智取大市：績優成強勢主題
1 :
GS(14)@2017-07-01 09:32:57納指以至Facebook、Google母公司Alphabet等等股份，都出現14日RSI三頂背馳情況，正常係睇淡訊號，不過要留意應用喺納指以至美國科技股之中，RSI訊號往績唔算準繩，嚟緊會大跌還是一跌就有資金撈底回升，單睇圖表確實找不出端倪。香港科網股喺冇乜壞消息之下，跟隨美國科技股調整，不幸地揀咗累積升幅最大、之前跌都冇跌過嘅比亞迪電子（285）開刀，其他都有一定跌幅。恒指未有方向之下，無論揸科網股以至其他股份，確實有膽博膽成份，要判斷的話，可研究港股係咪高到要進入派發期甚至大跌市？抑或踏入7月、8月仲有因素留得住投資者，令佢哋覺得值得再坐一會甚至炒多一轉？短線嚟講，七‧一維穩因素，有習近平來港。中線嘅話，踏入8月份將進入業績期，績優股買少見少，相信基金惜貨多過掟貨，有可能為騰訊（700）、舜宇（2382）呢啲坐定粒六高速增長嘅股份帶嚟支持。最重要因素，雖然美國科技股以至騰訊、舜宇估值高，但相關股份被投資者不停買上嘅習慣，不見得受到重大不利消息影響，亦未見超買至投資者情緒物極必反嘅情況，暫時可預計，強勢會持續。未來一兩個月，都以績優股優先，但低吸好過高追。煤炭股都係不錯選擇，煤價高企，執行能力較好嘅神華（1088）半年業績理應有唔錯增長，配以預測2017年市盈率10.3倍，估值唔高，有大漲小回嘅本錢，兗煤（1171）中線股價冇神華咁強，但屬於high beta煤炭股，中期業績亦唔會失禮，相信有追落後條件。至於商品股如江銅（358）、中鋁（2600）調整亦已完結，應該會向好。晉佳
http://fb.com/advanceguy1
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170629/20072385
智取大市：新大媽如何鍊成
1 :
GS(14)@2017-07-05 03:48:13大陸資金改變港股玩法，已經唔係一朝一夕嘅事，而港股近期變遷，亦係內地投資者演變嘅縮影。大陸人無論做生意定炒股，搶佔市場最緊要快。長汽（2333）挾淡倉，等多日都唔得，係都要一日挾足兩成幾；滙控（005）一日就升超過6%，粗暴式炒上快上快落。如果他朝內地股民開始識欣賞香港二三線股，一百幾十億市值股份，出咗一份令人刮目相看嘅業績，隨時可以一日升你三四五成，唔畀機會你等回吐先買，一日過反映任何利好消息甚至Overshoot埋，就係今日開始以至未來嘅玩法，話唔定今個暑假就開始，值得留意。細價股災，以至甚麼不能買的港股，加上沽空機構，逼使內地股民盡快辨別股票真與假、好與壞，加上大時代掀起格隆匯、雪球長篇大論去講基本因素乜乜乜嘅潮流，絕對相比港股大時代之前，係一大進步。假如內地股民冇咁易呃，嚟香港上市嘅造假、垃圾股自自然然會減少。內地股民質素、知識提升，港股市場質素先會同步改善，加上監管機構從緊，由呢一刻開始，相信港股市場都逐步重拾正軌，平均質素慢慢由谷底爬上嚟，長遠會向好嘅方面走。晉佳
http://www.fb.com/advanceguy1本欄逢周一、三、五刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170703/20076860
智取大市：啤殼界的生還者
1 :
GS(14)@2017-07-06 23:43:53騰訊（700）絕地反擊，港股跟住倒升，短期內大市氣氛會跟隨騰訊起落。如果騰訊chok住升、匯控（005）穩升，恒指頂得住，就可保持樂觀，炒風唔會停。細價股「粉塵大爆炸」後，連啤殼活動都暫停，幾隻細價新股上市取消。要啤出嚟嘅殼，演變成有盈利、有增長、有派息嘅公司，真係少之又少。唐宮中國（1181）喺2011年4月上市勁多人抽，可謂啤殼界嘅始祖，上市初期靠Pepper Lunch特許經營呢個靠唔住嘅賣點作招徠，去到6年後嘅今日，靠嘅係自己品牌餐廳，總算搵到增長方程式。舊年唐宮嘅餐廳數目由55家減至48家，其中Pepper Lunch摺埋7間，至於做得唔錯嘅唐宮小聚，由2間增加到5間，其中兩間喺香港。有去過香港嘅唐宮小聚或許知，呢間嘢生意唔錯，從裝修格調同菜式睇得出絕非Hea做，擴充中嘅唐宮小聚品牌做得出色，會帶動唐宮繼續增長。雖然減少餐廳數目，但舊年收入升23.9%，純利勁升107%，至1.01億人仔，市盈率12.8倍；全年派息27仙，唔計特別息，都派21仙，相當於股息率6厘，連續兩年派息比率約八成。唐宮早兩日發盈喜，話今年上半年純利將大幅上升，原因係半年收入增長、業務整合加上受惠增值稅改革。去到今年，市盈率降至單位數，兼係高息股，係少見由啤殼變成嘅勵志故事。晉佳
http://fb.com/advanceguy1
來源:
http://hk.apple.nextmedia.com/financeestate/art/20170706/20080210
智取大市：留一注死跟大媽
1 :
GS(14)@2017-07-07 02:39:24《人民網》連環發文狙擊《王者榮耀》，講到明要有更多監管，對騰訊（700）手遊業務自然出現一大打擊，監管一日唔出都仲係驚，情況猶如瑞聲科技（2018）被葛咸城狙擊一幕。雖然騰訊肯定可以克服今次小難關，但都要班基金經理大大們捱得過呢關唔減持先得，個個都諗住食糊保盈利之下，騰訊就有機會未咁快沽完。恒指、騰訊大陰燭下跌，散戶怕，基金經理都怕，不過，仲有大媽不怕。噚日大跌之際，綠城中國（3900）早段升逾8%，喺港股跌逾500點之際，綠城一度要倒跌，然後有本事升番4%收市。跌市途中，大媽只係停手個幾鐘，大市跌定又再掃過綠城，可見大媽嘅信心同意志幾咁強大。無可否認，佢哋係當今港股之中最牛嘅投資者。以大媽呢種強大嘅信心，相信繼恒大（3333）、長汽（2333）、綠城之後，佢哋都會搵到嘢炒，留一注死跟呢班最有實力投資者狗衝無壞，因為佢哋嘅身影會一直存在，而佢哋一出手勢必有大成交、大陽燭，跟！中期業績潮就到，數百億市值嘅績優股，更加啱佢哋嘅胃口，到時機會可能更密集咁出現，值得留意。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170705/20078964
智取大市：恒指沒反映的事
1 :
GS(14)@2017-07-09 03:53:10雖然恒指似轉弱，小時圖一浪低過一浪，仲要掙扎喺保歷加中軸以下，日線圖守唔守得住50天線亦成問題，但港股市場充斥一批無敵樂觀嘅大陸資金，只要指數唔大跌，就日日搵股爆炒，係近年罕見勁牛嘅港股買家。因此，指數似弱，但強勢股為數唔少，破頂、急升股嘅命中率，明顯比過往嘅恒指轉弱市高得多。比亞迪電子（285）股價喺上星期三一度急插逾兩成，由18蚊變14蚊，然後6個交易日由14蚊重返差唔多18蚊。大陸錢絕對係近期最惡、最牛嘅陣營，跟紅頂白，升跌都一步到位嘅玩法，要時刻緊記。只要你信牛市未死，最牛、最有實力嘅投資者囤兵喺邊，就可能係機會所在。長汽（2333）有大摩同格隆滙文章同時唱好，升接近8%收市，睇返格隆滙文章就feel到，喺大陸投資者眼中，長汽有Brand、平，同吉利（175）、中升（881）、正通（1728）升浪一比，股價遠遠落後，實行想當佢turnaround咁炒。只要當今最有實力嘅買家係咁嘅思維，斷估贏面高過輸面。冷門之選可以留意百盛（3368），股價喺1.2元有支持，超低殘資產股近期有市場，不妨趁打橫整固時吸納。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170707/20081282
智取大市：港股真係好到咁？
1 :
GS(14)@2017-07-29 03:38:16市況好嘅程度，有幾個迹象睇得到，先前講咗第一個，就係一隻龍頭股有壞消息，唔會感染至其他同業股份，可見投資者非常惜售；今期講第二迹象，就係炒到?家都仲係炒龍頭、強勢股，非強勢板塊食晒塵。投資者永遠係極盡貪心，絕對唔肯剩係炒爆強勢板塊嘅幾隻龍頭股就罷休，最後無論如何都會經過弱勢板塊「到此一遊」，未去到炒落後股嘅階段，就話你聽未升完。第三個迹象，就係恒指短期圖表貌似直昇機，其實似係旗形多啲。7月初恒指單周直線急升過千點，然後有幾日恒指變咗慢升，大家以為升勢弱咗，其實只係進入整固階段，而整固都仲係升咁解。恒指9日RSI升到83.8，正常要調整，但睇旗形形態就只係開始突破兩日，如果咁都未肯停就真誇張，下一步就係出現RSI頂背馳。資金目前只係集中炒藍籌股同強勢股，暫時未睇到見頂迹象。內房炒到咁瘋狂，恒大（3333）固然癲，但融創（1918）配股三日已經升穿配股前收市價，強勢程度歷來少見，所以唔好睇小呢輪港股升勢，最重要係持有強勢股爆升到七七八八，就要可以先食糊再去另一個板塊，暫時進攻以大藍籌＋強勢股為主。內房之後可望吓汽車股。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170728/20103694
智取大市：當人人話大時代
1 :
GS(14)@2017-08-04 06:35:51港股慢牛之下，大價股爬格仔咁升，散戶正常係大注買大藍籌或者call藍籌，升得咁慢反而令大家心急想賺，唔少人都大注博小贏。噚日輕輕一震，相信有唔少投資者略為減磅，但難談得上係一個大型震倉。要震走更多人，仲要跌得夠低令到一班一直等低吸嘅人去一齊搶股票。大藍籌已升得飽飽滯滯，後市似乎欠主力股份帶頭，係咪跌完一日又繼續直線升？相信難度會增加咗。既然博升市博咗咁耐，不如而家輕倉少少，派返啲福利畀自己，又減低啲風險同心理壓力，亦騰出空間喺業績期捕捉新機會，一舉三得。條街個個都話後市仲有得升，甚至仲有大時代，須知道股市永遠殺人一個措手不及，大家坐定粒六等牛三，都可以係升市無聲無息咁完結。遠嘅唔講，大家仲記得2015年大時代嘅教訓，就係2015年4月尾，恒指原來已見頂，大價股開始冇運行，而去到6月尾、7月頭，大家才猛然發覺進入大跌市，一切已太遲。即使升市未完嘅牌面係高，但龍頭股高位腳軟，點都有預備會調整，甚至要有「頂已見」嘅一點防備。大安旨意死忠重倉博大贏嘅話，當然要硬食埋鑄成大錯嘅風險。晉佳
http://fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170804/20110902
智取大市：跌市揸住乜股？
1 :
GS(14)@2017-09-17 13:28:25港股跌市要留嘅股，係升市或橫行市時股價跟升、跌市又跌唔多嘅強股，又或者非常接近支持位，唔爭在睇多幾格嘅股，內房股同教育股係前者嘅代表。除非港股直線下跌，否則強股有機會且戰且走，等爆上靚價食糊，好過跌市驚住低無限格掟出去。噚日提過嘅合景泰富（1813），點解喺內房股之中，近期股價升勢比較強？喺中期業績發佈會後，有報道講到合景泰富高層「保證」2018年至2020年嘅年增長率30%至40%，及後公司將「保證」二字澄清為「目標」，仲話高層計埋可供銷售貨源達到4,500億人仔，即係股份市值20倍以上！咪話唔誇張。前提係，合景泰富有冇足夠土儲去完成以上「目標」？合景近期吸納土儲速度相當快，6月底只有1,185萬平方米，上月底記者會上，高層提到近期土儲已去到1,570萬平方米，仲有70至80%土儲喺一、二線城市。雖然合景6月底計息長期負債達到445.54億人仔，相對淨資產246.52億人仔，屬於高水平，但內房市道暢旺之下，合景進攻嘅做法，絕對會受投資者歡迎。合景今年上半年每股盈利51分，年度化市盈率7倍唔夠，市賬率唔夠0.9倍。恒大（3333）講緊三千幾億市值，融創（1918）都見千億規模，200億、300億市值嘅進攻型內房股嚟講，除咗雅居樂（3383），255億市值嘅合景就成為新代表之一。由一開始冇乜人理，去到變成中小內房股代表，估值又夠平，就湊合到一個強勢故事。合景年初至今股價升咗1倍鬆啲，剩係追返雅居樂嘅升幅，再打九折，都可以挑戰10蚊了。晉佳
來源:
http://hk.apple.nextmedia.com/financeestate/art/20170907/20145009
智取大市：教育生意放在賭枱上
1 :
GS(14)@2017-09-17 17:33:48未睇得切教育股嘅招股書，就已經再爆上。牌面睇，內地教育股係一個容易理解嘅增長故事，開辦學校，然後收學費、住宿費賺錢。作為一個投資者，大家都讀過吓書，呢盤生意就變得容易理解，就好似香港經營國際學校咁有錢賺。現時股價幻想嘅故事係咪同將來現實一樣咁好景？反正資金已經當係真嘅增長故事去炒，短線市況夠癲之下，有乜嘢做唔出？呢種玩法，係投機者牛市至愛，這就是價值所在。以民生教育（1569）為例，目前喺重慶同內蒙開設4間學院，半年純利增長7.7%，未來透過投資學校，然後增加收生人數，令收入持續增加，暫時增長率較新高教（2001）同睿見（6068）嘅兩至三成半年盈利增長為低，所以民生教育估值都相對低。假設下半年盈利相比上半年增長一成，民生教育、新高教、楓葉教育（1317）、睿見、宇華（6169）嘅預測市盈率分別係20倍、22倍、24倍、33倍同36倍，小弟本來都覺得呢個估值狼狼哋，只不過未去到狼死咁解。至於長線，假如教育行業係真增長，公司管理能力優劣都並非重點，因為當處於一個起飛行業之中，盤生意真係馬騮都識管。回想2007年，中鐵（390）、中鐵建（1186）、中交建（1800）一樣估值貴一貴，業績增長期交唔出功課，到咗行業逆轉時先知道基建三寶係乜嘢斤兩。正如畢菲特名句：「到退潮時才知道誰在裸泳。」至於教育股？係咪個個都裸泳，唔係而家講，都係等退潮先講吧。晉佳
來源:
http://hk.apple.nextmedia.com/financeestate/art/20170914/20151991
智取大市：炒恒大華置方程式
1 :
GS(14)@2017-10-09 02:52:52恒指絕對唔反映港股爆升情況，二三線股即市升唔到半成嘅話，唔好叫強勢股。維持原判，喺美國周三晚宣佈縮表之前，好大機會仲會炒上。即使內房股尾市急回，但人家之前升到癲晒，Lead住咁多，唞吓氣都得啩。如果各位有留意恒大（3333）同華置（127）股價之間嘅關係，或許留意到，資金往往先炒恒大、後炒華置。5月29日同7月27日都係華置向上突破兼成交大增嘅第一日，但恒大同日錄得大陽燭之後即進入整固。如果恒大要回吐嘅話，可以想像一眾內房股都要唞氣。華置連番接力恒大炒落後呢條formula，你唔信往績，都應該信吓大劉啩。晉佳
來源:
http://hk.apple.nextmedia.com/financeestate/art/20170919/20157058
Next Page