ZKIZ Archives


中環人語 朱太 派錢 位位一百 宗菁華

2013-10-24  NM

朱太派錢 位位一百

眾所周知,金利豐朱太李月華,細細個就喺鴨脷洲長大,對呢個島仔感情特別深。每年佢都會返嚟呢度搞幾百圍盆菜宴,請成二千個老人家食飯,回饋一班睇住佢大嘅老街坊。上星期六,已經係第十一年,佢阿爸李樹福、母親大人、老公,同埋响先施表行( 444)揸旗嘅囝囝朱俊浩( Kingston),都有出席。

 


朱太每年都派利是俾人瑞級長者。(嚴寶權攝) 

朱太大搞先施表行,當晚梗係請埋旗下 Franck Muller嘅代言人「 Cool魔」張智霖做嘉賓,仲有盧海鵬、蓋鳴暉等等,氣氛好澎湃。朱太仲周圍派利是,小宗目及到封封紅衫魚,肉眼見佢自己派咗二、三百封。不單朱太,佢老公又派、阿仔又派、李樹福夫婦亦派,氹得一班長者笑到見牙唔見眼。以朱太嘅財力,呢鋪實在小兒科。之所以,呢個盆菜宴好受歡迎,以往擺一百九十圍,今年要加碼到二百一十三圍。
而家嘅朱太一身珠光寶氣,當年都捱過,佢同小宗講,阿爸李樹福做漁船生意,嗰時未有大橋連接鴨脷洲同香港仔,每日都要坐街渡返學。之後到澳門發展,環境好咗,不過,佢哋依然無忘記鴨脷洲,佢媽媽仲住喺區內鴻福閣,經常同班街坊打牌添!

陸捌九冇運行


689由高位滑落,跌到就嚟貼地,大家俾多些少耐性啦! 

長盈( 689)由○七年八月三個三之歷史高位滑落,跌到依家嘅兩毫子,可謂幾乎跌到貼地。呢隻股有冇運行,睇怕都無須多講矣。
呢間公司舊年做咗六千零萬生意,但就蝕咗三十四億,其經營狀況如何,可以想像。佢哋做啲乜嘢生意蝕到咁甘?阿根廷油田、印尼銅礦、美國礦山……諸如此類,總之係前景好到你唔信但又冇乜人知道其實際情況嘅項目。一句講晒,即係真人版嘅1 689咁,總之係大把願景啦。

黃老闆「嫁女信」


黃老闆嫁女,請小宗食文華嘅囍餅。 

本週一小宗收到美聯黃老闆嘅「嫁女信」,佢大女、美聯集團副主席黃靜怡終於出閣,開展人生另一豐盛階段。黃老闆話自己一向低調,婚宴以私人宴會形式進行。據知婚禮已於上週六在淺水灣低調舉行,聽聞女婿姓楊叫志遠,洋名 Xavier, fund佬一名,遲吓仲有機會入美聯幫手添,認真恭喜!黃老闆向來以小控大的方式揸美聯集團,如今持股近百分之十三已算揸得多,少過最大股東大摩百分之一;有個熟悉基金運作嘅女婿,以後唔使驚俾外人狙擊啦。

本週 cosplay

本週日置地嘅例牌節目「鼠戰中環」,玩得最投入者,竟然係賭王千金何超鳳。著住條白雪公主裙嘅佢,喺接力賽負責最後一棒,雖然條裙又長又論盡,但 Daisy仍可順暢地跑過遮打道,跳過巨型芝士障礙物再衝線!咁努力,都係三甲不入,至於跑第幾……最緊要好玩囉,哈哈哈哈。

Give me a break 搵稅貸着數

稅單殺埋身,除了痛恨政府之無能,都仲係要交稅嘅!唔少銀行嘅稅貸優惠陸續出籠,仲有平錢可借,達至錢搵錢。小宗嚴選咗幾個:
最平息:非永亨莫屬,佢哋推出「三個月免息免供計劃」,實際年利率僅一點六五釐,仲有「最低利息保證」。假如閣下喺永亨批咗稅貸之後嘅十五日內,成功獲得另一機構嘅更低年利率,永亨會「死跟」。不過,貸款上限為稅額兩倍,而還款期只得十二個月。
借最耐:可以考慮花旗同富邦,前者可借月薪十二倍,後者月薪八倍,還款期最高達四十八個月,即四年,不過要注意年利率平均要五釐,想借來投資,要諗到高回報項目至得囉。
最過癮:莫過於建行亞洲,稅貸上限達二百萬,仲有個好「實際」嘅大抽獎——一手建行股票,名額得十個,有運者得之。一手建行,值成六千蚊㗎!


永亨於稅貸市場一向係「平霸」,其信用財務總經理吳幗欣指目前公司息位已經「好靚」。(陳浩樂攝) 

金牙大狀講嘢 菲律賓零舍好蝦?


十一港難,海事處難辭其咎。作為特區之首, 689有冇代表政府鞠躬道歉?冇!(鄒潔珊攝) 

菲律賓人質事件,三年來香港人都放唔低,因為阿奎諾三世點都唔肯低頭認錯,話佢哋貴國冇咁嘅文化咁講。家屬覺得菲律賓政府欠死難者一個公道,其情可憫。
十一南丫港難,三十九個香港人犧牲。即使死因調查講明海事處有責,處長遲遲唔肯道歉;卒之礙於民情冇得唔道歉啦,亦道得老不情願。但係作為特區之首、海事處之老頂, 689有冇向死難者家屬以至全香港道歉呢?冇!
若然誓要阿奎諾三世道歉,公平起見, 689係咪要為十一港難道歉先?現今大家咬實阿奎諾三世唔放,而任得 689快樂逍遙,唔通人家窮就零舍好蝦?香港人唔係咁白鴿眼嘛?!


中環 人語 朱太 派錢 位位 位一 一百 菁華
PermaLink: https://articles.zkiz.com/?id=79481

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019