ZKIZ Archives


阿松入屋做奶媽

2013-11-28  NM
 
 

 

前財政司長、黑石大中華區主席梁錦松入南豐做行政總裁,主力睇太子女陳慧慧一向看重的投資部。金融界猜測,男朋友司徒啟瑞坐歪,莫非兩人感情生變。據知,梁錦松入局,其實要取代的是南豐執行董事唐國通。

這名Raymond Tong,早年在信和做咗十幾年律師,睇過物業管理、酒店、法律、秘書、內部審計等等,都幾吃重,年薪仲高過佢老闆黃志祥;佢一○年過檔南豐,都已經近七十歲。屆退休之年先轉工,估計都係幫太子女,過渡同家姐陳慧芳爭產之患難時期。唐國通不但幫手扶植陳慧慧兒子張世成上位;爭產期間,有名自稱係南豐「老臣子」的李孝仁,向傳媒抨擊司徒啟瑞不得陳廷驊心,又話有人分化兩姊妹,都係唐國通出信幫陳慧慧一一反駁。雖然爭產案尚在審議中,但陳慧慧已經搵到阿松幫手,佢都可以功成身退。至於陳慧慧同男朋友,兩人已計劃好未來日子,先去遊埠,sweet sweet。梁錦松喺投行浸淫多年,在金融界人脈甚廣,睇住南豐八百億資產唔難。佢仲係三子女之父,做埋奶媽幫陳慧慧睇仔,都應該難佢唔倒囉。

壹計就明盈利不能全面反映實質業績

本欄找來有二十多年經驗的資深會計師林智遠及鄔碩晉,每期踢爆一間上市公司的會計陷阱,股民入市前睇清睇楚,一計就明。滙豐(5)因應海外要求,在香港也公布第3季中期管理報告,季度和首9個月稅後盈利,比去年同期上升23%至24%,保持中期盈利增長趨勢。滙豐在季度報告中,不斷凸顯盈利上升,業績真的實質增長?為何股價還停滯不前?滙豐的季度報告不是香港法定要求,沒有中文版,財務摘要也只有收益表和資產負債表,其他報表一律欠奉。只有收益表是否足夠?看看滙豐8月公布的首6個月中期業績,「收益表」中稅後盈利是113億美元,比去年同期上升25%,但「全面收益表」中全面收益卻只是38億美元,只及稅後盈利三分一,比去年同期更大幅減少62%。盈利與全面收益有天淵之別,是因為盈利並未計算可供出售投資公允值虧損18億美元,和匯兌差額45億美元,管理層可在該相關項目出售或終止後,才把虧損計入收益表中。滙豐中期全面收益表,也已按今年生效的新會計準則要求,清楚顯示上述虧損是「符合特定條件後,將重新分類至損益賬的項目」。投資者分析業績時,除注意盈利外,也應留意全面收益。管理層每每有不同誘因,去延遲或提前在「收益表」中,計算其他全面收益。滙豐首9個月的全面收益是多少?季度報告為何不額外提供「全面收益表」?一切可能要留待全年業績去解答。但只看盈利,不看全面收益,相信未能「全面」了解滙豐的實質業績!(林智遠)

讀者有嘢講

居住元朗蝶翠峰嘅侯先生特意致電小宗話:「政府唔發牌俾王維基,搞到我哋啲老人家瞓唔着,梁振英平時攞住張櫈仔落區聽意見,請問佢以後仲會唔會落區,呢個政府咁不仁不義,要等到元旦遊行真係頂唔順,我啱啱見到屋苑有人貼出『我要睇電視』海報,你幫我話俾港視工會主席楊志豪知,可以印類似海報當免費報紙派,家家戶戶貼出嚟抗議。」

本週監察

企喺呢度,望左定望右好?如果閣下去到調景嶺翠善街就要小心啲,雞乸咁大隻字叫你望左,但係箭嘴就叫你望右,好矛盾噃!邊隻係左手、邊隻係右手,幼稚園都有教,但偉大嘅特區政府竟然唔識!「一男子」政府,擺明老點。

阿松 入屋 屋做 奶媽
PermaLink: https://articles.zkiz.com/?id=83449

阿信屋做雲吞麵足料但無味

2014-08-21  NM
 
 

 

759阿信屋撈過界開完平平化妝品店,上星期六又開埋雲吞麵鋪。聽聞九月仲會開茶餐廳,可能以後有759大酒家、759酒店和759主題樂園。759雲吞麵上星期四突擊試業,報章港聞一出,身邊所有零食王朋友都話好想試。我試食王當然唔想慢人一步,上星期六開張當日即刻幫襯。

步出長沙灣A3出口,已經見到759雲吞麵門口企滿人,與友人見狀馬上衝去攞籌。麵檔為街鋪,環顧四周也不見其他有冷氣的地方,叫號碼的店員把聲又溫柔,行遠些少也聽不到,唯有焗住在高溫下流汗呆等。等了四十五分鐘終於有位,從未試過為了一碗雲吞麵要等超過十分鐘。店仔好細,人少少預了要搭枱,都幾逼狹。餐牌選擇不多,主要是雲吞、牛雜和粉麵的配搭。三個人點了招牌雲吞麵、五香鮮牛雜麵、燜豬手和牛筋雙拼,還有巴基斯坦咖喱牛腩飯。雲吞算大粒,牛雜都多料到看不見麵底,仲有大量牛筋。咖喱牛腩飯無論咖喱汁、牛腩和白飯都大份,男生都竟然不能清碟。份量令人興奮,食落呢?雲吞麵湯底無大地魚濃烈鮮甜,對於食開正宗雲吞麵的人來說,太淡。全蛋麵可能比較香,但也較膩,而且我還是喜歡鹼水麵的彈牙。雲吞皮很薄,蝦肉夠彈牙,應該不是雪藏貨,但就是不夠鮮香。牛雜湯底也很清,如果喜歡清湯腩的,還可接受。如偏好濃味腩汁的,會失望。牛雜不夠入味,牛筋像擦字膠。一間粉麵檔,辣椒油很重要,不過店中的辣椒油不夠辣也不夠香,幫助不大。巴基斯坦咖喱牛腩最好食,咖喱味道複雜香口,還有些果香,唯一要挑剔,又是不夠辣。食物不是難食,而是淡味,吃得出製作花過心思,起碼雲吞是即叫即包,而且比起不少街坊店足料抵食,環境乾淨服務也不錯。如果自己屋企樓下有間,都會間唔中幫襯。

評分

食物:★★1/2服務:★★★環境:★★★抵食:★★★★

759雲吞麵

地址:長沙灣邨服務設施大樓地下1號鋪電話:3669 6936

試食王

喜歡外出用膳,也喜歡誠實,不相信飲食網站的所謂評分,也怕了所謂食家獲得優待後的意見,情願隱姓埋名,真金白銀,測試飲食雜誌飲食網頁捕捉不到的真實一面。

阿信 屋做 雲吞 麵足 足料 料但 無味
PermaLink: https://articles.zkiz.com/?id=109504

起燕屋做直銷燕農月賺十七萬

1 : GS(14)@2010-09-19 14:49:11

2010-9-16 NM  

香港人燕窩吃得多,有沒有想過自己建燕屋做「業主」?一百萬,在香港還不夠買一個客廳,四十五歲的唯一燕窩老闆呂錦輝(Johnny)選擇在印尼起屋做另類「包租公」,租客不是人,而是一隻隻金絲燕,租金則是一盞盞價值不輸黃金的燕窩。

打工仔半路出家做「燕農」,呂錦輝在銅鑼灣開設樓上鋪,實行生產、批發、零售一條龍,並以「全港最平」做招徠,主攻內地豪客,月賺逾十七萬。

最近,Johnny忙着建「豪宅」。「間屋面積大約有一個半籃球場大,四層樓高,雙牆設計,牆與牆間裝有抽氣扇。室內有泳池、人造瀑布牆,地板裝咗灑水噴頭,將溫度及濕度盡量維持到同山洞一樣。」說的正是Johnny位於印尼的第四間燕屋,建築成本逾二百萬,今年六月動工,預計年尾落成。「一般嘅燕屋只需一百萬,良禽擇木而棲,我希望利用間『豪宅』,將隔籬屋的燕子引過來!呵呵。」Jonny興致勃勃地打開電腦,展示「豪宅」的照片。

這間興建中的「豪宅」與Johnny的另外三間燕屋,均位於印尼北面的棉蘭市,現每月可採約十五公斤的燕窩,剛採下的燕窩原盞(或稱「毛燕」),每公斤市價約萬二至萬四港元,加工後的燕盞,每公斤則售萬五至萬七元,Johnny的燕屋,每個月已有逾二十萬元「落袋」。「燕屋起好後,鎖好門窗就唔使理了,幾乎係零成本,只要每個月用五、六百元請兩個當地人去摘燕窩,就可以印印腳收錢了。」Johnny不諱言道。

人工山洞引燕入甕

燕屋由Johnny和印尼拍檔William各佔一半權益。「佢出地,我出錢,印尼政府規定要係印尼籍,先可以買地起屋。William家族喺棉蘭有幾塊地,嗰度靠海潮濕,本來已有唔少燕屋。」二人原本都幫日本人造纖維公司Kuraray打工,Johnny負責東南亞銷售,不時要前往印尼,William 正是印尼的代理銷售經理,二人因此成為好友,最後更在William提議下,合作起燕屋。

Jonny表示,印尼很多燕屋都靠近民居,原本是住人的,因為燕子進駐,屋主才搬走,變成燕屋。後來越來越多當地人反過來,表面建民居,實則做燕屋。「政府唔俾申請建燕屋,只可用民居名義起。」○三年,Johnny第一次建燕屋,便因為太「求其」而撞板。「我地將William嬤嬤家嘅二樓改裝成燕屋,釘實門窗,喺天花開咗個窗俾燕子出入,再喺牆上噴灑燕子糞便,但因為唔夠暗,屋內溫度太熱,做唔到山洞嘅效果,冇燕子肯飛入來。」於是,二人投資五十萬,興建了第一間真正的燕屋。

「我哋每日黃昏都揸車去William家嘅田地,坐喺田邊度眼光光數燕子,觀察牠們嘅飛行路徑。」Johnny表示,燕子每日早上都會飛去大海、樹林或田地覓食,夜晚才回巢,所以燕屋選址要靠近這些地方。揀好位置後,再以「山洞」為藍圖來建屋。「燕屋要有兩層牆壁,不可用石屎,要用透氣嘅磚,以保持室內潮濕清涼,所以建築費等同起兩間民居。」Jonny說,燕屋用了半年才建成。「平時唔使搵人睇住,但要做好防盜,起碼兩道大鐵門,五、六把鐵鎖,再喺屋外養幾隻狼狗。」

萬事俱備,但燕子什麼時候來,就要聽天由命。「引第一隻燕子入來築巢最難,好彩嘅起緊間屋已經有,但我第一間屋等咗兩年,才有零星燕巢。」邊學邊做,Jonny和拍檔於○六年及○八年,分別投資七十萬起第二、三間燕屋。「第一間的牆身及屋頂都有洞口予燕子出入,令燕子容易飛走,之後再起嘅燕屋,只保留屋頂出口,一年左右已有收成。」Johnny說。

直銷一條龍

早在建燕屋前,Johnny已透過William搭路,向當地燕農買貨回香港,再批發予廣州的海味店。至第一間燕屋落成後,Johnny決定開鋪,兼營零售。打鐵趁熱,Johnny說服住在印尼泗水市的親戚,合資開設加工場。「開加工場要好低調,萬一俾當地人發現是加工燕窩,就好容易受襲擊。」為掩人耳目,加工場就設於親戚家中,擺放數張枱凳,請了十幾個女工便匆匆上馬。

銅鑼灣的店鋪位於崇光百貨後街,樓梯口掛着「全港最平」及「燕窩直銷」的燈箱,走上二樓,沿途貼滿「燕農」字樣。來到門口,鐵閘上裝有紅外線防盜器及閉路電視,按響門鈴,職員碧姐走過來扭開門上兩重密碼鎖。「我呢度擺咗五、六十萬燕窩o架!夜晚租俾個日本朋友喺鋪後面瞓,前鋪後居,好安全。」Johnny 說。三百多呎的店面,牆上木架、兩個雪櫃都放滿燕窩。其中,龍牙、貢品官燕盞每兩分別為七百九十元及九百八十元,最貴的頂級血燕盞每兩九百九十元,比起對面崇光百貨內,東方紅、燕之家專櫃的同名燕盞平均便宜二到三成。為吸引內地遊客,Johnny還首創銷售燕窩原盞。「內地很多假燕碎或漂白嘅燕盞,所以內地客對未挑毛嘅燕盞更有信心,覺得比較難做假嘛。」Johnny說。

另外,Johnny還會在預約的客人上來前,浸好燕窩,等客人來到即燉即試。「大部分客人都係食開燕窩嘅阿太,佢哋試過之後,就知品質高低,比我仲專業,假嘢呃不到佢哋。」Johnny表示,店鋪沒有做宣傳,全靠熟客口碑相傳。這天下午,熟客李太及林太來幫襯,「李太,面色又好咗喔。」Johnny熟落地打招呼,「係啊,冇咁黃。」李太笑說,二人坐下看燕窩,Johnny主動每兩減了逾二百元,兩位阿太即時笑逐顏開,合共買了三萬多元燕窩,離開時不忘拋下一句:「我哋會介紹多啲朋友來買o架啦。」Johnny表示,減價後,毛利由三成半跌至一成,唯有當作宣傳費。

內地借力建品牌

去年,有熟客主動提出向唯一取貨,以特約經銷形式,在廣州開店。Johnny只收萬五元加盟費,並以零售價的七成價錢供貨,毛利只有百分之七至八。「冇肉食」都照做,看似愚蠢,但Johnny表示,零售有八成客是內地人,分店有助加快提升品牌在內地的知名度。

現時,內地已有六間加盟商,分布深圳、廣州、成都等地。公司的燕盞,兩成產自自家燕屋,八成購自其他燕農。泗水加工場女工已增至百多人,每月加工一百公斤燕窩。夏季屬進補淡季,香港公司上月淨賺七萬元,踏入秋冬旺季,營業額更可倍增。

成功背後,做布料採購出身、半路出家賣燕窩的Johnny,其實捱足五年蝕本期。「當時印尼燕屋未有收成,香港直銷又未儲到客,○六年前都仲係一邊打工一邊創業,積蓄再加每個月三萬五元人工,全部擺晒落去。」今年七月,Johnny剛和女友拉埋天窗,他笑稱遲了十年。「沒辦法,創業期根本儲唔到錢。」再過多六個月就升級做爸爸的Johnny認為目前最重要是建立品牌。「希望將燕窩農民這個品牌傳俾我個仔,再傳俾我嘅孫,一直做下去。」

燕屋大解構

選址

燕屋的功能是取代山洞,吸引金絲燕到屋內築巢。燕子會早出晚歸覓食,喜歡吃海裡的微生物及一般昆蟲、果實等,不需要餵飼,因此要選擇靠海、森林或農田的地方建屋。

結構、設備

‧門窗全要密封,營造黑暗環境,只在屋頂開設約一平方米的洞口予燕子出入。

‧雙牆結構可以隔熱,牆間空隙可裝排氣扇,儘量保持室內溫度在23℃。

‧屋內設有水池及灑水系統,保持百分之九十以上的濕度。

‧擺放音響設備,持續播放燕子叫聲,另在牆身噴塗燕子糞便和雞蛋漿,營造燕洞氣氛。

採摘燕窩

‧燕屋平均需要約一年才有收成,成年金絲燕一年築巢約三次,每次燕子築巢後,要再等牠生蛋﹑孵化,以及初生的小金絲燕離巢,才可採摘燕窩,需時約三個半月。

‧緊記不可採摘仍有燕蛋或幼燕的燕窩,不然會趕走燕子。可在燕巢旁邊記下築巢﹑生蛋等日期,方便計算採摘時間。

香港直銷生意

開業資料(03年7月)

租金:$22,500*

水電:$3,000

裝修:$35,000

入貨:$100,000

總投資:$160,500

*兩個月按金,一個月上期

營業資料(10年8月)

營業額:$500,000

租金:$20,000

水電:$3,000

入貨:$400,000

人工:$4,000

雜費:$3,000

盈利:$70,000

一點意見

燕之家燕窩專門店董事總經理,十年前創辦燕之家,售賣燕盞及各款樽裝即食燕窩等,現於中港澳擁有三十家分店。

1 標榜燕農並不足以令客人有信心,建議每月或每季將燕窩送去SGS或GMA等檢測認證公司作品質檢定,費用約七千至八千元,檢測項目包括燕窩成分、含菌量及是否含有其他物質如漂白劑、雙氧水及防腐劑等。

2 「直銷」的成功關鍵在於薄利多銷,自建燕屋及加工場可控制原材料成本,但顧客群太窄,應主動聯絡報紙、雜誌等撰寫鱔稿,增加宣傳,先提高在港知名度,再反攻內地會更有效。

3 價錢算便宜,但為避免遊客有「假貨」懷疑,可申請如正貨正版﹑優質旅遊服務及香港名牌等標誌。
起燕 燕屋 屋做 直銷 燕農 農月 月賺 賺十 十七 七萬
PermaLink: https://articles.zkiz.com/?id=270814

Hazel入屋做醜人

1 : GS(14)@2016-06-01 11:37:02

唐紫睿(Hazel)和張家瑩昨日出席雜誌《瑪利嘉兒》在尖沙嘴舉行的「Best Label Award2015/16頒獎典禮」。
Hazel自參加ViuTV的女子格鬥節目《G-1格鬥會》之後,成功飛甩性感,她說:「轉型入屋企,而家好多唔同類型工作,酬勞係高咗,不過,市道唔好要開拓平台,想發放多啲正能量畀社會。」Hazel又表示不介意扮醜:「打完MMA幾醜都畀人見過,唔會介意。」得悉有線旗下奇妙電視獲發免費電視牌照,Hazel說:「有合作機會想試,唔希望再打格鬥,金腰帶放喺床頭,答應媽咪爹哋唔再打。」採訪:羅慧敏攝影:陳慧安





來源: http://hk.apple.nextmedia.com/entertainment/art/20160601/19635593
Hazel 入屋 屋做 做醜 醜人
PermaLink: https://articles.zkiz.com/?id=301621


ZKIZ Archives @ 2019