| ||||||
我是高艷霞，就快七十歲，住喺筲箕灣幾十年。臨尾呢幾年，我要住豪啲！我剛剛用咗六百七十萬元，一筆過現金買入房協新盤樂融軒單位，仲租埋樓下長者屋俾六十幾歲嘅阿妹住。呢個盤推銷「長幼共融」，我就來個「老老共融」。以下係我嘅故事： 買筲箕灣樂融軒前，我專程去長沙灣睇過示範單位，諗過度過才入票，結果抽中第六號籌。記得當日買樓要袋文件，又諗住之後shopping，所以拖住一個喼，仲同記者講笑裡面全部係現金！係呀，銀行唔會借按揭俾我呢啲老人家，所以我諗住一筆過現兜兜俾晒佢。五百呎兩房單位，要六百幾萬，貴係貴啲。不過，唔緊要啦，我要歎埋呢幾年，成世人都未住過全新樓。老人家呢，唔好睇得啲錢咁緊要，買咗個單位歎吓先，死咗咪又係剩番俾啲後生，帶得落棺材咩！我性格係好大家姐嘅，租埋樂融軒樓下單位俾六十幾歲嘅阿妹，租金一萬二千元，咁就可以互相照應。阿妹都話：「我死都黐住你呀，家姐。」妹夫已過身，有個仔，但成日出埠照顧唔到佢，咁我照顧啦！樂融軒啲老人屋唔使交管理費，只要我樓上層樓未賣，就每兩年自動續租，租金有可能會加，但唔愁佢突然趕你走。房協想做到「長幼共融」，想啲後生仔買樓，再租埋樓下老人屋俾長輩，方便照顧，但現實邊有咁理想。我改做「老老共融」，阿妹第時嘅長者屋，有視像電話直駁上我屋企，有乜唔妥搭升降機落去就睇到佢，落雨都唔使擔遮，幾方便。 因鋪位致富 我為自己未來日子打算好，後生唔明我哋諗法。你知唔知香港好多大廈入口，都有幾級樓梯？第日我要坐輪椅，邊個幫我搬張輪椅？唔通等啲仔女得閒先帶我出街咩，帶一、兩次都嫌你煩啦。呢啲係好現實嘅問題。有街坊話我：「唏，你都未坐輪椅！」等到坐輪椅先諗就遲啦，而家叫未雨綢繆！由細到大，我都好識為自己同身邊人計劃；五個兄弟姊妹中，我排第二，對上一個大佬。為咗兩個妹同細佬可以讀多啲書，我喺東華三院小學畢業就出來做嘢，幫老豆打理佢間雜貨鋪。我哋幾兄妹關係好好，好多嘢都係我話事。老豆走咗，我接手生意，十年前退休交番俾阿哥。我哋呢輩個個都老啦，免得第時因爭拗，親戚都無得做，今年初，決定賣走老豆剩落間雜貨地鋪，每人分咗幾百萬。喺香港有鋪位就可以致富；老公做傢俬裝修工程，早年又買落間千幾呎地鋪，前鋪後居，三年前亦俾田生地產收埋，於是買間三百幾呎嘅舊樓住吓，樓齡三十幾年，但有天台可以種吓花。成間屋連水喉、電線、傢俬，都係我哋自己搞掂！ 半夜屙尿好麻煩 不過人老咗，住落先發現間房太細，成日半夜起身屙尿，要跨過隔籬個人先落到床，點掂呀！唯有老公瞓出廳。我哋捱咗幾十年，老嚟仲要晚行朝拆，唔使咁淒涼啩，所以我先決定：換樓！不過而家有個難題，樂融軒要一年後先交樓，我喺半年內賣唔出而家住緊嗰層舊樓，就當我投資者，要俾五十萬元印花稅。（編按：今年二月政府推出調控樓市第三招，任何有物業業權的人士再買樓，就要交雙倍印花稅。）究竟有無酌情權呢？我無向政府攞過錢，咩綜援、資助，乜都無攞過o架。半年真係太趕，賣樓唔係賣棵菜囉。我亦唔靠啲後生，你哋一個早餐都幾十蚊，我等麵包鋪十二點後減價先買，仲可以食足四日。我唯一貪靚啲，靚衫要喺馬莎買；又鍾意同啲仔女出門旅遊，佢哋搵好晒旅行社，都係由我俾錢，大家開心，對錢唔好咁執着。留番啲錢俾後生？唔係話唔留呀，係我要享受咗先嘛！你諗吓老嚟瞓廳，好凍o架！ | ||||||