ZKIZ Archives


辣招辣死代理 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130620/18304479
黃遠輝話樓市要跌兩成,否則政府可能要推出新辣招,此乃純粹黃遠輝私人意見,並非政府已定下之選項。客觀地看,目前樓價會否跌兩成,見仁見智。目前不少業主企硬,誓不降價求售,買家見二手樓盤供應少,有時無奈之下,迫於接受業主叫價。睇番中原城市領先指數連續上升,現實就是如此啦,樓價何來下跌?不過,問番地產代理,大老闆施永青都願意參加一眾代理示威,站在政府總部外舉牌,就可知道代理生意慘淡,所謂樓價上升,只是乾升,未必反映到全盤情況。施永青就咬牙切齒話樓市一定跌──若然政府堅持目前政策不改嘅話!但佢有補充,就係豪宅樓價因數字大,淨計雙份印花稅已經令人肉痛,故此豪宅樓價在缺乏成交量支持下,會跌得快啲,多啲,而上車盤中小型單位因為需求大,單價較細,不跌反升,將來即使跌價,會跌得少啲,慢啲,剛好與梁特首意願相反。呢個講法有數字支持㗎,發展商大嗱嗱用幾十億元投地,實識計數,譬如中海外以天價買啟德嘅「港人港地」(用以興建中小單位),但會德豐就以市場預期下限價買入佛光街豪宅用地,可見一斑。
梁振英、曾俊華、張炳良推出房屋辣招之原意係抑制需求、壓低樓價,等無殼蝸牛年青人士可以有能力買樓,但笨人出笨招,反而推高晒居屋樓價,延伸至私樓中小單位,無殼蝸牛更加難上車,若云聰明笨伯之人,捨梁曾張外,還有誰人?
有云若要政府放棄辣招,要有三個條件:(一)梁振英在網誌話要供應到位先至諗。(但供應額根據佢嘅施政報告,未到2018,不會開始上升,大家等多五年先啦。)(二)等美國利息上升。此乃曾俊華,陳家強之期望,何時加息,要問過伯南克,如果美國守口齒嘅話,要在失業率跌到6.5%,未到2015年中,唔使慌咯。(三)樓價跌兩成。施永青估計會,但不知何時。三個條件要完全滿足嘅話,啲辣招仍然有排都未可以解除,樓市在未來三年仍然會非常沉悶,地產代理有見及此,唔怨聲載道就假,施永青聯同美聯高層一齊到添馬艦示威,就係要為手下打打氣,消消氣,因為啲老闆心知肚明,遲啲就要關舖裁員嘅嘞!
辣招 招辣 辣死 代理 左丁 丁山
PermaLink: https://articles.zkiz.com/?id=59504

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019