兌現箍煲期票林子善找數雞年做老襯
1 :
GS(14)@2017-02-12 15:38:062017-02-02 NM
去年初，林子善同拍拖5年的圈外女友Kary分手，分開方知衰咗，加上被契妹唐詩詠點醒，即刻開turbo求復合。箍煲成功，林子善對女友開定必娶期票！雞年兌現，林子善準備年中註冊結婚。恭喜！恭喜！註冊擺酒分兩年搞
林子善同女友Kary拍拖近六年，雖然去年情海翻波，但復合後更懂得珍惜對方。六年情因為「前途問題」變成壓力而一度分手；但本刊早前見兩人十指緊扣由銅鑼灣行去天后，密不可分。有此一日，全靠唐詩詠當頭棒喝，令林子善出力將女友箍回身邊，並開出結婚期票表誠意。據了解，林子善因為聽從蓮花宮一位師傅指點，要等到二○一八年才可擺喜酒，但為讓女友心安，他決定「偷步」，先註冊簽字。「子善同Kary定咗今年中或者年底註冊，到時會出埠影婚紗相，不過地點仲未定好，但應該離唔開陽光與海灘。擺酒就會聽師傅話，暫定一八年頭。」知情者說。
要性感過新娘
在出街劇集《乘勝狙擊》中飾演做打手的林子善，為影騷肌婚紗相，近期已開始keep住操！「難得佢為咗拍劇操到六嚿腹肌咁型仔，當然要keep住唔好六合一，子善諗好咗喺陽光海灘影輯肌肉婚照，夠破格兼分分鐘性感過老婆。」知情者說。
撰文、攝影、攝錄：娛樂組