ZKIZ Archives


再揭平價菜檔家農陰招狂售「唔生唔熟」雞

2017-08-03 NM

「十蚊三份!任配任搭!」《壹週刊》於今年四月,揭發全港有超過四十間分店的「蔬菜王國」家農,由名叫簡利珍的八十後內地女子「揸fit」,並以低價速銷進佔各區,被同行質疑:「啲菜無可能咁平!」簡利珍獲建華集團董事長、「豬肉大王」文卓培(培哥)撐腰,平價租鋪,發展如日中天!事隔三個月,家農的平價菜繼續來源不明,但同樣經營手法已伸展至:賣雞,並進化為:「四十蚊買農場走地雞一隻,送你十蚊現金券!」本刊放蛇再揭,簡利珍原來要求供應商,不要於包裝上印有「此日期前最佳」(best before)。此舉已觸犯食環署條例,而且,動機成疑。

揸瑪莎拉蒂的簡利珍,於短短數年間,以不同商號開了四十九間家農分店,不過風光背後有不少小本經營的菜檔,因其大劈價而被頂死;而平價菜源,亦相當神秘。其後簡利珍被本刊發現,她與由領展(823)外判街市養肥的「豬肉王」、建華集團創辦人文卓培關係密切。四月受訪時,她更溫馨地稱文卓培為契爺,親口向《壹週刊》承認:「契爺有鋪會照顧我先,租金按金都會平俾我!」得街市霸權優勢的她愈做愈富貴,在Facebook上不時展示巨鑽及名錶。事隔三個月,奇女子於社交網絡上已變得低調,再沒瘋狂炫富;原來她正在兼顧賣雞,心已雄起來。

唔生唔熟反應兩極

就在上月,簡利珍於深水埗開了新店,名為「家農優質果菜×勝哥火鍋專門店」。該鋪光猛企理,同出一轍用大聲公轟炸式宣傳。不同的是,該店除了蔬菜、竟放了一個雪櫃賣雞。而在北河街另一邊的分店,同樣有雞的蹤影。記者到現場買雞,只見雪櫃放了近二十隻雞,體積比一般冰鮮雞更大,每隻大約兩斤重。雞皮呈黃色,跟熟雞沒大分別。記者把雞隻拿上手細看,發現外面的密封袋內仍有空氣,為半脹狀態,亦即沒有真空包裝,摸上手雞身極為冰冷及堅實。職員指,這隻鹽水熟雞來自梅縣,可存放在冰箱長達七至十天,食用前要先解凍,再把雞隻蒸至全熟。「四十蚊一隻重送你十蚊菜,你想要咩都得!」現場不少師奶指食過翻尋味,大讚:「隻雞好食!好過買新鮮雞!」店員親口承認:「得八成熟,算唔生唔熟嘅,因為要喺內地過關所以要先過過(滾)水。回家要翻煮,雞肉仲係鮮嫩。」如果全熟才再加熱,肉質會變得嚡口。四十元有雞有菜,在百物騰貴下確是吸引,因此儲落不少捧場客。但有拖着兒子的年輕夫婦則表示有保留:「價錢算平,試就唔會試啦。我認為雞隻煮熟晒會好啲,半生熟嘅我驚易變壞。」也有激動的老伯直斥:「食垃圾做咩?食垃圾不如返大陸買!」北河街街市內的雞販也聞之色變,大多不欲多評家農定價,而主要賣冰鮮雞的何增記檔主只回應:「佢賣嘅雞同我哋唔同,但賣菜同時賣雞理應係唔合規格。」

蝕本價出售搶佔市場

雖然雞檔檔主認為菜檔賣雞屬違法,但一向精於計算的簡利珍,卻巧妙地避過條例,「攞正牌」地搶雞販生意。根據《食物業規例》(第132X章)規定,任何人士如有意在本港的樓宇內售賣新鮮、冰鮮或冷藏家禽,必須在開業前向發牌當局申領「新鮮糧食店」牌照。記者向食物環境衞生署發言人查詢,對方表示家農出售的雞隻,屬預先包裝的熟肉,「不屬限制以內」,毋須申請牌照。對於記者再三追問,家農職員強調雞隻只有八成熟,要再煮才可進食,那到底「熟肉」的定義是什麼及是否適用在這情況下,食環署發言人只「遊花園」地回應:「有巡查過知道佢哋無違規,但佢哋點聲稱我哋控制唔到。」記者其後走訪超市,不難發現有已調味之全熟雞出售,但定價比家農的貴近兩成;位於荃灣的Taste更有售多達四至五款之熟雞,定價為四十五元至五十元不等,只有數量不多、快將過期的雞隻才會劈價至三十五元,但價錢都不及簡利珍定出的「四十蚊隻雞!回贈十蚊菜!」吸引。香港冰鮮禽畜業商會主席郭時興指,現時冰鮮雞入口已被熟雞取代,後者每日入口量約有三至四萬隻。「香港人工、地方租金貴,熟雞嚟就唔使太多工序,加熱就可以食或賣。加上熟雞可退百分之十三稅,比冰鮮雞退百分之五多。」並指他入口的熟雞,來貨價大約是二十七、八元,還未計其他開支;對於家農以平價賣雞兼送菜的做法表示驚訝,以「真係好抵」作形容。

根據家農雞的包裝,記者到訪裕豐食品(香港)有限公司,工廠位於荃灣。記者以零售商身份,指希望了解雞隻價錢及詳情。迎門的是裕豐老闆李淦基的姐姐,她即席打開單位內雪房,拿出兩隻已雪至結冰的熟雞向記者展示。「我哋平時交俾餐廳嘅熟雞,就會係依家咁得透明袋包裝,但如果你係零售的話,我哋可以按你要求加靚仔啲嘅包裝。」她指交給酒樓或食店的貨多數只用透明袋,因他們會即日處理及加工煮成不同菜式出售;而零售商多會要求裕豐加以具詳細資料的包裝。李小姐一邊講解,一邊把雞隻上磅,每隻也有超過兩斤重,跟家農出售的體積相近。「批發價大約係四十至五十蚊一隻。」這比家農現正出售的價錢貴約十元!李小姐強調此價是一向的批發價。「佢(簡利珍)呢個價位賣,一定蝕,但嗰個人做生意嘅手法唔同。」有員工指簡利珍曾親口承認每日都蝕緊,「但佢要先打開呢條路,打開後可能慢慢加價上去都唔奇。」

欠食用日期非真空包裝

李小姐指與簡利珍的合作,是由長駐內地的弟弟李淦基負責,雞隻會直接從內地運去家農分店,不會經過香港工廠。「八成熟係客要求唔要咁熟,我就做到無咁熟。」她指八成熟雞的好處就是肉質較滑。「八成熟如果係短時間內賣就得,例如日日清嗰種,但如果去貨唔夠快要放一段時間,雪櫃又唔夠凍嘅話,就可能會有血水滲出嚟。」她更指一般大公司或零售商,也會要求有食用日期,但是簡利珍卻非此慣常做法。「係佢要求(唔打)嘅,咁佢唔打起碼唔使下下睇日期做人,過咗期就賣唔到。」根據《食物及藥物(成分組合及標籤)規例》(第132W章)(《規例》)的規定,除非獲得豁免,符合《規例》預先包裝食物定義的食物,須加上適當保質期的可閱標記或標籤,如「此日期前最佳」(best before) 或「此日期或之前食用」(use by)的日期。食環署回覆指,家農所出售之熟雞並不屬規例附表4所載可獲豁免的項目,並指若有店鋪違規出售,最高可被判罰款五萬元及監禁六個月。

三日發臭

而對比超級市場售賣的同類熟雞,均有先進行真空包裝,家農卻缺少此重要步驟,郭時興透露此做法不常見。「在店鋪賣嘅大多數係真空包裝,因未知幾時賣出;交俾食店嘅先無,因為佢哋好快處理。」香港專業教育學院應用科學系講師方麗影博士指,以非真空包裝方式存放未全熟之肉類,確實有風險。「因部分煮熟,係有兩成未煮熟,高溫至包裝過程當中一定有個溫度下降,如果處理得唔太衞生,例如搵牛角扇吹涼雞隻,都係可能會交叉污染。」她指雞隻在部分煮熟部分未煮熟下缺乏真空包裝,這樣的儲存是不太理想。「放喺四度或以下,都可能頂到一陣,但如果放喺二十多度、潮潮濕濕、溫溫熱熱嘅天氣,三、四日就有機會臭。」她提醒,如打開包裝後發現雞隻骨腔內有異味或腐味,則明顯不能食用。

簡利珍在輝哥家

過去四個月,簡利珍加速擴張,多開七間分店,當中四間位於屯門良景街市、太和街市及青衣長發街市,全屬領展旗下、由建華全權管理的爭議場地。位於太和廣場內的太和街市,前身原是領展首個八達通應用街市,建華從領展手中把其接手管理後,隨即在一五年七月進行翻新,重新開業後被指加租超過一倍,變相趕走不少舊商戶。兩年後的今天,家農以新成員姿態在太和大舉插旗,分別開設家農蔬果及家農草藥兩分店,同於街市當眼位置,前者獲得「服務之星——最佳商戶」之一頭銜,十分威水;後者則為前所未有的新商號,明顯走較高檔路線。其除有售一般蔬菜外,更引入紅衣花生、鐵棍淮山及標榜來自韓國的紫番薯,進一步擴闊客路。家農的戰場,依然在地鋪,以平價搶客的方法長做長有。本刊翻查最新分店——「家農優質果菜×勝哥火鍋專門店」的商業登記,發現該店以爵爺火鍋食品作登記法團。該公司為李文偉全資擁有,另有一勝哥火鍋分店開於上水龍豐花園。李文偉的登記住址位於屏山獨立屋,由他於一六年十一月以一千七百多萬買入。記者到訪該址希望查詢其與家農的合作詳情,應門的為一女傭,她隨即引路至獨立屋的內門,只見迎接我們的,竟然是赤腳站在屋內的簡利珍,未見李文偉蹤影;但當記者問到她是否簡小姐本人,她卻支吾以對:「咩事?我唔清楚。」並不願回答有關家農的所有問題。有圖有真相,不單是平價雞或是簡小姐的感情生活,是短福還是長禍仍有待觀察。

建華揸鋪全面睇

建華(街市)管理有限公司,是建華集團控股有限公司全資子公司,其除了承辦領展旗下十個街市成為「管理層」外;建華勢力更進一步顯現在各區,其以不同公司名義持有眾多地鋪,當中不少用以經營自家品牌的豬肉檔,部分則租予家農旗下分店,可見二人關係密切。

建華集團旗下菜肉檔王國

建華集團的「揸fit人」文卓培、文景華及凌偉邦分別身兼多間街市零售品牌的公司董事,以豬肉起家的他們勢力之爪早以延伸至菜檔及凍肉鋪;如今家農貫徹同樣手法打江山,以極街坊商號及名字開設無數分店,市民走進街市以為幫襯小商戶,可能也只是進貢予同一公司。

鮮肉(16個商號)利豐鮮肉、冠華鮮肉、冠一鮮肉、建華農牧、新界佬、領鮮、兩益鮮肉、三有肉枱、順景肉枱、順華、順昌、喜臨門、順得、葵喜肉枱、葵盛肉枱、茂發肉枱

蔬菜及水果(3個商號)建華農牧、新界佬、肥仔記生果店

家農旗下檔口(10個商號)家農果菜、家農蔬菜、家農喜臨門、利豐(茂發)蔬菜、家家富鮮果、家旺蔬菜、家喜蔬菜、小辣椒、天天優質果菜、家農草藥

鮮魚(2個商號)三哥鮮魚、二嫂鮮魚

凍肉(3個商號)牛丸哥哥、魚肉大皇、順景肉食公司

豆品(1個商號)豆腐主義

麵包(2個商號)包點先生、Qun Qun Pan

撰文:黃綺敏攝影、攝錄:財經組協力:李海澄ed_bn@nextdigital.com.hk

再揭 平價 菜檔 檔家 家農 農陰 陰招 招狂 狂售 唔生 生唔 唔熟
PermaLink: https://articles.zkiz.com/?id=256024

馮仁昭四圍超:當劇團係仔女歐錦棠唔生B

1 : GS(14)@2016-05-08 01:44:16

歐錦棠同太太萬斯敏嘅劇道場,呢個月19日會喺上環文娛中心演出《春雨歸來》,日前佢哋喺九龍灣綵排,阿棠同萬斯敏之間默契十足,仲學韓星晒心形手勢。講到呢齣舞台劇,阿棠話:「今次係講30年師生情誼,講人生競賽嗰啲嘢,我母校知道,話會拉大隊支持。」向來不平則鳴嘅阿棠,今次竟然冇刻意加入爭議性聲音,佢話:「而家唔合理又荒唐怪誕嘅事,其實幾百年前都有,所以唔會太着迹去講,反而今次有好多諗頭,加上我又好百厭想加入自己元素。」


■歐錦棠日前喺九龍灣為舞台劇綵排。

信仰改變人生

佢哋兩公婆經歷過離離合合,但係最後都行過難關,一齊生活,阿棠話:「之前同太太分開咗,嗰陣關係唔好,加上我又有抑鬱症,不過有咗宗教信仰後,處事同對人都同以前唔同,內外會自我更新,睇嘢角度同人生嘅意義都唔同咗。」佢仲話:「太太負責把關提點我,當然,我哋都會有爭拗,但係總有一方會妥協。」至於生B,阿棠話:「吓?咁貴,讀埋呢啲咁嘅書,唔好喇!」萬斯敏亦都話:「結婚嗰陣有共識唔生B,加上社會咁樣,如果要生成個計劃都唔一樣,我哋而家當咗劇團係小朋友。」撰文:馮仁昭





來源: http://hk.apple.nextmedia.com/entertainment/art/20160506/19599524
馮仁 仁昭 四圍 劇團 係仔 仔女 女歐 歐錦 錦棠 棠唔 唔生
PermaLink: https://articles.zkiz.com/?id=299767

蒙嘉慧愛自由唔生B

1 : GS(14)@2016-10-10 00:43:54

■蒙嘉慧爆老公鄭伊健曾有十八年沒有搭過巴士。



蒙嘉慧(YoYo)的母親懷着她時已離婚,她自小由外婆湊大,所以YoYo不相信婚姻,但後來決定跟鄭伊健結婚,全因朋友的話:「如果其中一方有事,我哋即使幾親密,法律上都唔可以為對方做任何重要決定,我聽完又覺得好啱。」因幸福變成肥師奶而被傳有喜,YoYo澄清他們沒有生小孩的打算:「我媽媽比較任性,我睇到婆婆成日要擔心佢,就明白養兒女係一世嘅責任,如果生咗個小朋友好似我媽媽咁咪好慘?我鍾意兩個人自由自在多啲。」至於伊健因「奪麵雙琪」每年生日都成傳媒焦點,為避開追訪,他習慣生日待在家中,YoYo說:「有年我同伊健由後門出去,搭巴士去食飯慶祝,成功避開記者,嗰時先知原來伊健十八年冇搭過巴士。」撰文:非非




來源: http://hk.apple.nextmedia.com/entertainment/art/20161008/19794311
蒙嘉 嘉慧 慧愛 自由 唔生
PermaLink: https://articles.zkiz.com/?id=311185

徐子淇封肚唔生B

1 : GS(14)@2016-10-15 12:12:15

■徐子淇昨指早前和老公李家誠被影到接吻魚相,覺得很尷尬。


■徐子淇(右)昨以大使身份出席籌款晚宴。

徐子淇和老公李家誠昨到尖沙嘴出席智行基金會籌款晚宴,身為大使的子淇佩戴英皇珠寶贊助價值逾1,700萬元、超過100卡的鑽飾登場,她說:「半年前籌備晚宴覺得好辛苦,因為香港經濟冇咁好,好難搵贊助,好在自己冇放棄,估計籌到超過500萬。」早前子淇夫婦被讀者影到在美國環球影城變身接吻魚,問是否計劃生第五胎?子淇說:「其實都好尷尬,好多人打嚟笑我哋,聽朋友講啲人喺街影相可以賣到報館,其實你哋影到相可以賣番畀我,我畀多過報館少少。」問會否再生B?她說:「唔生啦,夠啦,希望多啲時間陪佢哋。」採訪:羅慧敏攝影:林德雄




來源: http://hk.apple.nextmedia.com/entertainment/art/20161015/19801080
徐子 子淇 淇封 封肚 肚唔 唔生
PermaLink: https://articles.zkiz.com/?id=312132

【馮仁昭四圍超】昆凌卵巢有事唔生住

1 : GS(14)@2016-11-10 08:02:41

台灣《蘋果日報》





昆凌前日喺台灣活動上自爆患上多囊性卵巢症,造人計劃要擱置。噚日佢喺微博詳細解釋:「其實我是很輕微的,醫生說多運動不要熬夜狀況就會好很多,而且其實已經是好幾個月前的事了。」佢又鼓勵年輕一代女性愛自己,仲話:「子宮、卵巢對我們來說太重要了!直到發生在自己身上才真的去正視這個問題!真的要好好保養好好照顧自己。」撰文:馮仁昭




來源: http://hk.apple.nextmedia.com/entertainment/art/20161110/19828245
馮仁 仁昭 四圍 昆淩 卵巢 有事 唔生 生住
PermaLink: https://articles.zkiz.com/?id=314906

李居明預言唔生仔會有小三胡蓓蔚急操fit造人

1 : GS(14)@2016-12-28 08:12:19

57歲嘅「豹哥」單立文同45歲嘅胡蓓蔚08年結婚,婚後過住二人世界,但原來佢哋對生育問題一直存在分岐,有指豹哥其實恨仔恨到發燒,提議過老婆做人工受孕,但胡蓓蔚就好抗拒落晒閘,曾經為咗呢啲事而起爭執,最後豹哥都乖乖就範。但昨日有周刊報道就話,單太太嘅態度180度轉變,話佢好努力咁操Fit身體準備生B之外,仲向多仔公胡諾言求教生仔心得。咁因乜事胡蓓蔚會突然轉軚想做媽媽呢,原來係因為玄學家李居明,事緣早前單立文到李居明主持嘅電台節目做嘉賓,李居明就批年屆57歲嘅單立文明年雞年有望做老竇,仲講明如果佢兩公婆再唔生,2020年男方身邊會出現第三者,咁恨做老竇嘅豹哥當然就有機會同老婆施壓,據報道嘅知情人士講,話豹哥好想做爸爸,但老婆就唔制,仲講到豹哥恨仔恨到講晦仔說話,話唔通自把自為咩,咁O依家李居明咁講,豹哥就借啲意成日話惟有要「小三」唔要「小朋友」,咁胡蓓蔚就寧可信其有咁努力造人,一向有做開健身同跑步嘅佢,除咗加倍努力外,仲請教多仔公胡諾言,仲約埋佢同陳山聰一齊跑步。知情人士仲話,胡仔老婆陳琪剛生完第三胎,所以胡蓓蔚都好積極向陳琪請教生仔秘方,特別係男人食乜好,睇嚟真係好想幫豹哥生個慈姑椗。




來源: http://hk.apple.nextmedia.com/entertainment/art/20161228/19879243
李居明 預言 唔生 生仔 仔會 會有 有小 小三 三胡 胡蓓 蓓蔚 蔚急 急操 fit 造人
PermaLink: https://articles.zkiz.com/?id=320342

江碧蕙擺酒:唔生㗎啦

1 : GS(14)@2017-03-23 06:27:22

■再婚的江碧蕙昨與法籍老公在香港鄉村俱樂部擺酒。



香港首位華人女騎師江碧蕙昨日與網球教練Jerome於香港鄉村俱樂部結婚擺酒,筵開10席。穿上白色性感婚紗的江碧蕙,昨日傍晚與老公接受傳媒訪問,二人應要求錫錫。雖然Jerome是法國人,但二人仍有依中國傳統進行斟茶儀式,江碧蕙說:「佢好聽話,我叫佢做乜就做乜。」江碧蕙指她與前夫所生兩個兒子也有返港出席婚禮,她說:「兩個小朋友都專登返嚟香港,係我最大驚喜,好感恩佢哋接受同分享喜悅。」問婚後是否過二人世界?江碧蕙笑說:「係呀,唔打算生㗎啦!」採訪:卓寶花攝影:陳俊強




來源: http://hk.apple.nextmedia.com/entertainment/art/20170322/19965723
江碧 碧蕙 蕙擺 擺酒 唔生
PermaLink: https://articles.zkiz.com/?id=328384

【問爆你阿媽3】假如送你去老人院...會唔會唔生我?

1 : GS(14)@2017-05-18 02:14:19

唔知媽咪Elaine嘅大仔同細女聽到,會唔會呷醋呢?



三對母子母女,媽咪Estella+仔仔Jeff、媽咪Yan+囡囡Sissy,同埋媽咪Elaine+囡囡Sanke互相問問題,究竟仔女有幾了解阿媽,阿媽又有幾清楚自己仔女呢?最終回:關係之最!最愛,仔女問爆阿媽:「最鍾意邊個仔女?」標準答案:「無分,一樣咁錫!」不過,啲仔女唔係咁睇喎......最嬲,阿媽問爆仔女:「最嬲我嘅一次?」話晒兩母女,邊有隔夜仇,講到嬲,Sanke同Sissy都話諗唔到。不過仔仔Jeff就大爆,有次真係堅嬲,連媽咪Estella都反問:「你真係有嬲過我o架?」無錯,事源係雨傘運動......



最啱timing,仔女問爆阿媽:「生我嗰時係咪最啱timing?如果再揀,你想幾歲生我?」媽咪Estella同媽咪Elaine都話計劃好生仔仔Jeff同囡囡Sanke,時間啱啱好,不過媽咪Yan就話:「太早生喇!」竟然仲話,如果再揀唔想生添!咁咪無咗Sissy囉!?最後,阿媽問爆仔女:「將來你會搬出去,定會同我住,定送我去老人院?」你以為一齊住係標準答案?No, No, No......即刻去片!



兩母子邊有隔夜仇,不過有一刻真係嬲...

媽咪Yan竟然話如果有得揀,唔想生!Sissy陰公豬...


深情後記:

Sissy給媽咪的話:「雖然你話想無生過我同哥哥,但係其實你都係40歲唧,都好後生嘅,可能你嘅青春就40幾歲先開始,你嘅人生係調返轉,所以唔使擔心,我會放你出去o架!」
Yan給囡囡的話:「唔需要搵好多錢,諗住要照顧屋企,總之你想做自己鍾意做嘅嘢,咁就無問題o架喇!」
Sanki給媽咪的話:「我聽到你好在乎老人院嘅話題,唔使擔心喎,我哋一定會照顧你!」
Elaine給囡囡的話:「希望你快啲搵到男朋友!」
Jeff給媽咪的話:「媽咪,教咗我同大佬廿幾年,我哋終於成長喇!希望喺豐收期嘅日子,同你,同埋天上嘅Daddy,一齊享受生活!」
Estella給仔仔的話:「努力!繼續展開你美好嘅人生,唔使成日擔心媽咪嘅身體,人生自自然然會老去,我哋享受目前大家美好嘅時光!」祝各位媽咪母親節快樂!記者:鄒倩婷(阿仙)攝影:陳家文、峰剪接:Roy




來源: http://hk.apple.nextmedia.com/entertainment/art/20170515/20021787
問爆 爆你 阿媽 假如 送你 你去 老人院 老人 會唔 唔會 唔生 生我
PermaLink: https://articles.zkiz.com/?id=333387

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019