓飯堂。

金牙大狀講嘢

錯失良機689政府以申請遞解斯諾登之文件唔齊為辭,俾洩露美國國家機密之中情局前外判王飛咗去莫斯科,此乃聰明笨伯之做法也。試想想,若然689由得遞解令進入司法程序,咁非但可以彰顯特區司法獨立,連第一霸權大國都唔慄。即使三、四年後經過所有司法程序,斯諾登卒之都係要解返花旗,咁呢個都係法官大老爺嘅決定,同689無涉。再者,由得遞解令進入司法程序,非但可以彰顯司法獨立,更加證明689政府尊重司法獨立、不作干預。咁又豈非行政、司法雙贏之局?689政府捨上上之策而不由,以文件不齊為借口放走斯諾登,此則不由不令人懷疑係唔係屈服於阿爺嘅淫威,有正路唔行而行歪路?《大公報》慌死大家唔知發生乜嘢事,讚揚689話佢處理呢單嘢之手法,證明佢對《基本法》有高度透徹之了解云云!


公司 欠租 張震 豪宅 逍遙
PermaLink: https://articles.zkiz.com/?id=60365

隔牆有耳:房署收欠租 狂追$0.45

1 : GS(14)@2012-04-07 14:20:43

http://hk.apple.nextmedia.com/te ... 104&art_id=16212564

住喺慈雲山慈樂邨 15年嘅郭生,一直都同待業嘅阿哥住;之前因為工作需要,暫時搬咗去柴灣獨居。約 4、 5個月前返屋企時,竟然發現房署寄咗封欠租通知書嚟,話佢冇交租兩個月,所以佢拿拿臨清還合共約 3000幾蚊嘅欠租,找清條數一身輕。
點知上月初房署又寄咗封欠租通知,寫明「閣下仍未繳交租金港幣 0.45元」,郭生心諗:「家陣欠嗰 4毫子租都要出信,有冇搞錯呀?」男人老狗決定唔理呢啲婆乸數,點知房署窮追猛打,隔咗十幾日後第二度出信,郭生睇完火都嚟埋,覺得為咗嗰 4毫子而嘥埋郵費兼人力,唔係咁合乎成本效益囉,佢好不忿咁話:「人哋放貴利、財務追數都唔會追得咁密啦!」
八方講句公道話,覺得 0.45元都係錢吖,仲要係公帑,唔搞清楚又點交數上去呢,房署都係盡自己本份啫!但房署接連寄兩封信,都要用成$2.8郵費,仲多過筆欠款幾倍囉,難怪令郭生心中有氣嘅。

欠租隨時收回單位

公屋租戶如果長期欠租,房署可以要求住戶遷出㗎;若郭生堅持唔交欠租,分分鐘為咗幾毫子,連間公屋都冇得住。好彩郭生預告呢個月交租時會順便交埋餘下欠款,房署可以唔使煩咯。
隔牆 有耳 房署 署收 收欠 欠租 狂追 0.45
PermaLink: https://articles.zkiz.com/?id=278630

欠租男擎槍遭警射傷子彈穿臂擊斃12歲女

1 : GS(14)@2016-01-14 13:29:11

美國賓夕凡尼亞州一個欠租家庭被業主逼遷,州警與租戶對峙時開槍,子彈穿過租戶手臂,再擊斃他身後的12歲女兒。死者邁耶(Ciara Meyer)與家人住在中部城鎮鄧坎嫩一個月租600美元(4,680港元)的單位,房東去年11月底向地方當局申請驅逐邁耶一家,因他們拖欠1452.6美元(11,330港元)租金,但邁耶一家未有在限期去年12月30日前搬走。警員斯蒂爾(Clarke Steele)周一早上出動協助逼遷,邁耶57歲的父親唐納德(Donald Meyer)應門與斯蒂爾稍作溝通後,突然向斯蒂爾舉起步槍,斯蒂爾卻先發制人開槍,但子彈穿過唐納德手臂後擊中他身後的邁耶,邁耶當場死亡。事後唐納德被控4項包括嚴重襲擊的罪行,地方檢察部門正研究是否起訴斯蒂爾。路透社





來源: http://hk.apple.nextmedia.com/international/art/20160114/19450899
欠租 租男 男擎 擎槍 槍遭 遭警 射傷 子彈 穿臂 擊斃 12 歲女
PermaLink: https://articles.zkiz.com/?id=294175

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019