ZKIZ Archives


以古鑑今 老狐狸

來源: http://hkcitizensmedia.com/2015/01/15/%E4%BB%A5%E5%8F%A4%E9%91%91%E4%BB%8A/

在老狐貍仲係一隻上學的小狐貍的時代,小狐貍好唔明點解中學要讀歷史,仲要分埋中國歷史同西史,而當年小狐貍上親中史堂就同隔離同學傾計,上西史堂就釣魚,結果在中學年代的我只要有個幾舊屎,可以話係從未合格過。宜家老狐貍當然好明白讀歷史除左可以令你睡眠充足外,無論對語文能力,或者分析能力有莫大的脾益,我好記得老師話讀歷史可以以古鑑今,因為佢話歷史係不斷重演的,當年小狐貍當然唔會聽得入耳,但隨著年紀漸長,現在的老狐貍都會不時拎起D歷史書睇下,除左中國歷史、1929年大蕭條的歷史、公司發展史、或者香港金融市場典故亦都會睇得津津有味。

愈睇得多,老狐貍就會愈認同當年歷史老師的苦口婆心叫小狐貍讀史,因為歷史係會不斷循環的,或者詳細的不盡同,但會發覺萬變不離其宗,最簡單一句:「合久必分,分久必合」,老狐貍唔係講緊李克勤首歌,而係本年最大的財技專案,以前1號仔只做地產,向匯豐收購左#13號仔後化身成綜合企業,而#13號仔因為有D地皮資產又做左地產,經過多年發展後,現在又回復番一間地產,一間綜合企業了,資產沒有變,但價值就高左好多。

另一個個案,老狐貍就係從當年炒鬱金香的呢段歷史度走出黎,當年的鬱金香頭被炒到要成條村人夾錢都要買一個去炒既時候,呢個概念已經去到尾聲了。 而在1997年,老狐貍都曾經聯同幾個朋友夾錢買一個單位去投資,結果……….都買唔到,同時又有什麼手套黨、飲筒黨去幫人排隊,轉下手賣個籌就收幾十萬時,最終當年香港樓市係點?就係老狐貍恨恨被樓市KO了,我亦相信好多人都記憶猶新,老狐貍在該次重創後都要幾年至可以復元,幸好都被樓市復元得早,而現在RISK ADVERSE程度之高,連狐貍太太都話我份人保守,買樓只可接受自己供3成,甚至平常只用CASH,唔會點用信用咭。

呢幾日睇新聞,老狐貍又見到排隊買居屋的人龍,甚至有人話遲左交表唔知點同女朋友解釋雲雲,更有一個受訪青年話靠打工、又唔識投資呢世都買唔到樓了,如果今次抽到,就會問曬家人親友供錢交首期咁話,即時令老狐貍出了一個警惕。老狐貍同意現在的樓價係貴的,亦有D超越左一般打工仔的購買力,但大家應該清醒一下,買樓從來都應該係有能力的人才去買,不應以超越自己能力去做,就算買得到,都要供得起至得,尤其呢批人供樓都至少要經過一個ECONOMIC CYCLE,亂咁黎過幾年加息就未必頂得住。

另外,老狐貍記得幾年前政府曾經都推出過一D貨尾單位,當年都無乜人去抽,到現在好多人就係度揼曬心口。其實情況就好似係熊市時跪求你都無人買股,去到牛市第三期,D散戶借曬錢都要抽到D新股一樣,尤其係現在排隊買居屋的一眾向來都係樓市中購買能力最低的一群,現在連佢地都開始失去耐性,老狐貍就開始有D擔心了。

老狐貍並唔係用什麼供求去預測樓市未來升定跌,又或者估計樓市是否到頂,但「大市要你滅亡,必先令你瘋狂」呢句名言係小弟堅信的,只希望大家真的考慮是否有強烈的剛性需要,和有足夠能力承擔未來供款上升才入市吧。

今次有少少踩過界,請大家不要介意。

如大家有興趣,歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍

以古 古鑑 鑑今 老狐 狐貍
PermaLink: https://articles.zkiz.com/?id=127790


ZKIZ Archives @ 2019